Ŋgaŋ tsukɔ miɨ wu nə̀ galə bənɨ bə nɨŋ'ə kə
20
Jisɔs chi tədiə lə, “Buŋkuŋ bu bɔ́ na ji nɨ chɛ kə wudɔ wu nə̀ fɔɔ fuwɔki lə yu gəŋ dze bənɨ bə nɨŋ'ə ba ga kə wuhu wu muntaŋ mu mbiŋ'ə ntɨŋ. 2 Nɨ yu nə̀ gəŋə ŋəŋ bɔ wɨ, bɔ sa yu lə yu jiwa yu sɔmbu bɔ kɨba kɨbaª butsu lɨ. Yu faŋ bɔ, bɔ gəŋ kɨ nɨntɨ yu kə. 3 Lə kɨ ji nɨ tsá fumbɔɔ bɨŋ, yu fɔ ba gəŋ ŋəŋ bədɔ bənɨ wɨ, bɔ lɨmi shɨbɨŋ kɨlɔlɔ. 4 Yu tə bə bɔ lə, ‘Bə gə̂ŋ nɨŋ mɨ kə, njiwa nsɔmbu bəŋ fiɔŋ fi na kwətsə.’ Bɔ gəŋ. 5 Yu chi fɔɔ bbushə ŋgaaaŋ ba chi fɔɔ tɨ nɨ tsá tiɛ bɨŋ gəŋ dze bənɨ bə nɨŋ'ə tɨ. 6 Lə kɨ ji nɨ tsá shɨŋ bɨŋ fudiɔ, yu chi fɔɔ ba gəŋ ŋəŋ bənɨ bədɔ wɨ bɔ ləmiɛ. Yu bi bə bɔ lə, ‘Na ndzɨ la fi bə shə bə lɨmi mɛ butsu buchidi kɨlɔlɔ mɛ?’ 7 Bɔ chi lə, ‘Na ndzɨ miɨ kə dzɛɛ bɨ nɨŋ ntɨŋ.’ Yu tə bə bɔ lə, ‘Bə lɛ̂ la bə gəŋ nɨŋ mɨ kə.’8 Lə kɨ ji fudiɔ, chɛ kə wa tə bə fo wu bənɨ buhu bə nɨŋ'ə lə, ‘Bə̂ndɨ bənɨ bə nɨŋ'ə ba, wə nya bikwəntsə bibɔlə, gbɔ nə bənɨ bə sə ba nəjiŋ bɨŋ, gəŋ kanə bə bə sə ba ba fiəfiə.’ 9 Yu gbɔ kɨ kwɨntɨ bɔ. Bənɨ bə bə́ nə̀ dzɛɛ ba bɔ nɨŋ ntɨŋ tsá shɨŋ bɨŋ, bɔ ba yu sɔmbu bɔ kɨba kɨba. 10 Lə bənɨ bə bə́ nə̀ saa ba dze bɔ nɨŋ ntɨŋ ba, bɔ kɨ gɔmbiɛ lə bə́ jiba bə́ sɔmbu bɔ ya bədɔ ba. Bəmanɨ, bə́ sɔmbu bɔ tɨ kɨba kɨba. 11 Bɔ ləkə bikwəntsə bibɔlə ba gbɔ kɨ tsumbu chɛ kə wa, 12 bɔ tɨdi lə, ‘Bənɨ bə wə sə dzɛɛ bɛŋ nəjiŋ nɨŋ kwa kɨtsə kɨ tsa lə kɨmo, bəmanɨ wə sɔmbu bɨ bə bɔ diəŋ, ɨji bɨ bə sə shɨ kə kpoko nɨŋ butsu buchidi wɨmbɨ ntɨŋ.’ 13 Chɛ kə wa chi bə miɨ wudɔ nə bɔ ntɨŋ lə, ‘Mbwə, ŋkə mfɨsə fiɔŋ bə wə kə. Ntɨlə bɨ bə wə sə sa nɨŋ nyi kɨba lɨ sɨŋ? 14 Lə̂kə bikwəntsə biɔhɔ wə kɨ gɨntɨ. Ə se mɨ lə nsɔmbu miɨ wu nəjiŋ diəŋ nɨ mɨ nsɔmbɔ wə. 15 Nna nsɨŋ bə buŋga bu fənə fiɔŋ fi nna nse bə fiɔŋ fiɛŋ? Maa kɨndɔ na chindi wə ndzɨ mɨ n'yanshɛ kaŋ yɛŋ bə bənɨ lə?’” 16 Nɨ Jisɔs chanyɛ ma, yu kanə lə, “Na tɨ diəŋ nɨ bənɨ bə na ji nəjiŋ fɛŋ ná kɨ ji fiə, ɨ bə fiə kɨ ji nəjiŋ.”
Jisɔs chi chanyɛ tsukɔ ŋgwe yi kkpə yi yu jiwa yu kkpə wɨ
17 Lə Jisɔs kɨ bɨndɨ Jɛlosalɛm, bɔ bə beŋ buhu bə nɨŋ'ə bə yɔɔ ntse bəfɛ fɔ dzə, yu bəndɨ bɔ, bɔ tsu fətsutsu, yu tə bə bɔ lə, 18 “Bə wôkɔ bə wɔ, kə bɨndɨ ba Jɛlosalɛm, bə́ jiba ɨ bə́ gəŋ nya Wɛŋ wu Miɨ bəchɛ bintɔfiɛ bəbəŋ ma bənɨ bə tɨfiə bilaŋ bi Nyɔ lə kaŋ, ɨ bə́ sa yu ba kəmbɨ nsa lə bə́ kkpɨsɨ yu, 19 ba nya yu bənɨ bə na jimiɛhɛ Bəju kaŋ, ɨ bɔ ŋgo yu ba shɔ yu ba bandɨ yu kɨtɨ kɨ ŋ'wa lə wɨ, ɨ kɨ ji díɔ tɛ, ɨ Nyɔ dzakɔ yu nə kkpə lɨ.”
Mə Jɔŋ bə Jɛm nende bubəŋ bu beŋ buhu lə nə Jisɔs lɨ
20 Mə beŋ bə Dzɛbɛdi lə ba fə Jisɔs ku bə beŋ buhu, yu tuŋ nu Jisɔs nəfiə lə yu nende fiɔŋ. 21 Jisɔs bi bə yu lə “Wə na se la?” Yu tə bə yu lə, “Kâ lə ná kɨ ji tsa yi wə ná kɨ sakɨ buŋkuŋ bwɔhɔ, ɨ beŋ bɛŋŋ bə bəfɛ bɛŋ jiŋ fə wə ku, wudɔ wə nədiɨ, wudɔ wə nəməsə.” 22 Jisɔs chi bə beŋ ba lə, “Bə na kkəhə fiɔŋ fi bə na bi. Naji ɨ bə kafu bə mu yi bwaŋ wu ŋgə lə wu nnanji lə mmu?” Bɔ chi lə, “Naji ɨ kə kafu.” 23 Yu tə bə bɔ lə, “Yɛyi lɨ bə jiba bə mu bwaŋ wɛŋ. Bəmanɨ bə njiŋ kɨbandə kɛŋ kɨ nəməsə bə kɨ nədiɨ wɨ, na mɨ wu naji lə nnya bəŋ kə. Bidɨ biŋ na bi bənɨ bə Taa sə nachɛ ba ga bɔ lɨ.” 24 Lə beŋ bə nɨŋ'ə bə Jisɔs lə bə yɔɔ ba wɔ kɨ fiɔŋ fia lə, shəŋ lɔ bɔ bə beŋ bə bəfɛ ba. 25 Bəma Jisɔs bəndɨ bɔ bəchi, bɔ ba, yu tə bə bɔ lə, “Bə na kkəhə lə bənɨ bə na sakɨ bituŋ bidɔ ntɨŋ ba bɔ kɨ jimi bənɨ bəbɔlə bɨŋ, bənɨ bəbɔlə bəbəŋ donchɛ tɨ buŋga bubɔlə bə bɔ? 26 Fiŋ fiɔŋ na jimiɛhɛ lə fi kɨ ji bəŋ ntɨŋ. Miɨ wu na se lə yu kɨ ji miɨ wubəŋ nə bəŋ ntɨŋ na yu wu naji lə yu kɨ nɨntɨ bəŋ'ɨ. 27 Miɨ wu na se lə yu kɨ ji nsafiə nə bəŋ ntɨŋ, tə yu naji lə yu kɨ ji mfia wɛnɨ. 28 Na tɨ diəŋ nɨ Wɛŋ wu Miɨ nə̀ kə baha lə bənɨ kɨ nɨntɨ yu lɨ. Yu nə̀ ba lə yu nɨŋ bənɨ lɨ, yu nya buwəŋ buhu lə yu tsu bənɨ kɨyɛŋ nə kkpə kaŋ.”
Jisɔs gu yəsɨ yi bənyimə bəfɛ lə
29 Lə Jisɔs bə beŋ buhu bə nɨŋ'ə kɨ chɛti Jɛliko, kɨntsu kɨ bənɨ lə kɨbəŋ kɨ biəlɨ yu nəjiŋ. 30 Fi fɔ lə bənyimə bədɔ bəfɛ ɨji bənɨnsə bə nə̀ ba bɔ kɨ jimi fə dzə ku, lə bɔ wɔ lə Jisɔs chɛti wa, bɔ kɨ wunə bɔ tɨdi lə, “Baba, wɛŋ wu Ŋkuŋ Dɛbi, kwêse yaa bə bɨ.” 31 Kɨntsu kɨ bənɨ lə ka kɨ wɛmiɛ bə bɔ kɨ tɨdi lə bɔ baŋ. Bəmanɨ bɔ gəŋ fiə bə ŋ'wunə lə, “Baba, wɛŋ wu Ŋkuŋ Dɛbi, kwêse yaa bə bɨ.” 32 Jisɔs ləŋ ba bəndɨ bɔ, bɔ ba, yu bi lə, “Bə na se lə mfə bəŋ la?” 33 Bɔ chi lə, “Baba, fə̂ yəsɨ yaha gulɔ.” 34 Jisɔs kwese yaa ba bukɔ yəsɨ yibɔlə. Mɨ kɨsɨkɨ bɔ bu gbɔ kɨ chisə ŋəŋə bidɨ, bɔ bu dza kɨ biəlɨ Jisɔs.