Jisɔs dzakɔ nə kkpə lɨ
24
Lə butsu bu fufiɛ ba chɛ, bu wɔ butsu bu fiəfiə biənɨ ntɨŋ. Bəkansɨ ba fɔ futə ntɨŋ ba dze məŋ mə bɔ nə̀ fəə ma ba kɨ gɨntɨ bə mɔ mɨ fə dzəŋ ya ku. 2 Lə bɔ gəŋ fɔ mɨ, bɔ ŋəŋ ji bə́' baŋgə ta wu bə́ nə̀ baŋə wa dzəŋ ya su. 3 Bɔ be ba gəŋ dzəŋ ya ntɨŋ ba jikə ŋəŋkəhə kɨŋgundu kɨ Baba Jisɔs lə. 4 Bɔ ləŋ mɨ ba fɨŋgbə lɨ. Mɨ kɨsɨkɨ bənɨnsə bəfɛ lafu ba ləŋ fə bɔ ku, ɨji bɔ' dɔŋ bindzu biwo bi na lakiɛ. 5 Bəkansɨ ba le kɨtso ba tse mənshi koso. Bənɨnsə ba bi bə bɔ lə, “Bə na noŋko miɨ wuwəŋ bəŋkkpə ntɨŋ ndzɨ la? 6 Yu na sɨŋ mɛ, yu' dzakɔ nə kkpə lɨ. Bə sê fiɔŋ fi yu nə̀ tədiə bəŋ tsa yi bə nə̀ ji Galili bə yu. 7 Yu nə̀ tə lə, ‘Bə́ ná nya Wɛŋ wu Miɨ bənɨ bəbiə kaŋ, ɨ bɔ bandɨ yu kɨtɨ kɨ ŋ'wa lə wɨ, ɨ kɨ ji díɔ bɨŋ tɛ, ɨ yu dzakɔ nə kkpə lɨ.’”8 Bɔ tə se fiɔŋ fi Jisɔs nə̀ tədiə bə bɔ. 9 Bɔ dza nə fə dzəŋ ya ku ba tsu jiŋ gəŋ tə biɔŋ biŋ bichi bə beŋ buhu bə nɨŋ'ə bə yɔɔ ntse miu ma bənɨ bəchi bə nə̀ biəlɨ yu. 10 Bəkansɨ bə nə̀ tədiə fiɔŋ fi nə̀ tɨchə fiŋ bə beŋ bə faŋə bə Jisɔs lə nə̀ Maliya Madalen, Jwana bə Maliya mə Jɛm bə bəkansɨ bədɔ. 11 Bɔ wɔ nchanyɛ ya chi nchanyɛ yi buŋfidi ba jikə bɨmiə tɨmo. 12 Bəmanɨ, Pita bu dza ba lətə gəŋ fɔ fə dzəŋ ya ku, yu tsəkə ba bo dzəŋ ya ntɨŋ ba ŋəŋ kwa ji bindzu bi bə́ nə̀ kwɨdiɛ bia Jisɔs bə bi. Yu bu dza ba kɨ kwəlɨ yu ji bə kɨgəsə kɨ wɨŋə tsukɔ fiɔŋ fi tɨchə wɨ.
Bənɨ bədɔ ŋəŋ Jisɔs wɨ dzə yi Ɛmayɔs
13 Fi tɨchə tɨ butsu bwa lə bənɨ bədɔ bəfɛ bə nə̀ ba bɔ kɨ biəlɨ Jisɔs nə̀ dza nə Jɛlosalɛm kɨ gɨntɨ kɨtuŋ kɨdɔ ntɨŋ kɨ bə́ nə̀ tsɨsə lə Ɛmayɔs, kɨtuŋ ka nə̀ ji nɨ bəmaiª fumba bə ŋgəŋ fɔ sɔ. 14 Bɔ nə̀ gɨntɨ bɔ chanyɛɛ bɔ bɔ kɨ biɔŋ bichi bi nə̀ tɨchə lə. 15 Lə bɔ kɨ gəndə bɔ chanyɛ, bɔ dɨ gwɨ manɨ, Jisɔs kɨbɛɛ kɨnɨ ba gəŋ fə bɔ ku kɨ gəndə bə bɔ. 16 Fiɔŋ fidɔ fə lə bɔ kə̂ kkə Jisɔs. 17 Jisɔs jiji ba bi bə bɔ lə, “Ɨ na ji la fi bə na gəndə bə chanyɛ kɨ fi lə mɛ?” Nɨ yu biɛ manɨ bɔ ləŋ bə mənshi məndzudiɛ. 18 Miɨ wudɔ nə bɔ ntɨŋ wu yɨ wuhu nə̀ ji lə Klɔpas bi bə yu lə, “Na kwa wə miɨ wu banə Jɛlosalɛm wu kə wɔkɔhɔ biɔŋ bi tɨchə díɔ yiŋ ntɨŋ?” 19 Jisɔs bi lə, “Bi la?” Bɔ chi lə “Biɔŋ bi nə tɨchə bə Jisɔs wu Nadzalɛt. Miɨ no nə̀ miɨ wu shɔŋ yi Nyɔ. Biɔŋ bi yu nə fɨtɨ bə bi yu nə chanyɛɛ nə ji bi kɨgəsə kɨ wɨŋə lə. Yu nə ji miɨ wubəŋ Nyɔ nəfiə kɨtso ma bənɨ nəfiə tɨ. 20 Bəchɛ bintɔfiɛ bəbəŋ bə bənɨ bə sakɨ kɨtuŋ kaha nə nya yu lə bə́ kkpɨsɨ. Bə́ tə bandɨ yu kɨtɨ kɨ ŋ'wa lə wɨ. 21 Kə nə ga fiaha bufɨ yu wɨ lə nə̀ yu wu nə̀ji lə yu foso bənɨ bə Isla nə ŋgə ntɨŋ. Bəmanɨ na kwa nɨ díɔ tɛ nɨ biɔŋ bia nə tɨchə. 22 Fidɔ na lə bəkansɨ bədɔ nə kɨntsu kaha ntɨŋ sə chanyɛ fi nya bɨ kɨgəsə kɨ wɨŋə lə, bɔ' fɔ ba gəŋ fə dzəŋ ya ku futə ntɨŋ, 23 bɔ jikə ŋəŋkəhə kɨŋgundu kɨhɨ wɨ. Lə bɔ tsu, bɔ tə lə bɔ sə ŋəŋ bənchinda bə Nyɔ lə wɨ wələ na budəŋfɨ ntɨŋ, bɔ tə bə bɔ lə Jisɔs wa wuwəŋ. 24 Bənɨ bədɔ nə kɨntsu kaha ntɨŋ' gəŋ fə dzəŋ ya ku ba ŋəŋ yi wɨ tɨ diəŋ nɨ bəkansɨ ba sə tədiə, bəmanɨ, bɔ jikə ŋəŋkəhə Jisɔs wɨ.”
25 Jisɔs tə bə bɔ lə, “Ɔɔɔ, bəŋfidi bɛŋ, shəŋ yɛnɨ na ji wəəə kɨtso bə mbɨŋ biɔŋ bi bənɨ bə shɔŋ yi Nyɔ lə nə̀ tədiə. 26 Bə na kkəhə lə Nchitə wu Nyɔ nə̀ kaa wa nə̀ji lə yu wɔ̂ ŋgə fə yu tə bɛɛ bubəŋ buhu ntɨŋ?” 27 Jisɔs tə gbɔ kɨ nachɛ bɔ biɔŋ bichi bi bə́ nə̀ bɔndɔ Kɨŋwatɨ kɨ Nyɔ lə ntɨŋ tsukɔ yu wɨ dze nə bi Mose nə̀ bɔndɔ wɨ, gəŋ fɔ bi bənɨ bə shɔŋ yi Nyɔ lə wɨ. 28 Lə bɔ ba fɔɔ fə kɨtuŋ kɨ bɔ nə̀ gɨntɨ ka ku, Jisɔs fə wələ yu na chɛti buchɛnɛ. 29 Bɔ nende yu kɨtso ba tə lə, “Kə gə̂ŋ me. Tsa' chɛ kɨtso, fu' gbɔ kɨ jimi.” Bəma yu bɨŋ lə yu gəŋ me bə bɔ. 30 Bɔ gəŋ, lə bɔ kɨ diɨ, yu dze blɛ ba nya kɨmbafə bə Nyɔ ba gbədiə nya bə bɔ. 31 Mɨ kɨsɨkɨ manɨ, yəsɨ yibɔlə gulɔ, bɔ bu kkə yu. Yu layɛ nə bɔ yəsɨ. 32 Bɔ shə kɨ masə bɔ bɔ lə, “Ntɨlə shəŋ yaha sə shi lɨ tsa yi yu sə chanyɛɛ bə bɨ dzə, yu nachɛɛ tɨ biɔŋ bi Kɨŋwatɨ kɨ Nyɔ lə bə bɨ sɨŋ?”
33 Bɔ bu dza fudiɔ wa kɨ tsu Jɛlosalɛm. Lə bɔ gəŋ, bɔ ŋəŋ beŋ bə Jisɔs lə bə nɨŋ'ə bə yɔɔ ntse miu' tɛshɛ dɨ mo bə bənɨ bədɔ bə nə̀ ba bɔ kɨ biəlɨ yu. 34 Bɔ tə lə, “Yɛyi yɛyi, Baba waha' dzakɔ nə kkpə lɨ. Yu sə lafu Semon yəsɨ.” 35 Bɔ tə tɨ bə beŋ bə Jisɔs lə bə nɨŋ'ə bə yɔɔ ntse miu ba fiɔŋ fi sə tɨchə bɔ dzəchi, bɔ nachɛ nɨ bɔ sə kkə yu tsa yi yu sə gbəə blɛ.
Jisɔs lafu beŋ buhu bə nɨŋ'ə ntɨŋ
36 Nɨ bɔ nə̀ bambi bɔ chanyɛ manɨ, Jisɔs kɨbɛɛ bu lafu bɔ fəntɨŋ ba tsɨsɨ bɔ lə, “Budə kɨ ji bə bəŋ.” 37 Shəŋ kəmbə bɔ, bɔ kɨ lete, bɔ gɔmbiɛɛ lə bɔ' ŋəŋ ji kɨŋku. 38 Yu bi bə bɔ lə, “Bə na lete la? Bə na masə mɨ ndzɨ la? 39 Bə bô bə ŋəŋ kaŋ yɛmɨ bə go yɛŋ, bə jiba ɨ bə kkə lə na mɨ kɨbɛɛ. Bə fə̂fə gwɨ yɛmɨ, bə jiba bə kkə, ndzɨ kɨŋku na keŋkɛhɛ nyɛŋ gwɨ bə bikuŋfɔ nɨ bə na ŋɨntɨ chiŋ ŋkeŋkɛ.” 40 Nɨ yu tədiə manɨ, yu donchɛ bɔ kaŋ yihi bə go. 41 Bɔ bo Jisɔs mɛ, kɨnlaŋ kkpɨsɨ bɔ, bɔ kɨ ji bə kɨgəsə kɨwɨŋə. Fi ya bɔ bə mbɨŋ lə na yu. Yu bi bə bɔ lə, “Bə na keŋkɛ fiɔŋ fidiənə mɛni?” 42 Bɔ dze kɨdiadia kɨ biɔsu yi nyiŋɛ lə ba nya yu. 43 Yu ləkə ba diə lɨ bɔ yəsɨ.
44 Yu tə bə bɔ lə, “Biɔŋ bi bə ŋəŋə biŋ ndɛŋ na bi nnə̀ nchanyɛ bə bəŋ kɨ bi lə mbambi bə bəŋ. Nnə̀ ntə lə biɔŋ bichi bi na ji bubɔndɔ tsukɔ mɨ wɨ kɨŋwatɨ kɨ Mose lə ntɨŋ, bə Biŋwatɨ bi bənɨ bə shɔŋ yi Nyɔ lə ma kɨŋwatɨ kɨ Kɨŋkuntə lə ntɨŋ, bi ná foto lɨ diəŋ.” 45 Yu tə gu bufɨ bubɔlə, bɔ kkə biɔŋ bi na ji Kɨŋwatɨ kɨ Nyɔ lə ntɨŋ. 46 Yu tə lə, “Fi na ji bubɔndɔ lə Nchitə wu Nyɔ nə̀ kaa wa naji lə yu wɔ̂ ŋgə ba kkpə lɨ, ɨ kɨ ji díɔ tɛ bɨŋ, ɨ yu dzakɔ nə kkpə lɨ. 47 Fi na ji tɨ lə bə́ jiba ɨ bə́ gbɔ nə Jɛlosalɛm kɨ tɨfiə bituŋ bichi yɨ wuhu lɨ lə bənɨ bəchi fîchə shəŋ yibɔlə, Nyɔ gufiɛ məmbiə məmbɔlə. 48 Na bəŋ bɛŋ bə nə̀ ŋəŋə biɔŋ biŋ wɨ bə ná kɨ tɨfiə. 49 Bə wôkɔ bə wɔ, njiwa mfaŋ bəŋ kɨnya kɨ Taa nə̀ kaa ka bəŋ. Bəma, bə kə̂tə mɛ kɨtuŋ kɨŋ ntɨŋ kɨ wokɔ buŋga bu ná shiɛ nə bɔ́ ba ba bəŋ bɨŋ.”
Jisɔs bəndɨ bɔ́
50 Yu dze bɔ ba fɔ bə bɔ nə kɨtuŋ ka ntɨŋ, bɔ bə yu gəŋ fɔ Bɛtani, yu tɔ kaŋ yihi bɔ́ ba nya bɔ budə. 51 Nɨ yu nə̀ bambi yu nya bɔ budə manɨ, yu bu dza kɨ bɨndɨ bɔ́, yu bəndɨ ba layɛ lɨ. 52 Bɔ nya yu kɨŋkuntə kɨbəŋ ba dza nə mɨ tsu jiŋ Jɛlosalɛm bə kɨnlaŋ kɨbəŋ bɔ shəŋ. 53 Bɔ gəŋ ba kɨ ji tsɔŋ yi bintɔfiɛ ntɨŋ, bɔ bafəə Nyɔ tsá chi.