Ladzalɔs nsɨnə Jisɔs kkpə
11
Miɨ wudɔ wu yɨ wuhu nə̀ ji lə Ladzalɔs nə̀ gbɔ gwɨ. Yu nə̀ ji miɨ wu kɨtuŋ kɨ Bɛtani, yu ji sɔ bɔ bə bəwəmɛni bə nə̀ ji Maliya bə Mata. 2 Maliya no wu wəmɛni Ladzalɔs nə̀ gwente wa, nə̀ yu wu nə̀ fiɛ go yi Baba lə bə məŋ mə ntsɔŋfu lə ba shiŋkiɛ bə yu yihi yi fi. 3 Nɨ yu nə̀ gwente manɨ, dzə́mbɨtə yihi ya faŋ shɔŋ bə Jisɔs lə, “Baba, nsha wu shəŋ gwente wa.” 4 Jisɔs wɔ shɔŋ ya ba tə lə, “Gwɨ nyi na jimiɛhɛ yi kkpənə kə. Yi na ji lə yi donchɛ ji bubəŋ bu Nyɔ lə fə Wɛŋ wu Nyɔ keŋkɛ yɨ wubəŋ ndzɨ yi.”5 Jisɔs nə̀ laŋkɨ Mata bə wəmɛni Maliya ma bə Ladzalɔs kɨtso. 6 Bəmanɨ, tsa yi yu nə̀ wɔɔ lə Ladzalɔs gwente wa, yu chi mɛɛ dɨ wu yu nə̀ ji wa díɔ fɛ. 7 Nəjiŋ wusu, yu tə bə beŋ buhu bə nɨŋ'ə lə, “Kə fîchə ba tsu jiŋ Judɛya.” 8 Bɔ bi bə yu lə, “Labay, na kwa fəkwəŋ fəkwəŋ mɛ wu Bəju nə noŋko lə bɔ tumiɛ wə bə ta ba kkpɨsɨ lɨ, wə kɨ chisə tsɔ sɔ tɨ?” 9 Jisɔs chi bə bɔ lə, “Bbushə na keŋkɛhɛ bitsə yɔɔ ntse bifɛ butsu ntɨŋ? Ɨ miɨ na gəndə bbushə, tə naji ɨ yu kɨ chiŋkiɛ kə, ndzɨ kɨŋgbooŋ kɨ mbi no lə na tsalə yu wɨ. 10 Bəmanɨ, ɨ miɨ na gəndə bbutsu, tə naji ɨ yu kɨ chiŋkiɛ, ndzɨ yu na sɨŋ bə kɨŋgbooŋ.”
11 Nɨ yu chanyɛ manɨ, yu tə bə bɔ lə, “Mbwə waha Ladzalɔs' gbɔ kɨnɨ, bəmanɨ njiwa ŋgəŋ ndzakɔ yu nə kɨnɨ ka lɨ.” 12 Beŋ buhu bə nɨŋ'ə tə bə yu lə, “Baba, jilə yu na me lɨ, tə yu jiwa ɨ yu wəmiə.” 13 Jisɔs nə̀ chanyɛɛ ji tsukɔ kkpə yi Ladzalɔs wɨ, bəmanɨ bɔ kɨ woko lə yu na chanyɛ ji tsukɔ kɨnɨ kɨ mə kɨnɨ wɨ. 14 Jisɔs tə tə bə bɔ ŋgbooŋ lə, “Ladzalɔs' kkpə. 15 Bəmanɨ nna ŋ'woko buni ndzɨ bəŋ, lə nnə njimiɛhɛ mɨ kə, fə bə galə shəŋ yɛnɨ mɨ wɨ. Kə kɨ gɨntɨ la sɔ.” 16 Tɔmas wu bə́ nə̀ tsɨsə yɨ wuhu wudɔ lə Maŋ, tə bə beŋ bə nɨŋ'ə bədɔ ba lə, “Kə gə̂ŋ tɨ fə kə kkpə bə yu.”
Jisɔs dzakɔ Ladzalɔs nə kkpə lɨ
17 Lə Jisɔs fɔ mɨ, yu wɔ lə Ladzalɔs' jiŋ dzəŋ ntɨŋ díɔ nna. 18 Bɛtani no nə̀ ji gwɨgwɨ fə Jɛlosalɛm ku kwa nɨ bəmai bəfɛ. 19 Bəju kɨyɛŋ nə̀ baa fə bə Mata bə Maliya ku bɔ dzudi gwɨ bə bɔ ndzɨ kkpə yi wəmɛni wubɔ. 20 Lə Mata wɔ lə Jisɔs ba wa, yu fɔ ba gəŋ lə bɔ bə yu bɨkənɨ, bəmanɨ Maliya kətə tsɔŋ. 21 Mata gəŋ tə bə Jisɔs lə, “Baba, wə tə nə ji mɛ, ŋgwɨŋ tə nə jikə kkpəhə. 22 Bəmanɨ, nna ŋkkɨ lə fɛŋ tɨmo ma la fi wə nendɛ nə Nyɔ lɨ, yu jiwa ɨ yu nya wə fi.” 23 Jisɔs tə bə yu lə, “Wəma jiwa yu dzakɔ nə kkpə lɨ.” 24 Mata tə bə yu lə, “Nna ŋkkɨ lɨ lə yu ná jiwa ɨ yu dzakɔ butsu bu nəjiŋ bu bənɨ ná kɨ dzakɔ nə kkpə lɨ.” 25 Jisɔs tə bə yu lə, “Na mɨ wu na dzakɔ bənɨ nə kkpə lɨ, ɨji mɨ buwəŋ. Miɨ wu galə shəŋ mɨ wɨ naji ɨ yu kkpə lɨ tɨmo, ɨ yu kɨ ji wuwəŋ, 26 ma yəŋ wu na ji wuwəŋ fɛŋ ɨji yu' ga shəŋ mɨ wɨ, naji ɨ yu ná kkpə kə. Wə bɨŋ manɨ?” 27 Yu bɨŋ lə, “Ɨŋŋ Baba, nna ŋkeŋkɛ kɨmbɨŋ lə wə na ji Nchitə wu Nyɔ nə̀ kaa wa. Wə na ji Wɛŋ wu Nyɔ wu nə̀ ji bə mba mbi no ntɨŋ.”
28 Lə Mata tə manɨ, yu gəŋ bəndɨ wəmɛni Maliya ba wənə bə yu lə, “Miɨ wu Bitɨfiə wa mɛ, yu bɨndɨ wa wə.” 29 Lə yu wɔ manɨ, yu koŋ nə fəkoso lə yu gəŋ ŋəŋ Jisɔs. 30 Nə̀ ji Jisɔs bambi kə bekɛ kɨtuŋ ka ntɨŋ. Yu nə̀ bambi mɨ dɨ wu Mata nə̀ gəŋə wa ŋəŋ yu. 31 Lə Bəju bə nə̀ ji ba bə Maliya bɔ dzudi gwɨ ŋəŋ nɨ yu komiɛ ba fɔ nə tsɔŋ, bɔ kɨ biəlɨ yu, bɔ gɔmbiɛɛ lə yu na gɨntɨ fə dzəŋ ya ku lə yu gəŋ kɨ dɨ mɨ.
32 Lə Maliya gəŋ fɔ dɨ wu Jisɔs nə̀ ji wa, ba ŋəŋ yu, yu gbɔ go yi Jisɔs lə bɨŋ ba tə lə, “Baba, wə tə nə ji mɛ, ŋgwɨŋ tə nə jikə kkpəhə.” 33 Lə Jisɔs ŋəŋ nɨ yu na dɨ, Bəju bə nə̀ biəlɨ yu dɨ tɨ, fiɔŋ fia nɨkə shəŋ yihi kɨtso, gwɨ bə yu. 34 Yu bi lə, “Bə' kɨnsɨ yu məŋ?” Bɔ tə bə yu lə, “Baba, ba ŋəŋ.” 35 Jisɔs də. 36 Bəju ŋəŋ manɨ ba tə lə, “Bə bô bə ŋəŋ nɨ yu nə laŋkɨ yu.” 37 Bəmanɨ bədɔ tə yibɔ lə, “Nəji yu wu nə̀ guyɛ wa yəsɨ yi nyimə lə jikə diɔnɔ dzə́ chi ntɨŋ lə miɨ no kə kkpəhə?”
38 Shəŋ chi nɨkə yu kɨtso. Yu dza ba gəŋ fɔ fə dzəŋ ya ku. Dzəŋ nyi nə̀ ŋgbɔ, ɨji bə́' baŋ bifuŋ bia bə ta wubəŋ. 39 Jisɔs tə lə, “Bə fôso ta wa.” Mata jimə miɨ wuŋkpə wa tə bə Jisɔs lə, “Baba, fɛŋ ntsɔŋfu yibiə jiya yi kɨ ji. Na díɔ nna fɛŋ nɨ yu nə kkpə.” 40 Jisɔs bi bə yu lə, “Ntɨlə nsə ntə bə wə lə jilə wə' ga shəŋ mɨ wɨ, ɨ wə ŋəŋ bubəŋ bu na ji bu Nyɔ lə sɨŋ?” 41 Bəma, bɔ tə foso ta wa. Jisɔs tɔ bushi bɔ́ ba tə lə, “Taa, mɨ nnya kɨmbafə bə wə nɨ wə wɔɔ kɨntsɨsɨ kɛŋ. 42 Nna ŋkkɨ lə wə ba wə kɨ woko kɨntsɨsɨ kɛŋ tsá chi. Bəmanɨ, nna nchanyɛ fiŋ ɨji ndzɨ bənɨ bə na lɨmi bɛŋ mɛ, fə bɔ bɨmiə lə ə faŋ wə mɨ.” 43 Nɨ yu chanyɛ manɨ, yu wunə bə diɛ bɔ́ lə, “Ladzalɔs, fɔ̂!” 44 Miɨ wu ŋkkpə wa bu fɔ, ɨji bə́' kwɨdi kaŋ yihi bə go bə nshɛ́ŋkiɛ yi bindzu lə, kwɨdi tɨ bushi buhu bə nshɛ́ŋkiɛ yi bindzu lə. Jisɔs tə bə bɔ lə, “Bə yânshɛ yu ba tɔkaŋ yu kɨ gɨntɨ.”
Fó yi kɨtuŋ'ə sese lə yi kkpɨsɨ Jisɔs
45 Lə Bəju kɨyɛŋ bə nə̀ ba fə Maliya ku ŋəŋ fiɔŋ fi Jisɔs fəə, bɔ ga shəŋ yu wɨ. 46 Bəmanɨ, bədɔ tsuba gəŋ yibɔ ba ŋəŋ ji Bəfalasi, tə bɔ fiɔŋ fi Jisɔs fəə. 47 Bəchɛ bintɔfiɛ bəbəŋ bə Bəfalasi tə banchɛ fó yi kɨtuŋ'ə tə lə, “Kə jiba kə fə nəŋ? Miɨ no fɨtɨ wa biɔŋ kɨyɛŋ bi na donchɛ bubəŋ bu Nyɔ lə. 48 Ɨ kə tɔkaŋ lə yu kɨ gɨntɨ fiəfiə, tə bənɨ bəchi jiba ɨ bɔ ga shəŋ yu wɨ, ɨ bənɨ bə Lom bə na sakɨ bɨ ba ba kpodiɛ tsɔŋ yaha yi bintɔfiɛ bə kɨtuŋ kaha.”ª
49 Bəmanɨ, miɨ wudɔ nə bɔ ntɨŋ wu yɨ wuhu nə̀ ji lə Kaifas, wu nə̀ ji fo wu bəchɛ bintɔfiɛ lə kɨya ka wɨ dza ba tə yihi bə bɔ lə, “Bə na kkəhə tɨmo fiɔŋ kə. 50 Bə na kkəhə lə fi na ndzeŋe bəŋ'ɨ lə miɨ miu kkpə bənɨ bəchi lɨ, ba ya yi naji lə kɨtuŋ kɨchi la?” 51 Kaifas nə̀ chanyɛhɛ fiɔŋ fiŋ ɨji nə bufɨ buhu ntɨŋ. Yu nɨ fo wu bəchɛ bintɔfiɛ lə kɨya ka wɨ nə̀ chanyɛɛ mɛ yu tɨdi ji shɔŋ yi Nyɔ lə Jisɔs nə̀ji lə yu kkpə kɨtuŋ kɨ Bəju lə lɨ. 52 Jikə jimiɛ kwa kɨtuŋ kɨsu lɨ kə, yu nə̀ji lə yu kkpə ba banchɛ beŋ bə Nyɔ lə bəchi bə nə̀ tsaŋə kɨ ji bituŋ bidɔ ntɨŋ, lə bɔ kɨ ji kɨntsu kɨmo. 53 Dze nə butsu bwa lɨ, fó yi kɨtuŋ'ə tə gbɔ kɨ sesɛ nɨ bɔ jiba ɨ bɔ fə ba kkpɨsɨ Jisɔs.
54 Bəma, Jisɔs tsukə kɨ gəndə ŋgbooŋ Bəju ntɨŋ. Yu dza fihi nə nɔ ba gəŋ dia wu kpa bə beŋ buhu bə nɨŋ'ə kɨ ji sɔ kɨtuŋ kɨdɔ ntɨŋ kɨ bə́ tsɨsə lə Ɛflɛm.
55 Lə kɨgbeyɛ kɨ Bəju lə kɨ Nchɛnəbɨŋ'ə kɨ ba gwɨgwɨ, bənɨ kɨyɛŋ kɨ dza nə sha ya ntɨŋ bɔ bɨndɨ Jɛlosalɛm díɔ yiŋ ntɨŋ lə bɔ gəŋ wwɔlɔsɨ gwɨ́ yibɔlə fə butsu bwa tə gwɨyə. 56 Bɔ gəŋ gbɔ kɨ noŋko Jisɔs bɔ bishɛ bɔbɔ nɨ bɔ nə̀ ji mbaŋ wu tsɔŋ yi bintɔfiɛ wa ntɨŋ bɔ tɨdi lə, “Bə na gɔmbiɛ lə la? Yu baha kɨgbeyɛ kɨŋ ntɨŋ?” 57 Nə̀ ji bəchɛ bintɔfiɛ bəbəŋ ma Bəfalasi' nya kɨlaŋ lə, ɨ miɨ na ji su wu na kkɨ dɨ wu Jisɔs na ji, yu fə bɔ kkə, fə bɔ kwɛɛ yu.