Bə́ nya Jisɔs Pailɛt kaŋ
15
Lə butsu kɨ woto bu ba, bəchɛ bintɔfiɛ bəbəŋ bə bənɨ bə sakɨ kɨtuŋ ma bənɨ bə nə̀ tɨfiə bilaŋ bi Nyɔ lə bə kansu chi jiŋ ba sese diɛ. Bɔ kansɨ Jisɔs ba dze yu gəŋ nya bə Pailɛt. 2 Pailɛt bi bə Jisɔs lə, “Na wə Ŋkuŋ wu Bəju wa?” Jisɔs chi bə yu lə, “Cha chi wə tədiə.” 3 Bəchɛ bintɔfiɛ bəbəŋ gbɔ kɨ bunchi biɔŋ Jisɔs wɨ kɨyɛŋ. 4 Bəma Pailɛt bi bə Jisɔs lə, “Wə na sɨŋ bə fiɔŋ fi chisə? Wə na wokɔhɔ biɔŋ bi kɨyɛŋ'ə bi bə́ na tɨdi biŋ wə wɨ!” 5 Bəmanɨ Jisɔs jikə chisə yu nchanyɛ. Kɨgəsə wɨŋ Pailɛt.6 Pailɛt nə̀ ba yu foso miɨ miu nə tsɔŋ yi buŋfia ntɨŋ wu Bəju sə nendɛ lə yu foso tsa yi Kɨgbeyɛ kɨ Nchɛnəbɨŋ'ə. 7 Tsa ya wɨ nə̀ ji, miɨ wudɔ ji tsɔŋ yi buŋfia ntɨŋ yɨ wuhu ji lə Balabas, yu ji miɨ miu nə kɨntsu kɨ bənɨ bə nə̀ ji tsɔŋ yi buŋfia ntɨŋ ndzɨ bɔ nə̀ gbɔ bəŋgə binchi ba kkpɨshɛ bənɨ. 8 Kuta wu bənɨ gbɔ kɨ tɨdi lə Pailɛt fə nɨ yu nə̀ ba yu kɨ fɨtɨ bɔ lɨ. 9 Pailɛt bi bə bɔ lə, “Bə na se lə mfoso ji Ŋkuŋ wu Bəju?” 10 Yu nə̀ bi manɨ ndzɨ yu nə̀ kkɨ lə bəchɛ bintɔfiɛ bəbəŋ nə̀ nya Jisɔs yu kaŋ ɨji ndzɨ kɨndɔ nə̀ chindi bɔ bə Jisɔs. 11 Bəmanɨ, bəchɛ bintɔfiɛ bəbəŋ nyishi kuta wu bənɨ lə bɔ tə lə yu foso ji Balabas. 12 Pailɛt bi bə bɔ lə, “Mfoso yu manɨ, mfə nəŋ bə miɨ wu bə na tsɨsə no lə Ŋkuŋ wu Bəju?” 13 Bɔ wunə kɨtso lə, “Bə́ bandɨ yu kɨtɨ kɨ ŋ'wa lə wɨ.” 14 Pailɛt bi bə bɔ lə, “Bə́ bandɨ yu ndzɨ la? Fiɔŋ fibiə fi yu' fəə na la?” Bɔ chi wunə ba gəŋ fiə lə, “Bə́ bandɨ yu kɨtɨ kɨ ŋ'wa lə wɨ.” 15 Bəma Pailɛt tə foso Balabas ndzɨ yu nə̀ se lə yu fə nɨ bənɨ ba nə̀ se. Yu tə bə́ shɔkiɛ Jisɔs ba nya lə bə́ gəŋ bandɨ yu kɨtɨ kɨ ŋ'wa lə wɨ.
Bənɨ bə bitsa lə bə Pailɛt lə kɨ ŋgo Jisɔs
16 Bənɨ bə bitsa lə bə Pailɛt lə dze Jisɔs ba be gəŋ bə yu ntɔ, dɨ wu bə́ nə̀ tsɨsə lə Bletɔliɔm. Nɨ bɔ bɛɛ, bɔ bəndɨ kɨntsu kɨ bənɨ bə bitsa lə kɨdɔ ka kɨchi, kɨ tɛshɛ. 17 Bɔ dze kɨndzu kɨ buŋkuŋ'ə ba sumɔ yu wɨ, ba lɔ kɨfulɔ kɨ buŋkuŋ'ə kɨ ji bimbəmbiə bimbəmbiə ba chisə yu fi. 18 Bɔ kɨ ŋgo yu bɔ tɨdi lə, “Mbɛɛ, Ŋkuŋ wu Bəju.” 19 Nɨ bɔ nə̀ fɨtɨ manɨ, bɔ kɨ kɨtɨ yu bə kɨntɛ fi, bɔ chəyə mənchəŋ yu wɨ, bɔ baa bɔ tuntu nu yu nəfiə lə bɔ kuntə ba yu. 20 Lə bɔ chindəsɨ yu kɨndɔ manɨ kasɨ lɨ, bɔ chi sɛɛ bindzu bi buŋkuŋ'ə bia nə yu wɨ ba dɔŋ bihi bia bindzu yu wɨ, tə dze yu kɨ gɨntɨ bə yu lə bə́ gəŋ bandɨ yu kɨtɨ kɨ ŋ'wa lə wɨ.
Bə́ bandɨ Jisɔs kɨtɨ kɨ ŋ'wa lə wɨ
21 Lə bɔ kɨ gɨntɨ, bɔ bɨkənɨ bə miɨ wudɔ yu kwəlɨ nə ji, yɨ wuhu ji lə Semon, ɨji miɨ wu Silin. Yu nə̀ ji chɛ Alɛdzanda bə Lufos. Bɔ tombi yu, yu tɔ kɨtɨ kɨ ŋ'wa lə kɨ Jisɔs lə. 22 Bɔ gəŋ ba fɔ bə Jisɔs dɨ wu bə́ nə̀ tsɨsə lə Gɔlgɔta, (yɨ wuŋ ji lə Dɨ wu Kɨgɔkɔlɔ kɨ Fo lə,) 23 bɔ nya yu mbiŋª lə yu mu ɨji bə́' funchɛ bə ntsə yidɔ bə́ tsɨsə lə mɛɛl. Bəmanɨ Jisɔs jikə mwɔhɔ. 24 Bɔ tə bandɨ yu kɨtɨ kɨ ŋ'wa lə wɨ. Bɔ dze bindzu bihi lə bɔ jɛ bə gwɨ́ yibɔlə, bɔ ta kɨmbəmbɨ fə bɔ kkə nɨ bɔ jɛɛ bi. 25 Bə́ nə̀ bandɨ Jisɔs kɨtɨ kɨ ŋ'wa lə wɨ tsá bɨŋ fumbɔɔ fuwɔki. 26 Bɔ bɔndu fiɔŋ fi bɔ bandə yu kɨtɨ kɨ ŋ'wa lə wɨ ndzɨ fi, fi ji lə, “Ŋkuŋ wu Bəju.” 27 Nə̀ ji bɔ sə bandɨ tɨ bənɨ bə buyi lə bəfɛ bitɨ bi ŋ'wa lə wɨ, wudɔ yu nədiɨ, wudɔ yu nəməsə. [ 28 Fi tə fɔ diəŋ nɨ fi nə̀ ji bubɔndɔ Kɨŋwatɨ kɨ Nyɔ lə ntɨŋ lə,
“Bə́ nə̀ bɔmbiɛ yu kɨntsu kɨ bənɨ bə na bunchi bilaŋ ntɨŋ.”]ª
29 Bənɨ kɨ chɛti, bɔ ŋɨntɨ Jisɔs, bɔ mɨkɨ bə fo, bɔ liyɛ yu bə muntɔŋ, bɔ tɨdi lə, “Ɨŋhɨŋŋ! Wə wu nə̀ji ɨ wə kpodiɛ tsɔŋ yi bintɔfiɛ ba chi wɛyɛ yi díɔ ntɨŋ tɛ, 30 chîtə la gwɨ yɔhɔ wə shi nə kɨtɨ kɨ ŋ'wa lə ka wɨ.” 31 Bəchɛ bintɔfiɛ bəbəŋ bə bənɨ bə nə̀ tɨfiə bilaŋ bi Nyɔ lə kɨ ŋgo yu, bɔ tɨdi bə gwɨ́ yibɔlə lə, “Yu nə ba yu kɨ chitə bənɨ bədɔ, bəmanɨ yu kə kafɔ nchitə gwɨ yihi. 32 Yu wu na ji Nchitə wu Nyɔ nə̀ kaa wa, yu ji Ŋkuŋ wu bənɨ bə Isla, yu shî la nə kɨtɨ kɨ ŋ'wa lə ka wɨ fɛŋ, kə ŋəŋ ba bɨŋ bə yu.” Bənɨ bə bə́ nə̀ bandə ba bitɨ wɨ bɔ bə Jisɔs nə̀ liyɛ tɨ yu bə muntɔŋ.
Jisɔs kkpə
33 Lə kɨ ji bbushə ŋgaaaŋ, kɨjuwɔ gbɔ sha ya bɨŋ chi ba gəŋ fɔ bitsə bitɛ bɨŋ. 34 Lə kɨ ji tsá tiɛ bɨŋ, Jisɔs wunə kɨtso lə, “Ɛlɔi, Ɛlɔi lama sabatani?” Fi ji lə, “Nyɔ wɛŋ, Nyɔ wɛŋ, wə tɔfu mɨ ndzɨ la?”
35 Bənɨ bədɔ bə nə̀ ləmiə mɨ wɔ ba tə lə, “Bə wɔ̂, yu bɨndɨ wa Alaja.” 36 Miɨ wudɔ nə bɔ ntɨŋ lətə ba dze kɨŋ'wɔ ba chɛse kɨ mbiŋ mə ŋkpatə ntɨŋ, sese fitɨ wɨ ba nambɔ lə yu mu, ba tə lə, “Lə̂ŋ mɛ, kə ŋəŋ lə Alaja jiwa yu ba shisəsɨ yu nə kɨtɨ kɨ ŋ'wa lə kɨŋ wɨ lə.” 37 Jisɔs chi wɛŋɛ kɨtso ba yɨntɨ kɨn'yɨntɨ kɨhɨ kɨ nəjiŋ. 38 Kɨndzu kɨ nə̀ jɛti tsɔŋ yi bintɔfiɛ nəntɨŋ tandə fəntɨŋ dze nə bɔ́ ba shi fɔ koso bidiadia bifɛ. 39 Lə fo wu bənɨ bə bitsa lə wu nə̀ lɨmi Jisɔs nəfiə ŋəŋ dzə́ yi Jisɔs kkpə yi ntɨŋ, yu tə lə, “Yɛyi lɨ, miɨ no nə̀ Wɛŋ wu Nyɔ.”
40 Bəkansɨ bədɔ nə̀ lɨmi tɨ mɨ bɔ jiŋgə nə dzəbudə. Bəkansɨ bɛŋ nə̀ Maliya Madalen bə Maliya mə Jɛm, Jɛm wubiɨ wa, ɨji tɨ yu mə Jɔsɛs, wudɔ kpansɨ ji Salɔmi. 41 Bəkansɨ bɛŋ ji bɔ bə nə̀ biəlɨ Jisɔs Galili bɔ chitəə yu. Bɔ nə̀ ji mɨ bə bəkansɨ bədɔ tɨ kɨyɛŋ bə nə̀ biələ Jisɔs ba ba Jɛlosalɛm.
Bə́ kɨnsɨ kɨŋgundu kɨ Jisɔs lə dzəŋ ntɨŋ
42 Lə kɨ ji butsu bwa fudiɔ, ɨji Butsu bu Banchɛ Gwɨ fə bə́ bɛɛ butsu bu fufiɛ ntɨŋ, 43 miɨ wudɔ wu Alimatia wu bə́ nə̀ tsɨsə lə Jɔsɛ, kansɨ shəŋ ba gəŋ ŋəŋ Pailɛt ba nende kɨŋgundu kɨ Jisɔs lə, lə yu gəŋ di. Jɔsɛ no nə̀ miɨ nə kɨntsu kɨ Bəju lə ntɨŋ kɨ nə̀ sakɨ kɨtuŋ, bənɨ nə̀ kuntəə yu kɨtso. Yu wu yu nə̀ wokɔ tɨ tsa yi buŋkuŋ bu Nyɔ lə ná ba. 44 Lə Pailɛt wɔ lə Jisɔs sə kkpə, kɨgəsə wɨŋ yu. Yu bəndɨ fo wu bənɨ bə bitsa lə wa ba bi bə yu lə Jisɔs kkpə lə. 45 Lə yu wɔ nə fo wu bənɨ bə bitsa lə wa lɨ lə Jisɔs' kkpə, yu tə nya kɨŋgundu ka bə Jɔsɛ. 46 Jɔsɛ gəŋ ba taŋ kɨndzu kɨ ndzeŋe ba gəŋ shisəsɨ kɨŋgundu kɨ Jisɔs lə, kwɨdi sɔ ba gəŋ kɨnsɨ yu dzəŋ ntɨŋ yi bə́ nə̀ tsɔɔ kɨbɔ wɨ, ba bindiə ta wubəŋ ba baŋ bifuŋ bi dzəŋ ya lə su. 47 Maliya Madalen bə Maliya mə Jɔsɛs ŋəŋ dɨ wu bə́ nə̀ kɨnsə wa Jisɔs.