Judas bɨŋ lə yu jiwa yu taŋŋə Jisɔs
22
Lə tsa yi kɨgbeyɛ kɨ Blɛ wu bə́ kə galə dzé sɔ lə kɨ bə́ nə̀ tsɨsə lə kɨgbeyɛ kɨ nchɛnəbɨŋ'ə kɨ ba gwɨgwɨ. 2 Bəchɛ bintɔfiɛ bəbəŋ bə bənɨ bə nə̀ tɨfiə bilaŋ bi Nyɔ lə kɨ noŋko dzə́ yi bɔ kkpɨsə Jisɔs yi ntɨŋ bunyələ ndzɨ bɔ nə̀ lete bənɨ.3 Satan be Judas shəŋ wu bə́ nə̀ tsɨsə lə Ɛskaliɔt, ɨji miɨ nə beŋ bə Jisɔs lə bə yɔɔ ntse bəfɛ ntɨŋ. 4 Yu gəŋ fə bəchɛ bintɔfiɛ bəbəŋ ku bə fo yi kɨlaŋ'ə yi nə̀ kɨki tsɔŋ yi bintɔfiɛ. Bɔ bə bɔ sese nɨ yu jiwa yu fə ba tə taŋŋə Jisɔs bə bɔ. 5 Bɔ wɔ buni ba ka lə bɔ jiba bɔ sɔmbu yu kpə. 6 Yu bɨŋ ba gəŋ gbɔ kɨ noŋko dzə́ yi naji yu nya Jisɔs bɔ kaŋ tsa yi bənɨ na sɨŋ fə yu ku kɨyɛŋ.
Kɨgbeyɛ kɨ nchɛnəbɨŋ'ə
7 Lə butsu bu kɨgbeyɛ kɨ Blɛ wu bə́ nə̀ kə galə dzé sɔ lə ba kwətsə, ɨji kɨgbeyɛ kɨŋ ntɨŋ bə́ nə̀ ba bə́ yembe kɨchɔŋ kɨ biɨ, 8 Jisɔs faŋ Pita bə Jɔŋ ba tə lə, “Bə gə̂ŋ fə biɔŋ bi kə jiba ɨ kə diə kɨgbeyɛ kɨŋ su.” 9 Bɔ bi bə yu lə, “Wə na se lə kə gəŋ fə ji məŋ?”
10 Yu chi lə, “Bə wɔ̂, tsa yi bə kɨ beke bə gɨntɨ kɨtuŋ ka ntɨŋ, bə jiba bə ŋəŋ miɨ wudɔ' tɔ ŋgɔŋ shɔ ntɨŋ, ɨ bə biə yu tsɔŋ yi yu bɛɛ ya yi ntɨŋ. 11 Bə biə yu, bə tə bə chɛ tsɔŋ wa lə, Miɨ wu Bitɨfiə na bi lə dia wu tsɔŋ'ə wu bənɨ bə ŋkɔŋ'ə wu bɔ bə beŋ buhu bə nɨŋ'ə jiba bɔ diə Kɨgbeyɛ kɨ Nchɛnəbɨŋ'ə na məŋ lə? 12 Yu jiwa ɨ yu donchɛ bəŋ tsɔŋ yi ŋgbɔŋkɔ, tsɔŋ yi nəbɔ́ ntɨŋ, ɨji bə́' nachɛ yi, ɨ bə tə fə bidiəŋ sɔ.” 13 Bəma, bɔ gəŋ ba ŋəŋ biɔŋ bichi diəŋ nɨ Jisɔs nə̀ chanyɛ bə bɔ. Bɔ gəŋ ba fə bidiəŋ bi Kɨgbeyɛ kɨ Nchɛnəbɨŋ'ə ka lə.
Jisɔs bə beŋ buhu diə bidiəŋ bi Nyɔ lə
14 Lə tsa ba kwətsə, Jisɔs bə beŋ buhu bə faŋə ba jiŋ kɨ diɨ. 15 Yu jiji ba tə bə bɔ lə, “Nnə nse kɨtso lə ndiə Kɨgbeyɛ kɨ Nchɛnəbɨŋ'ə kɨŋ bə bəŋ fə ntə ŋ'wɔɔ ŋgə wu na ba wɨ. 16 Bə kkə̂ lə ntsɔhɔ ndiə Kɨgbeyɛ kɨŋ, gəŋ fɔ tsa yi fi ná fɔɔ diəŋ, yi Nyɔ ná kɨ sakɨ buŋkuŋ buhu.”
17 Yu dze bwaŋ ba nya kɨmbafə bə Nyɔ ba tə lə, “Bə kɔ̂ bə mu bəŋ bəchi ba fiədiə lɨ. 18 Ntə bəŋ lə dze nə fɛŋ bɨŋ kɨ gɨntɨ, naji ntsu ba mu mbiŋ nə kɨtɨ kɨ nləyə wɨ kə, gəŋ fɔ tsa yi buŋkuŋ bu Nyɔ lə ná ba.”
19 Yu dze blɛ, yu nya kɨmbafə bə Nyɔ ba gbə nya bə bɔ ba tə lə, “Nyi na gwɨ yɛŋ yi nna nnya ndzɨ bəŋ. Bə kɨ fɨtɨ mɛ fə bə kɨ gɔmbiɛ mɨ.” 20 Diəŋ tɨ manɨ nɨ bɔ kanə bə ndiə, yu dze bwaŋ ba tə lə, “Bwaŋ wuŋ na nchínə yifa yi Nyɔ diə bə ŋgwembe mɛŋŋ mə fɔɔ ndzɨ bəŋ. 21 Bəmanɨ, bə wôkɔ bə wɔ, miɨ wu jiwa yu taŋŋə mɨ, diɨ wa mɛ bə mɨ. 22 Bə kɨ kkɨ lə Wɛŋ wu Miɨ jiwa yu gəŋ nɨ Nyɔ nə̀ galə. Bəmanɨ, lɔŋ bə miɨ wu' taŋŋə wa yu.” 23 Bɔ tə gbɔ kɨ bishɛ bə gwɨ́ yibɔlə lə fa miɨ wu naji ɨ yu fə fiŋ fiɔŋ nə bɔ ntɨŋ na yəŋ lɛɛ.
Jisɔs tɨfiə chi naji lə bənɨ buhu kɨ ji
24 Bɔ jiji ba gbɔ yímbiɛ bɔ bɔ lə fa bɔ na ji mɛ miɨ wubəŋ nə bɔ ntɨŋ ji yəŋ lɛɛ? 25 Jisɔs tə bə bɔ lə, “Bəŋkuŋ bə sɛŋ koso na keŋkɛ buŋga bənɨ bəbɔlə bɨŋ, bənɨ bə na sakɨ kɨtuŋ tɨdi lə bə́ kɨ tsɨsə bɔ lə bintɔŋ kɨ bənɨ lə. 26 Bəmanɨ, naji ɨ fi kɨ ji manɨ bə bəŋ kə. Miɨntaŋ nə bəŋ ntɨŋ kɨ dze lə yu na ji wɛŋ, nsafiə nə bəŋ ntɨŋ kɨ ji nɨ miɨ wu na nɨntɨ bəŋ'ɨ bəchi. 27 Miɨ wubəŋ na wu la, miɨ wu' yəkə kɨ diɨ budiənə, maa miɨ wu na jɛti lə? Ntɨlə na miɨ wu yəkə kɨdiɨ? Bəmanɨ nna nji bəŋ ntɨŋ nɨ miɨ wu na nɨntɨ bəŋ'ɨ.
28 Nɨ nnə̀ nshɨ ŋ'woko bəŋgə tsá chi, əji kwa bəŋ bɛŋ bə kə nə̀ ji bə bəŋ. 29 Fi kɨ ji lə, diəŋ nɨ Taa nya mɨ buŋkuŋ lə ŋkɨ nsakɨ, kɨjilə mɨ nya tɨ bəŋ buŋga lə bə kɨ sakɨ. 30 Mɨ nya fə kə kɨ diɨ, kə mu dɨ mo ntɔ wɛŋ ntɨŋ, ɨji bə' jiŋ bəkabala bɨŋ kɨ sakɨ bitsɔŋ bi Isla bi yɔɔ ntse bifɛ.”
Jisɔs tə lə Pita jiwa yu nɨŋŋ yu
31 Jisɔs bəndɨ Pita lə, “Semon, Semon, bô ŋəŋ, Satan' ləkə buŋga bu shɛkɛlɛ bəŋ bəchi ba foso bədɔ diəŋ nɨ miɨ ba yu wɨ jiŋ ba foso miu wa. 32 Bəmanɨ mɨ ntsɨsɨ bə wə, shəŋ yɔhɔ kə̂ fɔkɔ nə mɨ wɨ. Tsa yi wə dɨyə bufɨ bwɔhɔ jiŋ, wə koso shəŋ yi bəwəma lə.”
33 Pita tə lə, “Baba, ɨ na lə ŋgəŋ tɨmo tsɔŋ yi buŋfia ntɨŋ makə lə ŋkkpə, njiwa ŋkɨ nji kwa bə wə.”
34 Jisɔs chi bə yu lə, “Pita wɔ̂, ntə wə lə, fə kɨyɔŋ kɨ ji lə kɨ tiŋ ndɛŋ, kɨ ji wə' nɨŋŋ tsá tiɛ lə wə na kkəhə mɨ.”
Jisɔs tɨfiə nɨ beŋ buhu bə nɨŋ'ə kɨ lɨmə shəŋ
35 Jisɔs bi bə beŋ buhu bə nɨŋ'ə lə, “Bə gɔ̂mbiɛ tsa yi nnə̀ mfaŋə ya bəŋ kpə sɨŋ, biba sɨŋ, bikpa sɨŋ tɨ, nɨ bə nə̀ gəndəə, bə nə̀ fiəŋkə fiɔŋ?” Bɔ chi lə, “Yɛ, kə nə̀ kə fiəŋkə fiɔŋ.” 36 Yu tə tə bə bɔ lə, “Bə fɛŋ, ɨ miɨ na keŋkɛ kpə, makə kɨba, yu dzê. Ɨ miɨ na sɨŋ bə mbiəlɨ, yu taŋŋə kɨndzu kɨhɨ ba taŋ'ɨ. 37 Nna nchanyɛ fiŋ ndzɨ fiɔŋ fi na ji bubɔndɔ Kɨŋwatɨ kɨ Nyɔ lə ntɨŋ lə,
‘Bə́ nə̀ bɔmbiɛ yu kɨntsu kɨ bənɨ bə na bunchi bilaŋ ntɨŋ’,
fiɔŋ fia' fɔ diəŋ bə mɨ fɛŋ. Bə kɨ kkɨ lə biɔŋ bi bə́ nə̀ bɔndɔ tsukɔ mɨ wɨ bi ba bia fɔɔ diəŋ bichi.” 38 Bɔ tə kəmbə shəŋ lə, “Baba, ŋə̂ŋ kə na keŋkɛ bəmbiəlɨ bəfɛ.” Yu chi lə, “Fi' kwətsə manɨ.”
Jisɔs tsɨsɨ Dzo yi Bitɨ bi Ɔlif lə bɨŋ
39 Jisɔs dza ba fɔ nə kɨtuŋ ka ntɨŋ bə beŋ buhu bə nɨŋ'ə ba gbɔ kɨ bɨndɨ Dzo yi Bitɨ bi Ɔlif lə, ɨji nɨ yu nə̀ ba yu kɨ fɨtɨ. 40 Lə bɔ bəndɨ ba fɔ dɨ wu bɔ nə̀ gɨntɨ, yu tə bə bɔ lə, “Bə kɨ tsɨsə mfɔ tə kə ba bəŋ wɨ, ɨ yi ya bəŋ.”
41 Nɨ yu tədiə manɨ, yu kɨnɨ ba gəŋ fɔ kwa nɨ naji ɨ miɨ li ta wu gəŋ fɔ, yu tuŋ nu fəkoso ba tsɨsɨ lə, 42 “Taa, jilə na nɨ wə na se, wə tɔ bwaŋ wu ŋgə lə wuŋ lə ŋkə mwɔhɔ. Bəmanɨ fə̂ nɨ wə na se, wə kə̂ fəkə nɨ nna nse.” [ 43 Nɨ yu tsɨsə manɨ, nchinda wu Nyɔ shi nə bɔ́ ba yinə yu buŋga. 44 Jisɔs nə̀ ji shəŋ yihi bɨfi yu kɨtso. Yu chi tsɨsə buntaŋ, yu yəsə, kɨyəsə ka təkiɛ fəkoso nɨ bitətə bi ŋgwembe lə.]ª
45 Lə yu tsɨsɨ ba kanə lɨ, yu tsu jiŋ fə beŋ buhu bə nɨŋ'ə ku ba ŋəŋ ɨji bɔ' dzudi gwɨ ba fuŋ gbɔ kɨnɨ. 46 Yu bi bə bɔ lə, “Bə tsu kɨ me ji bumenɛ? Bə dzâ wə bə kɨ tsɨsə mfɔ tə kə ba bəŋ wɨ ba ya bəŋ.”
Bə́ kwe Jisɔs
47 Tɨmɛ nɨ yu nə̀ bambi yu chanyɛ, kuta wu bənɨ lafu, ɨ tsu ji Judas wu nə̀ ji miɨ nə kɨntsu kɨ beŋ bə Jisɔs lə bə yɔɔ ntse bəfɛ ntɨŋ wu nə̀ sa fiə. Yu gəŋ fə Jisɔs ku lə yu kanchɛ yu, 48 bəmanɨ, Jisɔs bi bə Judas lə, “Wə fɛŋ na se lə wə kanchɛ Wɛŋ wu Miɨ mɛ bə ndonchɛ lə bə́ kwe?” 49 Lə beŋ buhu bə nɨŋ'ə bə nə̀ ji fə yu ku ŋəŋ fiɔŋ fi nə̀ ji lə fi tɨchə, bɔ bi lə, “Baba, kə gbechɛ bənɨ bɛŋ?” 50 Miɨ wudɔ nə bɔ ntɨŋ bu tsə ba kəmbɨ kɨtiu kɨ nədiɨ kɨ mfia wu fo wu bəchɛ bintɔfiɛ lə. 51 Jisɔs loso lə, “Miɨ kə̂ tsɔhɔ mɔŋɔ,” yu bukɔ kɨtiu kɨ miɨ wa lə, kɨ bu tsu nɨ kɨ nə̀ ji.
52 Bənɨ bə nə̀ ba ba lə bɔ kwe Jisɔs nə̀ bəchɛ bintɔfiɛ bəbəŋ bə fó yi kɨlaŋ'ə yi nə̀ kɨki tsɔŋ yi bintɔfiɛ ntɨŋ ma bənɨ bə nə̀ sakɨ kɨtuŋ. Yu bi bə bɔ lə, “Bə ba lə bə kwe mɨ bə kɨ ba bə binchində bə bintɛ wələ bə ba lə bə kwe ji miɨ wu buyi? 53 Nnə nshɨ bə bəŋ díɔ chi tsɔŋ yi bintɔfiɛ ntɨŋ, bə ji mɨ kə bukɔ ndzɨ la? Bəmanɨ, fɛŋ na tsa yənɨ yi naji ɨ bə fə fiɔŋ əji tsa yi buŋga bu kɨjuwɔ lə.”
Pita nɨŋŋ Jisɔs
54 Bənɨ ba kwe Jisɔs kɨ gɨntɨ bə yu ku wu fo wu bəchɛ bintɔfiɛ lə ntɨŋ, Pita biəlɨ nəjiŋ nə dzəbudə. 55 Bɔ gəŋ ba fə boso ku kɨntɨŋ kɨntɨŋ ba jiŋ kɨ yuku. Pita ba jiŋ tɨ bɔ ntɨŋ. 56 Nɨ boso nə̀ doko, wɛŋ wu kansɨ wudɔ wu nə̀ nɨntɨ ku wa ntɨŋ ŋəŋ Pita wɨ yu' jiŋ. Yu bo yu bushi wɨ ndzɔɔŋ ba tə lə, “Miɨ no sə ji bɔ bə miɨ wa.” 57 Pita nɨŋŋ ba tə lə, “Ɔ kpansɨ no! Nna ŋkkəhə miɨ wa.” 58 Lə tsa chɛ tsəsɨ, miɨ wudɔ chi ŋəŋə yu wɨ ba tə lə, “Wə na ji wudɔ tɨ nə kɨntsu kɨbɔlə ntɨŋ.” Bəmanɨ Pita tə lə, “Ɔ Nyunso no! Nna njimiɛhɛ wudɔ nə bɔ ntɨŋ.”
59 Lə tsa chɛ tɨmɛ nɨ kɨtsə kɨmo, miɨ wudɔ chi tsɔ su lə, “Yɛyi lɨ, miɨ no sə ji bɔ bə miɨ wa, ndzɨ yu na ji tɨ miɨ wu Galili.” 60 Pita chi nɨŋŋə ba tə lə, “Ɔ Nyunso no! Nna ŋkkəhə fiɔŋ fi wə chanyɛ.” Kwa nɨ yu nə̀ bambi yu chanyɛ manɨ, mɨ kɨsɨkɨ kɨyɔŋ bu tiŋ. 61 Baba fichə, yəsɨ yihi bɨkənɨ bə yi Pita lə. Pita se nchanyɛ yi Baba sə chanyɛ bə yu lə, “Fə kɨyɔŋ kɨ ji lə kɨ tiŋ ndɛŋ, kɨ ji wə' nɨŋŋ mɨ tsá tiɛ.” 62 Yu dza nə mɨ ba fɔ binchi ba də mɛ yɛyi yɛyi.
Bə́ kɨ ŋgo Jisɔs, bə́ kɨtɨ yu
63 Bənɨ bə nə̀ chiŋfiɛ ba Jisɔs gbɔ kɨ ŋgo yu, bɔ kɨtɨ yu, 64 bɔ fu bushi buhu bə kɨndzu ba tə bə yu lə, “Tə̂ miɨ wu' kəə wə.” 65 Bɔ kɨ tumiɛ yu bə muntɔŋ kɨyɛŋ.
Bə́ sa nsa yi Jisɔs
66 Lə butsu wɔ, bənɨ bə sakɨ kɨtuŋ bə bəchɛ bintɔfiɛ bəbəŋ ma bənɨ bə tɨfiə bilaŋ bi Nyɔ lə tɛshɛ bəchi. Lə bɔ tɛshɛ, bɔ dze Jisɔs ba gəŋ bə yu dɨ wu bɔ nə̀ ba bɔ kɨ sakɨ bənsa. 67 Nɨ bɔ gəŋə bə yu manɨ, bɔ tə bə yu lə, “Jilə na wə Nchitə wu Nyɔ nə̀ kaa wa, wə tə̂ bɨ” Jisɔs chi bə bɔ lə, “Ntə bəŋ, ɨ bə jikə bɨmiə. 68 Mbi tɨ bəŋ fiɔŋ, ɨ bə jikə chisə. 69 Bəmanɨ, dze nə fɛŋ bɨŋ, Wɛŋ wu Miɨ jiwa yu jiŋ Nyɔ wu buŋga nədiɨ.” 70 Bɔ bəchi tə bi bə yu lə, “Kɨjilə wə na ji Wɛŋ wu Nyɔ?” Yu chi lə, “Fi na ji nɨ bə na tɨdi.” 71 Bɔ tə lə, “Naji ɨ kə tsu kɨ noŋko miɨ lə yu tə lə la? Kə' wɔ fiɔŋ fi yu chanyɛ bə bifuŋ bihi.”