Bəkansɨ bə nə̀ gəndəə bə Jisɔs bɔ chitəə yu
8
Nəjiŋ wusu, Jisɔs kɨ gəndə bituŋ ntɨŋ yu tɨfiə shɔŋ yi ndzeŋe tsukɔ buŋkuŋ bu Nyɔ lə wɨ. Beŋ buhu bə nɨŋ'ə bə yɔɔ ntse bəfɛ biəlɨ yu 2 bə bəkansɨ bədɔ bə yu nə̀ wəmiəsɨ bɔ nə dzéŋ yibɔlə wɨ bə bədɔ bə yu nə̀ foshɛ bin'yɨntɨ bibiə nə bɔ wɨ. Bəkansɨ bɛŋ nə̀ Maliya wu bə́ nə̀ tsɨsə tɨ lə Madalen, wu Jisɔs nə̀ foshɛ bətsə nə yu wɨ fumba, 3 bə Jwana wu nomo nə̀ ji Chudza yu nɨntɨ Hɛlɔd lɨ, bə Susana bə bəkansɨ bədɔ kɨyɛŋ. Bɔ nə̀ gəndəə manɨ, bɔ foshɛɛ biɔŋ nə biba bibɔlə ntɨŋ, bɔ chitəə Jisɔs bə beŋ buhu bə nɨŋ'ə su.Ŋgaŋ tsukɔ miɨ wu nə̀ liyi ŋgwe wɨ
4 Bənɨ dza nə bituŋ ntɨŋ chichi chichi kɨ ba fə Jisɔs ku. Lə kuta wu bənɨ yi mɨ, yu ma ŋgaŋ bə bɔ lə,
5 “Miɨ wudɔ nə̀ lɛ liyɛ ŋgwe. Lə yu kɨ liyi, yidɔ gbɔ dzə, bənɨ dənchə bə go, munyinyi mu dimbi bɔ́ tsɔkiɛ ba diə lɨ. 6 Yidɔ gbɔ tá ntɨŋ, lə yi məndɨ, yi kkpəyɛ ndzɨ dɨ wa nə̀ ji buwomo. 7 Yidɔ ŋgwe gbɔ bifafɔ ntɨŋ, lə yi məndɨ yi kɨ ko bə bifafɔ bia, bi bu fu ŋgwe ya lə yi kə̂ kɔhɔ. 8 Yidɔ gbɔ ji sha yi ndzeŋe bɨŋ ba məndɨ kɔ lɨ, bə́ wəŋ muntaŋ nə nu tsa gbɨ ya nɨ bə́ nə̀ liyɛ.” Nɨ Jisɔs maa mɛ, yu wunə lə, “Miɨ wu na ji bə bitiu, yu wɔ̂.”
Fiɔŋ fi nə̀ fəə lə Jisɔs chanyɛ ŋgaŋ ntɨŋ
9 Beŋ buhu bə nɨŋ'ə bi bə yu lə fa ŋgaŋ wa na tseyɛ lə la lɛɛ? 10 Yu chi lə, “Bɛŋ na bəŋ bə Nyɔ nə fəə lə bə kkə̂ biɔŋ bi buŋkuŋ buhu lə bi na ji bunyələ. Bəmanɨ, bə bənɨ bədɔ, bɔ woko yibɔ ji bəŋgaŋ ntɨŋ, fə fi kɨ ji nɨ fi nə̀ ji lə,
‘Bɔ ná kɨ sasə yəsɨ, bɔ ji ŋəŋ sɨŋ,
bɔ wokɔ, bɔ ji ŋ'wɔ sɨŋ.’
Fiɔŋ fi ŋgaŋ tsukɔ miɨ wu nə̀ liyi wa ŋgwe wɨ na tseyɛ
11 Bə wɔ̂ la fiɔŋ fi ŋgaŋ wa na tseyɛ. Ŋgwe ya na diɛ yi Nyɔ. 12 Ŋgwe yi nə̀ gbɔɔ ya dzə, na bənɨ bə na woko diɛ yi Nyɔ, Satan ba foso shɔŋ ya nə bɔ shəŋ, fə bɔ jɛkə bɨmiə ba fɔfo. 13 Ŋgwe yi nə̀ gbɔɔ ya tá ntɨŋ na bənɨ bə na woko diɛ yi Nyɔ, bɔ ləkə bə kɨnlaŋ, bəmanɨ yi jikə chiŋfiɛhɛ gaŋ bɔ shəŋ, bɔ bɨmi kwa nə bifuŋ wɨ. Ɨ mfɔ ba lɨ, bɔ tsɔ gbo. 14 Ŋgwe yi nə̀ gbɔɔ ya bifafɔ ntɨŋ na bənɨ bə na woko diɛ yi Nyɔ, chi bɔ na gɨntɨ, kɨfunsə bə bubəŋ ma buni bu biɔŋ bi mbi lə fu diɛ ya, yi layɛ ba jikə kɔhɔ. 15 Ŋgwe yi nə̀ gbɔɔ ya sha yi ndzeŋe bɨŋ ji bənɨ bə na keŋkɛ shəŋ yi ndzeŋe, bɔ wɔ diɛ yi Nyɔ, bɔ dze tsa ba ga shəŋ yi wɨ ba kansɨ shəŋ kɨ fɨtɨ nɨ yi na tɨdi, bɔ gɨntɨ fiəfiə.
Kɨbɨlə kɨ bə́' kusə bə ŋka
16 Naji ɨ miɨ bɨlə kɨbɨlə ba dze ŋka kusə su kə. Naji ɨ miɨ chɛse kɨ fətakɔ kə. Miɨ ba yu bɨlə lɨ, yu tiyɛ ji biandɨ wɨ, fə bənɨ kɨ beke tsɔŋ bɔ ŋɨntɨ kɨŋgbooŋ wɨ.
17 Fiɔŋ fichi fi na ji bunyələ ná yinshi ŋgbooŋ, ɨ biɔŋ bi buji buji shafu ŋgbooŋ.
18 Bəma, bə dze kɨ woko diɛ yi Nyɔ, bə kɨ woko yi buni, bə kkə̂ lə miɨ wu na keŋkɛ fiɔŋ, bə́ jiba bə́ yinə yu. Miɨ wu na keŋkɛhɛ fiɔŋ, ma fintse fi yu na gɔmbiɛ lə yu keŋkɛ wa, bə́ jiba ɨ bə́ ləkə fi nə yu lɨ.”
Bənɨ bə na ji kɨtsɔŋ kɨ Jisɔs lə
19 Nɨ Jisɔs nə̀ tɨfiəə bənɨ manɨ, mə Jisɔs bə bəjimə Jisɔs ba lə bɔ ŋəŋ yu. Fi ya bɔ bə mbe ndzɨ bənɨ nə̀ yɛŋ mɨ kɨtso. 20 Miɨ wudɔ tə bə yu lə, “Mma bə bəwəma lɨmi ba sa biŋ bɔ se lə bɔ ŋə̂ŋ wə.”
21 Yu chi ji lə, “Nɛ bə bəŋgwɨŋ na miɨ chi wu na woko diɛ yi Nyɔ, yu fɨtɨ nɨ yi na tɨdi.”
Jisɔs dɨshə kɨkumɔ bə ŋgɔŋ
22 Lə kɨ ji butsu budɔ, Jisɔs tə bə beŋ buhu bə nɨŋ'ə lə, “Kə llə̂ kɨfɨsə ba gəŋ naha nəwuŋ.” Bɔ be kɨkpɔŋkɔ ntɨŋ kɨ llɨ. 23 Nɨ bɔ nə̀ llɨ, Jisɔs jiji ba gbɔ kɨnɨ. Kɨkumɔ gbɔ ba kɨ nɨkə ŋgɔŋ ma bə buŋga mɔ beke kɨkpɔŋkɔ ka ntɨŋ kɨ noŋko n'yi, bɔ nə̀ shɨkɨ kwa ŋkkpə bɨŋ. 24 Bɔ gəŋ kɨ dzakɔ Jisɔs bɔ tɨdi lə, “Miɨ wubəŋ, miɨ wubəŋ, kə kkpɨ ba kə gɨntɨ.” Jisɔs dzakɔ ba wɛŋ kɨkumɔ ka bə ŋgɔŋ mə nə̀ buku ma. Kɨkumɔ ka ka, ŋgɔŋ ma bu də mɛ mɔɔŋ. 25 Yu bi bə bɔ lə, “Bə' ga tə kɨmbɨŋ kɛnɨ məŋ?” Kɨgəsə wɨŋ bɔ, nyiŋ kwe bɔ, bɔ kɨ masə lə, “No na tə miɨ yɨla wu na wɛnti, kɨkumɔ bə ŋgɔŋ woko bə yu?”
Jisɔs ya bətsə buŋga
26 Bɔ dza nə Galili ba llə kɨnchɛŋ ka kwe nəwuŋ sha yi Gɛlasɨnª ntɨŋ. 27 Lə Jisɔs fɔ nə kɨkpɔŋkɔ ka ntɨŋ ba kɨ gɨntɨ fəkpa, bɔ bə miɨ wudɔ nə kɨtuŋ ka ntɨŋ bɨkənɨ ɨji bətsə' jibiə yu. Bɔ nə̀ jiŋ yu wɨ kɨtso, yu gəndəə kɨchilə kɨya, yu mee ji bəŋgbɔ ntɨŋ, dɨ wu bə́ nə̀ diyi bənɨ. Yu nə̀ tsu kə mɛɛ tsɔŋ. 28 Lə yu ŋəŋ Jisɔs wɨ, yu kpɨsɨ wulu ba gəŋ gbɔ yu nəfiə ba wɛŋ bə buŋga lə, “Jisɔs, Wɛŋ wu Nyɔ, Nyɔ wu na ji Fo wu Biɔŋ Bichi lə, wə na se la nə mɨ lɨ? Butɨɨ wə kə̂ nyaha mɨ ŋgə.” 29 Yu nə̀ chanyɛ manɨ ndzɨ nə̀ ji Jisɔs' wɛŋ kɨn'yɨntɨ kɨbiə ka kɨ fɔ nə yu wɨ. Kɨ nə̀ ba kɨ kɨ tasə yu tsá chi, bə́ gəŋ bə́ kwe yu ba kansɨ bibandə bihi ma go bə mfíaŋ ba kɨ kɨki yu. Bə kansɨ manɨ, yu kəmbiə yi, kɨn'yɨntɨ ka kufi yu, yu kɨ lətə yu gɨntɨ kpa.
30 Jisɔs bi bə miɨ wa lə, “Yɨ wɔhɔ na yəŋ?” Yu chi lə, “Yɨ wɛŋ na kuta.” Yu nə̀ chi manɨ ndzɨ bətsə nə̀ yi yu ntɨŋ. 31 Bətsə ba nende Jisɔs lə yu kə̂ faŋkəhə bɔ ji kɨkɨlɨ kɨ ndzumbɔ ntɨŋ. 32 Nə̀ ji kɨntsu kɨ bifi lə diɨ mɨ shəndɨ wɨ, bətsə ba nende Jisɔs lə yu tɔ̂kaŋ bɔ gəŋ be ji bifi bia ntɨŋ. Yu bɨŋ. 33 Bɔ bu fɔ nə miɨ wa wɨ ba llə gəŋ be bifi bia ntɨŋ. Bi tsaŋ ba sɨdi shi chɛŋ wɨ ba shi kɨfɨsə ka ntɨŋ ba midi sɔ.
34 Bənɨ bə nə̀ kɨki bifi bia ŋəŋ fiɔŋ fi tɨchə, bɔ dza nə mɨ ba chɛ gəŋ tə shɔŋ ya bə bituŋ bi nɔ. 35 Bənɨ kɨ woko, bɔ foto bɔ gɨntɨ lə bɔ ŋəŋ tɨ fiɔŋ fi tɨchə. Lə bɔ ba dɨ wu Jisɔs nə̀ ji ba ŋəŋ miɨ wa wɨ, ɨji bətsə ba' shə yu, yu' jiŋ fə Jisɔs ku ba dɔŋ bindzu, ɨji bufɨ buhu' kwə. Bɔ le kɨtso. 36 Bənɨ bə nə̀ ŋəŋə fiɔŋ fi nə̀ tɨchə wɨ tə bə bɔ nɨ fi nə̀ gəndə fə miɨ wu nə̀ keŋkɛɛ wa bətsə yu wɨ tə wəmiə. 37 Bənɨ bəchi bə sha yi Gɛlasɨn ntɨŋ kɨ ji bə nyiŋ, bɔ nende Jisɔs lə yu dza kɨ gɨntɨ. Jisɔs bu dza fihi ba be kɨkpɔŋkɔ ntɨŋ kɨ gɨntɨ. 38 Miɨ wu bətsə nə̀ fɔɔ wa nə yu wɨ nende Jisɔs lə bɔ bə yu kɨ gɨntɨ. Jisɔs nɨŋŋ ba chi yu jiŋ, tə lə, 39 “Kwə̂ ji wə ku, gə̂ŋ tə fiɔŋ fi kɨgəsə kɨ wɨŋə lə fi Nyɔ fəə bə wə.” Bəma, miɨ wa bu tsu jiŋ ba gəŋ kɨ gəndə sha ya ntɨŋ chi, yu tɨdi fiɔŋ fi kɨgəsə kɨ wɨŋə lə fi Nyɔ fəə bə yu.
Jisɔs ya dzéŋ bə kkpə
40 Jisɔs llə kɨnchɛŋ ba tsu nəwuŋ. Kuta wu bənɨ wu sə ji yu wokɔ yu mɨ ləkə yu. 41 Chɛku wudɔ ba mɨ bə́ tsɨsə yu lə Jailiɔs, ɨji fo wu tsɔŋ yi kɨntsɨsɨ lə mɨ. Nɨ yu ba, yu chɛ ba gəŋ tuŋ nu Jisɔs nəfiə ba nende lə yu bâ yu tsɔŋ, 42 lə wene kkpɨ wa. Yu nə̀ keŋkɛɛ wɛŋ ɨ ka kwa yu, ɨji wɛŋ wu kansɨ, yu ji biya yɔɔ ntse bifɛ.
Jisɔs dza kɨ gɨntɨ kuta wu bənɨ yi yu nəkpo. 43 Kpansɨ wudɔ nə̀ ji sɔ ntɨŋ ɨji gwɨ yi bikpaŋ' tsə yu wɨ biya yɔɔ ntse bifɛ. Yu nə̀ bɨsɨ fiɔŋ fichi fi yu nə̀ keŋkɛ bə bənɨ bə ntsə ləª, gwɨ ya ya bɔ bə mfə. 44 Yu diɔnɔ ba ba Jisɔs nəjiŋ, ba bukɔ bifuŋ bi kɨndzu kɨ Jisɔs lə wɨ. Mɨ kɨsɨkɨ bikpaŋ bia kəmbə. 45 Jisɔs bi lə, “Ə bukɔ yəŋ mɨ?” Bənɨ bəchi masə. Pita bi lə, “Miɨ wubəŋ, wə na ŋɨntəhə lə kuta wu bənɨ' yi wə nəkpo?” 46 Jisɔs kɨ kpɨ su lə, “Miɨ sə bukɔ mɨ wɨ. Nsə ŋ'wɔ nɨ buŋga fɔɔ nə mɨ wɨ.” 47 Kpansɨ wa ŋəŋ lə dzə na sɨŋ yi naji lə yu nyələ, yu chiŋkiɛ ba gəŋ gbɔ Jisɔs nəfiə ba tə bə bənɨ bəchi, bɔ wɔ fiɔŋ fi sə fəə lə yu bukɔ Jisɔs wɨ, yu tə nɨ yu sə bukɔ manɨ bikpaŋ bihi bu kəmbə. 48 Jisɔs tə bə yu lə, “Wɛnɛ, shəŋ yɔhɔ yi wə' galə mɨ wɨ fə wə wəmiə. Gə̂ŋ buni.”
49 Nɨ Jisɔs nə̀ bambi yu chanyɛ bə kpansɨ wa manɨ, miɨ wudɔ lafu mɨ, ɨji yu' fɔ nə tsɔŋ yi Jailiɔs fo wu tsɔŋ yi kɨntsɨsɨ ya lə ntɨŋ ba tə bə Jailiɔs lə, “Wana' fiəŋkə. Wə kə̂ tsɔhɔ nya Miɨ wu Bitɨfiə ŋgə.” 50 Lə yu chanyɛ manɨ, Jisɔs wɔ ba tə bə Jailiɔs lə, “Wə kə̂ lekɛhɛ, kêŋkɛ kwa kɨmbɨŋ, wana jiwa yu wəmiə.” 51 Bɔ bu dza kɨ gɨntɨ sɔ Jailiɔs ku, lə bɔ fɔ mɨ, Jisɔs nɨŋŋ lə miɨ kə̂ bekɛ tsɔŋ. Yu dze kwa ji Pita bə Jɛm bə Jɔŋ ma chɛ wɛŋ bə mə wɛŋ wa bɔ bə bɔ be. 52 Nə̀ ji bənɨ yeke məndəŋ bɔ dzudi gwɨ mɨ. Jisɔs tə lə, “Bə jîsə, wɛŋ no kə kkpəhə, yu na me lɨ.” 53 Bənɨ ba kɨ sɨŋfɨ yu mɨ busəŋfə, ndzɨ bɔ nə̀ kkɨ buni lə wɛŋ wa' kkpə. 54 Yu gəŋ dɨ wu wɛŋ wa nə̀ me, chiŋfi yu kɨbandə wɨ ba bəndɨ lə, “Wɛŋ wu kansɨ, dzâ wə!” 55 Wɛŋ wa bu dzakɔ ba dza wə tsa miu. Jisɔs tə lə bɔ nɔŋ fiɔŋ yu diə. 56 Lə mɛni bə tɨɨ ŋəŋ fiɔŋ fi tɨchə wɨ, kɨgəsə wɨŋ bɔ. Jisɔs loso lə bɔ kə̂ tədiə miɨ fiɔŋ fi tɨchə.