Jisɔs bɔ bə Dzakiɔs
19
Jisɔs gəŋ ba be kɨtuŋ kɨ Jɛliko ntɨŋ ba kɨ chɛti. 2 Miɨ wudɔ nə̀ ji sɔ yɨ wuhu ji lə Dzakiɔs, yu ji fo wu bənɨ bə nə̀ kwete kɨŋwatɨ lə, yu ji tɨ chɛ kpə. 3 Yu nə̀ se lə yu ŋəŋ miɨ wu Jisɔs nə̀ ji yu lɨ. Bəmanɨ, fi ya ndzɨ yu nə̀ ji miɨ wu dzulu, ɨji kɨntsu kɨ bənɨ lə baŋkɨ yu. 4 Yu lətə ba gəŋ fiə, gəŋ bəndɨ kɨtɨ kɨdɔ wɨ fə yu ŋəŋə Jisɔs wɨ tsa yi yu kɨ chɛti, ndzɨ Jisɔs nə̀ji lə yu chɛ nɔ kɨdia ka. 5 Jisɔs gəŋ ba fɔ mɨ ba li yəsɨ ŋəŋ yu sɔ bɔ́ ba bəndɨ lə, “Dzakiɔs, shî fɔfɔ wə ba, ndzɨ njiwa mme wə tsɔŋ ndɛŋ.”6 Yu sɨdi ba shi nə kɨtɨ ka wɨ ba ləkə Jisɔs bə kɨnlaŋ. 7 Bənɨ bəchi bə nə̀ ŋəŋə nɨ Jisɔs nə̀ gɨntɨ bə yu gbɔ kɨ nuŋɔ bɔ tɨdi lə, “Miɨ no gɨntɨ wa lə yu gəŋ me bɔ bə miɨ wubiə.”
8 Lə bɔ gəŋ kɨ ji, Dzakiɔs dza ba ləŋ wə tə bə Jisɔs lə, “Baba, bô ŋəŋ, njiwa njɛ biɔŋ biɛŋ fəntɨŋ ba nya bə bənɨ bə fiəŋkə. Jilə nnə̀ mfu miɨ, nchi yu tsá nia.”
9 Jisɔs wɔ mɛ ba tə bə yu lə, “Ndɛŋ bənɨ bə sɛŋ tsɔŋ' fɔfo, ndzɨ chɛku no na ji tɨ wɛŋ wu Ablaham. 10 Wɛŋ wu Miɨ nə̀ ba lə yu nɔŋ bənɨ bə nə̀ laa, lə yu fə bɔ fɔfo.”
Ŋgaŋ tsukɔ kpə wɨ
11 Nɨ bənɨ nə̀ wokɔ nɨ Jisɔs nə̀ chanyɛɛ biɔŋ biŋ, yu ma ŋgaŋ wudɔ bə bɔ ndzɨ nə̀ shɨkɨ tsəsɨ lə yu be Jɛlosalɛm, bənɨ gɔmbiɛɛ lə diŋkəla Nyɔ jiwa yu ŋgbɔ kɨ sakɨ buŋkuŋ buhu. 12 Yu tə lə, “Tsa yidɔ nə̀ ji, wɛŋ wu ŋkuŋ wudɔ dza nə kɨtuŋ kɨbɔlə ntɨŋ kɨ gɨntɨ kɨtuŋ kɨdɔ ntɨŋ dzəbudə lə bə́ gəŋ memɛ yu buŋkuŋ bɨŋ fə yu tə kwə ba kɨ sakɨ buŋkuŋ buhu. 13 Lə yu kɨ dza, yu bəndɨ beŋ buhu yɔɔ ba jɛ bɔ kpə biba gbɨ gbɨ ba tə lə, ‘Bə kɔ̂, bə shə̂ kɨ fɨtɨ shɨ su tuŋ bu nná mba.’ 14 Bənɨ bə kɨtuŋ kɨhɨ lə nə̀ lo bə yu. Bɔ shə ba faŋ bənɨ yu nəjiŋ lə bənɨ ba gəŋ tə lə bɔ na sɛhɛ lə miɨ wa kɨ ji ŋkuŋ wubɔ.
15 Dubəma, bə́ gəŋ ba memɛ yu kwa. Yu tsu jiŋ ba tə bə́ bəndɨ beŋ buhu bə nɨŋ'ə bə yu nə̀ jɛɛ ba kpə bə bɔ lə yu ŋəŋ lə bɔ nə̀ shə ba fə shɨ ba bɨkə mbɨ lə. 16 Wu fiəfiə ba tə lə, ‘Miɨ wubəŋ, biba gbɨ bi wə nə̀ nya bia mɨ, nnə̀ nshə ba bɨkə mbɨ bi bɨŋ tsá yɔɔ.’ 17 Miɨ wubəŋ wa laŋ ba bafə yu ba tə lə, ‘Wə na ji wɛŋ wu nɨŋ wu ndzeŋe. Nɨ wə nə̀ shə kɨ jiŋgə fiɔŋ fi tsəsɨ buni, njiwa ŋga ɨ wə kɨ sakɨ bituŋ yɔɔ.’ 18 Wudɔ wa ba tə lə, ‘Miɨ wubəŋ, biba biɔhɔ gbɨ bi wə nə̀ nya bia mɨ, nnə̀ nshə ba bɨkə mbɨ bi bɨŋ tsá shɨŋ.’ 19 Yu tə bə wa miɨ lə, ‘Njiwa ŋga ɨ wə kɨ sakɨ bituŋ bitɨŋ.’ 20 Wudɔ wa wɛŋ wu nɨŋ ba tə yihi ji lə, ‘Miɨ wubəŋ, biba gbɨ biɔhɔ bia biŋ mɛ, nnə̀ nshə ba kansɨ nshɛŋkiɛ yi bindzu lə ntɨŋ ba ga lɨ. 21 Nnə̀ mfə manɨ ndzɨ nnə̀ nlete wə ndzɨ wə na ji buntaŋ. Wə ba wə dze fiɔŋ fi wə nə̀ kə galə, wə banchɛ fiɔŋ fi wə nə̀ kə tishɛ.’ 22 Miɨ wuhu wubəŋ tə bə yu lə, ‘Wə na ji wɛŋ wubiə. Nchanyɛ yi fɔɔ nə wə dze na yi yi njiwa ndze ba sa wə su. Wə nə̀ kkɨ lə nna nji buntaŋ, ndze fiɔŋ fi nnə̀ ŋkə ŋgalə, mbanchɛ fiɔŋ fi nnə̀ ŋkə ntishɛ. 23 Wə nə̀ kkɨ manɨ, nə̀ fə la lə wə kə dzɛɛ kpə wɛŋ ba gəŋ ga kɨbə ntɨŋ, fə tsa yi nná ntsɔ, nləkə wu bə mbɨ?’ 24 Yu tə bə bənɨ bə nə̀ lɨmi fə yu ku lə, ‘Bə lə̂kə biba bia gbɨ nə yu lɨ ba nya bə miɨ wu na keŋkɛ wa fimbinchi.’ 25 Bɔ nɨŋŋ ba tə lə, ‘Miɨ wubəŋ, yu na keŋkɛ fimbinchi.’ 26 Miɨ wubəŋ wa tə lə, ‘Ntə bəŋ lə, miɨ wu na keŋkɛ fiɔŋ, bə́ jiba ɨ bə́ yinə yu fidɔ. Bəmanɨ miɨ wu na keŋkɛhɛ, ma fintse fi yu na keŋkɛ fia, bə́ jiba ɨ bə́ ləkə nə yu lɨ. 27 Nə fɛŋ bɨŋ, bənɨ bə nə̀ lo ba bə mɨ, bɔ nɨnntɨ lə naji ŋkɨ nji ŋkuŋ wubɔ kə, bə gə̂ŋ ba bə bɔ ba kkpɨshɛ bɔ mɨ yəsɨ.’”
Jisɔs be Jɛlosalɛm nɨ Ŋkuŋ
28 Nəjiŋ wusu nɨ Jisɔs nə̀ chanyɛ biɔŋ biŋ, yu dza kɨ sa fiə, yu bɨndɨ Jɛlosalɛm. 29 Lə yu kɨ gɨntɨ fɔɔ gwɨgwɨ fə kɨtuŋ kɨ Bɛtfash bə kɨ Bɛtani ku, bi nə̀ ji fə Dzo yi Bitɨ bi Ɔlif lə ku, yu sa beŋ buhu bə nɨŋ'ə bədɔ bəfɛ ba faŋ'ɨ, 30 yu tə lə, “Bə gə̂ŋ kɨtuŋ ka ntɨŋ sa fiə, bə jiba bə be sɔ ba ŋəŋ wɛŋ wu sɔmbwa wɨ, bə́' su, ɨji miɨ kə saa ba bəndɨ yu bɨŋ. Bə yânshɛ ba ba bə yu mɛni. 31 Bə gəŋ ba kɨ yanshɛ, miɨ bi lə bə na yanshɛ ndzɨ la lə, bə chi lə Miɨ Wubəŋ na keŋkɛ nɨŋ bə yu.”
32 Beŋ bə nɨŋ'ə ba gəŋ ba ŋəŋ fiɔŋ fichi diəŋ nɨ yu nə̀ tədiə bɔ. 33 Nɨ bɔ nə̀ yanshɛɛ wɛŋ wu sɔmbwa wa, bənɨ bə nə̀ keŋkɛ ba yu bi lə, “Bə na yanshɛ wɛŋ wu sɔmbwa wa ndzɨ la?”
34 Bɔ chi lə, “Miɨ Wubəŋ na keŋkɛ nɨŋ bə yu.” 35 Bɔ tə dze sɔmbwa wa ba nya bə Jisɔs, bɔ tsu bindzu bibɔlə sɔmbwa wa bɨŋ ba ga Jisɔs yu bɨŋ. 36 Yu kɨ gɨntɨ, bənɨ tsuku bindzu bibɔlə dzə, yu chɛti bi bɨŋ.
37 Lə yu kɨ gɨntɨ fɔɔ dɨ wu dzə na shichi Dzo yi Bitɨ bi Ɔlif lə wɨ, beŋ buhu bə nɨŋ'ə bəchi lafu kɨ wudiə bɔ kuntə Nyɔ bə diɛ bɔ́ ndzɨ biɔŋ bi kɨgəsə kɨ wɨŋə lə bichi bi bɔ nə̀ ŋəŋə. 38 Bɔ kɨ wudiə bɔ tɨdi lə, “Budə kɨ ji bə Ŋkuŋ wu na ba yɨ wu Baba lə lɨ. Budə na ji bɔ́, bubəŋ ji bu Nyɔ wu na ji bɔ́ lə.”
39 Bəfalasi bədɔ bə nə̀ ji kɨntsu ka ntɨŋ dza ba tə bə Jisɔs lə, “Miɨ wu Bitɨfiə, lôso beŋ bɔhɔ bə nɨŋ'ə bɛŋ lə bɔ də̂ mɔɔŋ.”
40 Jisɔs chi lə, “Ntə bəŋ lə, ɨ bɔ də mɔɔŋ, ɨ tá yiŋ kɨ wudiə.”
41 Jisɔs kɨ gɨntɨ fɔɔ gwɨgwɨ fə Jɛlosalɛm ku, yu bo sɔ mɛ ba wɛŋ məndəŋ 42 ba kɨ dɨ gwɨ lə, “Ɔɔɔ Jɛlosalɛm! tə kɨ ji la lə bə sə kkɨ fiɔŋ fi naji ɨ fi ba bəŋ bə budə butsu buŋ ndɛŋ. Bəmanɨ bə́' nyələ nə bəŋ'ɨ. 43 Bə kkə̂ lə tsa ba ya yi bənɨ bɛnɨ bə nchɛnɛ lə ná ba ba wɛyɛ mbaŋ fiədiə lɨ ba baŋ bəŋ dia chi. 44 Bɔ ná beke ba jishi bəŋ bə beŋ bɛnɨ ba kpodiɛ tsɔ́ŋ yɛnɨ, ɨ ta jikə shə wudɔ bɨŋ. Fi ná tɨchə manɨ ndzɨ bə nə̀ kə kkə tsa yi Nyɔ nə̀ ba bəŋ'ɨ.”
Jisɔs kɔŋ bənɨ bə shɨ lə nə mbaŋ wu tsɔŋ yi bintɔfiɛ ntɨŋ
45 Jisɔs gəŋ mbaŋ wu tsɔŋ yi bintɔfiɛ ntɨŋ ba gbɔ kɨ koŋko bənɨ bə nə̀ taŋŋə biɔŋ mɨ, 46 yu tɨdi bə bɔ lə, “Fi na ji bubɔndɔ Nyɔ tɨdi lə,
‘Tsɔŋ yɛmɨ ná kɨ ji tsɔŋ yi kɨntsɨsɨ.’
Bəmanɨ bə fə yi tsu ji kɨnyələ kɨ bənɨ bə buyi lə.”