Miɨ kə kɨ chanyɛ chichi yu fɨtɨ chichi
12
Lə Jisɔs chanyɛ manɨ, kuta wu bənɨ kɨ tɛshɛ mɨ bəntsuku lɨ bəntsuku lɨ, bɔ yiŋkə. Bədɔ dənchə go yi bədɔ lə. Jisɔs gbɔ kɨ chanyɛ bə beŋ buhu bə nɨŋ'ə yu tɨdi bə bɔ lə, “Bə dzê tsa bə dzé yi Bəfalasi lə yi na ji fiə wubɔlə wu bɔ na chanyɛ chichi, bɔ fɨtɨ chichi. 2 Bə kkə̂ lə fiɔŋ na sɨŋ su fi bə́' baŋə fi ná jɛkə yinshɛ ŋgbooŋ. Fiɔŋ na sɨŋ tɨ su fi bə́' nyələ fi bə́ ná jɛkə kkə. 3 Bə kkə̂ lə fiɔŋ fichi fi bə́' chanyɛ bbutsu, bə́ ná jiba bə́ wɔ fi bbushə. Fiɔŋ fichi fi bə́' fasə tsɔŋ ba kɨ wənə, bə́ ná laŋə fi fuŋ.Miɨ wu bə naji lə bə kɨ lete
4 Nsáŋ yɛŋ, mɨ ŋkɨ ntɨdi bə bəŋ lə bə kə kɨ lete bənɨ bə naji ɨ bɔ kkpɨsɨ kwa ji gwɨ yɛnɨ, ɨji naji ɨ bɔ chi fəə fiɔŋ fidɔ kə. 5 Bə wôkɔ, bə wɔ miɨ wu naji lə bə kɨ lete. Bə kɨ lete ji Nyɔ ndzɨ na yu wu na keŋkɛ buŋga bu kkpɨsə miɨ ba li miɨ wa boso wubəŋ ntɨŋ. Mɨ ŋkɨ nchisə ntədiə bə bəŋ yɛyi lə bə kɨ lete ji yu.
6 Bə na kkəhə lə bə́ na ba bə́ kɨ taŋə munsəsə muntɨŋ munini lɨ muŋfɛŋ kwa? Bəmanɨ, finsəsə fidɔ na sɨŋ fi Nyɔ na gufiɛ kɨ fi lə. 7 Ma yu yɛnɨ yi nəfi, Nyɔ na kkɨ yi miuŋkpaŋ miuŋkpaŋ. Bə kə kɨ lete. Bə na yakɨ munsəsə mu kɨyɛŋ'ə.
Miɨ wu na bɨmi bə miɨ wu na nɨnntɨ Jisɔs
8 Ntə bəŋ lə, ɨ miɨ bɨŋ bənɨ nəfiə lə yu na kkɨ mɨ, tə Wɛŋ wu Miɨ ná bɨmi tɨ miɨ wa bənchinda bə Nyɔ lə nəfiə. 9 Bəmanɨ, ɨ miɨ nɨŋŋ mɨ bənɨ nəfiə, tə nná nɨnntɨ tɨ miɨ wa bənchinda bə Nyɔ lə nəfiə.
10 Fi na ji lə, Nyɔ ná gufiɛ lɨ díɛ yibiə yi miɨ' chanyɛ tsukɔ Wɛŋ wu Miɨ wɨ, bəmanɨ naji ɨ Nyɔ ná shəshə yu gufiɛ díɛ yibiə yi miɨ' chanyɛ tsukɔ Kɨn'yɨntɨ kɨ Ntsaaŋ wɨ kə.
11 Tsa yi bə́ kwɛɛ bəŋ ba gəŋ bə bəŋ tsɔ́ŋ yi kɨntsɨsɨ lə ntɨŋ, makə bənɨ bə sakɨ kɨtuŋ nəfiə, makə bənɨ bə na keŋkɛ buŋga bu saŋə nəfiə, lə bə́ gəŋ sa bəŋ, ɨkɨ fo kɨ boso bəŋ lə bə jiba ɨ bə gəŋ tambo gwɨ ba chanyɛ lə la lə, makə ɨ bə chanyɛ nəŋ lə. 12 Ná kɨ ji tsa ya wɨ, ɨ Kɨn'yɨntɨ kɨ Ntsaaŋ tə bəŋ fiɔŋ fi bə chanyɛ.”
Ŋgaŋ tsukɔ chɛ kpə wu mfidi wɨ
13 Nɨ Jisɔs nə̀ tɨfiə beŋ buhu bə nɨŋ'ə manɨ, miɨ wudɔ chanyɛ nə kuta wu bənɨ wa ntɨŋ lə, “Miɨ wu Bitɨfiə, tə̂ bə ŋgwɨŋ lə yu jɛ̂ bishəŋə bi taa waha nə̀ shə bɨ lɨ, yu nyâ biɛŋ.”
14 Jisɔs bi bə yu lə, “Nyunso, ə ga yəŋ mɨ lə ŋkɨ ŋkɨmbɨ bənsa bɛnɨ, njɛti bishəŋə biɛnɨ?” 15 Lə Jisɔs bi manɨ, yu tə tə bə miɨ chi lə, “Bə kɨ tɨntɨ ŋkɨ buni, bə kə kɨ yɨtɨ yəsɨ bə biɔŋ, ndzɨ kɨjimiɛ kɨ miɨ lə na jimiɛhɛ ndzɨ biɔŋ bi yu na ji bə bi, ma ji miɨ wa keŋkɛ bubəŋ yɨla.”
16 Nɨ yu chanyɛ manɨ, yu ma ŋgaŋ lə, “Chɛ kpə wudɔ nə̀ keŋkɛ kə wuhu, bidiəŋ ndzeŋ sɔ kɨtso. 17 Yu gbɔ kɨ gɔmbiɛ lə yu jiwa ɨ yu fə nəŋ lɛɛ? Lə yu jiwa yu ga bidiəŋ bihi məŋ lɛɛ? 18 Lə yu gɔmbiɛ ma, yu bɨchə lə, ‘Fiŋ na fiɔŋ fi mfəə. Njiwa nshakiɛ bətaba bɛŋŋ ba chi wɛyɛ bəbəŋ ba ga bidiəŋ bə biɔŋ biɛŋ sɔ bichi. 19 Mfə manɨ, ntə ntə bə gwɨ yɛmɨ lə nna nji miɨ wu sa. Nna ŋkeŋkɛ biɔŋ bi njiwa ndiə biya kɨyɛŋ. Naji ŋkɨ mbambi mfunsə gwɨ yɛmɨ kə. Njiwa ŋkɨ ndiɨ kwa, mmu, ŋ'woko buni.’ 20 Lə yu səsə manɨ, Nyɔ bu bəndɨ yu lə, ‘Mfidi wudɔ! Ndɛŋ bbutsu njiwa ndze kɨn'yɨntɨ kɔhɔ. Biɔŋ bi wə' banchɛ biŋ bichi ga lɨ jibia bi kɨ ji bi yəŋ'ə?’”
21 Lə Jisɔs chanyɛ mɛ, yu tə lə, “Na tɨ diəŋ nɨ fi ná kɨ ji bə miɨ wu na banchɛ bubəŋ gwɨ yihi lɨ, yu jikə keŋkɛ bu dia wu Nyɔ lə.”
Bə gâ shəŋ Nyɔ wɨ
22 Jisɔs chi gbɔɔ kɨ chanyɛ bə beŋ buhu bə nɨŋ'ə lə, “Bə kə kɨ funsə gwɨ tsukɔ kɨjimiɛ kɛnɨ wɨ lə fa bə jiba bə diə la lə, makə tsukɔ gwɨ yɛnɨ wɨ lə fa bə jiba bə dɔŋ la lə. 23 Bə kkə̂ lə kɨn'yɨntɨ kɨ miɨ lə na yakɨ bidiəŋ, gwɨ yi miɨ yakɨ bindzu. 24 Bə bô bə ŋəŋ biwɔwɔ, bi na tishɛhɛ, bi na banchɛhɛ bidiəŋ. Bi na sɨŋ bə gá makə bətaba, bəmanɨ Nyɔ chɨyi bi bichi. Bə na kkəhə lə bə na yakɨ munyinyi? 25 Na yəŋ nə bəŋ ntɨŋ wu na funsə gwɨ, wu naji ɨ yu yinə kwa tsa yintse kɨjimiɛ kɨhɨ wɨ? 26 Jilə naji ɨ bə fə tɨmo fiɔŋ fi ntse fiŋ kə, fə la lə bə kɨ boso fo tsukɔ biɔŋ bidɔ wɨ? 27 Bə bô bə ŋəŋ nɨ bəflawa ba bɔ kɨ ko bɔ ji. Bəflawa nɨntəhə makə bɔ koto bindzu gwɨ yibɔ lɨ. Ntə bəŋ lə ma Ŋkuŋ Sɔlɔmon bə bubəŋ buchi bu yu nə̀ keŋkɛ, yu nə̀ ba yu deŋ gwɨ bəmanɨ, yu jikə fɔkɔ flawa wudɔ. 28 Jilə Nyɔ na dente wɔŋ wu kpa mɛ, wɔŋ wu na ko ndɛŋ, wɔki bə́ tiŋ bə boso, kɨjilə naji ɨ yu jikə deŋkɛ bəŋ ya manɨ? Ɔɔɔ bənɨ bə kɨmbɨŋ kɨntse lə!
29 Fi na ji lə bə kə kɨ funsə gwɨ, bə gɔmbiɛɛ lə fa bə jiba bə diə la ba mu la lə, 30 bimbi biɔŋ, ə ba kɨ gɔmbiɛ kwa ji bənɨ bə mbi lə bə na ji Nyɔ kə kkə. Bə kkə̂ lə Chaa wɛnɨ na kkɨ lɨ lə bə na se biɔŋ biŋ bichi. 31 Bə gâ bufɨ bwɛnɨ ji buŋkuŋ bu Nyɔ lə wɨ, yu jiwa yu nya bəŋ biɔŋ biŋ bichi.
32 Mɛfə bə na ji tsəsɨ mɛ, bə kə̂ lekɛhɛ, ndzɨ Chaa wɛnɨ nə chiŋ lə yu nyâ bəŋ buŋkuŋ. 33 Bə tâŋŋə biɔŋ bi bə na keŋkɛ ba jɛ kpə wa bə bənɨ bə fiəŋkə ba kɨ noŋko ji mundolə mu naji ɨ mu jikə shakiɛ. Bə kɨ galɨ biɔŋ biɛnɨ bi shaŋŋ'ə ji Nyɔ ku, dɨ wu naji ɨ bi ka kə, miɨ wu buyi naji yu chɛ mɨ kə, kɨfiɛnɛ naji kɨ diə kə. 34 Bə kkə̂ lə dɨ wu miɨ' galə fiɔŋ fihi fi shaŋŋ'ə, na mɨ wu shəŋ yihi jiya yi kɨ ji.
Bənɨ bə Jisɔs lə kɨ wokɔ yu
35 Bə kânsɨ bitsa biɛnɨ ba bɨlə bibɨlə kɨ wokɔ nɨŋ, 36 diəŋ nɨ beŋ bə nɨŋ'ə bə na wokɔ miɨ wubɔ wubəŋ yu ji kɨgbeyɛ kɨ bibinə lə ntɨŋ. Tsa yi yu ná kwə, ɨ yu bɔ kɨgwəŋ, ɨ bə bu gu yu lɨ, ɨ yu be. 37 Kɨnlaŋ kɨbəŋ ná kɨ ji bə beŋ bə nɨŋ'ə bə miɨ wubɔ wubəŋ ná ba ŋəŋ bɔ ji bɔ wokɔ yu. Ntə bəŋ yɛyi lə yu jiwa yu chɛ kɨndzu kɨ gwɨ, ɨ bɔ jimiɛ fəkoso, ɨ yu ba jɛchɛ bɔ bidiəŋ. 38 Kɨnlaŋ kɨbəŋ ná kɨ ji bə beŋ bə nɨŋ'ə bə yu ná kɨ ba fɔɔ ɨ yu ŋəŋ bɔ ji bɔ wokɔ. Diŋkə yu ná ba bbutsu kɨntɨŋ kɨntɨŋ, makə tsa yi biyɔŋ na tinti. 39 Bə kkə̂ lə, ɨ chɛ tsɔŋ na kkɨ tsa yi miɨ wu buyi jiwa yu ba, ɨ yu kɨ wokɔ. Ɨ yu jikə galə ma lə bə́ buŋ tsɔŋ yihi. 40 Bə naji lə bə kɨ wokɔ tɨ, ndzɨ Wɛŋ wu Miɨ jiwa yu fichə ba ba lɨ tsa yi bə naji kə kkə.”
41 Pita bi bə yu lə, “Baba, wə ma ŋgaŋ no ji bə bɨ maa bə bənɨ bəchi lə?” 42 Baba chi lə, “Wɛŋ wu nɨŋ wu kɨyɛyi, wu na ji bə bufɨ na wu la? Ntɨlə na wa wu miɨ wuhu wubəŋ' galə lə yu kɨ jiŋgə tsɔŋ yihi, tsa kɨ ba kwətsə, yu nya beŋ bidiəŋ bibɔlə? 43 Kɨnlaŋ kɨbəŋ na bə wɛŋ wu nɨŋ wa wu miɨ wuhu wubəŋ ná ba ɨ yu ŋəŋ yu nɨntɨ diəŋ nɨ yu nə̀ bɨmiə lə yu jiwa ɨ yu kɨ nɨntɨ. 44 Ntə bəŋ yɛyi lə miɨ wuhu wubəŋ ná sɛnti yu ba ga ɨ yu kɨ jiŋgə biɔŋ bihi bichi. 45 Bəmanɨ, ɨ wɛŋ wu nɨŋ wa gbɔ kɨ se yihi lə, ‘Naji ɨ miɨ wɛmɨ wubəŋ kəmə bə ŋkwə kə,’ yu gbɔ kɨ kəchə beŋ bə nɨŋ'ə bə nɨnsə bə bə kansɨ, yu diɨ, yu mu mbiŋ mɔ kwete yu, 46 tə miɨ wuhu wubəŋ ná butə waa butsu budɔ bu yu sə gɔmbiɛhɛ bə tsa yi yu' kkəhə wɨ. Yu ná butə manɨ, ɨ yu nya wɛŋ wu nɨŋ wa ŋgə ba faŋ yu ɨ yu gəŋ kɨ ji bə bənɨ bə na tɨdiɛhɛ kɨyɛyi.
47 Wɛŋ wu nɨŋ wu na kkɨ fiɔŋ fi miɨ wuhu wubəŋ na se lə yu kɨ fɨtɨ, yu jikə kɨ fɨtɨ fi, bə́ jiba bə́ shɔ yu muntɨ kɨyɛŋ. 48 Wɛŋ wu nɨŋ wu na kkəhə fiɔŋ fi miɨ wuhu wubəŋ na se lə yu kɨ fɨtɨ, yu fə ji fiɔŋ fi naji lə bə́ shɔ yu muntɨ kɨyɛŋ, bə́ jiba bə́ shɔ yu kwa tsəsɨ. Miɨ wu bə́' nya yu biɔŋ kɨyɛŋ, bə́ jiba ɨ bə́ kɨ se kɨyɛŋ nə yu lɨ. Miɨ wu bə́' galə biɔŋ yu kaŋ kɨyɛŋ na wu bə́ ná kɨ bi kɨyɛŋ nə yu lɨ.”
Jisɔs ba bə kɨnjɛgwɨ
49 Jisɔs chi tədiə bə beŋ buhu bə nɨŋ'ə lə, “Mɨ mba lə mfə ji boso sɛŋ mbi ntɨŋ. Boso wa tə sə gbɔ kɨ doko tɨmo. 50 Nna nji lə mbe ŋgwe yi ŋgə wudɔ ntɨŋ, shəŋ yɛŋ ná dɨ kwa tsa yi nná mbɛɛ yu ntɨŋ. 51 Bə na gɔmbiɛ lə mɨ mba ji bə budə mbi no ntɨŋ? Yɛ! Bə kkə̂ lə mɨ mba ji bə kɨnjɛgwɨ. 52 Dze nə fɛŋ bɨŋ gəŋ fiə, tsɔŋ yi na ji bə bənɨ bətɨŋ, jiya yi jɛ. Bənɨ bətɛ ná jɛti bə bə bəfɛ, ɨ bəfɛ jɛ bə bə bətɛ. 53 Chɛ wɛŋ ná jɛti bə wene wu nɨnsə, ɨ wɛŋ wu nɨnsə jɛ bə tɨɨ. Mə wɛŋ ná kɨ jɛti bə wene wu kansɨ, ɨ wɛŋ wu kansɨ jɛ bə mɛni. Mə nyunso ná kɨ jɛti bə kpansɨ wene, ɨ kpansɨ wɛŋ jɛ bə mə nomo.”
Bənɨ kɨ kkɨ tsa
54 Jisɔs tə bə kuta wu bənɨ lə, “Bə na ba bə ŋəŋ tsa yi kɨku na bɨndɨ nə dia wu diɔ midi, bə kɨ tɨdi lə, ‘Dzaŋ jiya yi ba.’ Yi ba. 55 Tsa yi bə' ŋəŋə tɨ fiəfɨ foŋko ji nəshiŋ, bə tə lə, ‘Kɨshisə jika kɨ kɨ ji.’ Kɨ bu kɨ ji. 56 Bəŋ bənɨ bə na lɔshə bɛŋ, nɨ bə na jiŋgə bɔlu bə sha bə kkɨ nɨ kɨbinchi jika ɨ kɨ kɨ ji, naji ɨ bə jikə kkə tɨ biɔŋ bi Nyɔ na donchɛ tsa nyi wɨ ndzɨ la?
57 Naji ɨ bə jikə gɔmbiɛ fiɔŋ fi diəŋ fi naji lə bə kɨ fɨtɨ? 58 Ɨ miɨ dze wə kɨ gɨntɨ bə wə kansu ntɨŋ, wə diɔnɔ bə nachɛ ə bambi dzə, yu tə kə kpa wə ba gəŋ nya miɨ wu sakɨ bənsa kaŋ, ɨ miɨ wa nya wə bənɨ bə bitsa lə kaŋ, ɨ bə́ fasɨ wə tsɔŋ yi buŋfia ntɨŋ. 59 Ntə wə lə naji ɨ wə fɔ nə nɔ kə, wə bambi kə kanə sɔmbɔ finini fichi fi bə́ na se nə wə lɨ.”