Jisɔs tə lə bə́ ná kpodiɛ lɨ tsɔŋ yi bintɔfiɛ
24
Lə Jisɔs fɔ nə mbaŋ wu tsɔŋ yi bintɔfiɛ ntɨŋ kɨ gɨntɨ, beŋ buhu bə nɨŋ'ə kɨnɨ ba ba fə yu ku kɨ donchɛ yu tsɔ́ŋ yi nə̀ ji mbaŋ wu tsɔŋ yi bintɔfiɛ ntɨŋ. 2 Bəmanɨ, Jisɔs tə bə bɔ lə, “Bə ŋəŋ tsɔ́ŋ yiŋ? Ntə bəŋ yɛyi lə ta mo ná shɨkəhə wudɔ bɨŋ bə́ ŋgboso sɨŋ koso.”3 Lə Jisɔs bəndɨ ba gəŋ jiŋ Dzo yi Bitɨ bi Ɔlif lə bɨŋ, beŋ buhu bə nɨŋ'ə kɨnɨ bɔbɔ ba ba fə yu ku ba tə lə, “Tə̂ bɨ tsa yi fiɔŋ fiŋ ná tɨchə, ma fiɔŋ fi ná kɨ donchɛ tsa yi wə ná kɨ ba, bə tsa yi mbi na ka” 4 Jisɔs chi bə bɔ lə, “Bə dzê tsa miɨ tə kə fukiɛ bəŋ ɨ bə fɨsə. 5 Bə kɨ kkɨ lə bənɨ kɨyɛŋ ná kɨ ba bɔ dze yɨ wɛŋ bɔ galɨ fiə, miɨ tɨdi lə, yu na ji Nchitə wu Nyɔ nə̀ kaa wa. Ɨ bɔ fə manɨ ba fukiɛ bənɨ kɨyɛŋ, ɨ bənɨ ba fɨsə. 6 Bə ná kɨ woko nɨ bə́ na tunɔ dzoŋ, bə woko tɨ shɔ́ŋ yi dzoŋ'ə. Bə dze kɨ woko manɨ, shəŋ kə kɨ bɨfi bəŋ. Biŋ na biɔŋ bi naji lə bi kɨ ji. Bəmanɨ bi na donchɛhɛ lə mbi ka wa. 7 Kɨtuŋ ná kɨ tunɔ dzoŋ bə kɨdɔ, ŋkuŋ wudɔ tunɔ dzoŋ bə wudɔ. Dzɔŋ ná kɨ ji, sha nɨkə bidɨ lɨ bidɨ lɨ. 8 Biɔŋ biŋ bichi ji diəŋ nɨ bulo bu kpansɨ lə bu fiəfiə tsa yi yu sə gbosɔ.
9 Bə́ ná kɨ kwediɛ bəŋ, bə́ nyaa lə bə́ funsu bəŋ, ɨ bə́ kɨ kkpɨshɛ bəŋ. Bituŋ bichi ná kɨ ti bə bəŋ ndzɨ yɨ wɛŋ. 10 Bəma ɨ bənɨ kɨyɛŋ gbɔ nə kɨmbɨŋ kɨbɔlə wɨ, bɔ ti bə gwɨ́ yibɔlə, bɔ taŋŋə gwɨ́ yibɔlə. 11 Bənɨ kɨyɛŋ bə na lənə lə na Nyɔ wu' faŋə bɔ ná kɨ ba bɔ fukiɛ bənɨ kɨyɛŋ. 12 Nɨ məmbiə ná kɨ yɛnti mɔ gɨntɨ fiə, fi ná kɨ fɨtɨ ɨ kɨnse kɨ bənɨ lə kɨyɛŋ kɨ tsu wəəə. 13 Bəmanɨ, miɨ wu ná kansə shəŋ gəŋ tuŋ fəŋgbɨŋ na wu ná fɔɔfo. 14 Bə́ naji lə bə́ tɨfiə shɔŋ yi ndzeŋe nyi yi na tsukɔ buŋkuŋ bu Nyɔ lə wɨ gəŋ fɔ mbi ntɨŋ chi, bituŋ bichi wɔ, fə mbi tə ka.
Bitɨfiə tsukɔ tsa yi ŋgə wubəŋ wɨ
15 Bəma tsa yi bə' ŋəŋə ɨji bubiə bu kɨnyənə lə bu naji ɨ bu nyefele dɨ, bu Dania miɨ wu shɔŋ yi Nyɔ nə̀ chanyɛ tsukɔ bu wɨ, bə ŋəŋ bu lɨmi ji dɨ wu ntsaaŋ ntɨŋ (miɨ wu na tanchɛ kɨŋwatɨ kɨŋ, yu wɔ̂ fiŋ buni,) 16 bənɨ bə na ji Judɛya, bɔ lə̂tə ba bəndɨ dzó bɨŋ. 17 Miɨ wu na ji fuŋ, yu shi lɨ, yu kə̂ bekɛ tsɔŋ lə yu dze fiɔŋ fihi fi na ji sɔ. 18 Miɨ wu na ji kə, yu kə̂ kwə lə yu gəŋ dze kɨndzu kɨhɨ kɨ nəbɨŋ. 19 Ŋgə wu kɨtso díɔ ya ntɨŋ ná kɨ ji wu bəkansɨ bə tɔ lə, ma bə na mambɔ beŋ. 20 Bə kɨ tsɨsə lə kɨlɨtɨ kɨŋ kə kɨ ji tsa yi kɨkumɔ ntɨŋ, makə butsu bu fufiɛ, 21 ndzɨ ŋgə ná kɨ ji tsa ya wɨ, ŋgwe yi wa ŋgə nə̀ kə saa ji lɨ dze nə mbi nə̀ bɛyɛ ba tuŋ ndɛŋ, ŋgwe yi wa ŋgə ná tsɔhɔ jimiɛ su. 22 Nyɔ tə nə̀ jikə yɛtɛ nə díɔ yi ŋgə wa lə wɨ, ɨ miɨbəwəŋ miu jikə fɔkɔ fo. Bəmanɨ Nyɔ ná yɛtɛ lɨ nə díɔ ya wɨ ndzɨ bənɨ buhu bə yu' sabiɛ. 23 Ná kɨ ji tsa ya wɨ, miɨ tə bə bəŋ lə, ‘Bə bô bə ŋəŋ, Nchitə wu Nyɔ nə̀ kaa wa no mɛ!’ makə lə, ‘Yu wa maha!’ bə kə̂ bɨmiə. 24 Bə kɨ kkɨ lə bənɨ ná kɨ ba bɔ lənə lə bɔ na ji bənchitə bə Nyɔ nə̀ kaa, ɨ bədɔ kɨ tɨdi lə bɔ na ji bənɨ bə shɔŋ yi Nyɔ lə, bɔ fɨtɨ biɔŋ bintaŋ bi na donchɛ buŋga bubɔlə, bɔ fɨtɨ tɨ biɔŋ bi kɨgəsə kɨ wɨŋə lə fə bɔ fukiɛ bənɨ ɨ bɔ fɨsə. Jilə bɔ' keŋkɛ dzə, ɨ bɔ fukiɛ tɨ ma bənɨ bə Nyɔ' sabiɛ. 25 Bə wôkɔ bə wɔ, mɨ ntə biɔŋ biŋ bə bəŋ fə bi tə tɨchə. 26 Bəma, bənɨ dze kɨ tɨdi bə bəŋ lə, ‘Bə bô bə ŋəŋ, Nchitə wu Nyɔ nə̀ kaa wa, yu wa kpa,’ bə kə̂ gəŋkə sɔ. Makə lə, ‘Bə bô bə ŋəŋ, yu wuhu tsɔŋ,’ bə kə̂ bɨmiə bə bɔ. 27 Bə kɨ kkɨ lə nɨ dzaŋ na ba yi lakiɛ bɔ́ dia wu diɔ na boso, ba tsalə gəŋ fɔ dɨ wu wu na midi, na tɨ diəŋ nɨ mba yi Wɛŋ wu Miɨ ná kɨ ji. 28 ‘Dɨ wu la wu fiɔŋ fiŋkkpə na ji, na mɨ wu bəŋgulu ba bɔ kɨ tɛshɛ.’
Nɨ Jisɔs ná kɨ ba
29 Tsa yi ŋgə wubəŋ no ná ba chɛ lɨ tɨmɛ, ɨ diɔ jiji ba jimə lɨ, ɨ fiəə tsukə tsalə, ɨ mbíansɨ gbɔyɛ, ɨ biɔŋ bi bɔ́ bichi bi na keŋkɛ buŋga nɨkə. 30 Ɨ fiɔŋ fi na donchɛ Wɛŋ wu Miɨ lafu bɔlu wɨ. Ɨ bituŋ bichi bi mbi ntɨŋ gbɔ kɨ dzudi gwɨ. Bənɨ ná ŋɨntɨ nɨ Wɛŋ wu Miɨ na ba kɨku ntɨŋ nə bɔ́ bə buŋga ma bubəŋ bu kɨtso lə. 31 Kɨmbu kɨbəŋ ná chaŋkɨ bə diɛ bɔ́, ɨ yu tə faŋ bənchinda buhu ɨ bɔ gəŋ bo nna yi mbi lə ntɨŋ bə yi bɔ́ ba banchɛ bənɨ buhu bə yu' sabiɛ.
32 Bə fɨ̂yə fiɔŋ nə findəŋ wɨ. Chɛ́ yi fi lə ba yi tɛ lɨ, nyí gbɔ kɨ bete su, bə tə kkə lə tsɨfɨ yashənɨ ya. 33 Na tɨ diəŋ nɨ tsa yi bə ná kɨ ŋɨntɨ biɔŋ biŋ wɨ bichi, ɨ bə tə kkə lə yu wa gwɨgwɨ, gwɨgwɨ tɨmo fə fiənsɨ ku. 34 Ntə bəŋ yɛyi lə naji ŋkɨkɨ wu fɛŋ no ná ka kə biɔŋ biŋ bichi ntɨchə sɨŋ. 35 Bɔlu bə sha ná ka lɨ, bəmanɨ diɛ yɛmɨ naji ɨ yi ná shəshə nɨkə lɨ kə.
Miɨ na sɨŋ su wu na kkɨ butsu makə tsa yi Jisɔs ná ba
36 Miɨ na sɨŋ su wu na kkɨ butsu bwa makə tsa ya. Bənchinda bə Nyɔ lə, ma tɨ Wɛŋ wu Nyɔ na kkəhə tɨmo. Na kkɨ kwa Nyɔ yu wumbɔŋ. 37 Diəŋ nɨ fi nə̀ ji tsa yi Nuwa wɨ, na tɨ nɨ fi ná kɨ ji tsa yi Wɛŋ wu Miɨ ná kɨ ba. 38 Tsa yi ŋgɔŋ nə̀ bambi kə bukiɛ mbi ntɨŋ, bənɨ nə̀ ji fibɔlə bɔ diɨ, bɔ mu, bəkansɨ bə bənɨnsə tɛshɛ bibinə, bənɨ nya beŋ bəbɔlə bɔ ləkə bibinə, gəŋ fɔ butsu bu Nuwa nə̀ bɛɛ kɨkpɔŋkɔ ntɨŋ, 39 bənɨ ba jikə kkə fiɔŋ fi naji lə fi kɨ ji, gəŋ fɔ tsa yi ŋgɔŋ nə̀ bukiɛ mbi ntɨŋ ba kundi bɔ bəchi gəŋ bə bɔ. Na tɨ diəŋ nɨ fi ná kɨ ji butsu bu Wɛŋ wu Miɨ ná kɨ ba. 40 Bənɨnsə bəfɛ ná kɨ ji kə, ɨ bə́ dze miu, ɨ miu shə. 41 Bəkansɨ bəfɛ ná kɨ gweke buna fənasɨ, ɨ bə́ dze miu, ɨ miu shə. 42 Bəma, bə kɨ tɨntɨ ŋkɨ ndzɨ bə na kkəhə butsu bu Baba wɛnɨ ná ba. 43 Bə kkə̂ lə ɨ chɛ tsɔŋ na kkɨ tsa yi miɨ wu buyi jiwa yu ba bbutsu, ɨ yu kɨ tɨntɨ ŋkɨ, ɨ yu jikə galə ma lə bə́ ba buŋ tsɔŋ yihi. 44 Bə naji lə bə kɨ tɨntɨ tɨ ŋkɨ ndzɨ Wɛŋ wu Miɨ ná ba tsa yi bə na jikə kkə.
Bitɨfiə tsukɔ wɛŋ wu nɨŋ wu kɨyɛyi wɨ bə wu dyɛ
45 Wɛŋ wu nɨŋ wu na ji bə kɨyɛyi, yu ji tɨ bə bufɨ na wu la? Na kə wa wu miɨ wubəŋ wuhu' galə yu lə yu kɨ jiŋgə tsɔŋ yihi, lə tsa kwətsə lɨ, yu nya beŋ bə nɨŋ'ə bidiəŋ? 46 Kɨnlaŋ kɨbəŋ ná kɨ ji kɨ wɛŋ wu nɨŋ wa lə wu miɨ wubəŋ wuhu ná ba ŋəŋ yu nɨntɨ nɨŋ diəŋ nɨ yu nə̀ji lə yu kɨ nɨntɨ. 47 Ntə bəŋ yɛyi lə miɨ wuhu wubəŋ ná sɛnti yu ba ga ɨ yu kɨ jiŋgə biɔŋ bihi bichi. 48 Bəmanɨ ɨ wɛŋ wu nɨŋ wa na wu na ji bə fiə wubiə, yu tɨdi bə gwɨ yihi lə, ‘Miɨ wɛmɨ wubəŋ naji ɨ yu kəmə bə mba kə,’ 49 yu gbɔ kɨ kɨtɨ beŋ bə nɨŋ'ə bədɔ bə bɔ bə bɔ na nɨntɨ, yu diɨ, yu mu bə bənɨ bə na mu bɔ chinchi, 50 tə miɨ wubəŋ wuhu ná butə waa butsu budɔ bu yu' gɔmbiɛhɛ kə, ma tsa yi yu nə̀ jikə kkə. 51 Yu ná butə manɨ, ɨ yu nya wɛŋ wu nɨŋ wa ŋgə, faŋ yu lə yu gəŋ kɨ ji kɨntsu kɨ bənɨ lə ntɨŋ bə na lɔshə, ɨji na dɨ wu bənɨ ná kɨ dɨ bɔ diɨ gəsɨ.”