Ŋgaŋ tsukɔ miɨ wu nə̀ liyi ŋgwe wɨ
4
Jisɔs chi gbɔɔ kɨ tɨfiə bənɨ fə kɨnchɛŋ ku, kuta wu bənɨ tɛshɛ mɨ mɛ gbeee fiədiə yu. Yu bu dza ba be jiŋ kɨkpɔŋkɔ ntɨŋ biɔ, kuta wa ləŋ sa kpa. 2 Yu kɨ tɨfiə bɔ biɔŋ kɨyɛŋ bəŋgaŋ ntɨŋ. Yu ma ŋgaŋ wudɔ bə bɔ lə, 3 “Bə wôkɔ bə wɔ, miɨ wudɔ nə̀ lɛ lə yu gəŋ li ŋgwe. 4 Lə yu kɨ liyi, yidɔ gbɔ dzə, munyinyi ba tsɔkiə ba diə lɨ. 5 Yidɔ ŋgwe gbɔ tá bɨŋ, sha ji wu bɨŋ tsəsɨ, yi məndɨ fɔfɔ nɨ sha nə̀ sɨŋ cha mɨ kɨtso. 6 Lə wɨmbɨ fɔ, wu kə ŋgwe ya yi kkpəyə ndzɨ gaŋ yisu nə̀ kə shikɛ kɨ. 7 Yidɔ ŋgwe gbɔ bimbəmbiə ntɨŋ. Bimbəmbiə bia kɔ ba fu ŋgwe ya, yi jikə muŋkɔhɔ muntaŋ. 8 Yidɔ ŋgwe gbɔ ji sha yi ndzeŋe bɨŋ ba məndɨ lɨ. Lə yi kɔ, yi muŋ ba ya nɨ bə́ nə̀ liyɛ yi, yəsɨ wu ŋgwe lə munchi yəsɨ mbaatiɛ, wudɔ yəsɨ gbɨbuse, wudɔ yəsɨ gbɨ.” 9 Lə Jisɔs ma ŋgaŋ wa manɨ, yu kanə lə, “Miɨ wu na ji bə bitiu, yu wɔ̂.”Fiɔŋ fi nə̀ fəə lə Jisɔs kɨ chanyɛ ji bəŋgaŋ ntɨŋ
10 Lə Jisɔs kɨ ji yu wumbɔŋ, bənɨ bədɔ bə nə̀ ba bɔ kɨ ji bə yu bə beŋ buhu bə nɨŋ'ə bə yɔɔ ntse bəfɛ bi bə yu kɨ bəŋgaŋ ba lə. 11 Yu chi bə bɔ lə, “Na bəŋ bə Nyɔ nə nya bəŋ biɔŋ bi buŋkuŋ buhu lə bi na ji bunyələ. Bəmanɨ, bə bənɨ bədɔ, fiɔŋ fichi na ji ji bəŋgaŋ ntɨŋ kwa, 12 fə bɔ kɨ bobi, bəmanɨ bɔ jikə ŋəŋkəhə, ɨ bɔ kɨ wokɔ tɨ, bɔ jikə wɔkɔhɔ. Fi ji manɨ bɔ tə kə fichə shəŋ yibɔlə, ɨ Nyɔ gufiə məmbiə məmbɔlə.”
Fiɔŋ fi ŋgaŋ wu Jisɔs nə̀ maa wa na donchɛ
13 Jisɔs jiji ba bi bə bənɨ bə nə̀ ji ba bə yu lə, “Kɨjilə bə kə kkə fiɔŋ fi ŋgaŋ no na tɨdi? Ɨ bə kə kkə no, ɨ bə kkə bədɔ bəŋgaŋ nəŋɨlɨ? 14 Ŋgwe yi miɨ wa nə̀ liyɛ ya na diɛ yi Nyɔ. 15 Ŋgwe yi nə̀ gbɔɔ ya dzə na bənɨ bə na woko diɛ yi Nyɔ, mɨ kɨsɨkɨ Satan ba foso diɛ ya nə bɔ shəŋ. 16 Ŋgwe yi nə̀ gbɔɔ ya ta ntɨŋ na bənɨ bə na woko diɛ yi Nyɔ, bɔ ləkə yi tsa miu bə kɨnlaŋ, 17 bəmanɨ, yi jikə tuŋkɔhɔ gaŋ bɔ shəŋ. Lə yi jiŋ kwa sɔ tsəsɨ, ŋgə ba lɨ makə bənɨ sese gbo bɔ nəjiŋ ndzɨ diɛ ya, bɔ bu tsɔ gbo tsa miu. 18 Ŋgwe yi nə̀ gbɔɔ ya bimbəmbiə ntɨŋ na bənɨ bə na woko diɛ yi Nyɔ, 19 kɨfunsə ndzɨ biɔŋ bi mbi no lə, bə kɨshəntə kɨ bubəŋ'ə, ma kɨshəntə kɨ biɔŋ bidɔ lə tɛshɛ ba kusə diɛ ya lə yi la kɨlɔlɔ. 20 Ŋgwe yi nə̀ gbɔɔ ya sha yi ndzeŋe bɨŋ na bənɨ bə na woko diɛ yi Nyɔ, bɔ ləkə yi, kɨ fɨtɨ nɨ yi na tɨdi bɔ gɨntɨ fiəfiə, yəsɨ wu yi lə munchi muntaŋ mbaatiɛ, yəsɨ wudɔ muŋ gbɨbuse, wudɔ gbɨ.”
Tsukɔ kɨbɨlə wɨ
21 Jisɔs chi biɛ lə, “Miɨ ba yu be bə kɨbɨlə tsɔŋ yu kusə bə ŋka, makə yu chɛse fətakɔ? Miɨ ba yu be bə kɨ, yu jikə tɨŋkəhə kɨ ji fiɔŋ fi bə́ tɨntɨ kɨbɨlə bɨŋ? 22 Bə kɨ kkɨ lə fiɔŋ fichi fi na ji bunyələ, bə́ ná fɨtɨ ɨ fi yinshi ŋgbooŋ, fi bə́ nə̀ nyələ lə bə́ kə̂ kkə, bə́ ná shafu lɨ. 23 Miɨ wu na ji bə bitiu, yu wɔ̂.” 24 Jisɔs chi tədiə lə, “Bə na wokɔ diɛ yi Nyɔ, bə kɨ wokɔ buni, bə kɨ kkɨ lə dzə́ yi miɨ na fɨkə fiɔŋ yi ntɨŋ, na nɨ Nyɔ ná fɨkə yi ntɨŋ ba nya bə miɨ wa, yu ná nya tɨmo ba yasə lɨ. 25 Miɨ wu na ji bə fiɔŋ, bə́ ná yinə lɨ. Miɨ wu na sɨŋ bə fiɔŋ, ma fi ntsekiɛ fi yu na ji fia bə fi, bə́ ná jiba bə́ ləkə nə yu lɨ.”
Ŋgaŋ tsukɔ ŋkɔ yi ŋgwe wɨ
26 Jisɔs chi chanyɛ lə, “Buŋkuŋ bu Nyɔ lə na ji nɨ ŋgwe yi miɨ ba yu li kə. 27 Tsa yi na ji bbutsu, miɨ wa kɨ me, butsu wɔ lɨ yu dza wə. Ŋgwe ya ko, yu jikə kkə chi yi na ko cha. 28 Na kwa sha yi na fɨtɨ lə ŋgwe ya kɨ ko. Yi na ba yi sa məndɨ, nə mɨ, yi fɛŋɛ ba nya yəsɨ. 29 Yi tɛ lɨ, yu dze fisɔ ba be kə, ndzɨ tsa yi gbenɛ' kwətsə.”
Ŋgaŋ tsukɔ ŋgwe yi fintaŋ fidɔ wɨ
30 Jisɔs chi tədiə lə, “Naji ɨ kə fɨkə buŋkuŋ bu Nyɔ lə bə la? Naji ɨ kə fɨkə bə ŋgaŋ wu la? 31 Bu na ji nɨ ŋgwe yi fintaŋ fidɔ,ª fi na sɨ fi yakɨ ŋgwé chi yi sɛŋ mbi ntɨŋ. Tsa yi bə́' liyɛ, 32 fi kɔ ba fu ya bitɨ bichi bi bə́' liyɛ kə, chɛ́ yisu tashɛ kɨ nya fufu, munyinyi mu dimbi bɔ́ kɨ wɛyɛ tsú su kɨ wɨ ndzɨ fufu wusu.”
33 Chinchi Jisɔs nə̀ tɨdi diɛ yi Nyɔ bə bənɨ bəŋgaŋ nɨ bɛmbɛ ntɨŋ mɛ, chi naji ɨ bɔ kafu ŋ'wɔ. 34 Yu nə̀ chanyɛhɛ fiɔŋ bə bɔ ɨjikə jimiɛ bəŋgaŋ ntɨŋ. Bəmanɨ, yu dze kɨ ji bɔ bə beŋ buhu bə nɨŋ'ə bɔbɔ, yu tə wɔlɔ bɔ tsukɔ bəŋgaŋ ba wɨ bəchi.
Jisɔs wɛŋ bə kɨkumɔ
35 Lə kɨ ji butsu bwa fudiɔ, Jisɔs tə bə beŋ buhu bə nɨŋ'ə lə, “Kə llə̂ kɨfɨsə ba gəŋ naha nəwuŋ.” 36 Bɔ shə kuta wu bənɨ wu nə̀ ji mɨ ba be kɨkpɔŋkɔ kɨ Jisɔs nə̀ ji ka ntɨŋ, bɔ bə yu kɨ llɨ, bikpɔŋkɔ bidɔ ji bə bɔ. 37 Nɨ bɔ nə̀ llɨ, kɨkumɔ kɨbəŋ fɔ ba gbɔ kɨ nɨkə ŋgɔŋ, mɔ beke kɨkpɔŋkɔ ka ntɨŋ, kɨ kɨ se lə kɨ yi. 38 Jisɔs nə̀ ji kɨkpɔŋkɔ ka ntɨŋ nəjiŋ, yu me, ɨji yu' kə fo kɨtɨ kɨ fo lə bɨŋ kɨ ji yuu. Bɔ gəŋ kɨ dzakɔ yu bɔ tɨdi lə, “Miɨ wu Bitɨfiə, kkpə na dze bɨ wə jikə nyaha kɨgaŋ?” 39 Jisɔs dzakɔ ba wɛŋ bə kɨkumɔ ka tə tə bə ŋgɔŋ ma lə, “Də̂ mɔɔŋ.” Kɨkumɔ ka bu də, bidɨ də nshiiŋ. 40 Yu tə bi bə beŋ buhu bə nɨŋ'ə lə, “Bə na lete la? Bə na bambi kə galə shəŋ mɨ wɨ?” 41 Nyiŋ kwe bɔ kɨtso, bɔ kɨ masə bɔbɔ lə, “No na miɨ yɨla wu ma kɨkumɔ bə ŋgɔŋ na woko bə yu?”