Bə́ nɔŋ kɨŋgundu kɨ Jisɔs lə ba jikə ŋəŋkəhə
20
Lə kɨ ji butsu bu fiəfiə bu biənɨ lə, Maliya Madalen fɔ ba dza futə ntɨŋ ba gəŋ fə dzəŋ ya ku ba ŋəŋ ɨji bə́' me ta wu bə́ nə̀ baŋə wa dzəŋ ya su. 2 Bəma yu bu lətə ba gəŋ fə Semon Pita ku, bə wɛŋ wu nɨŋ wu Jisɔs nə̀ laŋkɨ wa kɨtso ba tə bə bɔ lə, “Bə́' foso Baba nə dzəŋ ya ntɨŋ, kə kə kkə dɨ wu bə́' galə yu.” 3 Pita fɔ bɔ bə wɛŋ wu nɨŋ wu Jisɔs wudɔ wa ba kɨ gɨntɨ fə dzəŋ ya ku. 4 Bɔ nə̀ gɨntɨ bɔ lətə, bəmanɨ wɛŋ wu nɨŋ wu Jisɔs wa lətə ba ya Pita ba sa fɔ fə dzəŋ ya ku. 5 Nɨ yu fɔɔ mɨ, yu tsəkə ba bo lɨ, yu ŋəŋ bindzu bi bə́ nə̀ kwɨdiə bia Jisɔs su ji mɨ. Yu bo manɨ ba jikə bekɛ sɔ. 6 Semon Pita biə yu ba fɔ mɨ ba be gəŋ dzəŋ ya ntɨŋ. Lə yu be, yu ŋəŋ kwa ji bindzu bia wɨ bi ji mɨ, 7 ma findzukiɛ fi bə́ nə̀ kwɨdiə fo wu Jisɔs lə su, fi jikə jimiɛ fə bindzu bidɔ bia ku, ɨji bə' kunchɛ fi ba ga fi nə fi kaŋ. 8 Wɛŋ wu nɨŋ wu Jisɔs wudɔ wa wu nə̀ saa wa fɔ fə dzəŋ ya ku be tɨ dzəŋ ya ntɨŋ ba ŋəŋ bə yəsɨ yihi tə bɨŋ'ɨ. 9 Nə̀ ji bɔ bambi kə kkə kɨnyi kɨ fiɔŋ fi na ji Kɨŋwatɨ kɨ Nyɔ lə ntɨŋ lə Jisɔs nə̀ji lə yu dzakɔ nə kkpə lɨ.Jisɔs donchɛ gwɨ yihi bə Maliya Madalen
10 Beŋ bə nɨŋ'ə bə Jisɔs lə ba fichə ba kwə lɨ. 11 Bəmanɨ Maliya shə ba ləŋ mɨ kɨ bu dəə fə dzəŋ ya ku. Nɨ yu nə̀ dɨ, lə yu jiji ba tsəkə bo dzəŋ ya ntɨŋ, 12 yu ŋəŋ bənchinda bə Nyɔ lə bəfɛ bɔ' dɔŋ bindzu biwo ba jiŋ dɨ wu bə́ nə̀ kɨnsə wa kɨŋgundu kɨ Jisɔs lə, wudɔ dia wu fo nə̀ ji, wudɔ dia wu go nə̀ ji. 13 Bənchinda bə Nyɔ lə ba bi bə yu lə, “Kpansɨ, wə na dɨ la?” Yu chi lə, “Nna ndɨ ndzɨ bə́' tɔ Baba wɛŋŋ ba dza bə yu, mɨ njikə kkə dɨ wu bə́' galə yu.” 14 Nɨ yu nə̀ chanyɛ ma, lə yu fichə gwɨ yu ŋəŋ Jisɔs lɨmi. Bəmanɨ yu jikə kkə lə na Jisɔs. 15 Jisɔs bi bə yu lə, “Kpansɨ, wə na dɨ la? Wə na noŋko ji yəŋ?” Maliya kɨ se lə na miɨ wu na kɨki kə wu bitɨ bi muntaŋ'ə wa. Yu tə bə yu lə, “Miɨ wubəŋ, jilə wə' tɔ yu dza bə yu, wə tə dɨ wu wə galə yu, ŋgəŋ ndze ba dza bə yu.” 16 Jisɔs bəndɨ yu lə, “Maliya.” Maliya fichə gwɨ ba bəndɨ Jisɔs díɛ yibɔlə yi Hiblu ntɨŋ lə, “Labɔni,” ma ji lə, “Miɨ wu Bitɨfiə.” 17 Jisɔs tə bə yu lə, “Wə kə̂ chiŋfiɛhɛ mɨ ndzɨ nna mbambi kə bəndə fə Taa ku. Gə̂ŋ ji fə bəŋgwɨŋ ku, wə tə bə bɔ lə mbɨndɨ wa Taa ku wu na ji tɨ Chaa wɛnɨ ma bə Nyɔ wɛŋŋ wu na ji tɨ Nyɔ wɛnɨ.” 18 Maliya Madalen gəŋ ba tə bə beŋ bə Jisɔs lə bə nɨŋ'ə lə, “Mɨ' ŋŋəŋ Baba wɨ,” yu chi tədiə bə bɔ lə, Baba chanyɛ biɔŋ biŋ bə yu.
Jisɔs donchɛ gwɨ yihi bə beŋ buhu bə nɨŋ'ə
19 Lə kɨ ji fudiɔ butsu bwa bu nə̀ ji butsu bu fiəfiə bu biənɨ lə, ɨji beŋ bə nɨŋ'ə bə Jisɔs lə ji tsɔŋ, bɔ' baŋ bigwəŋ ndzɨ bɔ nə̀ lete Bəju. Jisɔs jiji ba lafu ləŋ bɔ fəntɨŋ ba tsɨsɨ bɔ lə, “Budə kɨ ji bə bəŋ.” 20 Nɨ yu tsɨsə bɔ manɨ, yu donchɛ bɔ kaŋ yihi bə bíə yihi. Beŋ bə Jisɔs lə bə nɨŋ'ə wɔ buni kɨtso nɨ bɔ ŋəŋə Baba wɨ. 21 Jisɔs chi tədiə bə bɔ lə, “Budə kɨ ji bə bəŋ. Nɨ Taa nə̀ faŋə mɨ, na tɨ diəŋ nɨ nna mfaŋkɨ bəŋ fɛŋ.” 22 Nɨ yu nə̀ tədiə manɨ, yu yɨntɨ bɔ wɨ ba tə lə, “Bə lə̂kə Kɨn'yɨntɨ kɨ Ntsaaŋ. 23 Ɨ bə gufiɛ bubiə bu miɨ lə, tə Nyɔ' gufiɛ bu tɨ. Bə jikə gufiɛ, tə bu' kətə bɔ wɨ.”
Jisɔs donchɛ gwɨ yihi bə Tɔmas
24 Tsa yi Jisɔs nə̀ ba fə beŋ buhu bə nɨŋ'ə ku, Tɔmas wu nə̀ ji miɨ miu nə kɨntsu kɨ beŋ bə yɔɔ ntse bəfɛ lə wu bə́ nə̀ tsɨsə yɨ wuhu wudɔ lə Maŋ nə̀ sɨŋ bɔ ntɨŋ. 25 Beŋ bə nɨŋ'ə bə Jisɔs lə bədɔ ba tə bə yu lə, “Kə sə ŋəŋ Baba wɨ.” Bəmanɨ Tɔmas tə yihi bə bɔ lə, “Fiəŋkə lə mɨ' ŋŋəŋ binələ bi shí yi muntsunɔ mwa lə, ba ga kpaŋ wɛŋŋ binələ bia bɨŋ, ba ga tɨ kpaŋ wɛŋŋ bíə yihi wɨ, ntə mbɨŋ.”
26 Biənɨ chɛ, beŋ bə Jisɔs lə bə nɨŋ'ə chi jimiɛ tsɔŋ, Tɔmas ji bɔ ntɨŋ, bɔ ji bigwəŋ bi mbaŋə. Bəmanɨ, Jisɔs lafu bɔ ntɨŋ ba tsɨsɨ bɔ lə, “Budə kɨ ji bə bəŋ.” 27 Lə yu tsɨsə bɔ manɨ, yu tə bə Tɔmas lə, “Gâ kpaŋ wɔhɔ mɛ wə bukɔ bibandə biɛŋ ba ŋəŋ nɨ bi na ji, wə gâ tɨ kɨbandə kɔhɔ bíə yɛmɨ wɨ. Wə kə̂ masə, bɨ̂ŋ.” 28 Tɔmas chi lə, “Baba wɛŋŋ, bə Nyɔ wɛŋŋ.” 29 Jisɔs bi bə yu lə, “Wə bɨŋ fɛŋ ndzɨ wə ŋəŋə mɨ wɨ? Kɨnlaŋ kɨbəŋ na ji bə bənɨ bə na bɨmi, mɛfə bɔ kə ŋəŋkəhə mɨ wɨ.”
Kɨgaŋ kɨ kɨŋwatɨ kɨŋ'ə