Miɨ kə kɨ sakɨ wudɔ
7
“Bə kə kɨ sakɨ bənɨ bədɔ, fə Nyɔ jɛ bəŋ kə sakəhə. 2 Bə kɨ kkɨ lə dzə́ yi bə na sakɨ miɨ wudɔ, na tɨ diəŋ nɨ Nyɔ jiwa ɨ yu sa bəŋ. Fiɔŋ fi miɨ' fɨkə fiɔŋ sɔ ba nya bə miɨ, na tɨ fi fi Nyɔ jiwa ɨ yu fɨkə sɔ ba nya bə miɨ wa. 3 Wə na ba wə kɨ jiŋgə ji shəsɨ yi na ji wəma yəsɨ, bəmanɨ wə jikə ŋəŋkəhə kɨnchimbili kɨ na ji wɔhɔ yəsɨ ntɨŋ ndzɨ la? 4 Naji ɨ wə fə nəŋ tə kɨ tɨdi bə wəma lə, ‘Lə̂ŋ mfoso shəsɨ nə wə yəsɨ,’ bəmanɨ kɨnchimbili ji wɔhɔ yəsɨ ntɨŋ? 5 Wə na ji miɨ wu na lɔshə! Sa foso kɨnchimbili kɨ na ji wɔhɔ yəsɨ ntɨŋ, wə tə keŋkɛ dzə yi ŋəŋə shəsɨ yi na ji yəsɨ wu wəma lə ntɨŋ ŋgbooŋ, ba tə foso lɨ.6 Bə kə̂ dzɛɛ fiɔŋ fi Nyɔ lə ba nya bə bíə. Ɨ bə fə manɨ, ɨ yi fichə ba gbechɛ bəŋ. Bə kə̂ dzɛɛ tɨ gəsɨ yɛnɨ yi buŋkuŋ'ə ba nya bə bifi. Ɨ bə fə manɨ, ɨ bi nyefele bə go.
Bə bî, bə nɔ̂ŋ, bə bɔ̂
7 Bə bî, bə jiba bə keŋkɛ. Bə nɔ̂ŋ, Nyɔ jiwa yu fə ɨ bə bɨkə. Bə bɔ̂ kɨgwəŋ, bə́ jiba bə́ gu bəŋ'ɨ. 8 Bə kkə̂ lə miɨ chi wu na bi, keŋkɛ lɨ, miɨ chi wu noŋko, ŋɨntɨ lɨ, wu boko kɨgwəŋ, bə́ jiba bə́ gu yu lɨ.
9 Na yəŋ nə bəŋ ntɨŋ wu na ji ɨ wene bi blɛ, ɨ yu nya yu ji ta, 10 makə wene bi biɔsu, ɨ yu nya yu ji ye? 11 Ɨ bəŋ bɛŋ bə na ji bənɨ bəbiə na kkɨ nnya yi biɔŋ bi ndzeŋe bə beŋ bɛnɨ, kɨ ji tɨ lə chaa wɛnɨ wu na ji bɔ́ naji ɨ yu jikə nyaha biɔŋ bi ndzeŋe bə bənɨ bə na bishɛ bə yu ya tɨmo manɨ? 12 Fi fɛŋ na ji lə, fiɔŋ yɨla fi bə na se lə bənɨ kɨ fɨtɨ bə bəŋ, kɨ ji fi fi bə kɨ fɨtɨ tɨ bə bɔ, ndzɨ fiŋ na fiɔŋ fichi fi Kɨŋwatɨ kɨ bilaŋ bi Mose lə ma Biŋwatɨ bi bənɨ bə shɔŋ yi Nyɔ lə na tɨfiə.
Fiənsɨ wu mbaŋ'ə wun'yiŋkə bə wuŋgbɔŋkɔ
13 Bə bê mbaŋ ntɨŋ ɨji dia wu fiənsɨ wu n'yiŋkə lə, ndzɨ fiənsɨ wu ŋgbɔŋkɔ wa bə dzə yi ŋkəmə ya na gɨntɨ ji dɨ wu bənɨ jiba ɨ bɔ la bulanə. Bənɨ na beke wa fiənsɨ ntɨŋ kɨyɛŋ. 14 Bə kɨ kkɨ lə fiənsɨ wu mbaŋ'ə wun'yiŋkə bə dzə yintaŋ na yi yi na gɨntɨ fə buwəŋ bu kəkaha ku. Bənɨ bə na chɛti wa ntɨŋ ji tsəsɨ.
Bənɨ bə na yundi lə bɔ na ji bənɨ bə shɔŋ yi Nyɔ lə
15 Bə kɨ dze tsa bə bənɨ bə na yundi lə bɔ na ji bənɨ bə shɔŋ yi Nyɔ lə. Bɔ na ba fə bəŋ ku bɔ yinshi gwɨ wələ bɔ na ji shíŋ, bəmanɨ nəntɨŋ bɔ ji bəfwa bə naji ɨ bɔ kasɨ shíŋ. 16 Bə jiba ɨ bə kkə bɔ ji nə fiə wubɔlə wɨ diəŋ nɨ bə́ ba bə́ kkə kɨtɨ nə muntaŋ mu kɨ lə wɨ. Naji ɨ bə́ wəŋ glɛb nə kɨtɨ kɨ bimbəmbiə lə wɨ kə, makə muntaŋ mu fik ləª nə mbiansɨ wɨ kə. 17 Fi na ji lə, kɨtɨ kɨ ndzeŋe kɨchi ba kɨ muŋ muntaŋ mundzeŋe, kɨtɨ kɨbiə muŋ muntaŋ mumbiə. 18 Kɨtɨ kɨ ndzeŋe naji ɨ kɨ muŋ muntaŋ mumbiə kə. Naji tɨ ɨ kɨtɨ kɨbiə muŋ muntaŋ mundzeŋe kə. 19 Kɨtɨ kɨchi kɨ na munchɛhɛ muntaŋ mundzeŋe, bə́ jiba bə́ gbe kɨ ba tiŋ'ɨ. 20 Bəma, bə jiba bə kkə bənɨ bə biyɔndu lə ba nə fiə wubɔlə wɨ.
21 Na miɨ chi kə wu na bɨndɨ mɨ lə, ‘Baba, Baba’, wu jiwa ɨ yu be buŋkuŋ bu bɔ́ ntɨŋ. Ná beke kwa miɨ wu na fɨtɨ fiɔŋ fi Baba wu ji bɔ́ na se. 22 Ná kɨ ji butsu bu nsa yi nəjiŋ'ə, ɨ bənɨ kɨyɛŋ kɨ bishɛ bə mɨ lə, ‘Baba, Baba, kə nə̀ tɨfiɛhɛ shɔŋ yi Nyɔ bə yɨ wɔhɔ, kə foshɛɛ bətsə nə bənɨ wɨ bə yɨ wɔhɔ, kə fɨtɨ tɨ biɔŋ bi kɨgəsə kɨ wɨŋə lə bə yɨ wɔhɔ?’ 23 Ntə ntə bə bɔ lə, ‘Nna ŋkkəhə bəŋ. Bə dzâ nə fə mɨ ku, bənɨ bə na fɨtɨ bɛŋ bubiə.’
Miɨ wu na wɛyɛ wu bufɨ bə wu buŋfidi
24 Bəma, miɨ chi wu na woko nchanyɛ yɛmɨ nyi, yu fɨtɨ nɨ yi na tɨdi, yu na ji nɨ miɨ wu bufɨ wu nə̀ wɛyɛ tsɔŋ yihi biansɨ bɨŋ. 25 Dzaŋ gbɔ, ŋgɔŋ bukiɛ, fiəfɨ chɛ ba nɨkə tsɔŋ ya, bəmanɨ yi jikə kpodiə, ndzɨ yu nə̀ ma kɨchə ka biansɨ bɨŋ. 26 Bəmanɨ, miɨ wu na woko nchanyɛ yɛmɨ nyi, yu jikə kɨ fɨtɨ nɨ yi na tɨdi, yu na ji nɨ mfidi wu miɨ wu nə̀ wɛyɛ yihi tsɔŋ ji mənshambu bɨŋ. 27 Dzaŋ gbɔ, ŋgɔŋ bukiɛ, fiəfɨ chɛ ba nɨkə tsɔŋ ya, yi kpodiə ba shisəsɨ koso mɛ wuuu.”
Buŋga bu bitɨfiə lə bu Jisɔs na keŋkɛ