Jisɔs yinshi gwɨ yihi bə beŋ buhu bə nɨŋ'ə fə ŋgɔŋ məmbəŋ ku
21
Nəjiŋ wusu Jisɔs chi yinshɛ gwɨ yihi bə beŋ buhu bə nɨŋ'ə fə ŋgɔŋ məmbəŋ mə Tibɛlias ku. Chinchi fi nə̀ ji: 2 Semon Pita bə Tɔmas wu bə́ nə̀ tsɨsə lə Maŋ, ma Natanial wu kɨtuŋ kɨ Kana sha yi Galili ntɨŋ, ma beŋ bə Dzɛbɛdi lə, bə beŋ bə nɨŋ'ə bə Jisɔs lə bədɔ bəfɛ nə̀ ji dɨ mo. 3 Semon Pita jiji ba tə bə bɔ lə, “Njiwa nlɛ bíɔsu.” Bɔ tə bə yu lə, “Kə jiba kə lɛ bəchi.” Bɔ bəchi fɔ ba gəŋ be kɨkpɔŋkɔ ntɨŋ. Bəmanɨ bɔ me bə ŋgəndə kɨkpɔŋkɔ ntɨŋ, bɔ ji fiɔŋ kə kwekɛhɛ.
4 Fuwɔki kpe, Jisɔs ba ba ləŋ fə ŋgɔŋ ma ku, beŋ buhu bə nɨŋ'ə jikə kkə lə na yu. 5 Jisɔs bi bə bɔ lə, “Beŋ bɛŋŋ, bə' kwe bíɔsu?” Bɔ chi lə, “Yɛ.” 6 Yu tə bə bɔ lə, “Bə lî gbɨ kɨkpɔŋkɔ nədiɨ, bə kwete lɨ fiɔŋ.” Bɔ li, wu kɨ yakɨ bɔ bə ŋkpa, ndzɨ bíɔsu nə̀ dze su kɨyɛŋ. 7 Wɛŋ wu nɨŋ wu Jisɔs, wu Jisɔs nə̀ laŋkɨ wa ŋəŋ manɨ ba tə bə Pita lə, “Na Baba.” Lə Semon Pita wɔ lə na Baba, yu bu dɔŋ kɨndzu ndzɨ nə̀ ji yu ji gwɨ yiya. Nɨ yu nə̀ dɔŋɔ manɨ, yu tə sɔ biɔ kɨ gɨntɨ fə Jisɔs ku. 8 Bəmanɨ beŋ bə nɨŋ'ə bədɔ ba kɨ biəlɨ kɨkpɔŋkɔ ntɨŋ bɔ kpa gbɨ wa ɨji bíɔsu' yi wu wɨ. Bɔ nə̀ jimiɛhɛ dzəbudə bə mfɔ kpa. Bəntaŋ nə̀ shɨkɨ kwa nɨ mbaashɨŋ. 9 Bɔ gəŋ shafu kpa ba ŋəŋ boso wɨ wu yələ, bíɔsu ji su bɨŋ, blɛ ji tɨ mɨ. 10 Jisɔs tə bə bɔ lə, “Bə bâ bə bíɔsu yidɔ yi bə kwɛɛ.” 11 Bəma Semon Pita gəŋ be kɨkpɔŋkɔ ntɨŋ ba kpa gbɨ wa foso kpa ɨji wu' yi bə bíɔsu yibəŋ gbɨ bə mbaashɨŋ ntse tiɛ (153). Mɛfə yi nə̀ ji cha kɨyɛŋ manɨ, gbɨ wa nə̀ kə shakiɛ. 12 Jisɔs tə bə bɔ lə, “Bə bâ diə.” Miɨ miu nə beŋ buhu bə nɨŋ'ə ba ntɨŋ nə̀ kə mɔŋkɔ tɨmo lə yu bi bə yu lə, “Na wə yəŋ?” Bɔ nə̀ kkə lə na Baba. 13 Jisɔs gəŋ ba dze blɛ wa bə bíɔsu ya ba nya bɔ. 14 Yiŋ nə̀ tsá tiɛ bɨŋ nɨ Jisɔs nə̀ donchɛ gwɨ yihi bə beŋ buhu bə nɨŋ'ə dze nə yu nə̀ dzakɔ nə kkpə lɨ.
Jisɔs chi nya nɨŋ bə Pita
15 Lə bɔ diə ba kanə lɨ, Jisɔs bəndɨ Pita ba bi bə yu lə, “Semon wɛŋ wu Jɔŋ, wə na laŋkɨ mɨ ba ya bədɔ bɛmbɛ?” Semon chi lə, “Ɨŋŋ Baba, wə na kkɨ lɨ lə nna nlaŋkɨ wə.” Jisɔs tə bə yu lə, “Kɨ chɨyi beŋ bɛmɨ bə shíŋ'ə.” 16 Jisɔs chi bəndə yu tsá bɨŋ fiɛ bi bə yu lə, “Semon wɛŋ wu Jɔŋ, wə na laŋkɨ mɨ?” Semon chi lə, “Ɨŋŋ Baba, wə na kkɨ lɨ lə nna nlaŋkɨ wə.” Jisɔs tə bə yu lə, “Kɨ kɨki shíŋ yɛmɨ.” 17 Jisɔs chi bəndə yu tsá bɨŋ tiɛ bi bə yu lə, “Semon wɛŋ wu Jɔŋ, wə na laŋkɨ mɨ?” Pita wɔ nɨ Jisɔs biɛ bə yu tsá bɨŋ tiɛ lə, “Wə na laŋkɨ mɨ?” Fiɔŋ fia funsə yu. Yu tə bə Jisɔs lə, “Baba, wə na kkɨ biɔŋ bichi, wə kkɨ tɨ lə nna nlaŋkɨ wə.” Jisɔs tə bə yu lə, “Kɨ chɨyi shíŋ yɛmɨ. 18 Yɛyi lɨ ntə wə lə, tsa yi wə nə̀ bambi wɛŋbutsɔ, nə̀ wə wu nə̀ ba wə dɔŋ bindzu biɔhɔ ba kɨ gɨntɨ dɨ wu wə na se. Bəmanɨ tsa yi wə ná tɛɛ, wə ná toto kaŋ yɔhɔ bɔ́, ɨ miɨ wudɔ chichi dɔŋ wə kɨndzu ba dze gəŋ bə wə dɨ wu wə na sɛhɛ.” 19 Jisɔs nə̀ chanyɛ mɛ, yu donchɛ ji ŋgwe yi kkpə yi Pita nə̀ji lə yu ná kkpə ba nya Nyɔ kɨŋkuntə. Nɨ Jisɔs nə̀ chanyɛ manɨ, yu tə bə Pita lə, “Bîə mɨ.”
20 Lə Pita fichə gwɨ, yu ŋəŋ wɛŋ wu nɨŋ wu Jisɔs nə̀ laŋkɨ wa kɨtso, yu biəlɨ bɔ. Wɛŋ wu nɨŋ no na wu nə̀ yəkə wa Jisɔs wɨ tsa yi bɔ nə̀ diɨ bidiəŋ bi nəjiŋ fudiɔ ba bi bə yu lə, “Baba, na yəŋ wa wu jiwa yu taŋŋə wə?” 21 Nɨ Pita nə̀ ŋəŋə wɛŋ wu nɨŋ wa biəlɨ bɔ, yu bi bə Jisɔs lə, “Baba, fi miɨ no lə na la?” 22 Jisɔs chi bə yu lə, “Jilə nna nse tɨmo lə yu kətə wuwəŋ fɔ tsa yi nna ntsɔ, ɨ fia keŋkɛ la fi fənə bə wə? Bîə kwa mɨ.” 23 Nɨ Jisɔs nə̀ tədiə manɨ, bənchanyɛ kɨ gəndə bənɨ bə kɨmbɨŋ'ə ntɨŋ lə wɛŋ wu nɨŋ wu Jisɔs no jiwa yu jikə kkpəhə. Bəmanɨ Jisɔs nə̀ kə tədiə lə naji ɨ yu kkpə kə. Jisɔs nə̀ bi kwa ji lə, “Jilə nna nse tɨmo lə yu kətə wuwəŋ fɔ tsa yi nná ntsɔ, ɨ fia keŋkɛ la fi fənə bə wə?”
Tsukɔ miɨ wu nə̀ bɔndɔ wa kɨŋwatɨ kɨŋ wɨ
24 Wɛŋ wu nɨŋ no na wu na chanyɛ tsukɔ biɔŋ biŋ wɨ, ɨji yu wu nə̀ bɔndɔ biɔŋ bia, kə kkɨ lə fiɔŋ fi yu nə̀ chanyɛ tsukɔ fi wɨ na yɛyi.
25 Biɔŋ bidɔ bia tɨ su kɨyɛŋ bi Jisɔs nə̀ fəə, tə kɨ ji lə bi bichi kɨ ji bubɔndɔ, ntə ŋkɨ ŋŋɨntɨ lə sha nyi chi naji ɨ yi keŋkɛ dɨ wu ganə biŋwatɨ bia kə.