Jisɔs dzakɔ nə kkpə lɨ
16
Lə butsu bu fufiɛ ba ba chɛ lɨ, Maliya Madalen bə Maliya mə Jɛm, bə Salɔmi taŋ məŋ məndɔ mə ntsɔŋfu lə, lə bɔ gəŋ kushi kɨŋgundu kɨ Jisɔs lə su. 2 Lə kɨ ji fuwɔki tɨmɛ nɨ diɔ na boso ɨji butsu bu fiəfiə biənɨ ntɨŋ, bɔ dza kɨ gɨntɨ fə dzəŋ ya ku. 3 Bɔ nə̀ gɨntɨ manɨ bɔ chanyɛ bɔ bɔ lə, “Kə na gɨntɨ mɛ, na yəŋ wu jiwa ɨ yu bindiɛ ta wu bə́ nə̀ baŋə wa bifuŋ bi dzəŋ ya lə bɨ lɨ?” 4 Bəmanɨ lə bɔ bo, bɔ ŋəŋ ɨji bə́' bindiə ta wa. Ta wa nə̀ wubəŋ kɨtso. 5 Lə bɔ be ba gəŋ sɔ dzəŋ ya ntɨŋ, bɔ ŋəŋ wɛŋbutsɔ wudɔ, yu' jiŋ nədiɨ, ɨji yu' dɔŋ kɨndzu kɨ dəŋfɨ kɨ ji boo. Gwɨ kɔ bɔ. 6 Wɛŋ butsɔ wa tə bə bɔ lə, “Gwɨ kə̂ kɔhɔ bəŋ. Nna ŋkkɨ lɨ lə bə na noŋko Jisɔs wu Nadzalɛt wu bə́ nə bandə wa kɨtɨ kɨ ŋ'wa lə wɨ. Yu na bambiɛhɛ mɛ. Yu sə dzakɔ nə kkpə lɨ. Bə bô bə ŋəŋ dɨ wu bə́ nə kɨnsə wa yu. 7 Bə gə̂ŋ tə bə beŋ buhu bə nɨŋ'ə ma bə Pita lə, ‘Yu wa wu sa bəŋ fiə, yu gɨntɨ Galili. Bə jiba bə gəŋ ŋəŋ yu sɔ nɨ yu nə̀ tədiə bə bəŋ.’” 8 Lə bəkansɨ ba fɔ nə dzəŋ ya ntɨŋ, bɔ kɨ jakɨ bə nyiŋ, bɔ chɛ bə lɨtɨ, ɨji bufɨ bubɔlə' jibiɛ. Bɔ jikə chanyɛ fiɔŋ bə miɨ, ndzɨ bɔ nə̀ lete lɨ.ªJisɔs donchɛ gwɨ yihi bə bənɨ
[ 9 Jisɔs nə̀ dzakɔ nə̀ kkpə lɨ butsu bu fiəfiə biənɨ ntɨŋ ɨ bambi futə ntɨŋ, yu sa ba lafu fə Maliya Madalen ku ɨji yu wu Jisɔs nə̀ fosɔ wa bətsə fumba nə yu wɨ. 10 Maliya gəŋ ba tə bə bənɨ bə bɔ bə Jisɔs nə̀ ba bɔ kɨ ji. Nə̀ ji bənɨ bɛŋ sə jiŋ ba tse mənshi kɨ dzudi gwɨ, bɔ dɨ kkpə. 11 Lə bɔ wɔ nɨ kpansɨ wa tədiə lə yu sə ŋəŋ Jisɔs wɨ, yu ji wuwəŋ, bɔ jikə bɨmiə.
12 Nəjiŋ wusu, Jisɔs chi donchɛ gwɨ yihi bə beŋ buhu bədɔ bə nɨŋ'ə bəfɛ, bɔ gəndəə dia wudɔ, ɨji bushi buhu sə yashənɨ. 13 Bɔ tsu jiŋ ba gəŋ tə bə beŋ bə nɨŋ'ə bədɔ ba, bɔ jikə bɨmiə.
14 Nəjiŋ wusu, Jisɔs donchɛ gwɨ yihi fɛŋ ji bə beŋ buhu bə yɔɔ ntse miu kɨbɛɛ ɨji bɔ diɨ. Yu wɛmiɛ bə bɔ, ndzɨ bɔ nə̀ kə keŋkɛ kɨmbɨŋ, bɔ tɛti fo bə mbɨŋ bə bənɨ bə nə̀ ŋəŋə ba yu wɨ tsa yi yu nə̀ dzakɔ nə kkpə lɨ. 15 Yu tə bə bɔ lə “Bə gə̂ŋ mbi chi ntɨŋ, bə gəŋ kɨ tɨfiə shɔŋ yi ndzeŋe yi Nyɔ bə bənɨ bəchi. 16 Miɨ wu bɨmiə shɔŋ ya, bə chɛse yu biɔ, yu jiwa ɨ yu fɔfo. Miɨ wu jɛkə bɨmiə, ɨ yu gbɔ nsa. 17 Bənɨ bə bɨmiə jiba ɨ bɔ kɨ fɨtɨ biɔŋ bi na donchɛ buŋga bu Nyɔ lə nɨ biŋ mɛ: bɔ ná kɨ foshɛ bətsə nə bənɨ wɨ bə yɨ wɛmɨ, bɔ ná kɨ chanyɛ díɛ yifa ntɨŋ, 18 bɔ ná kɨ chiŋfiɛ yé bə kaŋ. Ɨ bɔ mu tɨmo ntsə yibiə, ɨ yi jikə fəkə bɔ fiɔŋ, bɔ ná kɨ galɨ kaŋ bənɨ bə gwɨ́ lə wɨ, bənɨ ba wəmiɛ.”
Jisɔs bəndɨ bɔ́