Ŋgaŋ tsukɔ bəsɔŋfa bə kansɨ bədɔ wɨ yɔɔ
25
“Naji ɨ bə́ fɨkə buŋkuŋ bu bɔ́ bə bəsɔŋfa bə kansɨ bədɔ yɔɔ bə nə̀ dzɛɛ bibɨlə bibɔlə ba fɔ lə bɔ gəŋ ləkə nomə kpansɨ wufa wudɔ. 2 Bɔ nə̀ ji manɨ bətɨŋ fidi, bətɨŋ fɨŋfə. 3 Fi kɨ ji lə bəŋfidi ba nə̀ dze bibɨlə bibɔlə ba jikə dzɛɛ məŋ məndɔ, 4 bəmanɨ bəfɨ ba dze bibɔlə bibɨlə ba dze ma məŋ məndɔ. 5 Bɔ gəŋ ba kɨ wokɔ nomə kpansɨ wufa wa, yu shentɛ bə mba, kɨnɨ kɨ njiŋki bɔ bəchi, bɔ bu me. 6 Lə kɨ ji bbutsu kɨntɨŋ kɨntɨŋ, bɔ wɔ miɨ wudiə lə, ‘Lililililili, bə ŋə̂ŋ, nomə kpansɨ wufa no lɔɔɔ! Bə fɔ̂ bə ba ləkə yu lɔɔɔ.’ 7 Bəsɔŋfa bə kansɨ ba bəchi bu dza wə ba bəndəsɨ bibɨlə bibɔlə. 8 Bəsɔŋfa bə kansɨ bəŋfidi ba tə bə bəfɨ ba lə, ‘Bə nyâ la bɨ nə məŋ mɛnɨ wɨ. Bibɨlə biaha nyimə bia.’ 9 Bəmanɨ bəfɨ ba chi lə, ‘Naji ɨ mɔ kwətsə bɨ bəchi lɨ kə. Bə gə̂ŋ ji dɨ wu bə́ na taŋŋə, ba taŋ mɛnɨ.’ 10 Nɨ bɔ nə̀ gəŋə taŋə, nomə kpansɨ wufa wa shə ba lafu lɨ. Bə nə̀ ji ba bɔ' fə gwɨ kɨ wokɔ, bɔ gəŋ ba be bɔ bə yu tsɔŋ yi kɨgbeyɛ kɨ bibinə lə ntɨŋ ba fasɨ kɨgwəŋ. 11 Nəjiŋ wusu bəsɔŋfa bə kansɨ bədɔ ba bə nə̀ gəŋə ba məŋ taŋə lafu tɨ ba ləŋ fiəŋ kɨ tɨdi lə, ‘Miɨ wubəŋ, miɨ wubəŋ, gû kɨgwəŋ kə be.’ 12 Bəmanɨ, yu chi bə bɔ lə, ‘Ntə bəŋ yɛyi lə nna ŋkkəhə bəŋ.’ 13 Fi kɨ ji lə, bə tɨ̂ŋ ŋkɨ, bə kɨ wokɔ, ndzɨ bə na kkəhə butsu bwa makə tsa ya.Ŋgaŋ tsukɔ beŋ bə nɨŋ'ə wɨ bətɛ
14 Tsa ya wɨ fi ná kɨ ji nɨ miɨ wudɔ wu nə̀ji lə yu lɛ gbəndɨ, yu bəndɨ beŋ buhu bə nɨŋ'ə ba nya kpə wuhu bɔ kaŋ. 15 Yu nə̀ nya wɛŋ wu nɨŋ wudɔ biba gɨtɨŋ, yu nya wudɔ biba gɨfɛ, nya wudɔ biba gbɨ. Yu nə̀ nyaa yu biəlɨ nɨ buŋga bu miɨ lə nə̀ ji. Nɨ yu nya cha manɨ, yu lɛ gbəndɨ wuhu. 16 Wɛŋ wu nɨŋ wu nə̀ ləkə wa biba gɨtɨŋ, gəŋ tsa miu ba fə shɨ su, diə mbɨ biba gɨtɨŋ. 17 Wu nə̀ ləkə wa biba gɨfɛ, fə tɨ shɨ ba diə mbɨ biba gɨfɛ. 18 Bəmanɨ, wɛŋ wu nɨŋ wu nə̀ ləkə wa biba gbɨ, gəŋ fihi ba chiŋ kɨkpɔ ba nyələ kpə wu tɨɨ lə wa sɔ.
19 Lə miɨ wubəŋ wu beŋ ba lɛ gbəndɨ wa, yu gəŋ tsə sɔ kɨtso. Lə yu fichə, yu bəndɨ beŋ buhu lə bɔ bə bɔ nachɛ biɔŋ. 20 Wɛŋ wu nɨŋ wu nə̀ ləkə wa biba gɨtɨŋ ba bə biba gɨ tɨŋ tsá fiɛ, tə lə, ‘Taa, wə nə̀ nya mɨ biba gɨtɨŋ, bo ŋəŋ nnə̀ nshə ba fə shɨ su ba keŋkɛ bidɔ biba gɨtɨŋ bɨŋ.’ 21 Miɨ wubəŋ wuhu tə bə yu lə, ‘Wə bafə, wə fə buni. Wə na ji wɛŋ wu nɨŋ wu ndzeŋe, wə ji tɨ wu kɨyɛyi! Wə nə̀ shə kɨ jiŋgə fiɔŋ fintse buni. Bəma, njiwa ŋga wə fɛŋ ɨ wə kɨ jiŋgə ji fibəŋ. Bê la buni bu miɨ wubəŋ wɔhɔ lə ntɨŋ.’ 22 Wɛŋ wu nɨŋ wu wuhu wa kpə nə̀ ji biba gɨfɛ, tə lə, ‘Taa, wə nə̀ nya mɨ biba gɨfɛ. Bô ŋəŋ, nnə̀ nshə ba fə shɨ su ba bɨkə bidɔ biba gɨfɛ bɨŋ.’ 23 Miɨ wubəŋ wuhu tə bə yu lə, ‘Wə bafə kɨtso. Wə na ji wɛŋ wu nɨŋ wu ndzeŋe, wə ji tɨ wu kɨyɛyi! Wə nə̀ shə ba kkə njiŋgə fiɔŋ fintse. Bəma, njiwa ŋga wə fɛŋ ɨ wə kɨ jiŋgə ji fibəŋ. Bê la buni bu miɨ wubəŋ wɔhɔ lə ntɨŋ.’ 24 Wɛŋ wu nɨŋ wudɔ wa wu nə̀ ləkə wa biba gbɨ ba tɨ ba tə lə, ‘Taa, nnə̀ ŋkkɨ lə wə na tɛti kɨtso. Wə ba wə kɨ banchɛ bidiəŋ ɨji wə nə̀ kə nɨŋkə, wə fishi jiŋ ɨji wə nə̀ kə kpədiə. 25 Bəma nyiŋ nə̀ kwe mɨ, ŋgəŋ ba nyələ kpə wɔhɔ kɨ. Bô ŋəŋ, kpə wɔhɔ wuŋ, dze wə wu.’ 26 Miɨ wuhu wubəŋ chi bə yu lə, ‘Wə na ji wɛŋ wu nɨŋ wubiə, wə ji tɨ wu kɨŋkpɨŋ! Wə nə̀ kkɨ lə mba ŋkɨ mbanchɛ ɨji nnə̀ ŋkə nɨŋkə, mfishi jiŋ ɨji nnə̀ ŋkə ŋkpədiə. 27 Nɨ wə nə̀ kkɨ manɨ, wə nə̀ji lə wə ga kpə wɛmɨ kɨbə ntɨŋ fə tsa yi mfichɛ, nləkə kpə wɛŋ bə mbɨ su bɨŋ.’ 28 Nɨ yu tədiə manɨ, yu tə lə bə́ ləkə biba bia gbɨ nə yu lɨ ba nya bə miɨ wu na keŋkɛ wa biba gɨ tɨŋ tsá fiɛ. 29 Bə kkə̂ lə miɨ wu na keŋkɛ, bə́ jiba ɨ bə́ yinə ɨ yu keŋkɛ kɨyɛŋ. Bəmanɨ miɨ wu na keŋkɛhɛ, ma fintse fi yu na keŋkɛ fia, bə́ jiba ɨ bə́ ləkə nə yu lɨ. 30 Lə yu tə manɨ yu tə lə, ‘Bə lî kɨnɨntə kɨŋ kɨjuwɔ ntɨŋ sa biŋ, dɨ wu bənɨ ná kɨ dɨ bɔ diɨ gəsɨ.’
Bitɨfiə tsukɔ nsa yi butsu bu nəjiŋ wɨ
31 Tsa yi Wɛŋ wu Miɨ ná kɨ fichɛ yu ba bubəŋ buhu ntɨŋ, yu ba bə bənchinda bə Nyɔ lə bəchi, ɨ yu jiŋ kabala wuhu wu bubəŋ bɨŋ. 32 Bituŋ bichi bi mbi lə ná tɛshɛ yu nəfiə, ɨ yu jɛ bɔ diəŋ nɨ ntɨŋkɨ wu shíŋ ba yu jɛ shíŋ ba foso nə bí ntɨŋ. 33 Yu ná galɨ shíŋ kɨbandə kɨhɨ kɨ nədiɨ wɨ, ba ga bí kɨbandə kɨ nəməsə wɨ. 34 Yu wu Ŋkuŋ ná tɨdi bə bə na ji ba kɨbandə kɨ nədiɨ wɨ lə, ‘Bənɨ bə Taa' galə budə bɔ bɨŋ, bə bâ keŋkɛ shi buŋkuŋ ntɨŋ bu yu nə̀ nachə bəŋ'ɨ dze nə mbi nə̀ bɛyɛ, 35 ndzɨ dzɔŋ nə̀ wo mɨ, bə nya mɨ bidiəŋ. Ŋgɔ nə̀ wɨntɨ mɨ, bə nya mɨ fiɔŋ mmu. Nnə̀ nji wubanə, bə ləkə mɨ. 36 Nnə̀ nji kɨchilə kɨya, bə dɔŋ mɨ bindzu. Nnə̀ ŋgwente lɨ, bə ba tsɨsɨ mɨ. Nnə̀ nji tsɔŋ yi buŋfia ntɨŋ, bə ba tsɨsɨ mɨ.’ 37 Yu ná tɨdi manɨ, ɨ bənɨ bə diəŋ ba tə bi bə yu lə, ‘Baba, na tsa yi la yi kə nə̀ ŋəŋə dzɔŋ wo wə, kə nya wə bidiəŋ, makə tsa yi la yi ŋgɔ nə̀ wɨntɨ wə, kə nya wə fiɔŋ wə mu? 38 Na tsa yi la yi kə nə̀ ŋəŋə wə, wə ji wubanə, kə ləkə wə, makə kɨchilə kɨya, kə dɔŋ wə bindzu? 39 Na tsa yi la yi kə nə̀ ŋəŋə wə, wə gwente makə wə ji tsɔŋ yi buŋfia ntɨŋ, kə ba tsɨsɨ wə?’ 40 Ŋkuŋ ná chisə bə bɔ lə, ‘Ntə bəŋ yɛyi lə, nɨ bə nə̀ fəə biɔŋ biŋ, mɛ ji lə nə̀ bə miɨ wuntse nə bəŋgwɨŋ bɛŋŋ ntɨŋ, bə nə̀ fə ji bə mɨ.’ 41 Bəma, yu ná tɨdi bə bə na ji ba kɨbandə kɨ nəməsə wɨ lə, ‘Bəŋ bə lɔŋ kwɛɛ bəŋ, bə dzâ nə mɨ yəsɨ, bə gəŋ be boso wu kəkaha ntɨŋ wu bə́ nə̀ galə Satan lɨ bə bətsə buhu, 42 ndzɨ dzɔŋ nə̀ wo mɨ, bə jikə nyaha mɨ bidiəŋ. Ŋgɔ nə̀ wɨntɨ mɨ, bə jikə nyaha mɨ fiɔŋ lə mmu. 43 Nnə̀ nji wubanə, bə jikə ləkə mɨ. Nnə̀ nji kɨchilə kɨya, bə ji mɨ bindzu kə dɔŋkɔ. Nnə̀ ŋgwente lɨ, nji tɨ tsɔŋ yi buŋfia ntɨŋ, bə jikə baha tsɨsɨ mɨ.’ 44 Bɔ ná bi bə yu lə, ‘Baba, nə̀ tsa yi la yi kə nə̀ ŋəŋə dzɔŋ wo wə, makə ŋgɔ wɨntɨ wə, makə wə ji miɨ wubanə, makə kɨchilə kɨya, makə wə gwente, makə wə ji tsɔŋ yi buŋfia ntɨŋ, kə jikə chitə wə?’ 45 Yu ná chisə bə bɔ lə, ‘Ntə bəŋ yɛyi lə, nɨ bə nə̀ kə fəkə biɔŋ biŋ mɛ ji bə miɨ wuntse nə bəŋgwɨŋ bɛŋŋ ntɨŋ, bə nə̀ kə fəkə bi bə mɨ tɨ.’ 46 Ba bənɨ ná gɨntɨ ba be ŋgə wu kəkaha ntɨŋ. Bəmanɨ, ɨ bə na ji ba diəŋ gəŋ be yibɔ ji buwəŋ bu kəkaha ntɨŋ.”