9
Jisɔs chi tədiə bə bɔ lə, “Ntə bəŋ yɛyi lə, bənɨ bədɔ lɨmi ba mɛ bə ná jɛkə wɔkɔhɔ ntsɔŋfu yi kkpə fiəŋkə lə bɔ' ŋəŋ buŋkuŋ bu Nyɔ lə' ba bə buŋga.”Gwɨ yi Jisɔs yashənɨ
2 Díɔ ba chɛ buse, Jisɔs dze Pita, Jɛm bə Jɔŋ bɔ bəndɨ dzo yi dəŋfɨ yidɔ bɨŋ, kɨ ji mɨ bɔbɔ. Bɔ jiji ba ŋəŋ gwɨ yihi yashənɨ bɔ yəsɨ, 3 bindzu bihi kɨ lakiɛ, bi wosɔ ya nɨ naji ɨ miɨ nə sɛŋ koso wwɔ ɨ bi tsalə ba kɨ wosɔ manɨ. 4 Bɔ ŋəŋ Alaja bɔ bə Mose lafu bɔ nəfiə, kɨ chanyɛ bə Jisɔs. 5 Pita jiji ba tə bə Jisɔs lə, “Miɨ wu Bitɨfiə Wubəŋ, fi ndzeŋ nɨ kə na ji mɛni. Gâma kə wɛyɛ bitsawo bitɛ, kɨdɔ kɨ ji kɔhɔ, kɨdɔ kɨ Mose lə, kɨdɔ kɨ ji kɨ Alaja lə.” 6 Yu nə̀ chanyɛ manɨ ndzɨ nyiŋ nə̀ kwe bɔ kɨtso, yu jikə kkə fiɔŋ fi naji ɨ yu chanyɛ. 7 Nɨ yu chanyɛ manɨ, kɨku bu kusə bɔ, diɛ chanyɛ nə kɨku ka ntɨŋ lə, “No na Wɛnɛ wu na ji shəŋ yɛŋ. Bə kɨ woko bə yu.” 8 Mɨ kɨsɨkɨ lə bɔ jiŋgə, bɔ tsukə ŋəŋkəhə bənɨ ba wɨ, fiəŋkə Jisɔs kwa.
9 Lə bɔ dza nə dzo ya bɨŋ kɨ shichi, Jisɔs loso bɔ lə bɔ kə̂ tədiə fiɔŋ fi bɔ' ŋəŋə bə miɨ fiəŋkə tsa yi Wɛŋ wu Miɨ ná dzakɔ nə kkpə lɨ. 10 Bɔ wɔ manɨ ba ga bɔ shəŋ, bəmanɨ bɔ kɨ chanyɛ kwa bɔbɔ lə fa ndzakɔ yihi nyi nə kkpə lɨ na ji lə la lɛɛ. 11 Bɔ bi bə Jisɔs lə, “Bənɨ bə tɨfiə bilaŋ na tɨdi lə Alaja naji lə yu sa ba, fə Nchitə wu Nyɔ nə̀ kaa wa tə ba ndzɨ la?” 12 Jisɔs chi bə bɔ lə, “Na yɛyi lə Alaja tə sa ba ba nachɛ biɔŋ bichi, bi tsu nɨ bi nə̀ ji. Bəmanɨ, fiɔŋ fi na ji fiŋ bubɔndɔ lə Wɛŋ wu Miɨ naji lə yu sa wɔ ŋgə kɨtso, ɨ bənɨ nɨŋŋ yu, fi na ji ma ndzɨ la? 13 Bəmanɨ ntə bəŋ lə Alaja nə̀ sa ba ba lɨ, bənɨ kɨ fɨtɨ fiɔŋ fi bɔ na se bə yu. Na tɨ nɨ fi nə̀ ji bubɔndɔ tsukɔ yu wɨ.”
Jisɔs foso kɨn'yɨntɨ kɨbiə nə wɛŋ wudɔ wɨ
14 Jisɔs bɔ bə beŋ buhu bə nɨŋ'ə ba shi ba fɔ dɨ wu beŋ buhu bə nɨŋ'ə bədɔ ba nə̀ ji, bɔ ŋəŋ kuta wu bənɨ' fiəlɨ bɔ, ɨji bənɨ bədɔ bə nə̀ tɨfiə bilaŋ bi Nyɔ lə yimbiɛ bə bɔ. 15 Mɨ kɨsɨkɨ nɨ bənɨ bəchi nə̀ ŋəŋə Jisɔs wɨ, bɔ dza bə kɨnlaŋ ba lətə gəŋ tsɨsɨ yu. 16 Yu bi bə bɔ lə, “Bə na yimbiɛ bɔ nə la bɨŋ?” 17 Miɨ wudɔ chi bə yu nə kuta wa ntɨŋ lə, “Miɨ wu Bitɨfiə, nsə mba bə wɛnɛ fə wə ku ndzɨ kɨn'yɨntɨ kɨbiə kɨdɔ na ji yu wɨ, ɨji kɨ na ba kɨ fə miɨ tsu nchindiɛ. 18 Kɨn'yɨntɨ ka na ba kɨ tasɨ yu, yu gbɔ fəkoso, fu kɨ foto nə yu dze, yu diɨ gəsɨ, yu tɛbiɛ. Mɨ' ntə lə beŋ bɔhɔ bə nɨŋ'ə foso kɨn'yɨntɨ ka, bɔ jikə kafɔ.” 19 Jisɔs wɔ manɨ ba tə bə bɔ lə, “Ɔɔɔ! Ŋkɨkɨ wu kə galə no shəŋ Nyɔ wɨ. Njiwa njiŋ bə bəŋ gəŋ tuŋ bula? Njiwa ŋkansɨ shəŋ bə bəŋ gəŋ fɔ məŋ? Bə bâ mɨ bə wɛŋ wa.” 20 Bɔ dze wɛŋ wa kɨ ba bə yu fə Jisɔs ku. Nɨ kɨn'yɨntɨ ka ŋəŋə Jisɔs wɨ, kɨ bu waŋkɨ wɛŋ wa tsa miu, yu gbɔ fəkoso kɨ bindiɛ mɨ, fu foto nə yu dze. 21 Jisɔs bi bə chɛ wɛŋ wa lə, “Fiɔŋ fiŋ nə̀ gbɔ tsa yi la?” Yu chi lə, “Fi nə̀ gbɔ yu bambi wu biɨ. 22 Kɨn'yɨntɨ ka gboshɛ yu tsá kɨyɛŋ boso ntɨŋ ma ŋgɔŋ ntɨŋ, kɨ noŋko ŋkkpɨsɨ yu. Jilə naji ɨ wə fə fiɔŋ, butɨɨ, wə kwese yaa bə bɨ ba chitə bɨ.” 23 Jisɔs tə bə yu lə, “Lə jilə naji mfə fiɔŋ lə? Naji ɨ fiɔŋ fichi gəndə bə miɨ wu naji bə kɨmbɨŋ.” 24 Mɨ kɨsɨkɨ chɛ wɛŋ wa bu wunə kɨtso lə, “Mɨ' mbɨŋ. Fə̂ lə kɨmbɨŋ kɛmɨ gəŋ fiə.” 25 Jisɔs ŋəŋ kuta wu bənɨ lətəə, yu baa, yu tɛshɛ dɨ wu yu nə̀ ji wa, yu wɛŋ kɨn'yɨntɨ kɨbiə ka ba tə lə, “Wə, kɨn'yɨntɨ kɨbiə kɨŋ, kɨ na fɨtɨ wɛŋ no jikə chanyɛ, yu jikə wɔkɔhɔ tɨ, nna ntɨdi bə wə lə, fɔ̂ nə wɛŋ no wɨ wə gəŋ. Wə ná kə tsɔhɔ bɛɛ yu wɨ.” 26 Kɨn'yɨntɨ ka wunə kɨtso ba nɨkə wɛŋ wa dzə́ yibiə ntɨŋ, tə fɔ nə yu wɨ. Yu me mɨ fəkoso nɨ miɨ wu ŋkkpə. Lə bənɨ kɨyɛŋ ŋəŋ manɨ, bɔ kɨ tɨdi lə, “Yu' kkpə.” 27 Jisɔs chiŋfi yu kɨbandə wɨ ba dzasɨ yu, yu ləŋ wə.
28 Lə Jisɔs bə beŋ buhu bə nɨŋ'ə gəŋ ba be tsɔŋ, bɔ bi bə yu nəjiŋ nəjiŋ lə, “Kə sə kə kafɔ mfoso tsə wa ndzɨ la?” 29 Yu chi bə bɔ lə, “Fiɔŋ fi naji ɨ fi foso ŋgwe yi no tsə na kwa kɨntsɨsɨ. Naji ɨ fiɔŋ fidɔ chichi kafu mfoso kə.”
Jisɔs chi chanyɛ kɨ ŋgə wuhu lə bə kkpə yihi
(Matiɔ 17:22-23; Luka 9:43b-45)
30 Bɔ dza nə mɨ ba chɛ dzə yi Galili, Jisɔs jikə sɛhɛ lə miɨ kkə 31 ndzɨ yu nə̀ gəndəə yu tɨfiə beŋ buhu bə nɨŋ'ə, yu tɨdi lə, “Bənɨ ná nya Wɛŋ wu Miɨ bənɨ bəbiə kaŋ ɨ bɔ kkpɨsɨ yu. Bɔ ná kkpɨsə yu manɨ, ɨ kɨ ji díɔ bɨŋ tɛ, ɨ yu dzakɔ nə kkpə lɨ.” 32 Nɨ yu tədiə manɨ, bɔ jikə kkə fiɔŋ fi yu chanyɛ, bəmanɨ bɔ kɨ lete mbi bə yu.
Miɨ wubəŋ na yəŋ?
33 Lə bɔ gəŋ fɔ Kapanaum ba be tsɔŋ, Jisɔs bi bə bɔ lə, “Bə sə yimbiɛ dzə kɨ la lə?” 34 Bɔ kətə mɔɔŋ, ndzɨ bɔ nə̀ gəndəə dzə bɔ yimbiɛ bɔbɔ lə fa miɨ wubəŋ nə bɔ ntɨŋ na yəŋ lɛɛ? 35 Jisɔs jiŋ fəkoso ba bəndɨ bɔ bə yɔɔ ntse bəfɛ ba ba tə bə bɔ lə, “Ɨ miɨ na se lə yu kɨ ji nsafiə, tə yu naji lə yu dze gwɨ yihi lə yu naji kɨwodiə, yu ji tɨ miɨ wu na nɨntɨ bənɨ bəchi lɨ.” 36 Nɨ yu tədiə manɨ, yu dze wɛŋ wubiɨ ba tɨŋ bɔ fəntɨŋ, yu tɔ wɛŋ wa ba tə bə bɔ lə, 37 “Ɨ miɨ ləkə wɛŋ nɨ no yɨ wɛŋ'ɨ, tə yu ləkə ji mɨ. Ɨ miɨ ləkə mɨ, tə yu kə ləkə ji mɨ, tə yu ləkə ji miɨ wu' faŋə mɨ.”
Ɨ miɨ na yimbiɛhɛ wə, kɨjilə yu bɨmi wa bə wə
38 Jɔŋ tə bə yu lə, “Miɨ wu Bitɨfiə, kə nə ŋəŋ miɨ wudɔ yu foshɛ bətsə nə bənɨ wɨ bə yɨ wɔhɔ, kə loso yu ndzɨ yu na jimiɛhɛ miɨ nə bɨ ntɨŋ.” 39 Bəmanɨ Jisɔs chi bə bɔ lə, “Bə kə kɨ losɔ ŋgwe yi wa miɨ. Bə kɨ kkɨ lə ɨ miɨ na fɨtɨ fiɔŋ fi kɨgəsə kɨwɨŋə lə yu ta yɨ wɛŋ, tə naji ɨ yu tsu chanyɛ fiɔŋ fibiə tsukɔ mɨ wɨ kə. 40 Ɨ miɨ na yimbiɛhɛ bɨ, tə yu bɨmi wa bɨ. 41 Ntə bəŋ yɛyi lə, ɨ miɨ nya kwa ma bwaŋ wu ŋgɔŋ'ə bə bəŋ ndzɨ bə́ na tsɨsə bəŋ lə bənɨ bə Klistu lə, tə shəshə fə nəŋ naji ɨ yu ná fiəŋkə bikwəntsə bihi kə.”
Biɔŋ bi na fɨtɨ lə bənɨ kɨ fɨtɨ bubiə
42 Jisɔs chi tədiə lə, “Jilə miɨ fə lə wɛŋ miu nə kɨntsu kɨ beŋ bəbiɨ bə galə bɛŋ shəŋ mɨ wɨ fə bubiə, ɨ fi kɨ ndzeŋe lə bə́ ji nasɨ wubəŋ kɨmiə kɨ miɨ wa lə wɨ ba li yu ŋgɔŋ məmbəŋ ntɨŋ. 43-44 Jilə kɨbandə kɔhɔ na fɨtɨ wə fɨtɨ bubiə, wə kə̂mbɨ kɨbandə ka. Fi na ndzeŋe lə wə be buwəŋ bu kəkaha ntɨŋ bə kɨbandə kɨmo, ya nɨ naji lə wə kɨ keŋkɛ bibandə bichi ba gəŋ ji boso wubəŋ ntɨŋ wu na fiɨ tsá chi nyimə sɨŋ.ª 45-46 Jilə gbo wɔhɔ na fɨtɨ lə wə kɨ fɨtɨ bubiə, wə kə̂mbɨ gbo wa. Fi na ndzeŋe lə wə be buwəŋ bu kəkaha ntɨŋ wə ji gbo mo, ya nɨ naji lə wə kɨ keŋkɛ go chi, bə́ li wə boso wubəŋ ntɨŋ. 47 Jilə yəsɨ wɔhɔ na fɨtɨ lə wə kɨ fɨtɨ bubiə, wə tsɔ̂ yəsɨ wa. Fi na ndzeŋe lə wə be buŋkuŋ bu Nyɔ lə ntɨŋ bə yəsɨ mo, ya nɨ naji lə wə kɨ ji bə yəsɨ chi, bə́ li wə boso wubəŋ ntɨŋ. 48 Dɨ wuŋ na dɨ wu bigɨ bi mɨ na kkpəhə, boso wu mɨ nyiməhə. 49 Bə kɨ kkɨ lə boso ná bukɔ miɨ chi wɨ diəŋ nɨ bə́ ba bə́ kushi ŋka fiɔŋ wɨ. 50 Ŋka na fiɔŋ fi ndzeŋe, bəmanɨ ɨ yi lasɨ bundzəŋgə buyilə, ɨ wə fə nəŋ fə yi kɨ chisə ndzəŋgə? Bə kɨ ji nɨ ŋka yi na ndzəŋgə, bə keŋkɛ budə bə gwɨ́ yənɨ.”