Nchɛnɛ
10
Jisɔs dza nə nɔ ba gəŋ sha yi Judɛya ntɨŋ, yu llə Kɨnchɛŋ kɨ Jɔdan ba gəŋ nɔ nəwuŋ. Kuta wu bənɨ chi tɛshɛ fə yu ku, yu kɨ tɨfiə bɔ nɨ yu nə̀ ba yu kɨ tɨfiə. 2 Bəfalasi jiji ba ba lə bɔ fɔ yu, bɔ bi bə yu lə, “Kɨlaŋ na bɨmi lə naji ɨ miɨ kɔŋ kpansɨ?” 3 Jisɔs bi tɨ bə bɔ lə, “Mose nə̀ nya kɨlaŋ lə bə kɨ fɨtɨ nəŋ?” 4 Bɔ chi lə, “Mose nə̀ bɨŋ lə naji ɨ miɨ kɔŋ kpansɨ. Ɨ yu na koŋko yu, yu bɔndu kɨŋwatɨ ba nya bə kpansɨ wa, kɨ na donchɛ lə yu' kɔŋ yu.” 5 Jisɔs chi bə bɔ lə, “Mose nə̀ bɔndu kɨlaŋ kɨŋ ndzɨ bitiu biɛnɨ bintaŋ. 6 Bəmanɨ, nə mbɛyɛ bɨŋ tsa yi Nyɔ nə̀ fəə mbi, yu nə̀ fə nyunso bə kpansɨ. Lə yu fə manɨ, yu tə lə, 7 ‘Na ndzɨ fiŋ fi nyunso ná shə tɨɨ bə mɛni ba tɛshɛ bə kpansɨ, 8 ɨ bɔ bəfɛ tsu miɨ miu.’ Bəma, bɔ na tsɔhɔ jimiɛ bəfɛ, bɔ sə tsu miɨ miu. 9 Fi kɨ ji lə, fiɔŋ fi Nyɔ' tɛshɛ, miɨ kə̂ mɔŋkɔ lə yu jɛ fi.”10 Lə Jisɔs bɔ bə beŋ buhu bə nɨŋ'ə kɨ ji tsɔŋ, beŋ ba bi bə yu kɨ nchanyɛ ya lə. 11 Yu chi bə bɔ lə, “Miɨ yɨla wu kɔŋɔ kpansɨ ba dze wudɔ, yu' fə bubiə bə mme bə kpansɨ wudɔ. 12 Ɨ kpansɨ fɔ nə nomo lɨ ba gəŋ nyunso wudɔ lɨ, tə yu' fə nomo bubiə bə mme bə nyunso wudɔ.”
Jisɔs nya beŋ bəbiɨ budə
13 Bənɨ kɨ ba bə beŋ fə Jisɔs ku lə yu bukɔ bɔ wɨ, beŋ buhu bə nɨŋ'ə kɨ wɛmiɛ bə bɔ. 14 Lə Jisɔs ŋəŋ manɨ, shəŋ lɔ yu, yu tə bə bɔ lə, “Bə gâma beŋ ba ba fə mɨ ku, bə kə kɨ losɔ bɔ ndzɨ buŋkuŋ bu Nyɔ lə na ji bənɨ chi bɛŋ lɨ. 15 Ntə bəŋ yɛyi lə ɨ miɨ kə ləkə buŋkuŋ bu Nyɔ lə nɨ wɛŋ wubiɨ, ɨ yu jikə bekɛ buŋkuŋ bwa ntɨŋ.” 16 Nɨ yu tədiə manɨ, yu kɨ toto bɔ, yu galɨ kaŋ bɔ bɨŋ, yu nyaa bɔ budə.
Jisɔs bɔ bə chɛ kpə
17 Lə Jisɔs dza lə yu kɨ gɨntɨ, miɨ wudɔ lətə ba tuŋ nu yu nəfiə ba bi bə yu lə, “Miɨ wu Bitɨfiə wu ndzeŋe, fiɔŋ fi nna nji lə mfə tə keŋkɛ buwəŋ bu kəkaha na la?” 18 Jisɔs chi bə yu lə, “Wə tsɨsɨ mɨ lə miɨ wu ndzeŋe ndzɨ la? Miɨ na sɨŋ wu ndzeŋe fiəŋkə Nyɔ kwa. 19 Ntɨlə wə na kkɨ bilaŋ biŋ lə, ‘Wə kə̂ kkpɨsə miɨ, wə kə̂ biəlɨ kpansɨ miɨ, wə kə̂ yəhə, wə kə̂ ləmiə nsa yi dyɛ nəjiŋ, wə kə kɨ ji bə biŋfukiɛ, bə kɨ naji kɨŋ lə, kɨ kuntə bə chaa bə mma?’” 20 Miɨ wa chi bə Jisɔs lə, “Miɨ wu Bitɨfiə, nnə̀ ŋgalɨ lɨ bilaŋ biŋ bichi dze nə wɛŋbutsɔ lɨ tuŋ ndɛŋ.” 21 Jisɔs jiŋgə yu mɛ ndzɔɔŋ ba laŋ yu, tə tə bə yu lə, “Tə fiɔŋ shə fimo fi wə na bambi lə wə fə. Gə̂ŋ taŋŋə biɔŋ bichi bi wə na keŋkɛ, wə jɛ kpə wa bə bənɨ bə fiəŋkə, wə tə keŋkɛ bubəŋ ji kɨtuŋ kɨ bɔ́ ntɨŋ. Wə fə manɨ, wə tə ba kɨ biəlɨ mɨ.” 22 Lə Jisɔs chanyɛ manɨ, miɨ wa wɔ, bushi bə yu, yu fichə gwɨ kɨ gɨntɨ yu dzudi gwɨ ndzɨ yu nə̀ ji bə kpə kɨtso.
23 Jisɔs fichə ba bo beŋ buhu bə nɨŋ'ə mɛ ba tə bə bɔ lə, “Fi ná kɨ tɛti kɨtso bə bənɨ bə kpə lə bə mbe buŋkuŋ bu Nyɔ lə ntɨŋ.” 24 Nchanyɛ ya funsə beŋ buhu bə nɨŋ'ə. Jisɔs chi tədiə bə bɔ lə, “Beŋ bɛŋŋ, fi na tɛti kɨtso bə mbe yi miɨª buŋkuŋ bu Nyɔ lə ntɨŋ! 25 Fi na ji buŋkəmə kɨŋfene lɨ bə nchɛ yəsɨ wu bɔilə lə ntɨŋ ya nɨ naji lə miɨ wu kpə be buŋkuŋ bu Nyɔ lə ntɨŋ.” 26 Lə bɔ wɔ manɨ fi ya bɔ kɨtso, bɔ kɨ masə lə, “Jilə fi na ji manɨ, ɨ yəŋ fɔfo?” 27 Jisɔs fichə ba bo bɔ mɛ, tə lə, “Fiŋ fiɔŋ naji miɨbəwəŋ kafu fi lɨ kə, bəmanɨ naji ɨ Nyɔ fə, ndzɨ naji ɨ Nyɔ fə biɔŋ bichi.” 28 Pita tə bə Jisɔs lə, “Bô ŋəŋ, kə' shə biɔŋ bichi ba kɨ biəlɨ wə.” 29 Jisɔs chi bə yu lə, “Ntə wə yɛyi lə, miɨ chi wu' shə tsɔŋ, makə bəwəmɛni, makə dzə́mbɨtə yihi, makə mɛni, makə tɨɨ, makə beŋ, makə bəndəŋgə, yu shɨkɨ ndzɨ mɨ bə ndzɨ shɔŋ yi ndzeŋe yi Nyɔ, 30 yu jiwa ɨ yu keŋkɛ tsɔ́ŋ bə bəwəmɛni, bə dzə́mbɨtə, bə bəmɛni, bə beŋ, bə bəndəŋgə tsa yi fɛŋ nyi ntɨŋ tsá gbɨ. Bənɨ jiba bɔ kɨ sesɛ tɨ gbo yu nəjiŋ, ɨ kɨ ji tsa yi ná ba wɨ, ɨ yu keŋkɛ buwəŋ bu kəkaha. 31 Bəmanɨ, bənɨ kɨyɛŋ bə na ji fiə fɛŋ, bɔ ná kɨ ji nəjiŋ, ɨ kɨyɛŋ bə na ji nəjiŋ fɛŋ kɨ ji nəfiə.”
Jisɔs chi chanyɛ tsá bɨŋ tiɛ kɨ ŋgə wuhu lə bə kkpə yihi
32 Jisɔs bə beŋ buhu bə nɨŋ'ə dza ba dze dzə kɨ bɨndɨ Jɛlosalɛm yu sa fiə. Beŋ buhu bə nɨŋ'ə kɨ ji bə kɨgəsə kɨ wɨŋə. Bənɨ bə nə̀ biəlɨ kɨ ji bə nyiŋ. Jisɔs chi dzɛɛ beŋ buhu bə nɨŋ'ə bə yɔɔ ntse bəfɛ, bɔ baŋgə gwɨ, yu kɨ tɨdi bɔ fiɔŋ fi jifia fi tɨchə yu. 33 Yu tə bə bɔ lə, “Bə wôkɔ bə wɔ, kə bɨndɨ ba kə gɨntɨ Jɛlosalɛm, bə́ jiba ɨ bə́ gəŋ nya Wɛŋ wu Miɨ bəchɛ bintɔfiɛ bəbəŋ kaŋ ma bənɨ bə na tɨfiə bilaŋ bi Nyɔ lə, ɨ bɔ sa yu ba kəmbəsɨ nsa lə bə́ kkpɨsɨ yu, tə nya yu bənɨ bə na jimiɛhɛ Bəju kaŋ, 34 ɨ bɔ kɨ sɨŋfɨ yu, bɔ chəyə mənchəŋ yu wɨ, bɔ kɨtɨ yu. Ɨ bɔ kkpɨsɨ yu, ɨ kɨ ji díɔ bɨŋ tɛ, ɨ yu dzakɔ nə kkpə lɨ.”
Jɛm bɔ bə Jɔŋ nende bitɨ bibəŋ nə Jisɔs lɨ
35 Jɛm bɔ bə Jɔŋ beŋ bə Dzɛbɛdi lə jiji ba kɨnɨ ba Jisɔs nəfiə tə bə yu lə, “Miɨ wu Bitɨfiə, fiɔŋ fidɔ fia su fi kə na se lə wə fə bɨ lɨ.” 36 Yu bi bə bɔ lə, “Bə na se lə mfə bəŋ la?” 37 Bɔ chi lə, “Kə na se lə tsa yi wə na ji kabala wɔhɔ wu bubəŋ bɨŋ, ɨ kə jiŋ bitɨ bibəŋ bɨŋ, miɨ wudɔ wə nədiɨ, wudɔ wə nəməsə.” 38 Jisɔs chi bə bɔ lə, “Bə na kkəhə fiɔŋ fi bə na bi. Naji ɨ bə mu bwaŋ wu ŋgə lə wu nna mmu, makə bə mbe ŋgwe yi ŋgə wubəŋ wu njiwa mbe yu ntɨŋ?” 39 Bɔ chi bə yu lə, “Naji ɨ kə fə.” Jisɔs tə bə bɔ lə, “Bə jiba bə mu bwaŋ wu ŋgə lə wu njiwa mmu, ba be tɨ ŋgwe yi ŋgə wubəŋ wu mbɛɛ yu ntɨŋ, 40 bəmanɨ bə njiŋ mɨ nədiɨ makə mɨ nəməsə, na mɨ wu naji nnya bə miɨ kə. Bidɨ bia na ji bi bənɨ bə bə́ nə̀ galə bɔ lɨ.” 41 Beŋ bə nɨŋ'ə bə Jisɔs lə bə yɔɔ wɔ kɨ fiɔŋ fia lə ba kɨ lo bə Jɛm bə Jɔŋ. 42 Jisɔs bəndɨ bɔ bəchi. Lə bɔ ba, yu tə bə bɔ lə, “Ntɨlə bə kkɨ ba lə bənɨ bə na sakɨ bituŋ bidɔ ntɨŋ ba bɔ kɨ jimi bənɨ bəbɔlə bɨŋ bujimiɛ, bənɨ bəbəŋ bəbɔlə donchɛ buŋga bubɔlə bɔ bɨŋ. 43 Ŋgwe yi fia fiɔŋ na jimiɛhɛ lə fi kɨ ji bəŋ ntɨŋ. Miɨ wu na se lə yu kɨ ji miɨ wubəŋ bəŋ ntɨŋ, naji lə yu kɨ ji wu kɨ nɨntɨ bəŋ'ɨ. 44 Ɨ Miɨ na se lə yu kɨ ji nsafiə nə bəŋ ntɨŋ, tə yu naji lə yu kɨ ji mfia wu miɨ chi. 45 Bə kɨ kkɨ lə Wɛŋ wu Miɨ nə̀ kə baha lə bənɨ kɨ nɨntɨ yu lɨ. Yu nə̀ ba lə yu nɨŋ bənɨ lɨ ba nya buwəŋ buhu lə yu kkpə ba tsu bənɨ kɨyɛŋ nə kkpə kaŋ.”
Jisɔs gu yəsɨ yi Batimayɔs lə
46 Bɔ gəndə ba fɔ kɨtuŋ kɨ Jɛliko, Jisɔs dza nə nɔ bə beŋ buhu bə nɨŋ'ə ma kuta wu bənɨ, ɨji nyimə wudɔ' jiŋ fə dzə ku yu nende biɔŋ, bə́ tsɨsə yu lə Batimayɔs, ɨji wɛŋ wu Timayɔs. 47 Yu wɔ lə na Jisɔs wu Nadzalɛt ba gbɔ kɨ wunə kɨtso lə, “Jisɔs, Wɛŋ wu Ŋkuŋ Dɛbi, kwêse yaa bə mɨ.” 48 Bənɨ kɨyɛŋ dza kɨ wɛmiɛ bɔ tɨdi lə yu baŋ. Bəmanɨ yu kanə wunə kɨtso lə, “Wɛŋ wu Ŋkuŋ Dɛbi, kwêse yaa bə mɨ.” 49 Jisɔs ləŋ ba tə lə, “Bə bə̂ndɨ yu.” Bɔ bəndɨ nyimə wa, tə lə, “Fo' fɔ wə, dzâ wə, yu bɨndɨ wa wə.” 50 Nyimə wa li kɨndzu kɨhɨ kɨ nəbiŋ fəkoso ba dza wə gəŋ fə Jisɔs ku. 51 Jisɔs bi bə yu lə, “Wə na se lə mfə la wə lɨ?” Nyimə wa chi lə, “Miɨ wu Bitɨfiə Wubəŋ, nna nse lə ŋkɨ ŋŋɨntɨ.” 52 Jisɔs tə bə yu lə, “Kɨ gɨntɨ fiɔhɔ. Shəŋ yi wə' galə mɨ wɨ fə wə wəmiə.” Mɨ kɨsɨkɨ yəsɨ yihi bu gulɔ, yu gbɔ kɨ ŋɨntɨ biɔŋ wɨ, yu kɨ biəlɨ Jisɔs dɨ wu yu nə̀ gɨntɨ.