Ŋgaŋ tsukɔ shiŋ yi nə̀ la wɨ
15
Bənɨ bə nə̀ kwete kɨŋwatɨ bə bənɨ bəbiə bədɔ nə̀ balɨ fə Jisɔs ku lə bɔ wɔ fiɔŋ fi yu nə̀ tɨfiə. 2 Bəfalasi bə bənɨ bə nə̀ tɨfiə bilaŋ bi Nyɔ lə gbɔ kɨ nuŋɔ bɔ tɨdi lə, “Miɨ no' ləkə bənɨ bəbiə ba kɨ diɨ bə bɔ.” 3 Bəma, Jisɔs ma ŋgaŋ no bə bɔ lə,4 “Na yəŋ nə bəŋ ntɨŋ wu na ji bə shíŋ gbɨ, miuŋkpaŋ la lɨ, ɨ yu kɨ ji mɔɔŋ? Ɨ yu jikə shə yi gbɨ fumbɔɔ ntse fumbɔɔ ya kpa ba gəŋ kɨ noŋko miuŋkpaŋ ya, gəŋ fɔ tsa yi yu ŋəŋə yi wɨ? 5 Yu nɔŋ ba ŋəŋ yi wɨ, ɨ yu wɔ buni ba tɔ yi biə 6 kɨ kwəlɨ bə yi binchi. Yu kwə lɨ, ɨ yu tɛshɛ nsáŋ yihi bə bənɨ bə na me fə yu ku ba tə bə bɔ lə, ‘Bə bâ kə laŋ shiŋ yɛŋ yi sə la, mɨ nchi ŋəŋə yi wɨ.’ 7 Ntə bəŋ lə, na tɨ diəŋ nɨ kɨnlaŋ kɨbəŋ ná kɨ ji Nyɔ ku, ndzɨ miɨ wubiə miu wu' fichə shəŋ yihi. Bə́ ná laŋkɨ wa miɨ ya bənɨ gbɨ fumbɔɔ ntse fumbɔɔ bə na ji diəŋ bɔ jikə jimiɛ lə bɔ fichə shəŋ.
Ŋgaŋ tsukɔ kpə wu kɨtsu lə wɨ wu nə̀ la
8 Makə na kpansɨ wu la wu na keŋkɛ kpə wu bitsu lə yɔɔ, ɨ moŋkpaŋ la, ɨ yu kɨ ji mɔɔŋ? Ɨ yu jikə bɨlə kɨbɨlə ba yənsɨ tsɔŋ, dze tsa nɔŋ'ɨ gəŋ fɔ tsa yi yu ŋəŋə wu wɨ? 9 Yu nɔŋ ŋəŋ'ɨ, ɨ yu tɛshɛ nsáŋ yihi bə bənɨ bə na me fə yu ku ba tə lə, ‘Bə bâ kə laŋ kpə wɛŋ wu bitsu lə wu sə la, mɨ nchi ŋəŋə wu wɨ.’ 10 Ntə bəŋ lə, na tɨ diəŋ nɨ bənchinda bə Nyɔ lə na laŋkɨ ndzɨ miɨ wubiə miu wu' fichə shəŋ yihi.”
Ŋgaŋ tsukɔ wɛŋ wu nə̀ la wɨ
11 Jisɔs chanyɛ lə, “Miɨ wudɔ nə̀ ji bə beŋ bə nɨnsə bəfɛ. 12 Wu nəjiŋ wa jiji ba tə bə tɨɨ lə, ‘Taa, jɛ̂ biɛmɨ bishəŋə wə nya mɨ fɛŋ.’ Bəma, tɨɨ jɛ bishəŋə bia bə bɔ. 13 Wɛŋ wu nəjiŋ wa ləkə bihi bia bishəŋə, lə díɔ chɛ tsəsɨ, yu tɛshɛ bi bichi ba taŋə lɨ, tə lɛ gbəndɨ kɨtuŋ kɨdɔ ku dzəbudə ba gəŋ bɨsɨ kpə wa kɨn'yɛŋ ntɨŋ. 14 Lə yu bɨsɨ kpə wa wu ka, dzɔŋ yintaŋ bu kwe kɨtuŋ ka, yu kɨ fiəŋkə fiɔŋ fidiənə. 15 Bəma, yu gəŋ ba nɔŋ nɨŋ nə miɨ wudɔ lɨ ɨji miɨ nə kɨtuŋ ka ntɨŋ tɨ, lə yu kɨ nɨntɨ bə yu. Miɨ wa faŋ yu, yu gəŋ kɨ kɨki bifi bihi. 16 Yu kɨ se lə yu jiwa ɨ yu kɨdiɨ nə bidiəŋ bi bifi bia lə wɨ, bəmanɨ dzə jikə jimiɛ. 17 Lə yu gbɔ biŋgɔmbiɛ, yu dɨ bufɨ buhu jiŋ ba tə lə, ‘Bənɨ bə nɨŋ'ə bə taa lə na keŋkɛ bidiəŋ kɨyɛŋ bi yakɨ bɔ, nji mɛni ŋkkpɨ dzɔŋ. 18 Njiwa ndza ba tsu taa ku ba tə bə yu lə, “Taa, mɨ mfə bubiə bə Nyɔ ba fə bə wə tɨ. 19 Ŋkə ntsɔhɔ kwətsə lə bə́ kɨ tsɨsə mɨ lə wana. Dze kwa mɨ nɨ miɨ wɔhɔ wu nɨŋ.”’
20 Bəma, yu tə dza kɨ tsu tɨɨ ku. Lə yu kɨ ba fɔɔ fə ku wa ku, tɨɨ li yəsɨ ba ŋəŋ yu wɨ. Yaa kwe yu bə wɛŋ wa, yu dza wə ba lətə gəŋ kukɔ wɛŋ wa ba kanchɛ yu. 21 Wɛŋ wa tə bə yu lə, ‘Taa, mɨ mfə bubiə bə Nyɔ ba fə tɨ bə wə. Ŋkə ntsɔhɔ kwətsə lə bə́ kɨ tsɨsə mɨ lə wana.’ 22 Bəmanɨ, tɨɨ tsuba bəndɨ bənɨ buhu bə nɨŋ'ə ba tə lə, ‘Bə gə̂ŋ fɔfɔ ba nɔŋ kɨndzu kɨ ndzeŋe ba dɔŋ yu kɨ, bə dɔ̂ŋ yu fintɛŋ kpaŋ wɨ ma bikpa go yihi wɨ. 23 Bə gə̂ŋ kwe kɨntsumbɔ ka ba yembe lɨ, kə kɨdiɨ kə laŋkɨ, 24 ndzɨ wɛnɛ no nə̀ kkpə yu chi dzakɔ. Yu nə̀ la, yu chi fɔɔ.’ Bəma, bɔ gbɔ kɨ laŋkɨ.
25 Fiɔŋ fiŋ nə̀ dzee dɨ kɨ ji wəmɛni wuntaŋ' lɛ. Lə yu kɨ kwəlɨ, yu ba fɔɔ fə tsɔŋ ku, yu wɔ bikunɔ, kɨŋfidi shi. 26 Yu bəndɨ miɨ wu nɨŋ wudɔ ba bi bə yu lə, ‘Bə́ na binchi ji la lə.’ 27 Miɨ wa chi bə yu lə, ‘Wəma' kwə ndɛŋ. Bəma, chaa wɛnɨ' yembe kɨntsumbɔ kɨbəŋ ka, ndzɨ yu' ŋəŋ wəma yu ji su gwɨbuntaŋ.’ 28 Lə wəmɛni wuntaŋ wa wɔ manɨ, shəŋ tsuba bə yu, yu nɨŋŋ lə yu bekɛhɛ tsɔŋ. Tɨɨ fɔ ba gəŋ kɨ nende yu lə yu be la tsɔŋ. 29 Bəmanɨ, yu chi bə tɨɨ lə, ‘Bô ŋəŋ, mɨ nɨŋ bə wə nɨ mfia biya biŋ ntɨŋ bichi, ŋkə nsaa ba nɨŋŋ lə mfɨtəhə fiɔŋ fiɔhɔ fidɔ. Wə kə saa nya mɨ tɨmo fibi lə mfə kɨgbeyɛ su bɨ bə nsáŋ yɛŋ. 30 Tsulə wana wu nə̀ gəŋə no ba bɨsɨ bishəŋə bə bəkansɨ bə ndzenɛ lə ba, wə bu kwe kɨntsumbɔ ka ba yembe yu lɨ.’ 31 Tɨɨ chi bə yu lə, ‘Wɛnɛ, kə na ji mɛ tsá chi bə wə, fiɔŋ fichi fi nna ŋkeŋkɛ na fiɔhɔ. 32 Bəmanɨ, fi sə ndzeŋe lə kə kɨ laŋkɨ ndzɨ wəma no nə̀ kkpə, yu chi dzakɔ, yu nə̀ la, yu chi fɔɔ.’”