Miɨ wubəŋ buŋkuŋ bu bɔ́ ntɨŋ
18
Tsa ya wɨ nə̀ ji, beŋ bə Jisɔs lə bə nɨŋ'ə ba ba bi bə Jisɔs lə, “Miɨ wu na ko ba ya miɨ chi buŋkuŋ bu bɔ́ ntɨŋ na yəŋ?” 2 Jisɔs bəndɨ wɛŋ wubiɨ ba tɨŋ bɔ fəntɨŋ, 3 yu tə bə bɔ lə, “Ntə bəŋ yɛyi lə, ɨ bə kə yashənɨ ba tsu nɨ beŋ bəbiɨ, tə naji ɨ bə shəshə bə be buŋkuŋ bu bɔ́ ntɨŋ kə. 4 Ma yəŋ wu dzɛɛ gwɨ yihi koso, ba kɨ ji nɨ wɛŋ no, na yu wu na ji miɨ wubəŋ buŋkuŋ bu bɔ́ ntɨŋ. 5 Ɨ miɨ ləkə wɛŋ jimə no yɨ wɛŋ'ɨ, tə yu ləkə ji mɨ.6 Jilə miɨ wudɔ fə lə wɛŋ wu' galə shəŋ mɨ wɨ nə beŋ bəbiɨ bɛŋ ntɨŋ kɨ fɨtɨ bubiə, fi tə nə̀ kɨ ji lɨlɨ bə wa miɨ lə bə́ ji nasɨ wubəŋ kɨmiə kɨhɨ wɨ ba li yu ŋgɔŋ məmbəŋ ntɨŋ. 7 Lɔŋ na ji bə bənɨ bə mbi no lə ndzɨ biɔŋ bi na tosɔ bɔ lə bɔ kɨ fɨtɨ məmbiə. Biɔŋ biŋ naji lə bi kɨ ba, bəmanɨ lɔŋ na ji bə miɨ wu na ba wa bə biɔŋ biŋ. 8 Jilə kɨbandə kɔhɔ makə gbo wɔhɔ na fɨtɨ lə wə kɨ fɨtɨ bubiə, wə kəmbɨ kɨbandə ka makə gbo wa ba tɔfu lɨ. Fi na ndzeŋe lə wə be buwəŋ bu kəkaha ntɨŋ wə ji kɨbandə kɨmo makə wə sɨŋkɨ bə gbo mo, ba ya chi naji ɨ wə kɨ keŋkɛ bibandə bichi, makə go chi, ɨ bə́ li wə ji boso wu kəkaha ntɨŋ. 9 Jilə yəsɨ wɔhɔ na fɨtɨ wə fɨtɨ bubiə, wə tsɔ yəsɨ wa ba tɔfu lɨ. Fi na ndzeŋe lə wə be buwəŋ bu kəkaha ntɨŋ bə yəsɨ mo, ba ya chi naji ɨ wə kɨ keŋkɛ yəsɨ fɛ, ɨ bə́ li wə boso wubəŋ ntɨŋ.”
Ŋgaŋ tsukɔ shiŋ yi nə̀ la wɨ
10 Bə kɨ dze tsa, bə kə kɨ dze miɨ nə beŋ bəbiɨ bɛŋ ntɨŋ koso. Ntə bəŋ lə, bɔ́, bənchinda bə Nyɔ lə bə na kɨki bɔ, na ba bɔ kɨ ji tsá chi fə Taa ku wu na ji bɔ́. 11 [Wɛŋ wu Miɨ nə̀ ba lə yu fə lə bənɨ bə sə laa fɔfo.]ª
12 Bə gɔmbiɛ lə la? Ɨ miɨ na ji bə shíŋ gbɨ, miuŋkpaŋ la nə yi ntɨŋ, ɨ yu jikə shə yi gbɨ fumbɔɔ ntse fumbɔɔ ya dzo bɨŋ, gəŋ nɔŋ shiŋ miuŋkpaŋ yi' laa ya? 13 Ntə bəŋ yɛyi lə, ɨ yu nɔŋ ba ŋəŋ'ɨ, ɨ yu kɨ laŋkɨ ndzɨ shiŋ miuŋkpaŋ ya, ya yi gbɨ fumbɔɔ ntse fumbɔɔ yi sə kə laa ya. 14 Na tɨ diəŋ nɨ Chaa wɛnɨ wu ji bɔ́ na sɛhɛ lə miɨ miu nə beŋ bəbiɨ bɛŋ ntɨŋ la.
Nɨ naji ɨ miɨ nachɛ bəŋgə bɔ bə wəmɛni
15 Wəma fə fiɔŋ fibiə bə wə, wə gəŋ ŋəŋ yu ba donchɛ ŋgbɔ yihi bə yu kwa bəŋ bə yu bəfɛ. Ɨ yu wɔ fiɔŋ fi wə chanyɛ, tə wə' keŋkɛ wəma ba fichə yu jiŋ. 16 Yu jikə wɔkɔhɔ fiɔŋ fi wə chanyɛ, wə dze miɨ miu makə bənɨ bəfɛ kənə bə wə, bə chi gəŋə yu wɨ, fə bənchanyɛ bəchi keŋkɛ bənɨ bəfɛ makə bətɛ bə ləmiə nsa ya nəjiŋ. 17 Ɨ yu gəŋ ba nɨŋŋ ŋ'wɔ fiɔŋ fi bɔ chanyə, wə dze yu fɛŋ ntɛshɛ yi bənɨ bə kɨmbɨŋ'ə nəfiə. Yu jikə wɔkɔhɔ tɨ bə ntɛshɛ yi bənɨ bə kɨmbɨŋ'ə ya, wə tə dze yu chi miɨ wu na kkəhə Nyɔ makə nɨ miɨ wu na kwete kɨŋwatɨ.
18 Ntə bəŋ yɛyi lə, fiɔŋ fi bə jiba bə kansɨ sɛŋ koso, tə bə́ jiba ɨ bə́ kansɨ tɨ fi bɔ́, fiɔŋ fi bə jiba bə yanshɛ sɛŋ koso, tə bə́ jiba ɨ bə́ yanshɛ tɨ fi bɔ́. 19 Nchi tədiə bə bəŋ lə, ɨ bənɨ bəfɛ nə bəŋ ntɨŋ bɨŋ fiɔŋ sɛŋ koso ba nende kɨntsɨsɨ ntɨŋ, ɨ Baba wu ji bɔ́ fə fiɔŋ fia bɔ lɨ. 20 Bə kɨ kkɨ lə shi yi bənɨ bəfɛ makə bətɛ sə tɛshɛ ndzɨ yɨ wɛmɨ, njiwa ŋkɨ nji bɔ ntɨŋ.
Ŋgaŋ tsukɔ miɨ wu fie wu nə̀ sɨŋ bə yaa wu kwesɛ
21 Pita ba bi bə Jisɔs lə, “Baba na tsá miɛ bɨŋ yi naji lə ŋgwɨŋ fə bubiə bə mɨ, ŋkɨ ŋgufiɛ yu? Naji ɨ gəŋ fɔ tsá fumba bɨŋ?” 22 Jisɔs chi bə yu lə, “Ŋkə ntədiɛ bə wə lə na kwa tsá fumba. Mɨ ntə lə gbɨ fumba tsá fumba. 23 Bəma na fiɔŋ fi naji ɨ bə́ fɨkə buŋkuŋ bu bɔ́ bə ŋkuŋ wudɔ wu nə̀ se lə yu jiŋgə kɨ kpə wuhu lə, wu yu nə̀ nya bə bənɨ buhu bə nɨŋ'ə. 24 Nɨ yu nə̀ gbɔɔ kɨ jiŋgə ma, bə́ ba bə miɨ wudɔ, yihi fie ji fimbinchi. 25 Lə yu jikə kafɔ nsɔmbu, ŋkuŋ wa tə lə bə́ dze yu bə kpansɨ bə beŋ buhu, ma biɔŋ bihi bichi ba taŋŋə ba bə kpə wa ba sɔmbu fie ya su. 26 Lə ŋkuŋ tə manɨ, miɨ wa gbɔ yu nəfiə ba ku kaŋ bə yu, tə lə, ‘Baba, kânsɨ la shəŋ bə mɨ, njiwa nná nsɔmbɔ fiɔŋ fichi.’ 27 Shəŋ yidə fə miɨ wuhu wubəŋ tɔkaŋ nə yu wɨ, ba gufiɛ fie ya. 28 Bəmanɨ, miɨ wa kɨbɛɛ fɔ kɨ gɨntɨ. Lə yu fɔ miɨ wudɔ wɨ, wu bɔ bə yu nə̀ nɨntɨ ŋkuŋ lɨ, miɨ wa nə̀ ji yu bə fie biba gbɨª kwa. Yu bu shaŋ yu fəgbɨ ba tə lə, ‘Sɔ̂mbu mɨ fie yɛmɨ.’ 29 Miɨ wu nɨŋ wa gbɔ yu nəfiə, nende yu ba tə lə, ‘Kânsɨ la shəŋ bə mɨ, njiwa nná nsɔmbɔ wə.’ 30 Yu nɨŋŋ ba dze yu gəŋ fasɨ tsɔŋ yi buŋfia ntɨŋ, lə yu kɨ ji sɔ gəŋ fɔ tsa yi yu ná sɔmbɔ fie yihi. 31 Lə bənɨ bədɔ bə bɔ bə bɔ nə̀ nɨntɨ ŋəŋ fiɔŋ fi tɨchə wɨ, fi lɔ bɔ kɨtso. Bɔ bu gəŋ ba tə ŋkuŋ fiɔŋ fichi fi sə chɛɛ. 32 Ŋkuŋ bəndɨ yu, yu ba, ŋkuŋ tə bə yu lə, ‘Wə na ji fiɔŋ fi kɨlɔlɔ lə. Mɨ nsə ŋgufiɛ fie yɔhɔ chi, ndzɨ wə sə ku kaŋ bə mɨ. 33 Sə ji tɨ ɨ wə jikə kwesɛ yaa bə miɨ no wu bəŋ bə yu na nɨntɨ nɨŋ miu, chi nsə ŋkwesɛ cha yaa bə wə?’ 34 Shəŋ lɔ Ŋkuŋ, yu nya yu lə bə́ fasɨ tsɔŋ yi buŋfia ntɨŋ, bə́ funsu yu, sɨŋsɨŋ fɔ tsa yi yu sɔmbɔ fie yihi chi. 35 Bəma, na tɨ diəŋ nɨ Taa wu ji bɔ́ ná fəə bə miɨ chi nə bəŋ ntɨŋ, jilə yu kə gufiɛ wəmɛni bə shəŋ yihi chi.”