Bənɨ sese lə bɔ kwe Jisɔs ba kkpɨsɨ lɨ
14
Nə̀ shə díɔ fɛ lə kɨ ji butsu bu Kɨgbeyɛ kɨ Nchɛnəbɨŋ'ə ma Kɨgbeyɛ kɨ Blɛ wu bə́ kə galə Dzé sɔ lə. Bəchɛ bintɔfiɛ bəbəŋ bə bənɨ bə tɨfiə bilaŋ bi Nyɔ lə noŋko dzə yi bɔ kwɛɛ Jisɔs yi ntɨŋ bunyələ ba kkpɨsɨ lɨ. 2 Bɔ tə bə gwɨ́ yibɔlə lə, “Kə kə̂ mɔŋkɔ fiɔŋ fiŋ tsa yi bə́ na fɨtɨ kɨgbeyɛ kɨŋ, ndzɨ ɨ kə mɔŋ'ɨ, ɨ fi ba bə bəŋgə bənɨ ntɨŋ.”Kpansɨ wudɔ fi Jisɔs bə məŋ mə ntsɔŋfu lə
3 Lə Jisɔs kɨ ji kɨtuŋ kɨ Bɛtani ntɨŋ, tsɔŋ yi Semon ntɨŋ, wu nə̀ sa yu ji miɨ wu kɨnsansa, bɔ jiŋ kɨ diɨ, kpansɨ wudɔ jiji ba be bə fiŋgəª fi məŋ məndɔ mə ntsɔŋfu lə. Məŋ mənsu nə̀ tɛti kpə kɨtso, bə́' fə bə fiɔŋ fidɔ fifi, fi bə́ nə̀ tsɨsə lə nad. Lə yu be, yu kpɨshɛ chində yi fiŋgə fia ba tsumbiɛ məŋ ma Jisɔs fi. 4 Bənɨ bədɔ kɨ nuŋɔ bɔbɔ, bɔ tɨdi lə, “Yu bɨsɨ məŋ mɛŋ mɛ ndzɨ la? 5 Sə ji ɨ bə́ taŋŋə məŋ mɛŋ ɨ mɔ ya biba gɨtɛ ba nya kpə wa bə bənɨ bə fiəŋkə.” Bɔ kweŋ kpansɨ wa kɨtso. 6 Bəmanɨ, Jisɔs tə bə bɔ lə, “Bə gâ yu manɨ. Bə na nya yu ŋgə ndzɨ la? Yu fə ji fiɔŋ fi ndzeŋe bə mɨ. 7 Bə kɨ kkɨ lə bənɨ bə fiəŋkə na ji bə bəŋ tsá chi. Naji ɨ bə chitə bɔ tsa yi bə na se. Bəmanɨ, naji ŋkɨ nji bə bəŋ tsá chi kə. 8 Kpansɨ no' fə ji fiɔŋ fi yu nə̀ kafu. Yu tsumbiɛ məŋ mɛŋ mɨ wɨ mɛ, yu fiyə gwɨ yɛmɨ tsa bambi, chi bə́ ná diyɛ mɨ. 9 Ntə bəŋ yɛyi lə, dɨ wu la wu bə́ ná kɨ tɨfiə shɔŋ yi ndzeŋe mbi chi ntɨŋ, fiɔŋ fi kpansɨ no fəə, bə́ ná kɨ chanyɛ fi bə ŋgɔmbiɛ yu.”
Judas gəŋ lə yu taŋŋə Jisɔs
10 Judas Ɛskaliɔt miɨ nə kɨntsu kɨ beŋ bə Jisɔs lə ntɨŋ bə yɔɔ ntse bəfɛ, dza ba gəŋ fə bəchɛ bintɔfiɛ bəbəŋ ku lə yu taŋŋə Jisɔs bə bɔ. 11 Lə bɔ wɔ manɨ, bɔ laŋ kɨtso, bɔ ka lə bɔ jiba ɨ bɔ nya yu kpə. Yu gbɔ kɨ noŋko dzə́ yi naji ɨ yu nya Jisɔs bɔ kaŋ.
Kɨgbeyɛ kɨ nchɛnəbɨŋ'ə
12 Lə butsu bu fiəfiə bu Kɨgbeyɛ kɨ Blɛ wu bə́ kə galə Dzé sɔ lə, bu bə́ nə̀ ba bə́ yembe kɨchɔŋ kɨ Kɨgbeyɛ kɨ Nchɛnəbɨŋ'ə kɨ ba kwətsə, beŋ bə Jisɔs lə bə nɨŋ'ə ba bi bə yu lə, “Wə na se lə kə gəŋ fə dɨ wu wə diə Kɨgbeyɛ kɨ Nchɛnəbɨŋ'ə məŋ?” 13 Yu faŋ beŋ buhu bə nɨŋ'ə bədɔ bəfɛ ba tə bə bɔ lə, “Bə bê kɨtuŋ ka ntɨŋ, bə be lɨ, ɨ bə ŋəŋ miɨ wudɔ wɨ ɨji yu' tɔ ŋgɔŋ kpənsɨ ntɨŋ, ɨ bə biə yu. 14 Tsa yi yu gəŋə ba be tsɔŋ yi yu bɛɛ ya sɔ, bə tə bə miɨ wu na ji wa bə tsɔŋ ya lə, ‘Miɨ wu Bitɨfiə na bi lə tsɔŋ yi bənɨ bə gbəndɨ lə yi bɔ bə beŋ buhu bə nɨŋ'ə naji lə bɔ diə Kɨgbeyɛ kɨ Nchɛnəbɨŋ'ə sɔ na məŋ?’ 15 Yu jiwa yu donchɛ bəŋ tsɔŋ yi ŋgbɔŋkɔ, tsɔŋ yi nəbɔ́ ntɨŋ ɨji bə́' nachɛ yi, ɨ bə tə fə bidiəŋ sɔ.” 16 Lə beŋ bə nɨŋ'ə ba dza ba gəŋ sɔ kɨtuŋ ka ntɨŋ, bɔ gəŋ ŋəŋ biɔŋ kwa diəŋ nɨ Jisɔs sə chanyɛ bə bɔ. Bɔ fə bidiəŋ bi Kɨgbeyɛ kɨ Nchɛnəbɨŋ'ə sɔ. 17 Lə kɨ ji fudiɔ, Jisɔs bə beŋ buhu bə nɨŋ'ə bə yɔɔ ntse bəfɛ tɛshɛ sɔ. 18 Bɔ jiŋ kɨ diɨ, Jisɔs jiji ba tə bə bɔ lə, “Ntə bəŋ yɛyi lə miɨ wudɔ nə bəŋ ntɨŋ jiwa yu taŋŋə mɨ, miɨ no na wu na diɨ bə mɨ.” 19 Lə bɔ wɔ manɨ, bɔ kɨ dzudi gwɨ, bɔ kɨ tɨdi bə yu miu miu lə, “Naji ɨ kɨ ji mɨ kə” 20 Yu chi lə, “Na miɨ wudɔ nə bəŋ bə yɔɔ ntse bəfɛ ntɨŋ, wu bɨ bə yu na biŋkili blɛ fio miu ntɨŋ. 21 Wɛŋ wu Miɨ jiwa yu gəŋ nɨ fi na ji bubɔndɔ tsukɔ yu wɨ. Bəmanɨ, lɔŋ na ji bə miɨ wu jiwa yu taŋŋə Wɛŋ wu Miɨ. Fi nə̀ ndzeŋe kɨtso lə bə́ kə̂ bɛyɛ ŋgwe yi wa miɨ.”
Bidiəŋ bi Jisɔs lə bi nəjiŋ
22 Nɨ bɔ nə̀ diɨ, Jisɔs dza ba dze blɛ, yu nya kɨmbafə bə Nyɔ, yu gbədiə ba nya bə beŋ buhu bə nɨŋ'ə ba tə lə, “Bə kɔ̂, nyi na gwɨ yɛmɨ.” 23 Yu dze tɨ bwaŋ, nya kɨmbafə bə Nyɔ ba nya bɔ bwaŋ wa, bɔ mu bəchi. 24 Yu tə bə bɔ lə, “Mɛŋ na ŋgwembe mɛŋŋ mə Nyɔ diə nchínə su, mɔ' fɔ ndzɨ bənɨ kɨyɛŋ. 25 Ntə bəŋ yɛyi lə, ntsɔhɔ mmwɔ mbiŋ mə muntaŋ mu kɨtɨ kɨnləyə lə gəŋ fɔ butsu bu nná mwɔ məŋfa buŋkuŋ bu Nyɔ lə ntɨŋ.” 26 Lə Jisɔs bɔ bə beŋ buhu bə nɨŋ'ə kanə, bɔ tə yɨmbɨ yi kɨŋkuntə ba fɔ bəndɨ gəŋ Dzo yi Bitɨ bi Ɔlif lə bɨŋ.
27 Jisɔs jiji ba tə bə bɔ lə, “Bəŋ bəchi bə jiba bə saŋfiə mɨ nəjiŋ. Na nɨ fi nə̀ ji bubɔndɔ Nyɔ tɨdi lə,
‘Njiwa ŋkkpɨsɨ ntɨŋkɨ wu shíŋ ɨ shíŋ saŋfiɛ.’
28 Bəmanɨ, tsa yi Nyɔ dzakɔ mɨ nə kkpə lɨ, nsa bəŋ fiə ba gəŋ Galili.” 29 Pita chi bə Jisɔs lə, “Ma fi ji tɨmo lə bənɨ bəchi saŋfiə wə nəjiŋ, nə mɨ lɨ, naji nshə wə kə.” 30 Jisɔs tə bə yu lə, “Ntə wə yɛyi lə ndɛŋ bbutsu, fə kɨyɔŋ tiŋɛ tsá fiɛ, kɨ ji wə sə nɨŋŋ mɨ tsá tiɛ.” 31 Pita chanyɛ bə diɛ yintaŋ lə, “Ma ji tɨ lə ŋkkpə bə wə, naji nshəshə mɨ nɨŋŋ wə kə.” Nɨ yu tədiə manɨ, bɔ bəchi tə kwa tɨ diəŋ nɨ yu tədiə.
Kɨntsɨsɨ kɨ Jisɔs lə Gɛsɛmani
32 Lə bɔ gəŋ be kə wu bitɨ bi muntaŋ'ə wudɔ ntɨŋ, bə́ tsɨsə lə Gɛsɛmani, Jisɔs tə bə beŋ buhu bə nɨŋ'ə lə, “Bə jîŋ mɛni, ŋgəŋ ntsɨsɨ.” 33 Yu dze Pita, Jɛm bə Jɔŋ, bɔ dza nə mɨ. Yu gbɔ kɨ gɔmbiɛ biɔŋ bi funsə yu kɨtso. 34 Yu tə bə bɔ lə, “Shəŋ yɛŋ ya yi bɨfi kɨtso dzə́ yi naji ŋkkpə bukkpənə. Bə shə̂ kɨ ji mɛ bə bichə.” 35 Jisɔs dza nə mɨ ba kɨnɨ gəŋ fiə tsəsɨ ba gbɔ fəkoso tsɨsɨ lə jilə dzə ya su, tsa yi ŋgə wa chɛ nə yu wɨ. 36 Yu tsɨsɨ lə, “Abbaª, Taa, naji ɨ wə fə fiɔŋ fichi. Tɔ̂ bwaŋ wu ŋgə lə wuŋ lə ŋkə mwɔhɔ. Bəmanɨ, fə̂ kwa nɨ wə na se. Wə kə̂ fəkə nɨ nna nse.” 37 Jisɔs fichə ba tsu jiŋ fə bɔ ku, yu ŋəŋ bɔ me. Yu bi bə Pita lə, “Semon, wə na me bumenɛ? Naji ɨ wə jikə bichə ba fɔ kwa kɨtsə kɨ tsa lə ntɨŋ kɨmo? 38 Bə kɨ ji wə, bə tsɨsə mfɔ tə kə ba bəŋ wɨ. Na yɛyi lə shəŋ na se lɨ, bəmanɨ gwɨ ji yee.” 39 Nɨ yu chanyɛ manɨ, yu chi tsɔ jiŋ gəŋ kɨ tsɨsə diəŋ nɨ yu sə sa yu tsɨsə. 40 Yu chi tsɔ jiŋ ba chi ŋəŋə beŋ buhu bə nɨŋ'ə me ndzɨ kɨnɨ nə̀ ji bɔ yəsɨ kɨtso. Bɔ jikə kkə fiɔŋ fi bɔ chisə bə yu. 41 Yu chi tsɔ jiŋ tsá tiɛ bɨŋ ba bi bə bɔ lə, “Bə bambi ba bə me bə fufiɛ fiɛnɨ? Tsa' kwətsə, bə́ sə taŋŋə Wɛŋ wu Miɨ bə bənɨ bəbiə. 42 Bə dzâ wə, kə kɨ gɨntɨ. Bə bô, bə ŋəŋ, miɨ wu sə taŋŋə wa mɨ no wu na ba.”
Bə́ kwe Jisɔs
43 Nɨ Jisɔs nə̀ bambi yu chanyɛ, kɨsɨkɨ ka Judas wu nə̀ ji miɨ nə beŋ bə Jisɔs lə bə yɔɔ ntse bəfɛ ba ntɨŋ bu lafu. Yu nə̀ ba bə kɨntsu kɨ bənɨ lə, bɔ ji bə bəmbiəlɨ bə bintɛ kaŋ, ɨji nə̀ bəchɛ bintɔfiɛ bəbəŋ bə bənɨ bə tɨfiə bilaŋ ma bənɨ bə sakɨ kɨtuŋ bə nə̀ faŋə bɔ. 44 Miɨ wu nə̀ taŋŋə wa Jisɔs nə̀ kwe ntsuŋ bə bənɨ ba ba tə lə, “Miɨ wu ntsɨsə ba kanchə lɨ, bə kkə̂ lə na yu, bə bu kwe yu ba dze kɨ gɨntɨ bə yu, bə dze tsa yu tə kə lətə.” 45 Nɨ Judas ba cha manɨ, yu bu gəŋ tsa miu fə Jisɔs ku ba tsɨsɨ yu lə, “Miɨ wu Bitɨfiə Wubəŋ.” Nɨ yu tsɨsə manɨ, yu kukɔ yu. 46 Bənɨ ba bu kwe Jisɔs ba shaŋ yu. 47 Miɨ wudɔ wu nə̀ lɨmi bɔ bə Jisɔs bu tsɔ mbiəlɨ wuhu ba tsə kɨtiu kɨ mfia wu fo wu bəchɛ bintɔfiɛ lə su, kəmbɨ lɨ. 48 Jisɔs bi bə bənɨ ba lə, “Bə ba lə bə kwe mɨ bə kɨ ba ji bə bəmbiəlɨ ma bə bintɛ wələ bə ba lə bə kwe ji wuu? 49 Nnə̀ nji bə bəŋ díɔ chi mbaŋ wu tsɔŋ yi bintɔfiɛ ntɨŋ, ntɨfiə bənɨ bə ji mɨ kə kwekɛhɛ. Bəmanɨ, fiŋfi' tɨchə fɛŋ mɛ lə fiɔŋ fi nə̀ ji bubɔndɔ Kɨŋwatɨ kɨ Nyɔ lə ntɨŋ ba fɔ diəŋ.” 50 Beŋ bə Jisɔs lə bə nɨŋ'ə bəchi bu shə yu mɨ ba chɛ lɨtɨ. 51 Wɛŋ butsɔ wudɔ kɨ biəlɨ yu, ɨji yu kə dɔŋkɔ fiɔŋ gwɨ, yu' kusə kwa ji kɨndzu. Bɔ gəŋ lə bɔ kwe yu tɨ, 52 kɨndzu ka selɛ, yu shə kɨ ba lətə kɨchilə kɨya.
Bə́ sa nsa yi Jisɔs
53 Bɔ dze Jisɔs ba gəŋ bə yu fə fo wu bəchɛ bintɔfiɛ lə ku. Bəchɛ bintɔfiɛ bəbəŋ bə bənɨ bə sakɨ kɨtuŋ ma bənɨ bə tɨfiə bilaŋ tɛshɛ mɨ. 54 Bɔ nə̀ gɨntɨ bə Jisɔs ɨji Pita biəlɨ bɔ nəjiŋ nə dzəbudə. Yu gəŋ fɔ ku wu fo wu bəchɛ bintɔfiɛ lə kɨntɨŋ kɨntɨŋ ba jiŋ bə bənɨ bə nə̀ kɨki ku wa kɨ yuku boso. 55 Bəchɛ bintɔfiɛ bəbəŋ bə bənɨ bəchi bə sakɨ bənsa kɨ gɔmbiə fiɔŋ fi naji ɨ bɔ tə Jisɔs wɨ, fə bə́ kkpɨsə yu. Bəmanɨ, bɔ jikə keŋkɛ fiɔŋ. 56 Bənɨ kɨyɛŋ bu ləŋ nsa yi dyɛ nəjiŋ tsukɔ Jisɔs wɨ. Bəmanɨ, miɨ kɨ chanyɛ fiɔŋ fi na jikə gbɔnɔ bə fi miɨ wudɔ sə chanyɛ. 57 Bənɨ bədɔ dza ba ləŋ wə ba buŋ yibɔlə dyɛ yu wɨ lə, 58 “Kə nə wɔ yu tɨdi lə yu ná kpodiɛ tsɔŋ yi bintɔfiɛ yi bə́ wɛyɛ nyi bə kaŋ ba dze díɔ tɛ chi wɛyɛ yidɔ ɨ jikə jimiə ŋ'wɛyɛ yi miɨbəwəŋ.” 59 Məfə bɔ nə̀ chanyɛɛ manɨ, bənchanyɛ bəbɔlə jikə gbɔnɔnɨ. 60 Fo wu bəchɛ bintɔfiɛ lə dza ba ləŋ bənɨ ba nəfiə ba bi bə Jisɔs lə, “Wə na sɨŋ bə fiɔŋ fi chisə? Wə na woko tɨ biɔŋ bi bənɨ bɛŋ na chanyɛ wə wɨ?” 61 Jisɔs kətə kɨtɔ, yu jikə chisə fiɔŋ. Fo wu bəchɛ bintɔfiɛ lə chi biɛ bə Jisɔs lə, “Na wə Nchitə wu Nyɔ nə̀ kaa wa, wə ji Wɛŋ wu Nyɔ, Nyɔ wu bə́ na kuntə wa?” 62 Jisɔs chi lə, “Na mɨ. Bə ná ŋɨntɨ nɨ Wɛŋ wu Miɨ sə jimiɛ kɨbandə kɨ Miɨ wu keŋkɛ Buŋga lə nədiɨ, ɨ bə ŋəŋ tɨ nɨ yu na ba, yu ba kɨku kɨ bɔ́ ntɨŋ.” 63 Lə fo wu bəchɛ bintɔfiɛ lə wɔ manɨ, wu bu shakiɛ bindzu nə gwɨª ba bi lə, “Mbɨ wudɔ wa su wu bə́ kɨ bambi bə́ noŋko miɨ lə yu ləŋ ba chanyɛ fiɔŋ? 64 Bə kə wɔkɔhɔ nɨ yu dzɛɛ dɨ wu Nyɔ lə? Bə tə lə la?” Bənɨ bəchi bu kəmbɨ lə yu na ji miɨ wu naji lə bə́ kkpɨsɨ kwa bukkpɨsə. 65 Bənɨ bədɔ gbɔ kɨ chəyə mənchəŋ Jisɔs wɨ, bɔ kansɨ bushi buhu ba kɨ kwəmiə yu bə muŋkwəŋ bɔ tɨdi lə, “Tə̂ miɨ wu kwəŋə wə.” Bənɨ bə bitsa lə dza ba dze Jisɔs gbɔ kɨ kɨtɨ.
Pita nɨŋŋ Jisɔs
66 Nɨ Pita nə̀ ji ku wa ntɨŋ nəshiŋ, wɛŋ wu kansɨ wudɔ wu nə̀ nɨntɨ bə fo wu bəchɛ bintɔfiɛ lə ba mɨ. 67 Lə yu ŋəŋ Pita yuku boso, yu jiŋgə Pita mɛ ndzɔɔŋ ba tə lə, “Wə sə ji tɨ bə Jisɔs Miɨ wu Nadzalɛt wa.” 68 Pita nɨŋŋ ba tə lə, “Nna ŋkkəhə fiɔŋ fi wə na chanyɛ fiŋ. Nna ŋkkəhə fi.” Nɨ yu tədiə manɨ, yu dza nə mɨ ba gəŋ fə fiənsɨ wu mbaŋ'ə ku, kɨyɔŋ bu tiŋ.ª 69 Lə wɛŋ wu kansɨ wa chi ŋəŋə yu wɨ, yu tə bə bənɨ bə nə̀ lɨmi ba mɨ lə, “Miɨ no na wudɔ nə bɔ ntɨŋ.” 70 Pita chi nɨŋŋə. Lə tsa chɛ tsəsɨ, bənɨ bə nə̀ lɨmi ba mɨ chi tədiə bə Pita lə, “Na yɛyi lə wə na ji wudɔ nə bɔ ntɨŋ, ndzɨ wə na ji tɨ miɨ wu Galili.” 71 Pita chɛŋ ba dɨ lɔŋ yu fi tə lə, “Nna ŋkkəhə miɨ wu bə na chanyɛ no tsukɔ yu wɨ.” 72 Mɨ kɨsɨkɨ, kɨyɔŋ chi tiŋɛ tsá bɨŋ fiɛ. Yu wɔ ba se nchanyɛ yi Jisɔs sə chanyɛ bə yu lə, “Fə kɨyɔŋ kɨ ji lə kɨ tiŋ tsá fiɛ bɨŋ, kɨ ji wə sə nɨŋŋ mɨ tsá tiɛ.” Yu bu gbɔ məndəŋ.