Maliya kushi Jisɔs kɨtuŋ kɨ Bɛtani ntɨŋ
12
Lə kɨ shɨkɨ díɔ buse lə kɨ ji tsa yi Kɨgbeyɛ kɨ Nchɛnəbɨŋ'ə, Jisɔs dza ba gəŋ kɨtuŋ kɨ Bɛtani ntɨŋ, dɨ wu Ladzalɔs wu Jisɔs nə̀ dzakɔ wa nə kkpə lɨ nə̀ ji. 2 Lə yu nə̀ gə sɔ, bə́ fə bidiəŋ lə bə́ tə yu su. Mata kɨ ji miɨ wu kɨjɛnɛ, Ladzalɔs ji miɨ wudɔ nə kɨntsu kɨ bənɨ lə ntɨŋ bə nə̀ jimiɛ kɨ diɨ bə Jisɔs. 3 Maliya dza ba dze fiŋgə fi məŋ məndɔ mə ntsɔŋfu lə məŋfiŋɛ ba tsumbiɛ go yi Jisɔs lə wɨ ba shiŋkiɛ bə yu yihi yi fi. Məŋ mɛŋ nə̀ tɛti kpə kɨtso, bə́' fə bə fiɔŋ fidɔ fifi, fi bə́ nə̀ tsɨsə lə nad. Nɨ yu tsumbiɛ manɨ, tsɔŋ ya chi gbɔ kɨ tɔfiɛ ntsɔŋfu.4 Judas Ɛskaliɔt wu nə̀ ji miɨ nə kɨntsu kɨ beŋ bə Jisɔs lə ntɨŋ (wu nə̀ ji lə yu ná taŋŋə yu) tsu ba tə lə, 5 “Sə fə la lə bə́ kə taŋŋə məŋ mɛŋ bəntsuku gɨtɛª lɨ ba nya kpə wa bə bənɨ bə fiəŋkə?” 6 Judas nə̀ chanyɛhɛ mɛ lə yu na nya kɨgaŋ bə bənɨ bə fiəŋkə. Yu nə̀ ji wuu, nə̀ yu miɨ wu nə̀ galɨ kɨba kɨbɔlə, yu nə̀ ba yu kɨ chɛsɛ kaŋ sɔ kɨba ka ntɨŋ yu chitə gwɨ yihi su. 7 Jisɔs tə lə, “Gâ yu ma. Yu nə̀ ga məŋ mɛŋ mɛ lə yu nachɛ chi bə́ diyɛ mɨ. 8 Bənɨ bə fiəŋkə ná kɨ ji bə bəŋ tsá chi, bəmanɨ njiwa njikə kɨ ji bə bəŋ tsá chi.”
9 Lə kɨntsu kɨ Bəju lə wɔ lə Jisɔs wa sɔ, bɔ gəŋ sɔ. Bɔ nə̀ kə baha kwa ndzɨ Jisɔs kə. Bɔ nə̀ ba tɨ lə bɔ ŋəŋ Ladzalɔs wu Jisɔs nə̀ dzakɔ nə kkpə lɨ. 10 Bəma, bəchɛ bintɔfiɛ bəbəŋ kɨ kakɨ lə bɔ jiba bɔ kkpɨsɨ tɨ Ladzalɔs, 11 ndzɨ nə̀ ndzɨ Ladzalɔs wu Bəju kɨyɛŋ nə̀ shə bɔ ba ga shəŋ ji Jisɔs wɨ.
Jisɔs be Jɛlosalɛm nɨ Ŋkuŋ
12 Lə butsu wɔ, kɨntsu kɨ bənɨ lə kɨ nə̀ ba ka kɨgbeyɛ ntɨŋ wɔ lə Jisɔs wa dzə wu na ba Jɛlosalɛm. 13 Bɔ dze bíatə ba fɔ lə bɔ gəŋ ləkə yu dzə. Bɔ gəŋ kɨ wudiə lə, “Lilililili, bubəŋ kɨ ji bə Nyɔ lɔɔɔ! Nyɔ lî budə miɨ wu na ba yɨ wu Baba lə lɨ lɔɔɔ! Na yu Ŋkuŋ wu Isla lɔɔɔ!” 14 Jisɔs nɔŋ wɛŋ wu sɔmbwa ba bəndɨ yu bɨŋ, diəŋ nɨ fi na ji bubɔndɔ lə,
15 “Bənɨ bə Dzayɔn, nyiŋ kə kɨ kwete bəŋ.
Bə bô bə ŋəŋ, Ŋkuŋ wɛnɨ ba wa,
yu' bəndɨ wɛŋ wu sɔmbwa bɨŋ.”
16 Beŋ bə Jisɔs lə bə nɨŋ'ə nə̀ kə kkə kɨnyi kɨ fiɔŋ fiŋ'ə nə mbɛyɛ bɨŋ. Lə Jisɔs be bubəŋ buhu ntɨŋ, bɔ tə se lə fiɔŋ fiŋ nə̀ ji bubɔndɔ ji tsukɔ yu wɨ, fi tɨchə bə yu diəŋ nɨ fi nə̀ ji bubɔndɔ. 17 Kɨntsu kɨ nə̀ ji bə Jisɔs butsu bu yu nə̀ bəndə Ladzalɔs nə dzəŋ ntɨŋ ba dzakɔ yu nə kkpə lɨ nə̀ gəŋ kɨ tɨdi nɨ bɔ nə̀ ŋəŋə. 18 Fiɔŋ fi kɨntsu ka nə̀ fɔɔ lə bɔ gəŋ ləkə yu dzə nə̀ ji ndzɨ bɔ nə̀ wɔ lə yu nə̀ fə fiɔŋ fiŋ, fi donchɛ bubəŋ bu Nyɔ lə. 19 Bəfalasi ŋəŋ mɛ kɨ chanyɛ bɔ bɔ lə, “Bə kə ŋəŋkəhə? Fiɔŋ na sɨŋ fi naji ɨ kə chi fəə. Mbi chi biəlɨ wa yu.”
Bəglek bədɔ kɨ se lə bɔ ŋəŋ Jisɔs wɨ
20 Bənɨ bədɔ nə̀ ji kɨntsu kɨ bənɨ bə nə̀ bəndə ba Jɛlosalɛm lə bɔ tsɨsɨ bə Nyɔ tsa yi kɨgbeyɛ kɨŋ ntɨŋ ɨji Bəglek. 21 Bəglek bɛŋ gəŋ ŋəŋ Felip wu nə̀ fɔɔ nə kɨtuŋ kɨ Bɛsaida sha yi Galili ntɨŋ ba tə bə yu lə, “Miɨ wubəŋ, kə na se lə kə ŋəŋ Jisɔs.”
22 Felip gəŋ ba wə Andulu diɛ, bɔ bə yu gəŋ ba tə bə Jisɔs. 23 Jisɔs chi bə bɔ lə, “Tsa' kwətsə yi Wɛŋ wu Miɨ jiwa yu keŋkɛ yɨ wubəŋ. 24 Yɛyi lɨ ntə bəŋ lə, ɨ ŋgwe kə gbɔɔ sha bɨŋ ba kkpə lɨ, ɨ yi kətə yimbɔŋ. Ɨ yi kkpə lɨ, ɨ yi muŋ muntaŋ kɨyɛŋ. 25 Miɨ wu na laŋkɨ buwəŋ buhu kɨtso jiwa yu lasɨ bu, miɨ wu na sɛhɛ buwəŋ buhu mbi no ntɨŋ, miɨ wa na galɨ bu buganə fə yu ná keŋkɛ buwəŋ bu kəkaha. 26 Ɨ miɨ na nɨntɨ mɨ lɨ, tə yu naji lə yu kɨ biəlɨ mɨ, ma məŋ wu nna nji, ɨ miɨ wɛŋŋ wu nɨŋ kɨ ji tɨ mɨ. Ɨ miɨ na nɨntɨ mɨ lɨ, tə Taa jiwa ɨ yu yukɔ yu.”
Jisɔs chanyɛ tsukɔ kkpə yihi wɨ
27 Jisɔs tə lə, “Fɛŋ shəŋ ya yi bɨfi mɨ. Naji ntə lə la? Lə Taa fôso mɨ nə tsa yi ŋgə nyi ntɨŋ? Yɛ, nnə̀ mba ndzɨ tsa nyi. 28 Taa, fə̂ yɨ wɔhɔ keŋkɛ bubəŋ.” Nɨ yu chanyɛ manɨ, diɛ shi nə bɔ́ lə, “Mɨ' mfə wu keŋkɛ bubəŋ, mbambi wa lə nchi mfəə.”
29 Lə kɨntsu kɨ nə̀ lɨmi ka mɨ wɔ diɛ ya, bɔ tə yibɔ lə, “Na dzaŋ yi wɛŋɛ.” Bədɔ tə lə, “Na nchinda wu Nyɔ wu chanyɛ bə yu.” 30 Jisɔs chi lə, “Diɛ nyi ba ndzɨ bəŋ. Yi kə baha ndzɨ mɨ. 31 Fɛŋ na tsa yi bə́ jiba bə́ sa mbi no. Fɛŋ bə́ jiba bə́ shisəsɨ ba kɔŋɔ ŋkuŋ wu sakɨ mbi no. 32 Bəmanɨ yɛmɨ na ji lə, tsa yi bə́ tiyɛ mɨ bɔ́, ŋkpa bənɨ bəchi ɨ bɔ ba mɨ wɨ.” 33 Jisɔs nə̀ chanyɛɛ manɨ yu donchɛ ji ŋgwe yi kkpə yi yu jiwa yu kkpə. 34 Kɨntsu kɨ bənɨ lə chi bə yu lə, “Kə na woko nə kɨŋwatɨ kɨ bilaŋ'ə ntɨŋ lə Nchitə wu Nyɔ nə̀ kaa wa ná kɨ tsɨ tsá chi. Fi fə nəŋ fə wə kɨ tɨdi lə bə́ naji lə bə́ tiyɛ Wɛŋ wu Miɨ bɔ́? Wɛŋ wu Miɨ wa na wu la?” 35 Jisɔs tə bə bɔ lə, “Kɨŋgbooŋ jika kɨ kɨ ji bə bəŋ tsa ntɨŋ tsəsɨ. Nɨ bə na ji bə kɨŋgbooŋ kɨsu fɛŋ, bə kɨ gəndə, kɨjuwɔ tə kə baŋə bəŋ. Miɨ wu na gəndə kɨjuwɔ ntɨŋ kkəhə dɨ wu yu gɨntɨ. 36 Nɨ bə na keŋkɛ kɨŋgbooŋ, bə bɨ̂ŋ bə kɨŋgbooŋ kɨŋ, fə bə kɨ ji beŋ bə kɨŋgbooŋ'ə.”
Diɛ yi Jisɔs ná sakɨ miɨ wu nɨŋŋə nləkə yi
Nɨ Jisɔs nə̀ chanyɛ biɔŋ biŋ mɛ, yu dza ba gəŋ nyələ lɨ. 37 Mɛfə yu nə̀ fəə biɔŋ kɨyɛŋ bi donchɛ bubəŋ buhu bɔ ŋəŋ, bɔ nə̀ kə galə shəŋ yu wɨ. 38 Fi nə̀ ji manɨ fə fi fɔɔ diəŋ nɨ Adzaya miɨ wu shɔŋ yi Nyɔ nə̀ chanyɛ lə,
“Baba, na yəŋ su wu bɨmiə fiɔŋ fi kə na chanyɛ?
Na bəyəŋ bə Baba donchɛ buŋga bu kɨbandə kɨhɨ lə bə bɔ?”
39 Bəma nə̀ji ɨ bɔ ga shəŋ yu wɨ kə, ndzɨ Adzaya nə̀ chi chanyɛ dɨ wudɔ wɨ lə,
40 “Yu' baŋ yəsɨ yibɔlə,
ba fə shəŋ yibɔlə kɨ ji wəə,
fə bɔ jɛkə kɨ ŋɨntɨ biɔŋ bə yəsɨ yibɔlə,
bɔ kə kɨ kkɨ biɔŋ bɔ shəŋ,
fə bɔ jɛkə tsɔhɔ jiŋ, ŋ'wəmiəsɨ bɔ.”
41 Adzaya nə̀ chanyɛ biɔŋ biŋ ndzɨ yu nə̀ ŋəŋ bubəŋ bu Jisɔs lə ba tə kɨ chanyɛ tsukɔ yu wɨ. 42 Məfə bənɨ nə̀ kə galə tɨmo shəŋ Jisɔs wɨ, bənɨ kɨyɛŋ bə nə̀ ji fó yi kɨtuŋ'ə nə̀ ga shəŋ yu wɨ, bəmanɨ bɔ jikə chanyɛ bə bifuŋ bibɔlə ndzɨ bɔ nə̀ lete Bəfalasi lə bɔ tə kə kɔŋɔ bɔ nə tsɔŋ yi kɨntsɨsɨ ntɨŋ. 43 Bɔ nə̀ lete manɨ ndzɨ bɔ nə̀ laŋkɨ ŋkeŋkɛ kɨŋkuntə kɨ fɔɔ nə bənɨ lɨ ya kɨ fɔɔ nə Nyɔ lɨ.
44 Jisɔs dza ba wunə bə diɛ bɔ́ lə, “Miɨ wu galə shəŋ mɨ wɨ, yu kə galə ji mɨ wɨ kə. Yu ga ji miɨ wu faŋə mɨ wɨ. 45 Ɨ miɨ ŋəŋ mɨ, tə yu ŋəŋ ji miɨ wu faŋə mɨ. 46 Mɨ mba mbi no ntɨŋ nɨ kɨŋgbooŋ lə ma yəŋ wu galə shəŋ mɨ wɨ, ɨ yu tsukə jimiə kɨjuwɔ ntɨŋ. 47 Ɨ miɨ wɔ diɛ yɛmɨ ba jikə galə yi, njikə sakəhə yu, ndzɨ nnə̀ ŋkə mbaha lə nsa bənɨ bə mbi no ntɨŋ lə bɔ gbɔ nsa. Nnə̀ mba ji lə mfə bɔ fɔfo. 48 Miɨ wu nɨŋŋə mɨ ba nɨŋŋ nləkə diɛ yɛmɨ na keŋkɛ fiɔŋ fi jifia ɨ fi sa yu. Diɛ yi mɨ nchanyɛ bə yu na fiɔŋ fi ná saa yu butsu bu nəjiŋ ɨ yu gbɔ nsa. 49 Fi na ji manɨ ndzɨ nna nchanyɛhɛ ji nə buŋga bwɛŋ ntɨŋ. Taa wu faŋə mɨ na yu wu tədiə lə ŋkɨ nchanyɛ, ə nya yu mɨ fiɔŋ fi nna nchanyɛ, ba tə mɨ chi ŋkɨ nchanyɛ. 50 Nna ŋkkɨ lə fiɔŋ fi yu tədiə lə ŋkɨ nchanyɛ na fi na nya buwəŋ bu kəkaha. Bəma fiɔŋ fi nna nchanyɛ na fi Taa tədiə lə ŋkɨ nchanyɛ.”