Pailɛt bɔ bə Hɛlɔd bishɛ biɔŋ bə Jisɔs
23
Lə kɨntsu kɨ bənɨ lə bə nə̀ sakɨ bənsa chanyɛ manɨ, bɔ dza bɔ bəchi ba dze Jisɔs kɨ gɨntɨ bə yu Pailɛt ku. 2 Lə bɔ gəŋ ba fɔ mɨ, bɔ gbɔ kɨ bunchi dyɛ yu wɨ, bɔ tɨdi lə, “Miɨ no na gəndə yu bɨsə kɨtuŋ kaha, yu nɨnntɨ lə bənɨ kə kɨ tsufu kɨŋwatɨ bə Kaisa Ŋkuŋ wu Lom, yu tɨdi lə yu na ji Nchitə wu Nyɔ nə̀ kaa wa, fi donchɛ lə yu na ji ŋkuŋ wudɔ.”3 Pailɛt bi bə Jisɔs lə, “Na wə Ŋkuŋ wu Bəju?” Jisɔs chi bə yu lə, “Na nɨ wə tədiə.” 4 Pailɛt chanyɛ bə bəchɛ bintɔfiɛ bəbəŋ bə kɨntsu kɨ bənɨ lə kɨ nə̀ ji mɨ lə, “Ŋkə ŋəŋkəhə ŋgbɔ yi miɨ no.”
5 Bɔ bəchi kɨ kpɨ su kwa lə, “Miɨ no na gəndə yu tɨfiə bənɨ kɨtuŋ kɨchi kɨ Judɛya ntɨŋ, yu fɨtɨ lə bɔ kɨtɛti fo. Yu nə̀ bɛyɛ Galili, no na yu wu fɔɔ mɛ fɛŋ.”
6 Lə Pailɛt wɔ fiɔŋ fiŋ mɛni, yu bi lə, “Miɨ no na miɨ wu Galili?” 7 Bɔ bɨŋ, yu faŋ Jisɔs fə Ŋkuŋ Hɛlɔd ku, ndzɨ nə̀ yu wu nə̀ sakɨ sha yi Galili, ɨji yu nə̀ ji tɨ Jɛlosalɛm tsa ya wɨ.
8 Bɔ gəŋ bə Jisɔs, Ŋkuŋ Hɛlɔd ŋəŋ yu wɨ ba wɔ buni kɨtso, ndzɨ yu nə̀ shɨ yu woko kɨ Jisɔs lə, yu shəntəə lə yu ŋə̂ŋ Jisɔs wɨ, yu see tɨ lə diŋkəla ɨ Jisɔs fə fiɔŋ fi na donchɛ buŋga bu Nyɔ lə ɨ yu ŋəŋ. 9 Yu dze tsa ba kɨ bishɛ biɔŋ bə Jisɔs kɨyɛŋ, bəmanɨ Jisɔs jikə chisə fidɔ. 10 Yu nə̀ bishɛ ji bəchɛ bintɔfiɛ bəbəŋ bə bənɨ bə nə̀ tɨfiə bilaŋ bi Nyɔ lə ji mɨ bɔ bunchi dyɛ yi kɨyɛŋ'ə Jisɔs wɨ. 11 Ŋkuŋ Hɛlɔd bɔ bə bənɨ buhu bə bitsa lə gbɔ kɨ ŋgo Jisɔs, bɔ yɛshi yu. Bɔ dɔŋ yu bikɨŋ bi ndzeŋe ba chi yu jiŋ bə Pailɛt. 12 Nə̀ ji Pailɛt bə Ŋkuŋ Hɛlɔd jikə fɔkɔ buni. Butsu bwa kɨbɛɛ, bɔ bu kwe bushə.
Pailɛt kəmbɨ nsa nɨ bənɨ nə̀ se
13 Nɨ bɔ chisə Jisɔs jiŋ, Pailɛt banchɛ bəchɛ bintɔfiɛ bəbəŋ bə bənɨ bə nə̀ sakɨ kɨtuŋ ba banchɛ ma bə bənɨ bəchi. 14 Lə bɔ tɛshɛ, yu tə bə bɔ lə, “Bə sə ba bə miɨ no mɛni lə yu na fɨtɨ bənɨ tɛti fo, mɨ njiŋgə biɔŋ bi bə na kpɨ biŋ su bəŋ yəsɨ, bə wôkɔ bə wɔ, nə biɔŋ bi bə buŋɔ biŋ yu wɨ, ŋkə ŋəŋkəhə lə yu' fə fidɔ, 15 Ŋkuŋ Hɛlɔd sə kə ŋəŋkəhə tɨ. Na fiɔŋ fi sə fəə lə yu chi miɨ no jiŋ bə bɨ. Bə ŋə̂ŋ tɨ lə miɨ no kə fəkə ji fiɔŋ fi naji lə bə́ kkpɨsɨ yu. 16 Bəma, njiwa ŋkə yu kwa ba tɔkaŋ yu kɨ gɨntɨ.” 17 [Nə̀ ba ji díɔ yi Kɨgbeyɛ kɨ Nchɛnəbɨŋ'ə kɨŋ wɨ, Pailɛt kɨ ji lə yu foso miɨ miu nə tsɔŋ yi buŋfia ntɨŋ ba nya bə bənɨ.]ª 18 Bənɨ bəchi kɨ wɛnti lə, “Lâsɨ miɨ no, fôso Balabas nə tsɔŋ yi buŋfia ntɨŋ wə nya bɨ.” 19 Balabas no nə̀ ji tsɔŋ yi buŋfia ntɨŋ ndzɨ yu nə̀ fə bəŋgə toko ba kkpɨsɨ miɨ.
20 Pailɛt wɔ mɛni ba chanyɛ bə bənɨ bəchi ndzɨ yu nə̀ se lə yu tɔkaŋ nə Jisɔs wɨ. 21 Bəmanɨ, bɔ kɨ wɛnti kwa lə, “Bə́ bândɨ yu kɨtɨ kɨ ŋ'wa lə wɨ, bə́ bândɨ yu kɨtɨ kɨ ŋ'wa lə wɨ.” 22 Pailɛt tə chanyɛ bə bənɨ tsá tiɛ bɨŋ lə, “Bə́ bândɨ yu ndzɨ la? Fiɔŋ fibiə fi yu fəə na la? Ŋkə ŋəŋkəhə ŋgbɔ yidɔ yu wɨ yi naji ɨ bə́ kkpɨsɨ yu. Njiwa ŋkə yu kwa ba tɔkaŋ nə yu wɨ.”
23 Bɔ kətə bɔ wɛnti bə buŋga lə, “Bə́ bândɨ yu kɨtɨ kɨ ŋ'wa lə wɨ.” Ŋ'wɛŋ yibɔ ya ya Pailɛt. 24 Bəma, Pailɛt kəmbɨ nsa ba tə lə bɔ fə bə Jisɔs nɨ bɔ na se cha. 25 Yu foso miɨ wu bɔ nə̀ se wa nə tsɔŋ yi buŋfia ntɨŋ, wu nə̀ fəə wa bəŋgə toko ba kkpɨsɨ miɨ. Lə yu fosɔ, yu nya Jisɔs bə bɔ nɨ bɔ nə̀ se cha.
Bə́ bandɨ Jisɔs kɨtɨ kɨ ŋ'wa lə wɨ
26 Bɔ tə dze Jisɔs kɨ gɨntɨ bə yu. Nɨ bɔ nə̀ gɨntɨ, bɔ bə miɨ wudɔ bɨkənɨ yu kwəlɨ nə kə, yɨ wuhu ji lə Semon, ɨji miɨ wu Silin. Bɔ kwe yu ba toso yu kɨtɨ kɨ ŋ'wa lə kɨ Jisɔs lə yu biə, yu tɔ ba kɨ biəlɨ Jisɔs. 27 Bɔ bə yu kɨ gɨntɨ, kuta wu bənɨ biəlɨ bɔ. Bədɔ ji bəkansɨ bə nə̀ dzudi gwɨ bɔ dɨ. 28 Jisɔs fichə ba tə bə bɔ lə, “Bəkansɨ bə Jɛlosalɛm, bə kə kɨ dɨ ndzɨ mɨ. Bə kɨ dɨ ji gwɨ́ yɛnɨ, bə beŋ bɛnɨ. 29 Bə kɨ kkɨ lə tsa ba ya yi bə́ jiba ɨ bə́ kɨ tɨdi lə, ‘Kɨnlaŋ kɨbəŋ na bə bəkansɨ bəgbɔmbu, bə kə saa bɛyɛ lɨ, bə kə saa mambɔ tɨmo wɛŋ.’ 30 Ná kɨ ji tsa ya wɨ, ɨ bənɨ kɨ wunə bə dzó yibəŋ lə, ‘Yə gbɔyɛ bɨ bɨŋ,’ bɔ wunə bə dzó yintse lə, ‘Yə kusə bɨ.’ 31 Bɔ ná kɨ wunə manɨ ndzɨ, ɨ bənɨ fə ŋgwe yi fiŋ fiɔŋ bə kɨtɨ kɨ də, ɨ bɔ tə fə nəŋ bə kɨ womo.”
32 Nɨ bɔ nə̀ gɨntɨ bə Jisɔs manɨ, bɔ nə̀ ji bə bənɨ bə tsɔŋ yi buŋfia lə bəfɛ bə bɔ nə̀ gɨntɨ lə bɔ kkpɨsɨ tɨ. 33 Bɔ gəŋ ba fɔ dɨ wu bə́ na tsɨsə lə Kɨgɔkɔlɔ kɨ fo lə, bɔ bandɨ Jisɔs mɨ kɨtɨ kɨ ŋ'wa lə wɨ ba bandɨ tɨ bənɨ bə tsɔŋ yi buŋfia lə bəfɛ ba bibɔlə bitɨ wɨ, wudɔ Jisɔs nədiɨ, wudɔ yu nəməsə. 34 Jisɔs jiji ba tə lə, “Taa, gûfiɛ məmbiə mə bənɨ bɛŋ'ə, ndzɨ bɔ na kkəhə fiɔŋ fi bɔ na fɨtɨ.”ª Bənɨ ba dze bindzu bi Jisɔs lə ba ta kɨmbəmbɨ su fə bɔ jɛɛ bə gwɨ́ yibɔlə.
35 Biɔŋ biŋ bichi nə̀ tɨchə Jisɔs mɛni, ɨji bənɨ lɨmi mɨ bɔ ŋɨntɨ. Bənɨ bə nə̀ sakɨ kɨtuŋ kɨ ŋgo yu bɔ tɨdi lə, “Yu nə chitəə bənɨ bədɔ, yu chitə la gwɨ yihi fɛŋ, jilə yu na ji Nchitə wu Nyɔ nə̀ kaa wa ba sa lɨ.” 36 Bənɨ bə bitsa lə kɨ ŋgo yu tɨ, bɔ nyaa yu mbiŋ mə ŋkpatə, 37 bɔ tɨdi lə, “Jilə wə na ji Ŋkuŋ wu Bəju, wə chitə gwɨ yɔhɔ.” 38 Bə́ nə̀ bɔndu kɨŋwatɨ ba bandɨ kɨtɨ kɨ Jisɔs lə ka wɨ nəbɔ́ lə, “No na Ŋkuŋ wu Bəju.”
39 Miɨ wu tsɔŋ yi buŋfia wudɔ nə bənɨ ba ntɨŋ bə nə̀ ji bitɨ bia wɨ mɨ, dze kɨ suŋku Jisɔs, yu tɨdi lə, “Na tɨ wə Nchitə wu Nyɔ nə̀ kaa wa lə? Chîtə la gwɨ yɔhɔ, wə chîtə tɨ bɨ.” 40 Lə wudɔ wa wɔ fiɔŋ fi wa chanyɛ, yu wɛmiɛ bə yu ba bi lə, “Wə na letɛhɛ Nyɔ? Wə na ji ŋgə ntɨŋ tɨ diəŋ nɨ yu na ji. 41 Bɨ bə wə na kkpɨ yɛyi lɨ fi ji bikwəntsə bi biɔŋ bibiə lə bi kə nə̀ fɨtɨ, bəmanɨ miɨ no na kkpɨ yihi ɨji yu kə gbɔɔ fiɔŋ.” 42 Miɨ wu tsɔŋ yi buŋfia no tə tə lə, “Jisɔs, gɔ̂mbiɛ mɨ tsa yi wə ná kɨ sakɨ buŋkuŋ bwɔhɔ.” 43 Jisɔs tə bə yu lə, “Ntə wə yɛyi, ndɛŋ mɛ kə jiba kə kɨ ji bɨ bə wə dɨ wu Nyɔ lə wu buni lə ntɨŋ.”
Jisɔs kkpə
44 Lə diɔ kɨ ba ləmiə, kɨjuwɔ gbɔ kɨtuŋ kɨchi ntɨŋ gəŋ fɔ tsá bɨŋ tiɛ bbushə, 45 ndzɨ wɨmbɨ nə̀ tsu kə tsalə. Kɨndzu kɨ nə̀ jɛti tsɔŋ yi bintɔfiɛ fəntɨŋ tandə kɨntɨŋ kɨntɨŋ bidiadia lɨ bifɛ. 46 Jisɔs kɨ ji kɨtɨ kɨ ŋ'wa lə wɨ, yu jiji ba wɛŋ bə diɛ bɔ́ lə, “Taa, mɨ nya kɨn'yɨntɨ kɛŋ wə kaŋ.” Nɨ yu tədiə manɨ, yu yɨntɨ kɨn'yɨntɨ kɨ nəjiŋ.
47 Fo wu bənɨ bə bitsa lə wu nə̀ lɨmi mɨ ŋəŋ fiɔŋ fi nə̀ tɨchə wɨ ba nya bubəŋ bə Nyɔ tə lə, “Yɛyi, yɛyi, miɨ no nə sɨŋ bə ŋgbɔ.” 48 Le bənɨ bəchi bə nə̀ tɛshɛ mɨ ŋəŋ fiɔŋ fi nə̀ tɨchə, bɔ dza ba fichə kɨ kwəyə kú yibɔlə ntɨŋ ɨji bɔ' kə kaŋ biə. 49 Bəma nsáŋ yi Jisɔs lə chi nə̀ ba fiyilə yi lɨmi ji dzəbudə yi ŋɨntɨ fiɔŋ fi tɨchə wɨ. Yidɔ nə̀ bəkansɨ bə nə̀ fɔɔ nə Galili kɨ biəlɨ yu.
Bə́ di Jisɔs
50-51 Miɨ wudɔ nə̀ ji tsa ya wɨ bə́ tsɨsə yu lə Jɔsɛ, ɨji miɨ nə kɨtuŋ kɨ Bəju lə kɨdɔ ntɨŋ kɨ bə́ nə̀ tsɨsə lə Alimatia. Yu nə̀ ji miɨ wu ndzeŋe, yu ji tɨ miɨ wu diəŋ Nyɔ nəfiə, yu nə̀ wokɔ tɨ tsa yi Nyɔ jiwa ɨ yu ba kɨ sakɨ buŋkuŋ buhu. Yu nə̀ ji tɨ miɨ wu kɨntsu kɨ bənɨ bə nə̀ sakɨ bənsa lə ntɨŋ. Bəmanɨ, yu nə̀ kə bɨmiə fihi fiɔŋ fi bə́ nə̀ sesɛ ba fə bə Jisɔs. 52 Yu gəŋ fə Pailɛt ku ba nende dzə lə yu gəŋ dze kɨŋgundu kɨ Jisɔs lə. 53 Pailɛt bɨŋ, yu gəŋ shisəsɨ kɨŋgundu ka ba kwɨdi bindzu ntɨŋ ba gəŋ kɨnsɨ dzəŋ ntɨŋ, yi bə́ nə̀ tsɔɔ kɨbɔ wɨ, ɨji bə́ nə̀ kə saa ga miɨ sɔ. 54 Nə̀ Butsu bu bə́ nə̀ Fɨtɨ gwɨ lə bə́ be butsu bu fufiɛ ntɨŋ, ɨ shɨkɨ tsəsɨ lə butsu bubɔlə bu fufiɛ gbɔ.