Jisɔs wəmiəsɨ miɨ wu kɨbandə kɨŋkkpə
3
Lə kɨ ji tsa yidɔ wɨ, Jisɔs chi gəŋə ba be tsɔŋ yi kɨntsɨsɨ ntɨŋ. Miɨ wudɔ ji sɔ bə kɨbandə kɨŋkkpə. 2 Bənɨ bədɔ bə nə̀ ji sɔ dɔŋ yəsɨ yu wɨ lə bɔ ŋəŋ lə Jisɔs jiwa yu wəmiəsɨ miɨ butsu bu fufiɛ lə fə bɔ bɨkə dzə yi kweŋɛ yu. 3 Jisɔs tə bə miɨ wu nə̀ ji wa bə kɨbandə kɨŋkkpə lə, “Bâ nɛhɛ nəfiə.” 4 Lə yu ba, Jisɔs bi bə bənɨ ba lə, “Fiɔŋ fi kɨlaŋ' bɨmiə lə miɨ kɨ fɨtɨ butsu bu fufiɛ na fi la? Miɨ kɨ fɨtɨ fiɔŋ fi ndzeŋe maa fibiə lə? Bə ntsu miɨ nə ŋgə ntɨŋ maa bə ŋkkpɨsɨ lə?” Bɔ də mɔɔŋ. 5 Jisɔs jiŋgə bɔ fiədiə lɨ bə bulo ba dzudi gwɨ ndzɨ shəŋ yibɔlə yintaŋ. Yu tə bə miɨ wu kɨbandə kɨŋkkpə wa lə, “Nâmbiɛ kɨbandə kɔhɔ.” Yu nambiɛ kɨ ba bu wəmiə lɨ. 6 Bəfalasi fɔ ba gəŋ tɛshɛ bə kɨntsu kɨ bənɨ bə Ŋkuŋ Hɛlɔd lə, mɨ kɨsɨkɨ bɔ sese nɨ bɔ fəə ba kkpɨsɨ Jisɔs.Kuta wu bənɨ biə Jisɔs
7 Jisɔs bɔ bə beŋ buhu bə nɨŋ'ə baŋgə gwɨ ba gəŋ fə ŋgɔŋ məmbəŋ mə Galili ku. Kuta wu bənɨ kɨ biəlɨ yu nəjiŋ. Bədɔ bənɨ nə̀ fɔ nə sha yi Galili bə yi Judɛya ntɨŋ. 8 Bədɔ bənɨ fɔ nə Jɛlosalɛm, bədɔ nə Idumia, bədɔ nə Kɨnchɛŋ kɨ Jɔdan nəwuŋ, bədɔ nə bidia bi Taya bə bi Sidɔn. Kuta wa nə̀ ba mɛni ndzɨ bɔ nə̀ woko biɔŋ bichi bi yu nə̀ fɨtɨ. 9 Jisɔs jiji ba tə lə beŋ buhu bə nɨŋ'ə nɔŋ kɨkpɔŋkɔ yu lɨ, yu be sɔ ndzɨ kuta wa təkə yiŋkə yu wɨ. 10 Yu nə̀ tə manɨ ndzɨ nə̀ ji yu sə wəmiəsɨ bənɨ kɨyɛŋ, bənɨ bə gwɨ́ lə bambi bɔ meŋɛ lə bɔ bukɔ yu wɨ. 11 Ma tsa yi la yi bənɨ bə nə̀ ji bə bin'yɨntɨ bibiə nə̀ ba bɔ ŋəŋ Jisɔs wɨ, bɔ kɨ gbɔyɛ yu nəfiə bɔ wunə bɔ tɨdi lə, “Wə na ji Wɛŋ wu Nyɔ.” 12 Nɨ bɔ nə̀ dɨ cha, Jisɔs dɨsɨgwɨ ba loso bɔ lə bɔ kə̂ fəkə lə bənɨ kkə yu.
Jisɔs sa bənɨ yɔɔ ntse bəfɛ lə na beŋ buhu bə faŋə
13 Yu dza ba bəndɨ dzo bɨŋ ba dɨ bənɨ bə yu nə̀ se, bɔ ba fə yu ku. 14 Yu sa bənɨ yɔɔ ntse bəfɛ ba tsɨsɨ bɔ lə beŋ buhu bə faŋə,ª fə bɔ kɨ ji bə yu, yu faŋkɨ bɔ, bɔ gəndəə bɔ tɨdi diɛ yi Nyɔ, 15 bɔ keŋkɛ buŋga bu fosɔ bətsə nə bənɨ wɨ.ª 16 Bənɨ bɛŋ nə̀: Semon, wu yu nə̀ nya yɨ wuhu wudɔ lə Pita, 17 Jɛm bə wəmɛni Jɔŋ ɨji nə̀ ji beŋ bə Dzɛbɛdi lə, bə yu nə̀ nya bɔ yɨ lə “Boanɛgɛs” wu ji lə, “Beŋ bə dzaŋ yi wɛŋɛ lə.” 18 Andulu, Felip, Batɔlɔmiu, Matiɔ, Tɔmas, Jɛm wɛŋ wu Alfiyus, Tadiɔs, Semon wu nə̀ ji miɨ wu kɨntsu kɨ Bədzɛlɔtª lə, 19 bə Judas Ɛskaliɔt wu nə̀ gəndə gəndə ba taŋŋə Jisɔs.
Bənɨ kɨ tɨdi lə Bɛlsibu ŋkuŋ wu bətsə wa Jisɔs wɨ
20 Lə Jisɔs dza, yu gəŋ dɨ wu yu nə̀ me wɨ, kuta wu bənɨ chi tɛshɛ mɨ, bɔ bə beŋ buhu bə nɨŋ'ə jikə keŋkɛ tɨmo tsa yi diənə. 21 Lə kɨtsɔŋ kɨhɨ wɔ, bɔ gəŋ lə bɔ gəŋ dze yu, ndzɨ bənɨ nə̀ tɨdi lə yu' gbɔ dza. 22 Bənɨ bə nə̀ tɨfiə bilaŋ bi Nyɔ lə bə nə̀ fɔɔ nə Jɛlosalɛm shi sɔ kɨ tɨdi lə, “Bɛlsibu na ji yu ntɨŋ, yu na foshɛ bətsə mɛ ɨji bə buŋga bu ŋkuŋ wu bətsə wa lə.” 23 Jisɔs dɨ bɔ ba bi bə bɔ ŋgaŋ ntɨŋ lə, “Naji ɨ Satan kɔŋ Satan nə miɨ wɨ nəŋɨlɨ? 24 Ɨ kɨtuŋ jɛ ba kɨ dio kɨ kɨ, ɨ kɨ ləŋ kə. 25 Ɨ tsɔŋ jɛ ba kɨ dio bə gwɨ yihi, ɨ yi ləŋ kə. 26 Bəma, ɨ Satan jɛ bə kɨntsu kɨhɨ kɨ dio bɔ bɔ, ɨ bɔ ləŋ kə, ɨ fi kɨ ji kɨfəŋgbɨŋ kɨhɨ. 27 Bə kɨ kkɨ lə miɨ na sɨŋ wu naji ɨ yu be tsɔŋ yi ntɛgwɨ ntɨŋ ba kondi biɔŋ bihi yɛyi lɨ ba lətə bə bi, fiəŋkə lə yu sə sa ba kansɨ ntɛgwɨ wa fə yu tə kondiɛ bi. 28 Ntə bəŋ yɛyi lə, naji ɨ Nyɔ gufiə biɔŋ bibiə ma díɛ yibiə chi yi bənɨ na chanyɛ. 29 Bəmanɨ, ɨ miɨ chanyɛ diɛ yibiə Kɨn'yɨntɨ kɨ Ntsaaŋ wɨ, tə naji ɨ Nyɔ gufiə yu kə, ndzɨ yu' fə ji bubiə bu kəkaha.” 30 Jisɔs nə̀ chanyɛɛ manɨ ndzɨ bənɨ ba nə̀ tɨdi lə, “Kɨn'yɨntɨ kɨbiə na ji yu wɨ.”
Mə Jisɔs bə bəjimə Jisɔs
31 Mə Jisɔs bə bəjimə Jisɔs ba ba ləŋ binchi ba faŋ miɨ lə yu bəndɨ yu. 32 Nə̀ ji kuta wu bənɨ sə jiŋ ba fiədiɛ bansə yu. Bɔ tə bə yu lə, “Mma bə bəwəma noŋko ba wə sa binchi.” 33 Jisɔs bi lə, “Nɛ bə bəŋgwɨŋ na bəyəŋ?” 34 Lə yu bi manɨ, yu jiŋgə bənɨ bə nə̀ jimiɛ ba fiədiɛ yu, tə lə, “No na nɛ bə bəŋgwɨŋ mɛni. 35 Miɨ chi wu na fɨtɨ fiɔŋ fi Nyɔ na se, na yu wu na ji ŋgwɨŋ wu nɨnsə, wu kansɨ bə nɛ.”