Ŋgaŋ tsukɔ kpansɨ ŋku wɨ bə miɨ wu sakɨ bənsa
18
Jisɔs ma ŋgaŋ wudɔ bə ntɨfiə beŋ buhu bə nɨŋ'ə lə bɔ naji lə bɔ kɨ tsɨsə tsá chi mfuŋ sɨŋ. 2 Yu tə lə, “Miɨ wu sakɨ bənsa wudɔ nə̀ ji kɨtuŋ kɨdɔ ntɨŋ, yu jikə lekɛhɛ Nyɔ, yu jikə dzɛɛ miɨ fiɔŋ'ɨ tɨ. 3 Kpansɨ ŋku wudɔ nə̀ ji tɨ kɨtuŋ ka ntɨŋ. Yu nə̀ ba yu kɨ gɨntɨ tsá chi yu kuchi kaŋ bə miɨ wu sakɨ wa bənsa lə yu chitə yu ba kəmbɨ nsa yihi bɔ bə miɨ wuhu wu nchɛnɛ. 4 Miɨ wa jikə nyaha kɨgaŋ bə yu, kpansɨ ŋku wa kətə kwa yu bu gəŋə mɨ. Nəjiŋ wusu, miɨ wa tə bə gwɨ yihi lə, ‘Nɨ nna nji kə lekɛhɛ Nyɔ, njikə dzɛɛ miɨ fiɔŋ'ɨ, 5 bəmanɨ nɨ kpansɨ ŋku no na ba kwa yu funsə mɨ mɛ, mɨ ŋŋəŋ lə njiwa ŋkəmbɨ nsa yihi nɨ yu na se cha, kə jimiɛ manɨ, ɨ yu kətə yu ba yu funsə mɨ mɛ, ɨ miɨ kkpə nə yu kaŋ.’” 6 Nɨ Baba maa ŋgaŋ wa manɨ, yu tə lə, “Bə wɔ̂ fiɔŋ fi miɨ no wu na sakəhə no bənsa diəŋ nə̀ chanyɛ. 7 Nɨ yu nə̀ chitə kpansɨ ŋku wa mɛ, kɨjilə naji ɨ Nyɔ jikə chitə tɨ bənɨ buhu bə yu nə̀ sabiɛ, bə na dɨ bə yu bbutsu bə bbushə? Naji ɨ yu kɨ kpa gwɨ? 8 Ntə bəŋ lə Nyɔ jiwa yu kəmbɨ nsa yibɔ tɨmo fɔfɔ. Bəmanɨ tsa yi Wɛŋ wu Miɨ ná fichɛ ba lɨ, yu ná ŋɨntɨ bənɨ jisu sɛŋ koso bə' galə shəŋ Nyɔ wɨ manɨ?”Ŋgaŋ tsukɔ miɨ Bəfalasi wɨ bə miɨ wu kwete kɨŋwatɨ
9 Jisɔs chi maa ŋgaŋ wudɔ bə bənɨ bə nə̀ ŋɨntɨ gwɨ́ yibɔlə lə bɔ na ji bənɨ bə diəŋ, bɔ nyənə bədɔ. 10 Yu tə lə, “Bənɨ bədɔ bəfɛ nə̀ bəndɨ ba gəŋ tsɔŋ yi bintɔfiɛ ntɨŋ lə bɔ gəŋ tsɨsɨ. Wudɔ nə̀ miɨ Bəfalasi, wudɔ ji miɨ wu kwete kɨŋwatɨ. 11 Bɔ gəŋ ba be lɨ, miɨ Bəfalasi wa gəŋ ba ləŋ fihi yu wumbɔŋ ba tsɨsɨ lə, ‘Nyɔ, mɨ nya kɨmbafə bə wə ndzɨ nna njimiɛhɛ nɨ bənɨ bədɔ. Nna n'yɨtəhə yəsɨ bə biɔŋ. Nna nsɨŋ bə kɨŋfinchə. Nna nlɛtiɛhɛ bəkansɨ bə bənɨ lə, nna njimiɛhɛ tɨmo nɨ miɨ wu kwete kɨŋwatɨ wuhu. 12 Mba ŋkɨ nchinə bidiəŋ díɔ fɛ biənɨ ntɨŋ. Mba ŋkɨ nya ka mo bə wə nə ka yɔɔ ntɨŋ yi biɔŋ bichi lə bi nna ŋkeŋkɛ.’ 13 Bəmanɨ, miɨ wu nə̀ kwete wa kɨŋwatɨ ləŋ fihi dzəbudə, yu jikə bobiɛ tɨmo bɔ́, yu tse bushi, ba kə kɨbandə shəŋ yihi bɨŋ ba tsɨsɨ lə, ‘Ɔ Nyɔ, nna nji fiɛŋ miɨ wubiə, kwêse kwa yaa bə mɨ.’” 14 Nɨ Jisɔs maa mɛ, yu tə lə, “Ntə bəŋ lə, miɨ wu nə̀ kwete wa kɨŋwatɨ nə̀ fɔ kɨ shichi yu ji diəŋ Nyɔ yəsɨ nə miɨ Bəfalasi wa lɨ. Na tɨ diəŋ nɨ miɨ chi wu na dze gwɨ yihi bɔ́, bə́ ná shisəsɨ yu, miɨ chi wu na shisəsɨ gwɨ yihi, bə́ ná toto yu bɔ́.”
Kɨnse kɨ Jisɔs lə tsukɔ beŋ bəbiɨ wɨ
15 Bənɨ kɨ ba bə beŋ bəbiɨ fə Jisɔs ku lə yu bûkɔ bɔ wɨ. Beŋ buhu bə nɨŋ'ə ŋəŋ manɨ, bɔ kɨ losɔ bənɨ ba. 16 Bəmanɨ, Jisɔs bəndɨ beŋ ba lə bɔ kɨ ba, yu tə bə beŋ buhu bə nɨŋ'ə lə, “Bə gâ ma beŋ bəbiɨ kɨ ba fə mɨ ku. Bə kə̂ losɔ bɔ, ndzɨ buŋkuŋ bu Nyɔ lə na ji ndzɨ bənɨ nɨ bɛŋ. 17 Ntə bəŋ yɛyi lə, ɨ miɨ kə ləkə buŋkuŋ bu Nyɔ lə nɨ wɛŋ wubiɨ, ɨ yu jikə bekɛ buŋkuŋ bwa ntɨŋ.”
Jisɔs bə Chɛ kpə
18 Nsafiə wudɔ bi bə Jisɔs lə, “Miɨ wu Bitɨfiə, wə wu na ji miɨ wu ndzeŋe, fiɔŋ fi naji lə mfə ntə ŋkeŋkɛ buwəŋ bu kəkaha na la?” 19 Jisɔs bi bə yu lə, “Wə tsɨsɨ mɨ lə miɨ wu ndzeŋe ndzɨ la? Miɨ wu ndzeŋe na sɨŋ su, fiəŋkə Nyɔ kwa. 20 Bəmanɨ, bə ntsu jiŋ fiɔŋ fi wə sə bi wɨ, wə na kkɨ bilaŋ bi na tɨdi lə,
‘Wə kə̂ biələ kpansɨ miɨ,
wə kə̂ kkpɨsə miɨ,
wə kə kɨ yɨ,
wə kə kɨ bɨmi nləŋ nsa yi dyɛ nəjiŋ’,
bə kɨ na ji lə,
‘Kɨ kuntə bə chaa bə ma?’”
21 Miɨ wa chi lə, “Nnə̀ ŋgbɔ ŋga bilaŋ biŋ bichi mbambi tɨmo wɛŋbutsɔ.” 22 Jisɔs wɔ manɨ ba tə bə yu lə, “Tə fiɔŋ shə fimo fi wə na bambi kə fəkə. Gə̂ŋ taŋŋə biɔŋ biɔhɔ bichi, wə jɛ kpə wa bə bənɨ bə fiəŋkə, wə jiwa ɨ wə keŋkɛ bubəŋ ji Nyɔ ku. Ɨ wə diɔ ba fə manɨ, wə tə ba kɨ biəlɨ mɨ.” 23 Lə miɨ wa wɔ manɨ, gwɨ kkpə yu, ndzɨ yu nə̀ ji bə biɔŋ kɨtso. 24 Jisɔs bo yu mɛ ba tə lə, “Fi na tɛti kɨtso bə chɛ kpə bə mbe buŋkuŋ bu Nyɔ lə ntɨŋ. 25 Fi tɛti kɨtso bə chɛ kpə bə mbe buŋkuŋ bu Nyɔ lə ntɨŋ ya nɨ fi na ji buŋkəmə bə kɨŋfeneª bə nchɛ yəsɨ wu bɔilə lə ntɨŋ.” 26 Lə bənɨ bə nə̀ ji mɨ wɔ manɨ, bɔ bi lə, “Jilə fi na ji manɨ, ɨ yəŋ fɔfo?” 27 Jisɔs chi lə, “Fiɔŋ fi na yakɨ bənɨ bə mfə, naji ɨ fi ya Nyɔ kə.”
28 Pita tə bə yu lə, “Bô ŋəŋ, kə' shə biɔŋ biaha bichi, ba kɨ biəlɨ wə.” 29 Jisɔs chi bə bɔ lə, “Ntə bəŋ yɛyi lə, miɨ na sɨŋ su wu' shə ku wuhu, makə kpansɨ, makə bəwəmɛni, makə tɨɨ bə mɛni, makə beŋ buhu ndzɨ buŋkuŋ bu Nyɔ lə 30 wu ná jɛkə keŋkɛ bənɨ bə biɔŋ kɨyɛŋ kɨjimiɛ kɨŋ ntɨŋ bi na yakɨ bi yu nə̀ shə bia. Ná kɨ ji tsa yi kɨjimiɛ kɨ ná ba wɨ, ɨ yu keŋkɛ tɨ buwəŋ bu kəkaha.”
Jisɔs chi chanyɛ kɨ kkpə yihi lə
31 Jisɔs dze beŋ buhu bə nɨŋ'ə bə yɔɔ ntse bəfɛ bɔ baŋgə gwɨ. Yu tə bə bɔ lə, “Bə wôkɔ bə wɔ, kə bɨndɨ ba Jɛlosalɛm, tsa yi kə bəndə fɔ sɔ, ɨ fiɔŋ fichi fi bənɨ bə shɔŋ yi Nyɔ lə nə̀ bɔndɔ tsukɔ Wɛŋ wu Miɨ wɨ fɔ diəŋ. 32 Fi na ji lə, bə́ ná nya yu bəbanə kaŋ, ɨ bɔ kɨ sɨŋfɨ yu, bɔ suŋku yu, bɔ chəyə mənchəŋ yu wɨ. 33 Bɔ ná kɨtɨ yu ba kkpɨsɨ lɨ, ɨ kɨ ji díɔ bɨŋ tɛ, ɨ yu dzakɔ nə kkpə lɨ.”
34 Jisɔs chanyɛ manɨ, fiɔŋ fia funsə bɔ, bɔ jikə kkə tɨmo lə fa yu chanyɛ lə la lə, ndzɨ fiɔŋ fidɔ nə̀ fə lə bɔ kə kkə.
Jisɔs fə nyimə kɨ ŋɨntɨ
35 Lə Jisɔs kɨ ba gwɨgwɨ fə kɨtuŋ kɨ Jɛliko ku, nyimə wudɔ' jiŋ fə dzə ku kɨ nende biɔŋ. 36 Yu wɔ nɨ kuta wu bənɨ na kunə yu chɛti, yu bi lə na la lə.
37 Bɔ chi bə yu lə na Jisɔs wu Nadzalɛt wu na chɛti. 38 Yu gbɔ kɨ wunə lə, “Jisɔs, wɛŋ wu Ŋkuŋ Dɛbi, kwêse yaa bə mɨ.”
39 Bənɨ bə nə̀ sa fiə wɛŋ bə yu ba tə lə yu bâŋ. Bəmanɨ yu kanə wunə kɨtso lə, “Wɛŋ wu Ŋkuŋ Dɛbi, kwêse yaa bə mɨ.”
40 Jisɔs wɔ ba ləŋ'ɨ, tə lə bə́ ba bə yu. Lə bə́ ba bə yu, Jisɔs bi bə yu lə, 41 “Wə na se lə mfə la wə lɨ?” Miɨ wa chi lə, “Baba, fə̂ ŋkɨ ŋɨntɨ.”
42 Jisɔs tə tə bə yu lə, “Kɨ ŋɨntɨ. Shəŋ yi wə' galə mɨ wɨ fə yəsɨ yɔhɔ gulɔ.”
43 Mɨ kɨsɨkɨ manɨ, miɨ wa bu gbɔ kɨ ŋɨntɨ. Yu dza kɨ biəlɨ Jisɔs, yu nyaa Nyɔ kɨŋkuntə. Bənɨ bəchi bə nə̀ ji mɨ ŋəŋ ba nya kɨmbafə bə Nyɔ.