Wɛŋ wu nɨŋ wu kɨŋfinchə
16
Jisɔs chanyɛ bə beŋ buhu bə nɨŋ'ə lə, “Chɛ kpə wudɔ nə̀ ji bə wene wu nɨŋ wudɔ wu yu nə̀ galə lə yu kɨ jiŋgə biɔŋ bihi. Yu jiji ba wɔ lə wene wu nɨŋ wa na bɨsə biɔŋ bihi, 2 yu bəndɨ wene wa ba bi bə yu lə, ‘Fiɔŋ fi nna ŋ'woko fiŋ tsukɔ wə wɨ na la? Bânchɛ biŋwatɨ bichi bi wə na bondo kpə wɛŋ sɔ, wə ba chi mɨ bi. Wə tsɔhɔ nɨŋə bə mɨ.’ 3 Wɛŋ wu nɨŋ wa gəŋ jiŋ ba gɔmbiɛ lə, ‘Nɨ miɨ wɛmɨ wubəŋ na koŋko mɨ nə dɨ wu nɨŋ'ə bɨŋ, njiwa mfə nəŋ? Nɨ nna ŋkeŋkɛhɛ buŋga bu nɨŋə bə ji, yaa kwete mɨ bə nende yi fiɔŋ.’ 4 Yu gɔmbiɛ lə, ‘Mɨ ŋkkə fiɔŋ fi mfəə, fə tsa yi bə́ kɔŋɔ mɨ nə dɨ wu nɨŋ'ə bɨŋ, ŋkɨ ŋkeŋkɛ nsáŋ yi naji ɨ yi ləkə mɨ yi tsɔ́ŋ.’ 5 Bəma, yu bəndɨ bənɨ bə nə̀ ji bə fíe yi miɨ wuhu wubəŋ'ə miu miu. Wu fiəfiə ba, wɛŋ wa bi bə yu lə, ‘Wə naji lə wə sɔ̂mbu miɨ wɛmɨ wubəŋ la?’ 6 Yu chi lə, ‘Na bibə bi məŋ'ə bibəŋ bibəŋ gbɨ.’ Yu tə lə, ‘Kɔ̂ kɨŋwatɨ kɔhɔ kɨ fie lə kɨŋ wə jiŋ fəkoso fɔfɔ ba yashənɨ bɔndu lə mbaashɨŋ.’ 7 Yu fichə ba bi bə wudɔ wa lə, ‘Wə naji lə wə sɔmbu la wə wuwə?’ Yu chi lə, ‘Na jiŋ bijiŋə gbɨ.’ Yu tə lə, ‘Kɔ̂ kɨŋwatɨ kɔhɔ kɨŋ wə yashənɨ ba bɔndu lə bijiŋə gbɨyaŋ.’ 8 Lə miɨ wubəŋ wu wɛŋ wu nɨŋ no ŋəŋ nɨ yu donchɛ yu bufɨ manɨ, yu tsuba sɛŋ yu lə yu na fɨŋfə kɨtso.” Jisɔs tə kanə lə, “Bənɨ bə mbi no ntɨŋ na fɨŋfə bə biɔŋ bi bɔ na fɨtɨ ya nɨ bənɨ bə kɨŋgbooŋ'ə na fɨŋfə bə bibɔlə bi kɨŋgbooŋ'ə.9 Bəma, ntə bəŋ lə, bə kɨ dze biɔŋ biɛnɨ bi sɛŋ koso, bə kwete bushə su, fə tsa yi bi ka, ɨ Nyɔ ləkə bəŋ yu tsɔŋ dɨ wu bə ná kɨ ji tsá chi. 10 Miɨ wu na kkɨ njiŋgə fiɔŋ fintse buni, naji ɨ yu kkə tɨ njiŋgə fibəŋ. Miɨ wu na fɨtɨ kɨŋfinchə bə fiɔŋ fintse, naji ɨ yu finchə tɨ bə fibəŋ. 11 Ɨ bə na kkəhə nchiŋfi biɔŋ bi sɛŋ koso, ɨ yəŋ nya bəŋ biɔŋ bi məbiɔŋ? 12 Ɨ bə na kkəhə tɨ nchiŋfi fiɔŋ fi miɨ wudɔ lə buni, ɨ yəŋ nya bəŋ fiɛnɨ?
13 Naji ɨ wɛŋ wu nɨŋ kɨ nɨntɨ bənɨ bəbəŋ'ɨ bəfɛ kə. Ɨ yu dze kɨ nɨntɨ manɨ, ɨ yu kɨ lo bə wudɔ, yu laŋkɨ wudɔ, makə ɨ yu kɨ woko bə wudɔ buni, yu dze wudɔ wa koso. Naji ɨ bə kɨ nɨntɨ Nyɔ lɨ, bə nɨntɨ tɨ kpə lɨ kə.”
14 Nɨ Jisɔs chanyɛ manɨ, Bəfalasi wɔ biɔŋ biŋ bichi ba kɨ yɛshi yu, ndzɨ bɔ nə̀ laŋkɨ kpə kɨtso. 15 Jisɔs tə bə bɔ lə, “Na bəŋ bɛŋ bə na donchɛ gwɨ bənɨ nəfiə lə bə na ji bənɨ bəndzeŋe, bəmanɨ Nyɔ kkɨ biɔŋ bichi bi na ji bəŋ shəŋ. Bə kɨ kkɨ lə biɔŋ bi bənɨ na sɛnti lə na biɔŋ, na bi Nyɔ na ŋɨntɨ bi bɨfi yu lɨ bubəfiə.”
Kɨlaŋ bə buŋkuŋ bu Nyɔ lə
16 Jisɔs tə lə, “Fiəfiə nə̀ ji bə́ tɨfiə ji bilaŋ bi Mose lə bə biɔŋ bi bənɨ bə shɔŋ yi Nyɔ lə nə̀ bondo. Bəmanɨ, lə Jɔŋ ba, bə́ gbɔ kɨ tɨfiə shɔŋ yi ndzeŋe tsukɔ buŋkuŋ bu Nyɔ lə wɨ, miɨ chi diɔnɔ lə yu bê buŋkuŋ bwa ntɨŋ. 17 Fi na ji buŋkəmə bə bɔlu bə sha bə ŋka, ya nɨ na ji ɨ mbiɔndu yi kɨŋwatɨ la kɨlɔlɔ nə kɨŋwatɨ kɨ bilaŋ'ə ntɨŋ.
18 Fi kɨ ji lə, ɨ miɨ kɔŋ kpansɨ ba dze wudɔ, kɨjilə yu' fə bubiə diəŋ nɨ bə nlɛ kpansɨ miɨ wudɔ. Ɨ miɨ dze kpansɨ wu' fɔɔ nə miɨ wudɔ tsɔŋ, kɨjilə miɨ wa na dze kpansɨ miɨ.”
Ladzalɔs bə Chɛ kpə
19 Jisɔs chi tədiə lə, “Chɛ kpə wudɔ nə̀ jisu, yu dente gwɨ bə bindzu bi kpə lə bi ndzeŋe yɛyi yɛyi, yu woko buni díɔ chi. 20 Miɨ wu fiəŋkə wudɔ ji tɨ su, yɨ wuhu ji lə Ladzalɔs. Yu ji bə shí gwɨ chi. Bə́ nə̀ ga yu kɨ shɨ yu jimi chɛ kpə wa fiəŋ, 21 yu nə̀ ji mɨ yu wokɔ lə diŋkəla tsa yi miɨ wa kɨdiɨ ɨ mənambu kɨ gbɔyɛ, yu dete, yu diɨ. Chi yu nə̀ jimiɛ mɨ manɨ, bíə kɨ ba yi lətɨ shí ya. 22 Lə kɨ ji tsa yidɔ wɨ, miɨ wu fiəŋkə wa kkpə, bənchinda bə Nyɔ lə ba ba tɔ yu gəŋ ga yu dɨ wu buni lə wɨ fə Ablaham ku. Lə chɛ kpə wa kkpə tɨ, bə́ di yu. 23 Yu gəŋ ji boso ntɨŋ kɨ ji mɨ ŋgə ntɨŋ. Lə yu li yəsɨ, yu ŋəŋ Ablaham wɨ dzəbudə bə Ladzalɔs fə yu ku. 24 Yu bəndɨ lə, ‘Taa Ablaham, kwêse yaa bə mɨ wə faŋ Ladzalɔs, yu chɛse kpaŋ wuhu ŋgɔŋ ntɨŋ, yu ba dɨsɨ lɨmɨ wɛŋ su. Nna nji bə funyi wubəŋ boso wuŋ ntɨŋ.’ 25 Ablaham chi bə yu ji lə, ‘Wɛnɛ, gɔ̂mbiɛ tsa yi wə nə̀ bambi wə ji mbi wu koso ntɨŋ. Wə nə̀ keŋkɛɛ biɔŋ bi ndzeŋe bichi tsa ya wɨ, Ladzalɔs woko ji ŋgə. Fɛŋ Ladzalɔs wa buni ntɨŋ, wə ji funyi ntɨŋ. 26 Na kwa fiŋ kə. Kkə tɨ lə kɨfɔŋkɔ kɨbəŋ na jɛti bɨ bə wə naha kɨ bə́ fəə. Naji ɨ miɨ dza nə mɛ ba llə ba dɨ wu wə na ji kə, naji ɨ miɨ dza tɨ kə nə dɨ wu wə na ji wɨ ba llə nɛhɛ.’ 27 Chɛ kpə wa chi nendɛ lə, ‘Butɨɨ taa, fâŋ kwa la Ladzalɔs bɨ ku. 28 Nna nji bə bəŋgwɨŋ bətɨŋ, yu gəŋ loso bɔ lə bɔ dzê tsa bɔ tə kə ba tɨ dɨ wu ŋgə lə wuŋ ntɨŋ.’ 29 Ablaham chi ji lə, ‘Bəwəma ba na keŋkɛ biŋwatɨ bi Mose nə̀ bɔndɔ bə bi bənɨ bə shɔŋ yi Nyɔ lə nə̀ bɔndɔ, bɔ kɨ woko biɔŋ bi bɔ na chanyɛ.’ 30 Chɛ kpə wa nɨŋŋ ba tə lə, ‘Yɛ taa Ablaham, jilə ə dzakɔ miɨ wudɔ nə kkpə lɨ ba gəŋ tɨfiə bɔ, ɨ bɔ wɔ ba fichə shəŋ yibɔlə.’ 31 Ablaham chi bə yu lə, ‘Ɨ bɔ nɨŋŋ ŋ'wɔ fiɔŋ fi Mose bə bənɨ bə shɔŋ yi Nyɔ lə na tɨdi, tə naji ɨ bɔ jikə wɔkɔhɔ tɨmo fi miɨ wu' dzakɔ nə kkpə lɨ tədiə.’”