Bitɨfiɛ tsukɔ kɨnya wɨ
6
“Tsa yi bə na fɨtɨ biɔŋ bi ndzeŋe, bə kɨ dze tsa. Bə kə kɨ fɨtɨ bənɨ nəfiə lə fə bɔ kɨ ŋɨntɨ. Ɨ bə fə manɨ, ɨ chaa wɛnɨ wu na ji bɔ́ jikə kwəŋkəhə bəŋ. 2 Bəma, tsa yi wə na nya fiɔŋ bə miɨ wu fiəŋkə, wə kə̂ tiŋkɛhɛ kɨmbu nɨ bənɨ bə na lɔshə ba bɔ kɨ fɨtɨ tsɔ́ŋ yi kɨntsɨsɨ lə ntɨŋ ma dzə́ lɨ, fə bənɨ kɨ sɛnti bɔ. Ntə bəŋ yɛyi lə, bɔ' keŋkɛ bikwəntsə bibɔlə. 3 Bəmanɨ, tsa yi wə na nya fiɔŋ bə miɨ wu fiəŋkə, wə kə̂ fəkə lə kɨbandə kɔhɔ kɨ nəməsə kkə fiɔŋ fi kɨ nədiɨ na fɨtɨ. 4 Bəma, ɨ kɨnya kɔhɔ kɨ ji bunyələ, ɨ Chaa wu ba kɨ ŋɨntɨ biɔŋ bi bə́ fɨtɨ bunyələ kwəŋ wə.Bitɨfiɛ tsukɔ kɨntsɨsɨ wɨ
5 Tsa yi bə na tsɨsə, bə kə kɨ fɨtɨ diəŋ nɨ bənɨ bə na lɔshə ba bɔ kɨ fɨtɨ. Bɔ laŋkɨ nləŋ tsɔ́ŋ yi kɨntsɨsɨ lə ntɨŋ, ma bə shí yi dzə́ tɛshɛ ba tə kɨ tsɨsə, fə bənɨ kɨ ŋɨntɨ bɔ wɨ. Ntə bəŋ yɛyi lə bɔ' keŋkɛ bikwəntsə bibɔlə. 6 Bəmanɨ tsa yi wə na tsɨsə, wə be tsɔŋ yi nəntɨŋ ba fasɨ kɨgwəŋ tə kɨ tsɨsə bə Chaa wu ji bunyələ. Ɨ Chaa wu ba kɨ ŋɨntɨ biɔŋ bi bə́ fɨtɨ bunyələ kwəŋ wə. 7 Tsa yi bə na tsɨsə, bə kə kɨ bu dzəmbiə nɨ bənɨ bə na kkəhə Nyɔ ba bɔ kɨ fɨtɨ. Bɔ ba bɔ kɨ fɨtɨ manɨ bɔ gɔmbiɛ lə bə́ jiba ɨ bə́ wɔ kɨntsɨsɨ kɨbɔlə ndzɨ díɛ yi kɨyɛŋ'ə yi bɔ na chanyɛ. 8 Bə kə kɨ ji diəŋ nɨ bɔ. Bə kɨ kkɨ lə fə bə kɨ bi naji Chaa wɛnɨ kkɨ fiɔŋ fi bə na se. 9 Chinchi bə naji lə bə kɨ tsɨsə:
‘Taa waha wu ji bɔ́,
bənɨ kɨ kuntə yɨ wɔhɔ,
10 buŋkuŋ bwɔhɔ bâ,
fiɔŋ fi wə na se, fi kɨ ji sɛŋ koso diəŋ nɨ fi na ji bɔ́.
11 Nyâ bɨ bidiəŋ bi ndɛŋ'ə.
12 Gûfiɛ məmbiə maha
nɨ kə na gufiɛ məmbiə mə bənɨ bədɔ na fɨtɨ bə bɨ.
13 Wə kə̂ tɔkaŋ lə kə be mfɔ ntɨŋ.
Fôso bɨ nə miɨ wubiə wa kaŋ.’ª [Buŋkuŋ na bwɔhɔ, buŋga ji bwɔhɔ, bubəŋ ji bwɔhɔ tsá chi ŋka sɨŋ. Fi kɨ ji ma.]ª
14 Bə kɨ kkɨ lə ɨ bə na gufiɛ məmbiə mə bənɨ bədɔ na fɨtɨ bə bəŋ, ɨ Chaa wɛnɨ wu na ji bɔ́ kɨ gufiə mɛnɨ tɨ. 15 Bəmanɨ, ɨ bə na gufiɛhɛ məmbiə mə bənɨ bədɔ na fɨtɨ bə bəŋ, ɨ Chaa wɛnɨ jikə gufiə mɛnɨ tɨ.
Bitɨfiɛ tsukɔ nchinə yi bidiəŋ wɨ
16 Tsa yi bə na chinə bidiəŋ, bə kə kɨ dzudi gwɨ nɨ bənɨ bə na lɔshə ba bɔ kɨ fɨtɨ. Bɔ ba bɔ yashənɨ mənshi məmbɔlə tsa ya wɨ, fə bənɨ kɨ ŋɨntɨ lə bɔ chinə ba bidiəŋ. Ntə bəŋ yɛyi lə bɔ' keŋkɛ bikwəntsə bibɔlə. 17 Bəmanɨ, tsa yi wə na chinə bidiəŋ, wə wwɔ bushi bwɔhɔ ba sha yu yɔhɔ, 18 fə kɨ jikə jimiɛ bənɨ bə kɨ ŋɨntɨ lə wə chinə wa bidiəŋ, ɨ kɨ ŋɨntɨ ji Chaa wu na ji bunyələ. Ɨ Chaa wu ba kɨ ŋɨntɨ biɔŋ bi bənɨ fɨtɨ bunyələ kwəŋ wə.
Bitɨfiɛ tsukɔ biɔŋ bi shaŋŋ'ə wɨ
(Luka 12:33, 34)
19 Bə kə kɨ galɨ biɔŋ biɛnɨ bi shaŋŋ'ə sɛŋ koso dɨ wu naji ɨ kɨfiɛnɛ diə, naji tɨ ɨ lə kwe bi, bəwuu naji ɨ bɔ buŋ ba be yə lɨ. 20 Bə kɨ galɨ biɔŋ biɛnɨ bi shaŋŋ'ə ji kɨtuŋ kɨ bɔ́ ntɨŋ, dɨ wu kɨfiɛnɛ naji ɨ kɨ jikə diəhə, lə naji ɨ wu kwe kə, bəwuu naji ɨ bɔ buŋ ba be yə lɨ kə. 21 Bə kkə̂ lə dɨ wu miɨ' galə fiɔŋ fihi fi shaŋŋ'ə na mɨ wu shəŋ yihi jiya yi kɨ ji.
Kɨbɨlə kɨ gwɨ yi miɨ lə
22 Yəsɨ yi miɨ lə na kɨbɨlə kɨ gwɨ yihi lə. Jilə yəsɨ yɔhɔ na tsalə lɨ, ɨ gwɨ yɔhɔ chi yi bə kɨŋgbooŋ. 23 Bəmanɨ, ɨ yəsɨ yɔhɔ na jimə lɨ, ɨ gwɨ yɔhɔ chi yi bə kɨjuwɔ. Jilə kɨŋgbooŋ kɨ miɨ lə' tsu kɨjuwɔ, ɨ kɨjuwɔ ka kɨ bɨfi nəŋ?
Naji ɨ wə nɨŋ bənɨ bəfɛ lɨ kə
24 Naji ɨ miɨ kɨ nɨntɨ bənɨ bəbəŋ'ɨ bəfɛ kə. Ɨ yu dze kɨ nɨntɨ manɨ, ɨ yu kɨ lo bə wudɔ, yu laŋkɨ wudɔ, makə ɨ yu kɨ woko bə wudɔ buni, yu dze wudɔ wa koso. Naji ɨ bə kɨ nɨntɨ Nyɔ lɨ bə nɨntɨ tɨ kpə lɨ kə.
25 Bəma, ŋkɨ ntɨdi bə bəŋ lə bə kə kɨ funsə gwɨ tsukɔ kɨjimiɛ kɛnɨ wɨ lə fa bə jiba bə diə la, makə bə mu la lə, makə tsukɔ gwɨ yɛnɨ wɨ lə bə jiba bə dɔŋ la lə. Ntɨlə Kɨn'yɨntɨ kɨ miɨ lə na yakɨ bidiəŋ, gwɨ yi miɨ yakɨ tɨ bindzu? 26 Bə ŋə̂ŋ nɨ munyinyi mu dimbi bɔ́ na ji. Mu tishɛhɛ makə mbanchɛ yi bidiəŋ ba ga gá ntɨŋ. Bəmanɨ, Chaa wɛnɨ wu na ji bɔ́ na bu chɨyɛ mu. Bə na yakəhə munyinyi? 27 Na yəŋ nə bəŋ ntɨŋ wu na funsə gwɨ, wu naji ɨ yu yinə kwa tsa yintse kɨjimiɛ kɨhɨ wɨ? 28 Bə na funsə gwɨ ndzɨ bindzu ndzɨ la? Bə bô tɨ bə ŋəŋ nɨ bəflawa ba bɔ kɨ ko ji bɔ ji. Bəflawa nɨntəhə makə bɔ koto bindzu gwɨ yibɔ lɨ. 29 Ntə bəŋ lə ma Ŋkuŋ Sɔlɔmon bə bubəŋ buchi bu yu nə̀ keŋkɛ, yu nə̀ ba yu deŋ gwɨ, bəmanɨ yu jikə fɔkɔ flawa wudɔ. 30 Jilə Nyɔ na dente wɔŋ wu kpa mɛ, wɔŋ wu na ko ndɛŋ, wɔki bə́ tiŋ bə boso, kɨjilə naji ɨ yu jikə deŋkɛ bəŋ ya manɨ? Ɔɔɔ bənɨ bə kɨmbɨŋ kɨntse lə! 31 Bəma, bə kə kɨ ndzaŋkɔ bə gɔmbiɛ lə fa bə jiba bə diə la ba mu la, makə bə dɔŋ la gwɨ lə. 32 Biɔŋ biŋ bichi na bi bənɨ bə na kkəhə Nyɔ ba bɔ kɨ galɨ bufɨ bi wɨ. Bə bəŋ, chaa wɛnɨ wu ji bɔ́ na kkɨ lɨ lə bə na se biɔŋ biŋ bichi. 33 Bə sa bə ga bufɨ bwɛnɨ ji buŋkuŋ bu Nyɔ lə wɨ ma biɔŋ bi diəŋ wɨ bi yu na se, yu jiwa yu nya bəŋ biɔŋ biŋ bichi. 34 Fi fɛŋ na ji lə, bə kə kɨ ndzaŋkɔ ndzɨ wɔki. Bə jiba bə fɔ ba ndzaŋkɔ bə ŋgə wu wɔki ji wɔki. Ŋgə wu butsu na kwətsə kwa butsu bwa lɨ.”