Ntɨfiə yi Jisɔs tsukɔ bubiə wɨ bə kɨmbɨŋ bə nɨŋ
17
Jisɔs tə bə beŋ buhu bə nɨŋ'ə lə, “Biɔŋ bi na tosɔ bənɨ lə bɔ kɨ fɨtɨ bubiə ná kaha. Bəmanɨ, lɔŋ bə miɨ wu na tosɔ bənɨ lə bɔ kɨ fɨtɨ bubiə. 2 Fi na ndzeŋe lə bə́ ji nasɨ wubəŋ kɨmiə kɨhɨ wɨ ba me yu ŋgɔŋ məmbəŋ ntɨŋ, ya nɨ na ji lə yu kɨ fɨtɨ beŋ bɛŋŋ fɨtɨ bubiə. 3 Bə kɨ dze tsa.Ɨ wəma fə wə bubiə, wə chanyɛ bə yu. Yu fichə shəŋ yihi, wə gufiɛ yu. 4 Yu fə tɨmo biɔŋ bibiə bə wə tsá fumba butsu bumo ntɨŋ ba kɨ ba yu kuchi kaŋ lə yu' gbɔ, tə wə naji lə wə gufiɛ yu.”
5 Beŋ bə Baba lə bə faŋə jiji ba tə bə yu lə, “Fə̂ kɨmbɨŋ kaha tɛ.” 6 Baba chi lə, “Ɨ bə na ji bə kɨmbɨŋ kɨ ji kwa nɨ shɛmi yi finsonso, tə naji ɨ bə tə bə kɨtɨ kɨbəŋ kɨŋ lə kɨ woɔ nə mɛ ba gəŋ tishɛ gwɨ yi kɨ ŋgɔŋ məmbəŋ ntɨŋ, ɨ kɨ wɔ bəŋ.
7 Bə dzê lə miɨ nə kɨntsu kɛnɨ ntɨŋ na keŋkɛ wene wu nɨŋ wu na nɨntɨ kə, makə yu jiŋgə shíŋ, ɨ yu kwə lɨ, ɨ yu bu tə lə wene wu nɨŋ wa gəŋ dze bidiəŋ bihi ba jiŋ kɨdiɨ? 8 Naji ɨ fi kɨ ji manɨ kə. Fiɔŋ fi naji ɨ yu tə na lə, yu gə̂ŋ yashənɨ bindzu ba fə yu bidiəŋ ba bə bi, tə kɨ wokɔ tsa yi yu diə ba mu lɨ, ɨ wene wu nɨŋ wa tə banchɛ fío ya ba tə gəŋ kɨ diɨ. 9 Jilə wɛŋ wu nɨŋ wa' fə biɔŋ biŋ bichi, ɨ miɨ wuhu wubəŋ wa nya yu kɨmbafə tɨmo? 10 Na tɨ diəŋ nɨ fi na ji bə bəŋ. Bə diɔ ba nɨŋ nɨŋ yi bə́ nya bəŋ yi ka lɨ, bə tə kwa lə, ‘Kə na ji fiaha ji beŋ bə nɨŋ'ə, kə nɨŋ kwa ji nɨŋ yi na ji yaha.’”
Jisɔs wəmiəsɨ bənɨ bə kɨnsansa lə yɔɔ
11 Nɨ Jisɔs nə̀ gɨntɨ Jɛlosalɛm, yu chɛ ntandə yi sha yi Samaliya bə yi Galili ntɨŋ. 12 Lə yu kɨ gɨntɨ bɛɛ kɨtuŋ kɨdɔ ntɨŋ, bənɨnsə bədɔ yɔɔ bə nə̀ ji bə kɨnsansa ŋəŋ yu wɨ, bɔ ji dzəbudə, 13 bɔ gbɔ kɨ bɨndɨ bə diɛ bɔ́ lə, “Jisɔs chɛ bənɨ, kwêse yaa bə bɨ.”
14 Lə Jisɔs ŋəŋə bɔ wɨ, yu tə lə, “Bə gə̂ŋ donchɛ gwɨ́ yɛnɨ bə bəchɛ bintɔfiɛ.” Nɨ bɔ dza kɨ gɨntɨ, bɔ bu wəmiə ba tsalə lɨ, bɔ bambi dzə. 15 Miɨ wudɔ nə bɔ ntɨŋ ŋəŋ lə yu' wəmiə, yu bu fichə kɨ tsu jiŋ fə Jisɔs ku, yu kuntəə Nyɔ bə diɛ bɔ́. 16 Lə yu ba, yu bu gbɔ Jisɔs nəfiə ba bafə yu. Miɨ wa nə̀ miɨ Bəsamalita. 17 Jisɔs tə lə, “Sə bənɨ yɔɔ bə nsə ŋ'wəmiəsɨ bɔ kɨ ji ntsaaŋ, bə fumbɔɔ ba dzəŋ? 18 Kɨjilə miɨ na sɨŋ wu' ŋəŋə lə yu tsu jiŋ ba nya Nyɔ kɨmbafə yasə kwa miɨ wubanə no?” 19 Jisɔs tə bə yu lə, “Dzâ wə, kɨ gɨntɨ fiɔhɔ. Shəŋ yi wə galə mɨ wɨ' fə wə wəmiə.”
Buŋkuŋ bu Nyɔ lə bu fɛŋ'ə bə bu ná ba
20 Bəfalasi jiji ba bi bə Jisɔs lə buŋkuŋ bu Nyɔ lə ná ba tsa yi la lə. Jisɔs chi lə, “Fiɔŋ na sɨŋ su fi ná tseyɛ tsa yi Nyɔ ná gbɔɔ kɨ sakɨ buŋkuŋ buhu. 21 Miɨ na sɨŋ su wu ná tədiə lə, ‘Bə bô bə ŋəŋ, Nyɔ no wu na sakɨ mɛ,’ Makə lə, ‘Yu wuhu wu na sakɨ maha.’ Bə wôkɔ bə wɔ, buŋkuŋ bu Nyɔ lə na ji bəŋ ntɨŋ.”ª
22 Yu tə fichə fɛŋ ba chanyɛ bə beŋ buhu bə nɨŋ'ə lə, “Tsa ba ya yi bə ná kɨ se lə bə ŋə̂ŋ Wɛŋ wu Miɨ butsu bumo kwa, ɨ bə jikə ŋəŋkəhə. 23 Ná kɨ ji tsa ya wɨ, ɨ bənɨ bədɔ kɨ tɨdi lə, ‘Bə bô bə ŋəŋ, yu wuhu maha’, makə lə, ‘Bə bô bə ŋəŋ, yu no mɛni.’ Bɔ dze kɨ chanyɛ manɨ, bə kə̂ biəlɨ bɔ makə lə bə gəŋ jiŋgə. 24 Bə na kkɨ nɨ dzaŋ ba yi lakiɛ bɔ́ mɛ mwawm, bo yi mbi lə nna chi tsalə mɛ ŋgbooŋ, bənɨ bəchi ŋəŋ. Na tɨ diəŋ nɨ bənɨ bəchi ná ŋəŋə Wɛŋ wu Miɨ wɨ butsu bu yu ná fichə ba lɨ. 25 Bəmanɨ, ŋgəŋ yihi ba chi ba, na ji yu sə sa wɔ ŋgə kɨtso ŋkɨkɨ wu fɛŋ no nɨŋŋ yu. 26 Diəŋ tɨ nɨ fi nə̀ ji tsa yi Nuwa wɨ, na tɨ nɨ fi ná kɨ ji tsa yi Wɛŋ wu Miɨ. 27 Bənɨ nə̀ ji bɔ diɨ, bɔ mu, bənɨnsə dze bəkansɨ, bənɨ nyaa beŋ bənɨnsə dze, gəŋ fɔ butsu bu Nuwa nə̀ bɛɛ kɨkpɔŋkɔ ntɨŋ ŋgɔŋ bukiɛ ba jishi bɔ bəchi. 28 Fi ná kɨ ji tɨ diəŋ nɨ fi nə̀ ji tsa yi Lɔt wɨ. Bənɨ nə̀ diɨ, bɔ mu, bɔ diɨ shɨ, bɔ nɨntɨ kə́, bɔ ma tsɔ́ŋ. 29 Butsu bu Lɔt nə̀ fɔɔ nə Sɔdɔm, Nyɔ bu shisəsɨ boso wuhu wu kɨ shichi wu doko nɨ boso wu muŋkaŋ'ə, wu shi ba jishi bənɨ bə Sɔdɔm bəchi. 30 Na tɨ diəŋ nɨ fi ná kɨ ji butsu bu Wɛŋ wu Miɨ ná butə wɨ.
31 Ná kɨ ji butsu bwa, miɨ wu na ji fuŋ biɔŋ bihi ji tsɔŋ, yu kə̂ shikɛ lə yu be ba dze lɨ. Diəŋ tɨ, ɨkɨ miɨ wu na ji kpa tə ná kɨ kwəlɨ lə yu gəŋ dze fiɔŋ. 32 Bə gɔ̂mbiɛ fiɔŋ fi nə̀ tɨchə kpansɨ Lɔt. 33 Miɨ wu na noŋko lə yu bətə buwəŋ buhu lə yu tə kə lasə, yu jiwa ɨ yu lasɨ bu. Miɨ wu na lasə buwəŋ buhu na wu na bətə bu bubətə. 34 Ntə bəŋ lə, ná kɨ ji butsu bwa, bənɨ ná kɨ me ta bəfɛ, ɨ bə́ dze miu, ɨ wudɔ shə. 35 Bəkansɨ bəfɛ ná kɨ gweke buna fənasɨ, ɨ bə́ dze miu, ɨ wudɔ shə. 36 [Bənɨnsə bəfɛ ná kɨ ji kə, ɨ bə́ dze miu, ɨ wudɔ shə.]”ª 37 Beŋ buhu bə nɨŋ'ə tə bi bə yu lə, “Baba, fiɔŋ fia ná tɨchə ji məŋ?” Yu chi ji ŋgaŋ ntɨŋ lə, “Dɨ wu la wu fiɔŋ fiŋkkpə na ji, na mɨ wu bəŋgulu ba bɔ kɨ tɛshɛ.”