Judas shəŋ
27
Lə kɨ ji fuwɔki dibidibi, bəchɛ bintɔfiɛ bəbəŋ bə bənɨ bə sakɨ kɨtuŋ jiŋ ba kwe ntsuŋ tsukɔ Jisɔs wɨ, chi bɔ kkpɨsə yu. 2 Bɔ kansɨ yu ba dze yu gəŋ nya bə Pailɛt miɨ wu Lom, wu nə̀ sakɨ sha ya.3 Lə Judas wu nə̀ taŋŋə wa Jisɔs ŋəŋ lə bə́' kəmbəsɨ lə bə́ jiba bə́ kkpɨsɨ Jisɔs, yu də gwɨ ba dze kpə wu bitsu lə wu mbaatiɛ wa ba fichə bə wu lə yu gəŋ chi bə bəchɛ bintɔfiɛ bəbəŋ bə bənɨ bə sakɨ kɨtuŋ. 4 Nɨ yu nə̀ gəŋə, yu tə bə bɔ lə, “Mɨ mfə bubiə bə ntaŋŋə miɨ, ɨji yu kə fəkə bubiə.” Bɔ chi bə yu lə, “Fia fiɔŋ na keŋkɛ la fi fənə bə bɨ? Na kkɨ wə fia fiɔŋ.” 5 Judas li kpə wa fəkoso fə tsɔŋ yi bintɔfiɛ ku ba fɔ gəŋ shəŋ'ɨ. 6 Bəchɛ bintɔfiɛ bəbəŋ dediɛ kpə wa ba tə lə, “Wuŋ na kpə wu ŋgwembe lə, ɨji kɨlaŋ kə bɨmiə lə bə́ ga jimə wuŋ kpə kɨbə kɨ tsɔŋ yi bintɔfiɛ lə ntɨŋ.” 7 Bɔ jiŋ ba sese diɛ ba gəŋ taŋ dɨ nə miɨ wudɔ lɨ, wu nə̀ ma kənsɨ, fə bɔ kɨ diyi bəbanə mɨ. 8 Na fiɔŋ fi bə́ na tsɨsə dɨ wa ba fɔ ndɛŋ lə, “Ndəŋgə wu Ŋgwembe.” 9 Fi nə̀ tɨchə manɨ lə fiɔŋ fi Jɛlimia miɨ wu shɔŋ yi Nyɔ nə̀ chanyɛ ba kwətsə nɨ yu nə̀ tədiə lə, “Bə́ nə̀ dze kpə wu bitsu lə mbaatiɛ, wu nə̀ ji kpə wu fo wuhu lə, nɨ beŋ Bəisla nə̀ sesɛ 10 ba taŋ dɨ su nə miɨ wu na ma kənsɨ lɨ, fi ji diəŋ nɨ Baba Nyɔ nə̀ tədiə bə mɨ.”
Jisɔs ləŋ Pailɛt nəfiə, miɨ wu Lom wu nə̀ sakɨ bənɨ
11 Nɨ Jisɔs nə̀ ləmiə Pailɛt miɨ wu nsa nəfiə, Pailɛt bi bə yu lə, “Na wə Ŋkuŋ wu Bəju wa tɨ?” Jisɔs chi lə, “Na nɨ wə tədiə.” 12 Bəmanɨ, bəchɛ bintɔfiɛ bəbəŋ bə bənɨ bə sakɨ kɨtuŋ gbɔ kɨ bunchi dyɛ yu wɨ, yu jikə tsɔhɔ chisə fiɔŋ. 13 Pailɛt bi bə yu lə, “Wə na wokɔhɔ ŋgwe yi biŋ biɔŋ bi bə́ na chanyɛ wə wɨ?” 14 Bəmanɨ, Jisɔs jikə chisə yu diɛ nə biɔŋ ntɨŋ bi bɔ buŋɔ bia yu wɨ. Miɨ wu sakɨ wa bo mɛ, kɨgəsə wɨŋ yu kɨtso.
15 Nə̀ ba ji tsa yi Kɨgbeyɛ kɨ Nchɛnəbɨŋ'ə, miɨ wu sakɨ no foso miɨ miu nə tsɔŋ yi buŋfia ntɨŋ wu bənɨ na se lə yu foso. 16 Nə̀ ji tsa ya wɨ, miɨ wudɔ ji tsɔŋ yi buŋfia ntɨŋ, wu bə́ nə̀ kkɨ yu lə yu nə̀ ji ntinsɛ wu biɔŋ bibiə, yɨ wuhu ji lə Balabas. 17 Lə bənɨ tɛshɛ, Pailɛt bi bə bɔ lə, “Bə na se lə mfoso ji yəŋ nə tsɔŋ yi buŋfia ntɨŋ? Bə na se lə mfoso Balabas maa Jisɔs wu bə́ na tsɨsə wa lə Nchitə wu Nyɔ nə̀ kaa wa lə?” 18 Yu nə̀ bishɛ manɨ ndzɨ yu nə̀ kkɨ lɨ lə bɔ nə̀ nya Jisɔs yu kaŋ ɨji ndzɨ kɨndɔ nə̀ chindi bɔ bə Jisɔs. 19 Lə kɨ ji tsa yi Pailɛt nə̀ jimi lə bɔ gbɔ kɨ sakɨ nsa ya, kpansɨ faŋ shɔŋ bə yu, yu tɨdi lə, “Wə kə̂ fəkə fiɔŋ bə miɨ wa. Yu na ji miɨ wu diəŋ. Nna nchanyɛ mɛ ndzɨ budəŋfɨ sə finchə bə mɨ ndɛŋ bbutsu kɨtso tsukɔ yu wɨ.” 20 Nɨ Pailɛt bishɛ manɨ, bəchɛ bintɔfiɛ bəbəŋ bə bənɨ bə sakɨ kɨtuŋ nyishi bənɨ lə bɔ tə lə yu foso ji Balabas, ba kasɨ bə Jisɔs. 21 Miɨ wu sakɨ wa chi dza ba bi bə bɔ lə, “Miɨ wu bə na se lə nshə nə bənɨ bɛŋ bəfɛ ntɨŋ na wu la?” Bɔ chi lə, “Balabas.” 22 Pailɛt chi biɛ bə bɔ lə, “Ntɔkaŋ nə yu wɨ, ntə mfə nəŋ bə Jisɔs wu bə́ na tsɨsə lə Klistu?” Bɔ bəchi tə lə, “Bə́ bândɨ yu kɨtɨ kɨ ŋ'wa lə wɨ.” 23 Yu fichə ba bi lə, “Bə́ bandɨ yu ndzɨ la? Fiɔŋ fibiə fi yu' fəə na la?” Bɔ kɨ wɛnti kwa bɔ gɨntɨ fiə lə, “Bə́ bândɨ yu kɨtɨ kɨ ŋ'wa lə wɨ.”
24 Lə Pailɛt ŋəŋ lə dzə na sɨŋ yi naji ɨ yu fə fiɔŋ, lə yu dze kɨ bu diɔnɔ, ɨ fi ba ji bə bəŋgə. Yu dze ŋgɔŋ ba wwɔ kaŋ yihi su kɨntsu kɨ bənɨ ba lə nəfiə ba tə lə, “Kaŋ yɛmɨ na sɨŋ kkpə yi miɨ no ntɨŋ. Na bəŋ fi.” 25 Bənɨ ba bəchi chi bə yu lə, “Ɨŋŋ, gâ ma ŋgwembe muhu kɨ ji bɨ fi ma beŋ baha fi.” 26 Pailɛt foso Balabas nɨ bɔ nə̀ se ba tə lə bə́ chɔ Jisɔs ba nya yu lə bɔ gəŋ bandɨ kɨtɨ kɨ ŋ'wa lə wɨ.
Bənɨ bə bitsa lə kɨ ŋgo Jisɔs
27 Bənɨ bə bitsa lə bə miɨ wu sakɨ lə tə dze Jisɔs ba be bə yu ntɔ wu miɨ wa lə ntɨŋ dɨ wu bə́ nə̀ tsɨsə lə Bletɔliɔm ba tɛshɛ kɨntsu kɨ bənɨ bə bitsa lə kɨchi, kɨ tɛshɛ ba fiədiɛ Jisɔs nəkpo. 28 Bə́ sediɛ bindzu bihi ba dze bindzu bi buŋkuŋ'ə biyə ba dɔŋ yu wɨ, 29 tə lɔ kɨfulɔ kɨ buŋkuŋ'ə bə bimbəmbiə ba chisə yu fi, ba nya yu nchiŋ lə yu chiŋfi kɨbandə kɨhɨ kɨ nədiɨ wɨ, tə kɨ ba bɔ tuntu nu yu nəfiə bɔ ŋgo yu bɔ tɨdi lə, “Mbɛɛ! Ŋkuŋ wu Bəju!” 30 Nɨ bɔ nə̀ fɨtɨ manɨ, bɔ kɨ chɨ mənchəŋ yu wɨ, bɔ dzee nchiŋ wa bɔ kɨtɨ yu bə wu fo wɨ. 31 Lə bɔ ŋgo yu manɨ kanə lɨ, bɔ tə se bindzu bi buŋkuŋ'ə bia ba chi bihi bindzu yu gwɨ, tə dze yu lə bɔ gəŋ bandɨ kɨtɨ kɨ ŋ'wa lə wɨ.
Bə́ bandɨ Jisɔs kɨtɨ kɨ ŋ'wa lə wɨ
32 Nɨ bɔ nə̀ gɨntɨ, bɔ bɨkənɨ bə miɨ wudɔ wu kɨtuŋ kɨ Silin ntɨŋ, yɨ wuhu ji lə Semon. Bɔ tombi miɨ no, yu tɔ kɨtɨ kɨ ŋ'wa lə kɨ Jisɔs lə. 33 Bɔ gəŋ fɔ dɨ wudɔ wɨ wu bə́ nə̀ tsɨsə lə Gɔlgɔta (yɨ wuŋ ji lə Dɨ wu Kɨgɔkɔlɔ kɨ Fo lə), 34 bɔ nya Jisɔs mbiŋ ɨji bɔ' funchɛ bə fiɔŋ fidɔ fi lo nɨ lɨyə lə yu mu. Bəmanɨ lə yu fɔ, yu nɨŋŋ mu. 35 Bɔ bandɨ yu kɨtɨ kɨ ŋ'wa lə wɨ ba ta kɨmbəmbɨ ndzɨ bindzu bihi lə bɔ jɛ bə gwɨ́ yibɔlə. 36 Lə bɔ fə manɨ, bɔ jiŋ mɨ kɨ kɨki yu. 37 Bɔ bɔndu kɨŋwatɨ kɨ na donchɛ fiɔŋ fi bɔ bandə yu kɨtɨ kɨ ŋ'wa lə wɨ ndzɨ fi, ba tə bandɨ kɨtɨ kɨ ŋ'wa lə ka wɨ fo wuhu nəbɔ́, fi ji lə, “No na Jisɔs, Ŋkuŋ wu Bəju.” 38 Bə́ bandɨ tɨ bənɨ bə buyi lə bəfɛ bitɨ wɨ tɛshɛ bə Jisɔs, wudɔ yu nədiɨ, wudɔ yu nəməsə. 39 Bənɨ kɨ chɛti bɔ ŋɨntɨ Jisɔs bɔ mɨkɨ kwa bə fo, bɔ liyɛ yu bə muntɔŋ, 40 bɔ tɨdi lə, “Wə wu nəji ɨ wə kpodiɛ tsɔŋ yi bintɔfiɛ ba chi wɛyɛ yi díɔ ntɨŋ tɛ, chîtə la gwɨ yɔhɔ! Ɨ wə na ji Wɛŋ wu Nyɔ, wə shi nə kɨtɨ kɨ ŋ'wa lə ka wɨ.” 41 Bəchɛ bintɔfiɛ bəbəŋ bə bənɨ bə tɨfiə bilaŋ ma bənɨ bə sakɨ kɨtuŋ kɨ ŋgo yu tɨ, bɔ tɨdi lə, 42 “Yu nə chitə bənɨ bədɔ, ɨji naji ɨ yu jikə chitə gwɨ yihi. Ntɨlə yu na ji Ŋkuŋ wu bənɨ bə Isla. Yu shi la nə kɨtɨ kɨ ŋ'wa lə ka wɨ fɛŋ ɨ kə tə bɨŋ bə yu. 43 Yu nə nɨkɨ Nyɔ wɨ. Jilə Nyɔ na laŋkɨ yu, Nyɔ chitə la yu fɛŋ chi yu nə tɨdi lə yu na ji Wɛŋ wu Nyɔ.” 44 Bənɨ bə buyi lə bə bə́ nə̀ bandə ba bitɨ wɨ tsa miu bə Jisɔs kɨ liyɛ Jisɔs bə muntɔŋ tɨ.
Jisɔs kkpə
45 Lə diɔ bəndɨ ləŋ'ɨ, kɨjuwɔ gbɔ sha ya bɨŋ chi gəŋ fɔ tsá tiɛ bbushə. 46 Lə kɨ ji nɨ tsá tiɛ bɨŋ, Jisɔs də bə diɛ bɔ́ lə, “Ɛli, Ɛli, lama sabatani.” Fi ji lə, “Nyɔ wɛŋ, Nyɔ wɛŋ, wə tɔfu mɨ ndzɨ la?” 47 Bənɨ bədɔ bə nə̀ lɨmi mɨ wɔ ba tə lə, “Miɨ wa na bɨndɨ ji Alaja.” 48 Miɨ wudɔ nə bɔ ntɨŋ lətə tsa miu ba dze kɨŋ'wɔ, chɛse mbiŋ mə ŋkpatə ntɨŋ, fasə fintɨ wɨ ba nambɔ bə yu, lə yu mu. 49 Bəmanɨ bədɔ bənɨ tə lə, “Kə wôkɔ, kə ŋəŋ, fa Alaja jiwa ɨ yu ba chitə yu lɛ.”
50 Jisɔs chi dəə bə diɛ bɔ́, yu nya kɨn'yɨntɨ kɨhɨ bə Nyɔ. 51 Fi tɨchə lə, kɨndzu kɨ nə̀ jɛti tsɔŋ yi bintɔfiɛ fəntɨŋ nə̀ tandə fəntɨŋ dze nə bɔ́ ba shi fɔ koso bidiadia bifɛ. Sha nɨkə, ta kkpəyɛ, 52 dzə́ŋ gulɔ tɨ bənɨ bə Nyɔ lə kɨyɛŋ bə nə̀ kkpəyɛ dzakɔ nə kkpə lɨ. 53 Lə Jisɔs dzakɔ nə kkpə lɨ, bənɨ ba dza ba gəŋ kɨtuŋ kɨ ntsaaŋ ntɨŋ Jɛlosalɛm, bənɨ kɨyɛŋ ŋəŋ bɔ wɨ. 54 Fo wu bənɨ bə bitsa lə bə bənɨ bə bɔ bə yu nə̀ ji mɨ bɔ kɨki Jisɔs ŋəŋ nɨ sha nɨkə, bə fiɔŋ fichi fi nə̀ tɨchə, nyiŋ kwe bɔ kɨtso. Bɔ tə lə, “Yɛyi lɨ, miɨ no nə ji Wɛŋ wu Nyɔ.” 55 Bəkansɨ kɨyɛŋ nə̀ lɨmi nə dzəbudə bɔ bobi mɨ. Bəkansɨ bɛŋ ji bə nə̀ fɔɔ nə Galili kɨ biəlɨ Jisɔs bɔ chitə yu. 56 Kɨntsu ka ntɨŋ nə̀ Maliya Madalen bə Maliya mə Jɛm bə Jɔsɛ, ma mə beŋ bə Dzɛbɛdi lə.
Bə́ di Jisɔs
57 Lə kɨ ji fudiɔ, chɛ kpə wudɔ ba nə Alimatia yɨ wuhu ji lə Jɔsɛ. Yu nə̀ ji tɨ wɛŋ wu nɨŋ wudɔ wu Jisɔs. 58 Yu gəŋ ŋəŋ Pailɛt ba nende lə Pailɛt nya yu kɨŋgundu kɨ Jisɔs lə yu gəŋ di. Bəma Pailɛt tə lə bə́ gəŋ nya yu kɨ. 59 Jɔsɛ ləkə kɨŋgundu ka ba kwɨdi kɨndzu kɨ ntsaaŋ ntɨŋ, 60 tə gəŋ ba kɨnsɨ yihi dzəŋ ntɨŋ yi bambi yifa, yu nə̀ tsɔ dzəŋ ya kɨbɔ wɨ. Yu bindiə ta wubəŋ ba baŋ bifuŋ bi dzəŋ ya lə su, ba dza lɨ. 61 Maliya Madalen bɔ bə Maliya wudɔ wa nə̀ ji mɨ, bɔ nə̀ jiŋ gwɨgwɨ fə dzəŋ ya ku kɨdia kɨdɔ ka wɨ.
Bə́ kɨ kɨki dzəŋ yi Jisɔs
62 Lə butsu wɔ, ɨji butsu bu bɔ nə̀ ba bɔ kɨ fɨtɨ gwɨ tsukɔ butsu bu fufiɛ wɨ' chɛ, bəchɛ bintɔfiɛ bəbəŋ bə Bəfalasi gəŋ ba ŋəŋ Pailɛt, 63 tə bə yu lə, “Miɨ wubəŋ, kə na se fiɔŋ fi miɨ wu dyɛ wa nə̀ chanyɛ tsa yi yu nə̀ bambi wuwəŋ. Yu nə̀ ji yu tɨdi lə, ná kɨ foto díɔ tɛ, ɨ yu dzakɔ nə kkpə lɨ. 64 Nɨ fi na ji manɨ, tə̂ lə bənɨ gəŋ kɨ kɨki dzəŋ ya gəŋ fɔ díɔ bɨŋ tɛ, ndzɨ kə na lete lə naji ɨ beŋ buhu bə nɨŋ'ə gəŋ ba yə kɨŋgundu kɨhɨ dza bə kɨ, kɨ tɨdi bə bənɨ lə, ‘Yu' dzakɔ nə kkpə lɨ.’ Ɨ bɔ fə manɨ, ɨ dyɛ yi fɛŋ'ə yiŋ ya yi fiəfiə ya.” 65 Pailɛt tə bə bɔ lə, “Bə dzê bənɨ bə bitsa lə la bə gəŋ bə bɔ, bə tə bɔ kɨ kɨki dzəŋ ya buni nɨ naji ɨ bə fə.” 66 Bəma bɔ tə gəŋ dze tsa ba baŋ fiənsɨ wu dzəŋ ya lə, ba laª fiɔŋ fidɔ ta wu bɔ nə̀ baŋə wa fiənsɨ wu dzəŋ ya lə wɨ, ba ga bənɨ bə bitsa lə lə bɔ kɨ kɨki yi.