Bitɨfiə tsukɔ ŋka yi kpansɨ bə nyunso
19
Lə Jisɔs chanyɛ biɔŋ biŋ kanə lɨ, yu dza nə sha yi Galili ntɨŋ ba llə gəŋ sha yi Judɛya ntɨŋ, Kɨnchɛŋ kɨ Jɔdan nəwuŋ. 2 Lə yu gəŋ, kɨntsu kɨ bənɨ lə kɨyɛŋ biə yu, yu wəmiəsɨ bɔ bəchi mɨ bə nə̀ gwente.3 Bəfalasi ba fə yu ku lə bɔ fɔ yu, bɔ bi lə, “Kɨlaŋ na bɨmi lə naji ɨ miɨ ka bɔ bə kpansɨ ndzɨ fiɔŋ ma ɨji fi la?” 4 Jisɔs chi bə bɔ lə, “Bə kə tanchɛ nɨ fi na ji bubɔndɔ lə nə mbɛyɛ bɨŋ, yu wu nə̀ fəə bənɨ, yu nə̀ ma bɔ nyunso bə kpansɨ? 5 Yu nə̀ ma bɔ manɨ, yu tə lə, ‘Na ndzɨ fiŋfi, fi nyunso ná shə tɨɨ bə mɛni ba gəŋ tɛshɛ bə kpansɨ, ɨ bɔ bəfɛ tsu miɨ lɨ miu.’ 6 Bəma, ɨ bɔ tsukə jimiɛ bənɨ bəfɛ, ɨ bɔ kɨ ji fɛŋ ji miɨ lɨ miu. Kɨjilə, fiɔŋ fi Nyɔ sə tɛshɛ, miɨ kə̂ mɔŋkɔ lə yu jɛ fi.”
7 Bənɨ ba bi bə Jisɔs lə, “Nə̀ ndzɨ la fi Mose nə̀ tədiə lə naji ɨ miɨ bɔndu kɨŋwatɨ ba nya bə kpansɨ bə ndonchɛ lə yu' ka bə kpansɨ wa?” 8 Jisɔs chi lə, “Nə̀ ndzɨ fó yɛnɨ yintaŋ yi Mose nə̀ galə lə naji ɨ miɨ kɔŋ kpansɨ. Bəmanɨ, fi nə̀ jimiɛhɛ ma nə mbɛyɛ bɨŋ. 9 Mɨ ŋkɨ ntɨdi bəŋ yɛmɨ lə, ɨ miɨ kɔŋ kpansɨ ba dze wudɔ, ɨjikə jimiɛ ndzɨ kpansɨ wa na dzenɛ binchi, tə yu' fə bubiə diəŋ nɨ bə nlɛ yi kpansɨ wudɔ.”
10 Lə beŋ bə Jisɔs lə bə nɨŋ'ə wɔ fiŋ, bɔ tə bə yu lə, “Jilə na mɛ nɨ fi na ji tsukɔ nyunso bə kpansɨ wɨ, ɨ fi kɨndzeŋe lə miɨ kətə fihi manɨ ndze sɨŋ kpansɨ.” 11 Jisɔs tə bə bɔ lə, “Na miɨ chi kə wu naji ɨ yu bɨŋ fiŋ fiɔŋ. Naji ɨ bɨŋ kwa bənɨ bə Nyɔ' fəə lə bɔ bɨŋ. 12 Bə kɨ kkɨ lə bənɨ bədɔ basu bə gwɨ yibɔ na dzaha, ɨji nɨ bə́ nə̀ bɛyɛ bɔ. Bədɔ ji manɨ, ɨji mfə yi bənɨ lə bɔ kɨ ji ma. Bədɔ ji manɨ ɨji mfə yibɔ bə kaŋ yibɔlə lə bɔ kɨ ji ma ndzɨ buŋkuŋ bu bɔ́. Miɨ wu naji yu bɨŋ fiŋ, yu bɨ̂ŋ.”
Jisɔs nya beŋ bəbiɨ budə
13 Bənɨ dza kɨ ba bə beŋ fə Jisɔs ku lə yu bukɔ bɔ wɨ ba tsɨsɨ bɔ bɨŋ. Beŋ buhu bə nɨŋ'ə kɨ wɛmiɛ bə bənɨ ba. 14 Jisɔs tə yihi lə, “Bə gâ ma beŋ ba ba mɨ wɨ. Bə kə kɨ funsə bɔ, ndzɨ buŋkuŋ bu bɔ́ na ji ɨji bənɨ nɨ bɛmbɛ lɨ.” 15 Nɨ yu tədiə manɨ, yu ga kaŋ bɔ bɨŋ ba dza kɨ gɨntɨ.
Jisɔs bə chɛ kpə
16 Miɨ wudɔ bu ba fə Jisɔs ku ba bi bə yu lə, “Miɨ wu Bitɨfiə, fiɔŋ fi ndzeŋe fi naji lə mfə ba tə keŋkɛ buwəŋ bu kəkaha na la?” 17 Jisɔs bi bə yu lə, “Wə na bi ji bə mɨ tsukɔ fiɔŋ fi ndzeŋe wɨ ndzɨ la? Wu ndzeŋe wa ji kwa miu. Ɨ wə na se lə wə be buwəŋ bu kəkaha ntɨŋ, wə kɨ galɨ bilaŋ bi Nyɔ lə.” 18 Miɨ wa bi bə Jisɔs lə, “Bilaŋ bi Nyɔ lə na bi la?” Jisɔs chi lə, “Wə kə̂ kkpɨsə miɨ, wə kə̂ biələ kpansɨ miɨ, wə kə̂ yəhə, wə kə̂ bɨmiə nləŋ nsa yi biyɔndu nəjiŋ, 19 wə kûntə bəchaa bə mma, ba laŋ miɨ wu na ji fə wə ku nɨ wə na laŋkɨ gwɨ yɔhɔ.” 20 Wɛŋ wu nɨnsə wa tə bə yu lə, “Nnə ŋgalɨ lɨ bilaŋ biŋ bichi. Fɛŋ shə la?” 21 Jisɔs chi bə yu lə, “Ɨ wə na se fɛŋ lə wə kɨ ji miɨ wu ndzeŋe ba gəŋ tuŋ fəŋgbɨŋ, wə gəŋ taŋŋə biɔŋ bichi bi wə na ji bə bi ba nya kpə wa bə bənɨ bə fiəŋkə, ɨ wə tə keŋkɛ ji bubəŋ bu bɔ́. Ɨ wə diɔ ba fə manɨ, wə ba kɨ biəlɨ mɨ.” 22 Lə wɛŋ wu nɨnsə wa wɔ manɨ, yu dza kɨ gɨntɨ yu dzudi gwɨ, ndzɨ yu nə̀ ji bə biɔŋ kɨtso.
23 Jisɔs tə tə bə beŋ buhu bə nɨŋ'ə lə, “Ntə bəŋ yɛyi lə fi ná kɨ ji buntaŋ bə miɨ wu kpə bə mbe buŋkuŋ bu bɔ́ ntɨŋ. 24 Nchisə tədiə bə bəŋ lə, fi na ji buŋkəmə kɨŋfeneª lɨ bə mbe yəsɨ wu bɔilə lə ntɨŋ ba ya nɨ naji ɨ miɨ wu kpə be buŋkuŋ bu Nyɔ lə ntɨŋ.” 25 Lə beŋ bə Jisɔs lə bə nɨŋ'ə wɔ fiɔŋ fiŋ, kɨgəsə wɨŋ bɔ kɨtso. Bɔ bi lə, “Jilə na manɨ, ɨ yəŋ fɔfo?” 26 Jisɔs bo bɔ mɛ ba tə bə bɔ lə, “Jilə na miɨbəwəŋ'ɨ, ɨ fi ya. Bəmanɨ Nyɔ lɨ, naji ɨ fiɔŋ ya yu kə.” 27 Pita tə bə yu lə, “Bô ŋəŋ, kə' shə biɔŋ bichi kɨ biəlɨ wə. Kə jiba ɨ kə keŋkɛ la?” 28 Jisɔs tə bə bɔ lə, “Ntə bəŋ yɛyi lə, tsa yi Wɛŋ wu Miɨ jiwa ɨ yu jiŋ kabala wuhu wu bubəŋ bɨŋ mbi wufa ntɨŋ, ɨ bəŋ bə nə̀ biəlɨ bɛŋ mɨ, ɨ bə jiŋ tɨ bəkabala bɨŋ yɔɔ ntse bəfɛ kɨ sakɨ bitsɔŋ bi Isla bi yɔɔ ntse bifɛ. 29 Miɨ chi wu' shə ku wuhu, makə bəwəmɛni, makə dzə́mbɨtə yihi, makə tɨɨ, makə mɛni, makə beŋ, makə kə, ɨji yu' shə ndzɨ mɨ, miɨ wa ná keŋkɛ lɨ bənɨ bə biɔŋ tsá gbɨ ya nɨ yu nə̀ sa yu keŋkɛ. Yu ná keŋkɛ lɨ tɨ buwəŋ bu kəkaha. 30 Bəmanɨ, bənɨ kɨyɛŋ bə na ji nəfiə fɛŋ, bɔ ná kɨ ji nəjiŋ, ɨ kɨyɛŋ bə na ji nəjiŋ fɛŋ kɨ ji nəfiə.”