Jisɔs faŋ beŋ buhu bə nɨŋ'ə bə yɔɔ ntse bəfɛ
10
Jisɔs bəndɨ beŋ buhu bə nɨŋ'ə bə yɔɔ ntse bəfɛ, bɔ ba. Yu nya bɔ buŋga bu bɔ kɨ foshɛ bin'yɨntɨ bibiə nə bənɨ wɨ, bɔ wəmiəsɨ gwɨ́ chichi chichi ma dzéŋ chichi chichi. 2 Yiŋ na yɨ́ yi beŋ bə faŋə bə Jisɔs lə bə yɔɔ ntse bəfɛ ba lə: Wu fiəfiə nə̀ Semon wu bə́ nə̀ tsɨsə tɨ lə Pita bə wəmɛni Andulu. Bədɔ ji Jɛm bə Jɔŋ beŋ bə Dzɛbɛdi lə, ma 3 Felip bə Batɔlɔmiu, Tɔmas bə Matiɔ wu nə̀ kwete kɨŋwatɨ, Jɛm wɛŋ wu Alfiyus, Tadiɔs bə 4 Semon wu nə̀ ji kɨntsu kɨ Bədzɛlɔtª lə ntɨŋ bə Judas Ɛskaliɔt wu nə̀ taŋŋə Jisɔs.5 Jisɔs faŋ bənɨ bə yɔɔ ntse bəfɛ bɛŋ, tə bə bɔ lə, “Bə dze kɨ gɨntɨ, bə kə̂ gəŋkə bənɨ wɨ bə na jimiɛhɛ Bəju. Bə kə̂ gəŋkə bituŋ bi Bəsamalita lə ntɨŋ. 6 Bə gə̂ŋ ji fə beŋ Bəisla ku bə na ji nɨ shíŋ yi sə laa. 7 Bə dze kɨ gɨntɨ bə kɨ tɨfiə bɔ bə tɨdi lə, ‘Buŋkuŋ bu bɔ́ bwa gwɨgwɨ.’ 8 Bə kɨ wəmiəsɨ bənɨ bə gwɨ́ lə, bə dzakɔ bənɨ bəŋkkpə bɔ tsu bəwəŋ, bə wəmiəsɨ bənɨ bə binsansa lə, bə foshɛ bətsə nə bənɨ wɨ. Mɨ nnya bəŋ buŋga kɨlɔlɔ. Bə gəŋ ba kɨ chitə bənɨ su kɨlɔlɔ tɨ. 9 Bə dze kɨ gɨntɨ, miɨ kə̂ dzɛɛ kpə findolə ntɨŋ, ma ji wu kɨyɛŋ'ə, ma ji wu tsəsɨ, ma ji wu sɨ nəŋ. 10 Miɨ kə̂ dzɛɛ kɨba. Miɨ kə̂ dzɛɛ bindzu bifɛ makə bikpa bidɔ, makə kɨntɛ. Bə kɨ kkɨ lə ɨ miɨ na nɨntɨ nɨŋ, tə na nə mɨ wu yu naji lə yu kɨ diɨ. 11 Bə gəŋ ba be kɨtuŋ kɨntse ntɨŋ makə kɨbəŋ ntɨŋ, bə chənə miɨ wu na ji lə yu' bɨŋ bəŋ, bə kɨ ji bə yu gəŋ fɔ tsa yi bə kɨ dza nə nɔ. 12 Bə be miɨ wa tsɔŋ, bə tsɨsɨ tsɔŋ ya. 13 Jilə tsɔŋ ya' bɨŋ bəŋ, ɨ budə bwɛnɨ ba tsɔŋ ya ntɨŋ. Jilə yi kə bɨmiə bəŋ, ɨ budə bwɛnɨ tsu bə bəŋ. 14 Ɨ miɨ nɨŋŋ nləkə bəŋ makə ŋ'wɔ fiɔŋ fi bə na chanyɛ, bə fɔ nə tsɔŋ ya ntɨŋ makə nə kɨtuŋ ka ntɨŋ ba kuchɛ bidi bibɔlə nə go yɛnɨ wɨ. 15 Ntə bəŋ yɛyi lə ná kɨ ji butsu bu nsa yi nəjiŋ'ə, ɨ biɔŋ kɨ ji lɨlɨ bə kɨtuŋ kɨ Sɔdɔm bə kɨ Gɔmɔla ya kɨtuŋ ka.
Bəŋgə bə beŋ bə faŋə bə Jisɔs lə
16 Bə wôkɔ bə wɔ, nna mfaŋkɨ bəŋ, bə jiba bə gəŋ kɨ ji nɨ shíŋ bəfwa ntɨŋ. Bəma bə dze kɨ gəndə bə kɨ fɨŋfə nɨ yé, bə ji bə kɨnshiiŋ nɨ muŋkukulu. 17 Bə dze kɨ gəndə, bə kɨ dze tsa tsukɔ bənɨ wɨ. Bə kɨ kkɨ lə bə́ jiba bə́ nya bəŋ bənɨ bə sakɨ bənsa kaŋ. Bɔ jiba bɔ bumbu bəŋ tsɔ́ŋ yibɔlə yi kɨntsɨsɨ lə ntɨŋ. 18 Bɔ jiba bɔ kpa bəŋ ba gəŋ bə bəŋ bənji bə bəŋkuŋ nəfiə ndzɨ mɨ, ɨ bə tə chanyɛ bə bɔ ma bə bənɨ bə na jimiɛhɛ Bəju tsukɔ mɨ wɨ. 19 Tsa yi bɔ nya bəŋ bə bɔ manɨ, bə kə kɨ kpɨshɛ fo lə fa bə jiba bə gəŋ chanyɛ lə la, dzə yi la ntɨŋ lɛɛ, ndzɨ Nyɔ jiwa yu nya bəŋ fiɔŋ fi bə chanyɛ tsa ya bɨŋ. 20 Bə kɨ kkɨ lə na bəŋ bə ná chanyɛ kə. Na Kɨn'yɨntɨ kɨ Chaa wɛnɨ lə kɨ ná chanyɛ bəŋ'ɨ. 21 Miɨ ná kɨ dze wəmɛni, yu nya bə́ kkpɨsɨ, chɛ wɛŋ gəŋ yu dze wene, yu nya bə́ kkpɨsɨ. Beŋ ná kɨ sesɛ gbo bətɨɨ bəbɔlə nəjiŋ, bɔ fɨtɨ bə́ kkpɨshə bɔ. 22 Bənɨ bəchi ná kɨ ti bə bəŋ ndzɨ yɨ wɛŋ. Bəmanɨ miɨ wu ná kansə shəŋ gəŋ tuŋ fəŋgbɨŋ na wu ná fɔɔfo. 23 Tsa yi bənɨ sesɛ gbo bəŋ nəjiŋ kɨtuŋ kɨdɔ ntɨŋ, bə lətə nə nɔ ba gəŋ kɨdɔ ntɨŋ chichi. Ntə bəŋ yɛyi lə, naji ɨ bə gəndə bituŋ bi Isla ntɨŋ bichi kə Wɛŋ wu Miɨ bambi kə baha.
24 Wɛŋ wu kɨŋwatɨ yakəhə miɨ wu' tɨfiə yu, wɛŋ wu nɨŋ yakəhə tɨ miɨ wuhu wubəŋ. 25 Fi na ji diəŋ lə wɛŋ wu kɨŋwatɨ naji ɨ yu kɨ ji nɨ miɨ wu' tɨfiə yu, wɛŋ wu nɨŋ kɨ ji tɨ nɨ miɨ wuhu wubəŋ. Jilə bə́ na tsɨsə chɛ tsɔŋ lə yu na ji Bɛlsibu, ɨ bə́ jikə kɨ tsɨsə beŋ bə sɔ tsɔŋ yɨ́ yi na bɨfi yi yakɨ wa?
26 Bəma bə kə kɨ lete miɨ. Bə kɨ kkɨ lə fiɔŋ na sɨŋ fi na ji bubaŋə fi ná jɛkə fɔkɔ ŋgbooŋ. Fiɔŋ na sɨŋ tɨ fi na ji bunyələ fi bə́ ná jɛɛ fi kə kkə. 27 Fiɔŋ fi nna ntɨdi bə bəŋ bbutsu, bə kɨ tɨdi fi bə bənɨ bbushə. Fi mɨ ŋ'wənə bə bəŋ, bə wunə fi ji fuŋ. 28 Bə kə kɨ lete bənɨ bə naji ɨ bɔ kkpɨsɨ kwa ji gwɨ ɨji naji ɨ bɔ kkpɨsɨ kɨn'yɨntɨ kə. Bə kɨ lete ji Nyɔ wu naji ɨ yu jishi kɨn'yɨntɨ kɨ miɨ lə bə gwɨ yihi boso wubəŋ ntɨŋ. 29 Ntɨlə bə́ na taŋŋə munsəsə muŋfɛŋ finini lɨ kwa? Bəmanɨ, fimo naji fi gbɔ koso kə chaa wɛnɨ mbɨŋ sɨŋ. 30 Bə bəŋ, Nyɔ na kkɨ ma yu chi yi na ji bəŋ fi. 31 Bəma bə kə kɨ lete. Bə na yakɨ munsəsə mu kɨyɛŋ'ə.
32 Ɨ miɨ bɨŋ bənɨ nəfiə lə yu na kkɨ mɨ, tə nná mbɨmi tɨ miɨ wa Taa wu na ji bɔ́ nəfiə. 33 Bəmanɨ ma yəŋ wu na nɨnntɨ mɨ bənɨ nəfiə, nná nɨnntɨ lɨ tɨ yu Taa wu na ji bɔ́ nəfiə.
Jisɔs ba bə kɨnjɛgwɨ
34 Bə kə kɨ gɔmbiɛ lə mɨ mba ji bə budə mbi no ntɨŋ. Fia na fiɔŋ fi mɨ mba bə fi kə. Mɨ mba ji bə dzoŋ. 35 Bə kɨ kkɨ lə mɨ mba lə mfə wɛŋ wu nɨnsə kɨ dio bə tɨɨ, wɛŋ wu kansɨ dio bə mɛni, kpansɨ wɛŋ dio bə mə nomo. 36 Bənɨ bə nchɛnɛ lə bə miɨ lə ná kɨ ji bənɨ bə yu tsɔŋ. 37 Ɨ miɨ na laŋkɨ tɨɨ makə mɛni yu yakɨ mɨ, tə yu kə kwətsə miɨ wu jimiɛ miɨ wɛmɨ. Ɨ miɨ na laŋkɨ wene wu nɨnsə makə wu kansɨ yu yakɨ mɨ, tə yu kə kwətsə tɨ miɨ wu naji ɨ yu kɨ ji miɨ wɛmɨ. 38 Ɨ miɨ kə tɔkɔhɔ kɨhɨ kɨtɨ kɨ ŋ'wa lə kɨ biəlɨ mɨ, tə yu kə kwətsə miɨ wu naji ɨ yu kɨ ji miɨ wɛmɨ. 39 Ɨ miɨ na bətə buwəŋ buhu, ɨ yu lasɨ bu. Bəmanɨ ɨ miɨ na lasə buwəŋ buhu ndzɨ mɨ, ɨ yu keŋkɛ buwəŋ bu kəkaha.
40 Ɨ miɨ ləkə bəŋ, tə yu ləkə ji mɨ. Ɨ miɨ ləkə mɨ, tə yu ləkə ji miɨ wu' faŋə mɨ. 41 Ɨ miɨ ləkə miɨ wu shɔŋ yi Nyɔ ndzɨ yu na kkɨ lə na Nyɔ wu faŋə yu, tə yu jiwa ɨ yu keŋkɛ bikwəntsə bi Nyɔ na kwɨntɨ bənɨ buhu bə shɔŋ'ə su. Ɨ miɨ ləkə miɨ wu diəŋ ndzɨ yu na kkɨ lə miɨ wa na miɨ wu diəŋ, tə yu jiwa ɨ yu keŋkɛ bikwəntsə bi Nyɔ na kwɨntɨ bənɨ bə diəŋ su. 42 Ntə bəŋ yɛyi lə, ɨ miɨ nya kwa tɨmo bwaŋ wu ŋgɔŋ məndə lə bə miɨ miu nə kɨntsu kɨ bənɨ bəntse bəntse lə bɛŋ ntɨŋ ndzɨ yu na kkɨ lə na miɨ wɛmɨ wu nɨŋ, tə naji ɨ miɨ wa fiəŋkə bikwəntsə bihi kə.”