Jisɔs wəmiəsɨ miɨ wu nə̀ kkpə dia mo
2
Lə díɔ chɛ su, Jisɔs fichə ba tsu Kapanaum. Lə bənɨ wɔ lə yu wa tsɔŋ, 2 bɔ ba ba tɛshɛ mɨ kɨyɛŋ, dzə kɨ ji sɨŋ yi naji ɨ miɨ ta gbo mɨ fiəŋ. Yu kɨ tɨfiə bɔ diɛ yi Nyɔ. 3 Bənɨ bədɔ bəna jiji ba kɨ ba bə miɨ wudɔ fə yu ku, bɔ' tɔ yu kɨta ntɨŋ, ɨji yu' kkpə dia mo. 4 Fi ya bɔ bə mbe ba gəŋ bə yu fə Jisɔs ku ndzɨ bənɨ nə̀ yiŋkə kɨtso. Bɔ bəndɨ ba gu ji fuŋ. Nɨ bɔ guyɛ manɨ, bɔ shisəsɨ miɨ wa kɨta ka ntɨŋ. 5 Lə Jisɔs ŋəŋ nɨ bənɨ ba galə shəŋ yu wɨ, yu tə bə miɨ wu nə̀ kkpə wa dia mo lə, “Mbwə, mɨ' ŋgufiɛ məmbiə mɔhɔ.” 6 Bənɨ bədɔ bə nə̀ tɨfiə bilaŋ bi Nyɔ lə bə nə̀ jimiə mɨ wɔ manɨ ba kɨ bishɛ bɔ shəŋ lə, 7 “Miɨ no chanyɛ mɛ nəŋɨlɨ? Yu dze dɨ wu Nyɔ lə. Na yəŋ su wu naji ɨ yu gufiɛ bubiə yasə Nyɔ?” 8 Jisɔs bu kkə tsa miu fiɔŋ fi bɔ nə̀ gɔmbiɛ, tə bi bə bɔ lə, “Bə na keŋkɛ ŋgwe yi biŋ biŋgɔmbiɛ bəŋ shəŋ mɛ ndzɨ la? 9 Fi ŋkəmə bə ntə bə miɨ no na fi la? Bə ntə lə mɨ' ŋgufiɛ bubiə buhu, maa lə yu dza ba dze kɨta kɨhɨ kɨ gɨntɨ lə? 10 Bəmanɨ, njiwa mfə ɨ bə kkə lə Wɛŋ wu Miɨ na keŋkɛ buŋga sɛŋ koso ma bu gufiɛ məmbiə.” Yu tə tə bə miɨ wu nə̀ kkpə wa dia mo lə, 11 “Nna ntɨdi bə wə lə, dzâ wə, dze kɨta kɔhɔ wə kɨ kwəlɨ.” 12 Yu dza wə ba dze kɨ kɨ foto bənɨ bəchi jiŋgə yu. Bɔ jiŋgə yu mɛ, kɨgəsə wɨŋ bɔ, bɔ kɨ kuntə Nyɔ bɔ tɨdi lə, “Kə kə sa ŋəŋ ŋgwe yi fiŋ fiɔŋ wɨ.”Jisɔs bəndɨ Lɛbi lə yu kɨ ji wene wu nɨŋ
13 Lə Jisɔs chi dza ba gəŋ gwɨgwɨ fə ŋgɔŋ məmbəŋ mə Galili ku, kuta wu bənɨ ba mɨ, yu kɨ tɨfiə bɔ. 14 Lə yu dza kɨ gɨntɨ, yu ŋəŋ Lɛbi wɛŋ wu Alfiyus, ɨji yu' jiŋ dɨ wuhu wu nɨŋ'ə bɨŋ, kɨ kwete kɨŋwatɨ. Jisɔs tə bə yu lə, “Kɨ biəlɨ mɨ.” Yu bu dza wə kɨ biəlɨ yu.
15 Jisɔs bɔ bə beŋ buhu bə nɨŋ'ə jiji ba gəŋ kɨ diɨ Lɛbi tsɔŋ bə bənɨ bə nə̀ kwete kɨŋwatɨ ma bə bənɨ bədɔ bəbiə tɨ. Ŋgwe yi bɛŋ bənɨ nə̀ ba bɔ kɨ biəlɨ yu kɨyɛŋ. 16 Bəfalasi bə nə̀ tɨfiə bilaŋ bi Nyɔ lə ŋəŋ nɨ Jisɔs na diɨ bə bənɨ bəbiə ma bə nə̀ kwete kɨŋwatɨ, bɔ bi bə beŋ buhu bə nɨŋ'ə lə, “Yu na diɨ bə bənɨ bə kwete kɨŋwatɨ ma bənɨ bəbiə bədɔ ndzɨ la?” 17 Jisɔs wɔ nɨ bɔ biɛ, yu tə bə bɔ lə, “Bəntɛgwɨ noŋkɔhɔ dɔta. Ə ba kɨ noŋko ji bənɨ bə gwente. Ŋkə mbaha lə mbəndɨ bənɨ bə na ji diəŋ. Mɨ mba lə mbəndɨ ji bəbiə.”
Tsukɔ nchinə yi bidiəŋ wɨ
18 Lə kɨ ji tsa yidɔ wɨ, beŋ bə Jɔŋ'ə bə nɨŋ'ə bə Bəfalasi kɨ chinə bidiəŋ. Bənɨ bədɔ ba ba bi bə Jisɔs lə, “Beŋ bə nɨŋ'ə bə Jɔŋ'ə bə Bəfalasi na chinə bidiəŋ, beŋ bɔhɔ bə nɨŋ'ə jikə chinə ndzɨ la?” 19 Jisɔs chi bə bɔ lə, “Naji ɨ bə́ bəndɨ bənɨ kɨgbeyɛ kɨ bibinə lə ntɨŋ ɨ bɔ gəŋ kɨ chinə bidiəŋ ɨji nomə kpansɨ wufa ji bə bɔ? Naji ɨ bɔ kɨ chinə bidiəŋ yu ji bə bɔ kə. 20 Bəmanɨ, tsa baya yi bə́ ná ləkə nomə kpansɨ wufa wa nə bɔ lɨ, ɨ bɔ tə gbɔ kɨ chinə bidiəŋ tsa ya wɨ. 21 Naji ɨ miɨ dze kə nshɛŋkiɛ yi kɨndzu kɨfa ba kɔ kɨndzu kɨko wɨ. Jilə yu fə manɨ, ɨ nshɛŋkiɛ yi kɨndzu kɨfa ka fə ɨ kɨndzu kɨko ka kanə shakiɛ, ɨ kɨkpɔ kɨ sə ji ka su kanə ŋgbɔŋkɔ ya nɨ kɨ sə sa kɨ ji. 22 Naji tɨ ɨ miɨ dze kə mbiŋ məŋfa ba ga kɨŋgəª kɨ sə ka gwɨ ntɨŋ kɨ bə́ fəə bə dzɨ yi nyɛŋ kə, jilə yu fə manɨ, ɨ mbiŋ məŋfa ma kwe ba kpɨshə kɨŋgə ka, ɨ mbiŋ bə kɨŋgə la kɨlɔlɔ. Fi diəŋ na lə, bə́ naji lə bə́ ga mbiŋ məŋfa ji kɨŋgə kɨfa ntɨŋ kɨ na bambi kəkaha gwɨ.”
Butsu bu fufiɛ
23 Lə kɨ ji butsu bu fufiɛ budɔ wɨ, Jisɔs bə beŋ buhu bə nɨŋ'ə kɨ gəndə bɔ chɛti fə kə wu jiŋ'ə wudɔ ku. Beŋ buhu bə nɨŋ'ə gbɔ kɨ kəmbiə fo yi jiŋ'ə bɔ diɨ. 24 Lə Bəfalasi ŋəŋ, bɔ bi bə Jisɔs lə, “Bô ŋəŋ, beŋ bɔhɔ bə nɨŋ'ə na fɨtɨ fiɔŋ fi kɨlaŋ kə bɨmiə lə miɨ fə butsu bu fufiɛ ndzɨ la?” 25 Jisɔs bi tɨ bə bɔ lə, “Bə kə sa tanchɛ tɨ nə Kɨŋwatɨ kɨ Nyɔ lə ntɨŋ nɨ dzɔŋ nə̀ wo Ŋkuŋ Dɛbi bə kɨntsu kɨhɨ yu fə? 26 Tsa yi Abiata nə̀ ji fo wu bəchɛ bintɔfiɛ lə, Dɛbi be tsɔŋ yi Nyɔ ntɨŋ ba dze blɛ wu bə́ nə̀ sabiɛ ba ga lə na wu Nyɔ ba diə lɨ ba nya tɨ kɨntsu kɨhɨ nu, nə̀ kɨlaŋ lə miɨ kə̂ diəhə blɛ wa yasə bəchɛ bintɔfiɛ.” 27 Jisɔs tə kanə tədiə bə bɔ lə, “Nyɔ nə̀ ga butsu bu fufiɛ ndzɨ miɨ. Yu nə̀ kə maa miɨ ndzɨ butsu bu fufiɛ. 28 Bəma, Wɛŋ wu Miɨ na ji Miɨ Wubəŋ ma wu butsu bu fufiɛ.”