Jisɔs nachɛ tsukɔ butsu bu fufiɛ wɨ
6
Lə kɨ ji butsu bu fufiɛ, Jisɔs bə beŋ buhu bə nɨŋ'ə gəndəə bɔ chɛti kə wu jiŋ'ə wudɔ ntɨŋ, beŋ buhu bə nɨŋ'ə dza ba gbɔ kɨ kəmbiə fo yi jiŋ'ə bɔ fishi kaŋ bɔ diɨ. 2 Bəfalasi bədɔ ŋəŋ ba bi lə, “Bə na fɨtɨ fiɔŋ fi kɨlaŋ kə bɨmiə lə miɨ fə butsu bu fufiɛ ndzɨ la?”3 Jisɔs bi bə bɔ tɨ lə, “Kɨjilə bə kə saa tanchɛ nə Kɨŋwatɨ kɨ Nyɔ lə ntɨŋ nɨ dzɔŋ nə̀ wo Ŋkuŋ Dɛbi bə kɨntsu kɨhɨ yu fə? 4 Yu nə̀ be tsɔŋ yi Nyɔ ntɨŋ ba dze blɛ wu bə́ nə̀ sabiɛ ba ga lə na wu Nyɔ, diə lɨ ba nya kɨntsu kɨhɨ nu, ɨji nə̀ kɨlaŋ lə miɨ kə̂ diəhə blɛ wa fiəŋkə bəchɛ bintɔfiɛ kwa.” 5 Jisɔs kanə tədiə bə bɔ lə, “Wɛŋ wu Miɨ na ji Miɨ Wubəŋ wu butsu bu fufiɛ.”
Jisɔs wəmiəsɨ miɨ butsu bu fufiɛ
6 Lə kɨ ji budɔ butsu bu fufiɛ, Jisɔs gəŋ be tsɔŋ yi kɨntsɨsɨ yidɔ ntɨŋ kɨ tɨfiə bənɨ. Miɨ wudɔ ji sɔ ɨji kɨbandə kɨhɨ kɨ nədiɨ' kkpə. 7 Bənɨ bə nə̀ tɨfiə bilaŋ bi Nyɔ lə bə Bəfalasi kɨ noŋko fiɔŋ fi bɔ buŋɔ Jisɔs wɨ. Bɔ dɔŋ yəsɨ yu wɨ kɨ jiŋgə lə yu jiwa ɨ yu wəmiəsɨ miɨ butsu bu fufiɛ lə. 8 Jisɔs kkə fiɔŋ fi bɔ na finchɛ bə fi, yu tə bə miɨ wu kɨbandə kɨhɨ nə̀ kkpə wa lə, “Dzâ wə, ba ləŋ mɛni.” Yu bu dza wə ləŋ'ɨ. 9 Jisɔs bi bə bɔ lə, “Nna mbi bə bəŋ lə, fiɔŋ fi kɨlaŋ na bɨmi lə miɨ fə̂ butsu bu fufiɛ na fi la? Bə mfə yi fiɔŋ fi ndzeŋe maa fibiə lə? Bə nchitə miɨ maa bə ŋkkpɨsɨ lə?” 10 Yu bo bɔ bəchi yəsɨ yəsɨ bansə lɨ ba tə bə miɨ wa lə, “Nambiɛ kɨbandə kɔhɔ.” Yu nambiɛ, kɨ bu wəmiə.
11 Bəmanɨ, fi lɔ bənɨ ba wɨ, bɔ gbɔ kɨ sesɛ nɨ bɔ fəə bə Jisɔs.
Jisɔs sa beŋ buhu bə faŋə yɔɔ ntse bəfɛ
12 Lə kɨ ji tɨ díɔ ya ntɨŋ, Jisɔs dza ba bəndɨ dzo bɨŋ lə yu gəŋ tsɨsɨ, yu me yu tsɨsə bə Nyɔ sɨŋ sɨŋ butsu wɔ. 13 Lə butsu wɔ, yu bəndɨ beŋ buhu bə nɨŋ'ə, bɔ ba. Yu sa bədɔ yɔɔ ntse bəfɛ ba bəndɨ bɔ, bɔ kɨ ji beŋ buhu bə faŋə. 14 Yɨ́ yi bənɨ ba lə nə̀: Semon, wu yu nə̀ nya yɨ wuhu wudɔ lə Pita, bə Andulu jimə Semon. Bədɔ ji Jɛm, Jɔŋ, Felip, Batɔlɔmiu, 15 Matiɔ, Tɔmas bə Jɛm wɛŋ wu Alfiyus, Semon wu nə̀ ji miɨ wu kɨntsu kɨ Bədzɛlɔtª lə, 16 Judas wɛŋ wu Jɛm bə Judas Ɛskaliɔt wu nə̀ taŋŋə Jisɔs.
Jisɔs nə̀ tɨfiəə, yu wəmiəsɨ bənɨ
17 Nɨ yu sabiɛ bɔ manɨ, bɔ bəchi dza kɨ shichi. Lə bɔ kɨ shichi, yu ləŋ dɨ wudɔ wɨ ndəŋgə ntɨŋ, beŋ buhu bə nɨŋ'ə nə̀ ji tɨ mɨ kɨyɛŋ ma bə bənɨ bədɔ bə kɨyɛŋ'ə bə nə̀ fɔɔ nə Judɛya bə Jɛlosalɛm. Bədɔ bənɨ nə̀ dza nə sha yi Taya bə Sidɔn ɨji fə ŋgɔŋ məmbəŋ ku. 18 Bɔ nə̀ ba lə bɔ wɔ bitɨfiɛ bi Jisɔs lə, lə yu wəmiəsɨ tɨ gwɨ́ yibɔlə. Bənɨ bə bin'yɨntɨ bibiə nə̀ funsə bɔ nə̀ ba tɨ yu foshɛ bin'yɨntɨ bia. 19 Bənɨ bəchi tə kɨ se lə bɔ bukɔ yu wɨ, ndzɨ buŋga bu nə̀ foto nə yu wɨ nə̀ wəmiəsɨ bənɨ bəchi bə nə̀ bukɔ yu wɨ.
Kɨnlaŋ bə ŋgə
20 Jisɔs jiji ba bo beŋ buhu bə nɨŋ'ə ba tə lə,
“Kɨnlaŋ kɨbəŋ na kɛnɨ, bəŋ bə fiəŋkə,
ndzɨ buŋkuŋ bu Nyɔ lə na bwɛnɨ.
21 Kɨnlaŋ kɨbəŋ na kɛnɨ, bəŋ bə na dɨ dzɔŋ fɛŋ,
ndzɨ Nyɔ jiwa yu fə ɨ bə fulu.
Kɨnlaŋ kɨbəŋ na kɛnɨ, bəŋ bə na dɨ fɛŋ,
ndzɨ bə jiba bə səŋfɨ.
22 Kɨnlaŋ kɨbəŋ na kɛnɨ, tsa yi bə na biəlɨ Wɛŋ wu Miɨ, bənɨ ti bə bəŋ, bɔ fosɔ bəŋ nə bɔ ntɨŋ, bɔ suŋku bəŋ, bɔ nyaa bəŋ yɨ́ yibiə. 23 Fi dze kɨ tɨchə manɨ, bə kɨ laŋkɨ bulaŋə, bə binchi, bə woko ji buni, ndzɨ bikwəntsə biənɨ bibəŋ na ji Nyɔ ku. Bə kɨ kkɨ lə na tɨ nɨ bəchɛ chaa bənɨ ba nə̀ finchɛ bə bənɨ bə shɔŋ yi Nyɔ lə bə fiəfiə.
24 Bəmanɨ, lɔŋ bə bəŋ, bəŋ bənɨ bə bubəŋ'ə,
ndzɨ kɨnlaŋ kənɨ na ka kwa mɛni.
25 Lɔŋ bə bəŋ, bəŋ bə na yisə bitɔ fɛŋ,
ndzɨ bə ná dɨ dzɔŋ.
Lɔŋ bə bəŋ, bəŋ bə na sɨŋfɨ fɛŋ,
ndzɨ bə ná kɨ dɨ, bə tseke mənshi.
26 Lɔŋ bə bəŋ, tsa yi bənɨ bəchi na sɛnti bəŋ. Bə kɨ kkɨ lə na tɨ nɨ bəchɛ bətɨɨ bəbɔlə ba nə̀ sɛnti bənɨ bə biyɔndu lə bə nə̀ yundi lə bɔ na ji bənɨ bə shɔŋ yi Nyɔ lə.
Miɨ kɨ laŋkɨ miɨ wuhu wu nchɛnɛ
27 Bəmanɨ nna ntɨdi bə bəŋ bɛŋ bə na woko fiɔŋ fi nna nchanyɛ, lə bə kɨ laŋkɨ bənɨ bɛnɨ bə nchɛnɛ, bə fɨtɨ ji biɔŋ bi ndzeŋe bə bənɨ bə na ti bə bəŋ. 28 Bə nênde lə Nyɔ li ji budə bə bənɨ bə na kundu bəŋ. Bə tsɨ̂sɨ tɨ bə bənɨ bə na nya bəŋ ŋgə. 29 Ɨ miɨ kə wə ŋgaŋ wɨ, wə fichə wudɔ wa yu kanə kəə. Ɨ Miɨ se kɨndzu kɔhɔ kɨ nəbɨŋ, wə ga ma yu dze kɨ nəntɨŋ ka tɨ. 30 Ɨ miɨ nende fiɔŋ nə wə lɨ, wə nya yu. Ɨ miɨ dze tɨmo biɔŋ biɔhɔ, wə kə kɨ shɨ wə bishɛ kə. 31 Fiɔŋ yɨla fi bə na se lə bənɨ kɨ fɨtɨ bə bəŋ, kɨ ji fi fi bə kɨ fɨtɨ tɨ bə bɔ.
32 Ɨ bə na laŋkɨ kwa bənɨ bə na laŋkɨ bəŋ, ɨ fiɔŋ fi bə́ kɨ sɛnti bəŋ su kɨ ji la? Bənɨ bəbiə na fɨtəhə tɨ manɨ? Bɔ na laŋkɨ kwa ji bənɨ bə na laŋkɨ bɔ. 33 Ɨ bə na fɨtɨ biɔŋ bi ndzeŋe ɨji kwa bə bənɨ bə na fɨtɨ tɨ bə bəŋ, ɨ fiɔŋ fi bə́ kɨ sɛnti bəŋ su kɨ ji la? Bənɨ bəbiə fɨtəhə tɨ manɨ? 34 Ɨ bə na fete biɔŋ ɨji kwa bə bənɨ bə bə' ŋəŋə lə naji ɨ bɔ chi bəŋ fi, ɨ fiɔŋ fi bə́ kɨ sɛnti bəŋ su kɨ ji la? Ntɨlə bənɨ bəbiə na ba bɔ kɨ fete biɔŋ bə mənshə məmbɔlə kwa ndzɨ bɔ na kkɨ lə bɔ jiba ɨ bɔ chi fiɔŋ fichi? 35 Fi na ji diəŋ lə bə kɨ laŋkɨ bənɨ bɛnɨ bə nchɛnɛ lə, bə kɨ fɨtɨ ji biɔŋ bi ndzeŋe bə bɔ, bə kɨ fete bənɨ biɔŋ mbɨchə sɨŋ lə bɔ ná chisə lɨ. Bəma, ɨ bə keŋkɛ bikwəntsə bibəŋ, ɨ bə kɨ ji beŋ bə Nyɔ wu na ji Fo wu Biɔŋ Bichi lə, ndzɨ na diəŋ nɨ yu ba yu kɨ fɨtɨ biɔŋ bi ndzeŋe bə bənɨ bəchi bə na yɨtɨ yəsɨ ma bənɨ bə na ji bə shəŋ yi yi. 36 Bə kɨ kwesɛ yaa bə bənɨ diəŋ nɨ Chaa wɛnɨ na kwesɛ.
Miɨ kə kɨ sakɨ wudɔ
37 Bə kə kɨ sakɨ bənɨ bədɔ, fə Nyɔ jɛ bəŋ kə sakəhə. Bə kə kɨ nyənə bənɨ, fə Nyɔ jɛ bəŋ kə nyənə. Bə kɨ gufiɛ məmbiə mə bənɨ bədɔ lə, Nyɔ jiwa ɨ yu gufiɛ tɨ mənɨ. 38 Bə kɨ nya kɨnya bə bənɨ, Nyɔ jiwa ɨ yu kɨ nya tɨ bəŋ. Yu ná kɨ ba nya lɨ, ɨ yu dze tsa ba fɨkə buni, yu nɨkə, yu chindi fi yisə fi shishɛ fəkoso. Fiɔŋ fi miɨ' fɨkə fiɔŋ sɔ ba nya bə miɨ, na tɨ fi fi Nyɔ jiwa ɨ yu fɨkə sɔ ba nya bə miɨ wa.”
39 Jisɔs chi maa wudɔ ŋgaŋ bə bɔ lə, “Nyimə naji ɨ yu donchɛ wudɔ nyimə dzə kə. Yu mɔŋ'ɨ, ɨ bɔ jikə gbɔyɛ kɨkpɔ ntɨŋ bəchi? 40 Bə kkə̂ lə wɛŋ wu kɨŋwatɨ yakəhə miɨ wu' tɨfiə yu, bəmanɨ, tsa yi yu' fɨyə kanə lɨ, ɨ yu kɨ kkɨ tɨ nɨ miɨ wu' tɨfiə wa yu.
41 Wə na ba wə kɨ jiŋgə ji shəsɨ yi na ji wəma yəsɨ, bəmanɨ wə jikə ŋəŋkəhə kɨnchimbili kɨ na ji wɔhɔ yəsɨ ntɨŋ ndzɨ la? 42 Naji ɨ wə gəndə nəŋ tə tə bə wəma lə, ‘Ŋgwɨŋ, lə̂ŋ mfoso shəsɨ nə wə yəsɨ,’ bəmanɨ wə ji ŋəŋ sɨŋ kɨnchimbili kɨ na ji wɔhɔ yəsɨ ntɨŋ? Wə na ji miɨ wu na lɔshə! Sa fôso kɨnchimbili kɨ na ji wɔhɔ yəsɨ ntɨŋ wə tə keŋkɛ dzə yi ŋəŋə shəsɨ fi na ji yəsɨ wu wəma lə ntɨŋ ŋgbooŋ, ba tə foso lɨ.”
Bə́ kkɨ kɨtɨ nə muntaŋ mu kɨ lə wɨ
43 Jisɔs tə lə, “Naji ɨ kɨtɨ kɨ ndzeŋe muŋ muntaŋ mumbiə kə. Naji tɨ ɨ kɨtɨ kɨbiə muŋ muntaŋ mu ndzeŋe kə. 44 Bə́ kkɨ kɨtɨ ji nə muntaŋ mu kɨ lə wɨ. Naji ɨ miɨ wəŋ kə fimbiŋ nə kɨtɨ kɨ bimbəmbiə lə wɨ, naji ɨ miɨ wəŋ tɨ kə ŋga nə findəŋ wɨ. 45 Ɨ miɨ na ji bə kɨbə kɨ biɔŋ bi ndzeŋe lə yu shəŋ, ɨ yu kɨ foshɛ ji biɔŋ bi ndzeŋe. Wudɔ ji miɨ wu kɨhɨ kɨbə ji biɔŋ bibiə yu shəŋ, ɨ yu kɨ foshɛ ji biɔŋ bibiə. Fi na ji manɨ ndzɨ fiɔŋ fi sə yisə miɨ shəŋ na tɨ fi fi na foto nə yu dze.”
Kɨchə kɨ ndzeŋe bə kɨ biə
46 Jisɔs bi bə bɔ lə, “Bə na tsɨsə mɨ lə, ‘Baba, Baba’, mfə sɨŋ fiɔŋ fi nna ntɨdi bəŋ ndzɨ la? 47 Miɨ chi wu na ba mɨ wɨ, yu woko bitɨfiɛ biɛŋ, yu gəŋ kɨ fɨtɨ nɨ bi na tɨdi, njiwa ndonchɛ bəŋ fɛŋ nɨ wa miɨ na ji. 48 Yu na ji nɨ miɨ wu nə̀ se lə yu wɛyɛ tsɔŋ, yu sa chiŋ ba shi fəta, gəŋ bukɔ biansɨ wɨ ba chɛse kɨchə tə wɛyɛ lɨ. Lə ŋgɔŋ bukiɛ, mɔ fɔ ba tsu tsɔŋ ya, yi jikə nɨkə, ndzɨ yu nə̀ dze tsa ba wɛyɛ buni. 49 Bəmanɨ, miɨ wu na ba yu wɔ bitɨfiɛ biɛŋ ba gəŋ jikə kɨ fɨtɨ nɨ bi na tɨdi, yu na ji nɨ miɨ wu ba yu se lə yu wɛyɛ tsɔŋ, yu tsəshɛ nəbɨŋ nəbɨŋ ba wɛyɛ lɨ kɨchə sɨŋ. Ŋgɔŋ fɔ ba tsu tsɔŋ ya, tsa miu yi shi mɛ wuuu, ba tsaŋ'ɨ.”