Miɨ chi fîchə shəŋ yihi makə ɨ yu kkpə
13
Tsa ya wɨ nə̀ ji, bənɨ bədɔ ba ba wə Jisɔs diɛ tsukɔ bənɨ bə Galili bədɔ wɨ, bə nə̀ gəŋə lə bɔ fə bintɔfiɛ Nyɔ lɨ, Pailɛt faŋ bənɨ bɔ gəŋ ba gbechɛ bɔ, ŋgwembe məmbɔlə tɛshɛ bə mə nyɛ́ŋ yi bɔ nə̀ fɨtɨ bintɔfiɛ su. 2 Jisɔs wokɔ mɛ, yu bi bə bɔ lə, “Bə na gɔmbiɛ lə bənɨ ba nə̀ kkpə ŋgwe yi ya kkpə manɨ ndzɨ bubiə bubɔlə nə̀ yakɨ bu bənɨ bə Galili bədɔ lə maa? 3 Na manɨ kə. Ntə bəŋ lə, ɨ bə kə fichə shəŋ yɛnɨ, ɨ bəŋ bəchi kkpəyɛ tɨ manɨ. 4 Tsutə bənɨ bə yɔɔ ntse yaŋ bə tsɔŋ yi dəŋfɨ nə̀ gbɔɔ ya bɔ bɨŋ Sailɔm ba kkpɨshɛ bɔ? Bə na gɔmbiɛ lə bənɨ ba nə̀ kkpəyɛ manɨ ndzɨ bubiə bubɔlə nə̀ yakɨ bu bənɨ bə Jɛlosalɛm bədɔ lə maa? 5 Na manɨ kə. Ntə bəŋ lə, ɨ bə kə fichə shəŋ yɛnɨ, ɨ bəŋ bəchi kkpəyɛ tɨ manɨ.”Ŋgaŋ tsukɔ kɨtɨ wɨ kɨ nə̀ munchɛhɛ
6 Jisɔs ma ŋgaŋ wudɔ bə bɔ lə, “Tsa yidɔ nə̀ ji, miɨ wudɔ tishɛ kɨtɨ kɨdɔª yu kə. Lə tsa yi wəŋə muntaŋ ba kwətsə, yu ba wəŋə, yu jikə ŋəŋkəhə muntaŋ kɨtɨ ka wɨ. 7 Yu tə bə miɨ wu nə̀ jiŋgəə wa kə wuhu lə, ‘Bô ŋəŋ, na biya bitɛ bɨŋ fɛŋ nɨ na mba muntaŋ wəŋə nə kɨtɨ kɨŋ wɨ, njikə ŋəŋkəhə fiɔŋ kɨ wɨ. Gbê kɨ koso. Kɨ na fuku dɨ kɨlɔlɔ.’ 8 Miɨ wuhu wu nɨŋ wa chi lə, ‘Miɨ wubəŋ, gâ kɨ ma kɨya kɨŋ ntɨŋ, ntsəshɛ kɨ fəchiŋ ba ga biŋfekɛ mɨ, 9 jilə kɨ' muŋ kɨya kɨ na ba kɨŋ wɨ, ɨ fi ndzeŋ, kɨ jikə muŋkɔhɔ, ntə ŋgbe.’”
Jisɔs wəmiəsɨ kpansɨ wudɔ butsu bu fufiɛ
10 Lə kɨ ji butsu budɔ bu fufiɛ, Jisɔs kɨ tɨfiə bənɨ tsɔŋ yi kɨntsɨsɨ yidɔ ntɨŋ. 11 Kpansɨ wudɔ nə̀ ji sɔ, kɨn'yɨntɨ kɨbiə ji yu wɨ, ɨji kɨ na ba kɨ nya miɨ dzeŋ. Kɨ nə̀ fə yu gweŋ biya yɔɔ ntse yaŋ, yasɨ yihi guu, yu tsukə ləmiə wə nyɨlɨlɨ. 12 Lə Jisɔs ŋəŋ kpansɨ wa, Jisɔs bəndɨ yu, yu ba. Jisɔs tə bə yu lə, “Nɛ, wə' wəmiə nə dzeŋ yɔhɔ nyi wɨ.” 13 Nɨ yu tədiə manɨ, yu nambɔ kɨbandə ba bukɔ yu wɨ. Mɨ kɨsɨkɨ, yasɨ yihi chi lɨmə, yu ləŋ wə nyɨlɨlɨ ba kɨ kuntə Nyɔ.
14 Lə fo wu tsɔŋ yi kɨntsɨsɨ ya lə ŋəŋ nɨ Jisɔs wəmiəsɨ kpansɨ wa ɨji butsu bu fufiɛ bɨŋ, fiɔŋ fia tiŋ yu kɨtso. Yu kɨ wɛmiɛ bə bənɨ yu tɨdi lə, “Díɔ yi nɨŋ'ə na ji buse. Bə kɨ ba bə wəmiəsɨ gwɨ́ yɛnɨ ji díɔ ya ntɨŋ. Ɨkɨ miɨ mɔŋɔ ba ba butsu bu fufiɛ.”
15 Baba chi bə yu lə, “Bəŋ bənɨ bə na lɔshə bɛŋ. Ə ba ji butsu bu fufiɛ, miɨ chi nə bəŋ ntɨŋ jikə dzɛɛ naŋ wuhu nə mbaŋ ntɨŋ makə sɔmbwa wuhu ba gəŋ nya yu ŋgɔŋ? 16 Kpansɨ no wu na ji wɛŋ wu Ablaham, ɨji Satan' ga yu buŋfia ntɨŋ biya yɔɔ ntse yaŋ, kɨjilə fi na ndzeŋɛhɛ lə bə́ foso yu nə ŋgə ntɨŋ butsu bu fufiɛ?” 17 Lə Jisɔs chanyɛ manɨ, yaa kwe bənɨ buhu bə nchɛnɛ lə, bənɨ kɨyɛŋ kɨ laŋkɨ ndzɨ biɔŋ bi kɨgəsə kɨ wɨŋə lə bichi bi Jisɔs nə̀ fɨtɨ.
Ŋgaŋ tsukɔ ŋgwe yi fintaŋ fidɔ wɨ
18 Jisɔs jiji ba bi lə “Buŋkuŋ bu Nyɔ lə na ji nɨ la? Fiɔŋ fi naji mfɨkə su na la? 19 Bu na ji nɨ ŋgwe yi fintaŋ fidɔª fi miɨ nə̀ liyɛ yu kə, lə fi məndɨ, fi kɔ ba tsu kɨtɨ, munyinyi mu dimbi bɔ́ kɨ wɛyɛ tsú kɨ wɨ.”
Ŋgaŋ tsukɔ dzé wɨ
20 Jisɔs chi biɛ lə, “Naji nchi mfɨkə buŋkuŋ bu Nyɔ lə bə la? 21 Bu na ji nɨ dzé yi kpansɨ nə̀ fɨkə di bənsɔ bəbəŋ bəbəŋ bətɛ ba funchɛ su, nyishɛ ba ga lɨ, yi fə di wa kundu.”
Fiənsɨ wu n'yiŋkə
22 Jisɔs dza kɨ gɨntɨ Jɛlosalɛm. Nɨ yu nə̀ gɨntɨ, yu kɨ chɛti bituŋ bibəŋ bə bintse ntɨŋ, yu tɨfiəə bənɨ. 23 Miɨ wudɔ bi bə yu lə, “Baba, na kwa bənɨ tsəsɨ bə jiba bɔ fɔfo?” Jisɔs chi bə bɔ lə, 24 “Bə dîɔ dzə́ ntɨŋ chi lə bə bê ji fiənsɨ wu n'yiŋkə wa ntɨŋ. Bə kkə̂ lə bənɨ kɨyɛŋ jiba bɔ kɨ noŋko lə bɔ be, ɨ bɔ jikə keŋkɛ dzə. 25 Tsa ná kwətsə, ɨ chɛ tsɔŋ dza wə ba baŋ kɨgwəŋ fasɨ lɨ, ɨ bə kətə binchi bə boko kɨgwəŋ bə nende lə, ‘Miɨ wubəŋ, gû la kɨgwəŋ kə be.’ Ɨ yu chi bə bəŋ lə, ‘Nna ŋkkəhə dɨ wu bə fɔɔ.’ 26 Ɨ bə tə gbɔ kɨ yakɨ yakɨ bə tɨdi lə, ‘Na bɨ bə kə nə shɨ bə wə, kə diɨ, kə mu. Wə nə gəndəə wə tɨfiə bənɨ bituŋ biaha ntɨŋ.’ 27 Ɨ yu chi chisə lə, ‘Nna ntɨdi bəŋ butədiə lə nna ŋkkəhə dɨ wu bə fɔɔ. Bə dzâ nə mɨ fiəŋ, bəŋ bə na gəndə bɛŋ bə bɨshə biɔŋ.’ 28 Bə jiba bə ŋəŋ Ablaham bə Adze bə Jakɔ ma bənɨ bə shɔŋ yi Nyɔ lə bəchi buŋkuŋ bu Nyɔ lə ntɨŋ, ɨji bə́' baŋ bəŋ binchi, ɨ bə kɨ ji bə dɨ, bə diɨ gəsɨ. 29 Bənɨ ná dza nə dia chi, dze nə dia wu díɔ na boso ba gəŋ fɔ dɨ wu wu na midi ma nəgo bə nəshiŋ wu mbi ba shi kɨdiɨ buŋkuŋ bu Nyɔ lə ntɨŋ. 30 Bə wôkɔ bə wɔ, bənɨ bədɔ bə na ji nəjiŋ fɛŋ, bɔ ná kɨ ji nəfiə, ɨ bədɔ bə na ji nəfiə fɛŋ ná kɨ ji nəjiŋ.”
Jisɔs də gwɨ bə Jɛlosalɛm
31 Lə kɨ ji tsa ya wɨ, Bəfalasi tə bə Jisɔs lə, “Fɔ̂ fiɔhɔ nə sɛŋ wə gəŋ dia wudɔ ndzɨ Ŋkuŋ Hɛlɔd na noŋko lə yu kkpɨsɨ wə.”
32 Jisɔs chi bə bɔ lə, “Bə gə̂ŋ tə bə kɨŋfundɔ ka lə nna mfoshɛ bətsə nə bənɨ wɨ ndɛŋ, ŋ'wəmiəsɨ bənɨ bə gwɨ́ lə, ɨji nɨ njiwa mfɔ kɨ fɨtɨ wɔki, ɨ kɨ ba fɔɔ bwa, ntə ŋkanə nɨŋ yɛmɨ. 33 Bəmanɨ, njiwa ŋgbɔ gbəndɨ wɛŋ wu Jɛlosalɛm ndɛŋ, mfɔ ŋgəndə wɔki gəŋ fɔ bwa. Fi na jimiɛhɛ diəŋ lə bə́ kkpɨsɨ miɨ wu shɔŋ yi Nyɔ dɨ wudɔ wɨ chichi fiəŋkə Jɛlosalɛm.”
34 Lə Jisɔs chanyɛ mɛ, yu də gwɨ lə, “Hɛbɛɛ Jɛlosalɛm! Hɛbɛɛ Jɛlosalɛm! Wə wu na kkpɨshɛ bənɨ bə shɔŋ yi Nyɔ lə, wə tumiɛɛ bənɨ bə Nyɔ na faŋkɨ bɔ wə lɨ bə ta. Na tsá miɛ nɨ mɨ ndiɔɔ lə mbanchɛ beŋ bɔhɔ diəŋ nɨ shə ba yi banchɛ beŋ buhu ba kusə lɨ, wə nɨŋŋ? 35 Bô ŋəŋ, tsɔŋ yɔhɔ ná tsu kɨchə. Ntə bəŋ lə bə tsɔhɔ ŋəŋə mɨ wɨ, gəŋ fɔ tsa yi bə ná kɨ tɨdi lə, ‘Budə na ji bə miɨ wu na ba yɨ wu Baba lə lɨ.’”