Jisɔs wwɔ go yi beŋ buhu bə nɨŋ'ə
13
Lə kɨ ji lə butsu woto bwa Kɨgbeyɛ kɨ Nchɛnəbɨŋ'ə, Jisɔs kkə lə tsa yi naji lə yu shə mbi no ba fichə tsu fə Tɨɨ ku' kwətsə. Nɨ yu nə̀ laŋkɨ bənɨ buhu mbi no ntɨŋ, yu laŋ bɔ gəŋ fɔ fəŋgbɨŋ. 2 Bɔ kɨ diɨ fudiɔ, ɨji Satan sə ga kɨŋgɔmbiɛ shəŋ yi Judas lə ntɨŋ wɛŋ wu Semon Ɛskaliɔt lə yu taŋŋə Jisɔs. 3 Nɨ Jisɔs nə̀ kkɨ lə Tɨɨ' nya biɔŋ bichi yu kaŋ, yu kkɨ tɨ lə yu nə̀ fɔ nə fə Nyɔ ku, lə yu fichɛ wa yu tsu jiŋ fə Nyɔ ku, 4 yu bu dza nə bidiəŋ bɨŋ ba se bindzu bihi, dze kɨndzu kɨ bə́ na shiŋkiɛ gwɨ su ba kansɨ chi, 5 tə yente ŋgɔŋ ŋka ntɨŋ ba gbɔ kɨ wwo go yi beŋ buhu bə nɨŋ'ə, yu shiŋkiɛɛ bə kɨndzu kɨ yu nə̀ kansə ka chi. 6 Lə yu ba fɔ Semon Pita wɨ, Semon Pita bi bə yu lə, “Baba, na wə wu naji lə wə wwɔ go yɛmɨ?”7 Jisɔs chi bə yu lə, “Fiɔŋ fi nna mfɨtɨ naji ɨ wə kkə fi fɛŋ kə. Wə ná kkɨ ji nəjiŋ.” 8 Pita tə bə Jisɔs lə, “Naji wə shəshə ba wwɔ go yɛmɨ kə.” Jisɔs chi bə yu lə, “Njikə wwɔɔ wə, tə kə na keŋkɛhɛ fiɔŋ bɨ bə wə.” 9 Semon Pita tə bə Jisɔs lə, “Baba, jilə fi na ji manɨ, tə naji ɨ wə wwɔ kwa ji go yɛmɨ kə. Wə jiwa wə wwɔ kaŋ yɛmɨ bə fo wɛmɨ tɨ.” 10 Jisɔs chi bə yu lə, “Miɨ wu sə wwɔɔ gwɨ na tsalə gwɨ chi, mbɨ wudɔ jikə jimiɛ wu naji lə yu chi wwɔɔ gwɨ, fiəŋkə kwa go. Bə na ji ntsaaŋ, bəmanɨ ɨ jikə jimiɛ bəŋ bəchi bə na tsalə.” 11 Jisɔs nə̀ chanyɛ manɨ ndzɨ yu nə̀ kkɨ miɨ wu jiwa yu taŋŋə yu. Fia nə̀ fiɔŋ fi yu nə̀ tədiə fia lə, “Bə na tsaləhə bəchi.”
12 Lə Jisɔs kanə bə ŋ'wwɔ yi go yibɔlə, yu dɔŋ bindzu bihi ba tsu kɨjimiɛ kɨhɨ bɨŋ, tə bi bə bɔ lə, “Bə kkə fiɔŋ fi mɨ mfəə fiŋ bə bəŋ? 13 Bə na tsɨsə mɨ lə Miɨ wu Bitɨfiə, bə tsɨsə tɨ mɨ lə Baba, ɨji bə na tsɨsə manɨ fi ji diəŋ ndzɨ na fiɔŋ fi nna nji. 14 Jilə mɨ wu nna nji Baba wɛnɨ nji Miɨ wɛnɨ wu Bitɨfiɛ mɨ ŋ'wwɔ go yɛnɨ, tə bə naji tɨ lə bə kɨ wwɔnɔnɨ go yɛnɨ. 15 Mɨ mfə manɨ ndonchɛ bə bəŋ lə bə kɨ fɨtɨ tɨ nɨ mɨ mfəə bə bəŋ. 16 Yɛyi lɨ ntə bəŋ lə wɛŋ wu nɨŋ kɔhɔ ba ya miɨ wubəŋ wuhu, miɨ wu bə́' faŋə kɔhɔ tɨ ba ya miɨ wu sə faŋə wa yu. 17 Ɨ bə na kkɨ biɔŋ biŋ, bə fɨtɨ bi, ɨ kɨnlaŋ kɨbəŋ kɨ ji kɛnɨ. 18 Nna nchanyɛhɛ ɨji tsukɔ bəŋ bəchi wɨ. Nna ŋkkɨ bənɨ bə mɨ nsabiɛ. Bəmanɨ, fiɔŋ fi na ji Kɨŋwatɨ kɨ Nyɔ lə ntɨŋ naji lə fi ba fɔ diəŋ nɨ fi na ji bubɔndɔ lə, ‘Miɨ wu diə bidiəŋ biɛŋ, yu dza kɨ sesɛ gbo mɨ nəjiŋ.’ 19 Nna ntɨdi fiɔŋ fiŋ bə bəŋ fɛŋ fi bambi kə tɨchə, fə tsa yi fi tɨchə, ɨ bə bɨŋ lə na mɨ wa. 20 Yɛyi lɨ ntə bəŋ lə miɨ wu ləkə miɨ wu la wu mɨ mfaŋə, tə yu ləkə ji mɨ. Miɨ wu ləkə mɨ na ləkə ji miɨ wu' faŋə mɨ.”
Jisɔs donchɛ miɨ wu jiwa yu taŋŋə yu
21 Lə Jisɔs chanyɛ biɔŋ biŋ mɛ, shəŋ yihi gbɔ kɨ nɨkə. Yu dza ba chanyɛ ŋgbooŋ lə, “Yɛyi lɨ ntə bəŋ lə miɨ wudɔ nə bəŋ ntɨŋ jiwa yu taŋŋə mɨ.” 22 Beŋ buhu bə nɨŋ'ə kɨ bobiɛnɨ gwɨ́, bɔ masə lə fa yu na chanyɛ ji yəŋ lɛɛ. 23 Miɨ wudɔ nə bɔ ntɨŋ wu Jisɔs nə̀ laŋkɨ kɨtso nə̀ yəkə kɨ diɨª gwɨgwɨ fə yu ku. 24 Semon Pita kpashi yu ba tə lə yu bi bə Jisɔs lə yu na chanyɛ ji yəŋ lə. 25 Bəma miɨ wa yəkə ba gəŋ Jisɔs wɨ ba bi bə yu lə, “Baba, na yəŋ?” 26 Jisɔs chi bə yu lə, “Na miɨ wu njiwa ŋgbə blɛ ba biŋkili bubu ntɨŋ ba nya yu.” Bəma yu biŋkili blɛ wa ba nya bə Judas wɛŋ wu Semon Ɛskaliɔt. 27 Lə Judas ləkə blɛ wa mɛ, Satan bu be yu ntɨŋ. Jisɔs tə bə yu lə, “Sôkiɛ wə fə fiɔŋ fi wə na se fia lə wə fə.” 28 Miɨ wudɔ nə kɨntsu kɨbɔlə ntɨŋ nə̀ kə kkə fiɔŋ fi yu chanyɛ bə yu manɨ. 29 Bədɔ nə̀ gɔmbiɛɛ lə nɨ Judas nə̀ ji miɨ wu galɨ kɨba kɨ kpə lə, lə Jisɔs' chanyɛ bə yu lə yu gəŋ taŋ biɔŋ bi bɔ naji lə bɔ diə kɨgbeyɛ su, makə lə yu gəŋ nya fiɔŋ bə bənɨ bə fiəŋkə. 30 Lə Judas ləkə blɛ wa ba diə lɨ, yu bu fɔ tsa miu ba gəŋ'ɨ. Tsa ya nə̀ ji tsa yi kɨjuwɔ.
Jisɔs tə kɨ kkpə yihi lə bə beŋ buhu bə nɨŋ'ə
31 Lə Judas fɔ ba gəŋ'ɨ, Jisɔs shə ba tə lə, “Fɛŋ bə́ jiba ɨ bə́ gbɔ kɨ ŋɨntɨ bubəŋ bu Wɛŋ wu Miɨ lə, bə́ ŋɨntɨ tɨ bubəŋ bu Nyɔ lə wene wɨ. 32 Jilə bə́' ŋəŋ bubəŋ bu Nyɔ lə wene wɨ, tə Nyɔ donchɛ lɨ bubəŋ bu wene lə yu wu Nyɔ wɨ. Yu jiwa yu donchɛ tsa miu. 33 Beŋ bɛmɨ, njiwa njiŋ bə bəŋ kwa tsa ntɨŋ tsəsɨ. Bə jiba bə shə ba nɔŋ mɨ ɨ bə ji mɨ wɨ kə ŋəŋkəhə. Nɨ nnə̀ ntədiə bə Bəju, na nɨ nna ntɨdi bə bəŋ fɛŋ lə, ‘Dɨ wu nna ŋgɨntɨ naji bə ba mɨ kə.’ 34 Nna nnya kɨlaŋ, ɨji kɨlaŋ kɨfa lə bə shə lɨ, bə kɨ laŋkɨ gwɨ́ yɛnɨ. Bə kɨ laŋkɨ gwɨ́ yɛnɨ diəŋ nɨ mɨ nlaŋə bəŋ. 35 Ɨ bə shə kɨ laŋkɨ gwɨ́ yɛnɨ manɨ, ɨ fiŋfi fə bənɨ bəchi kkə lə bə na ji beŋ bɛmɨ bə nɨŋ'ə.”
Jisɔs tə lə Pita jiwa yu nɨŋŋ yu
36 Semon Pita bi bə Jisɔs lə, “Baba, wə na gɨntɨ ji məŋ?” Jisɔs chi lə, “Dɨ wu nna ŋgɨntɨ naji ɨ wə biə mɨ fɛŋ kə. Wə jiwa wə shə tə biə lɨ.” 37 Pita chi biɛ bə yu lə, “Baba, naji mbiə wə fɛŋ kə ndzɨ la? Njiwa nnya buwəŋ bwɛŋ ba kkpə ndzɨ wə.” 38 Jisɔs bi bə yu lə, “Naji ɨ wə nya buwəŋ bwɔhɔ ba kkpə ndzɨ mɨ? Ntə wə yɛyi yɛyi lə fə kɨyɔŋ kɨ ji lə kɨ tiŋ, kɨ ji wə' nɨŋŋ mɨ tsá tiɛ.”