Bə́ sa ba kəmbɨ lə bə́ kkpɨsɨ Jisɔs
19
Pailɛt dze Jisɔs ba nya bə́ chɔ yu. 2 Bənɨ bə bitsa lə lɔ kɨfulɔ kɨ buŋkuŋ'ə bə bibəmbiə ba chisə yu fi, bɔ dze kɨndzu kɨ buŋkuŋ'ə kɨyə ba sumɔ yu wɨ. 3 Bɔ kɨ gɨntɨ yu nəfiə, bɔ ŋgo yu, bɔ tɨdi lə, “Mbɛɛ! Ŋkuŋ wu Bəju!” Bɔ nə̀ fɨtɨ manɨ, bɔ sandiɛ yu bə bíaŋ. 4 Pailɛt chi fɔɔ binchi ba tə bə bənɨ lə, “Bə wɔ̂, njiwa mfoso miɨ no ba nya bəŋ, fə bə kkə lə ŋkə ŋŋəŋkəhə fiɔŋ fi yu fɨsə.” 5 Jisɔs fɔ bə kɨfulɔ kɨ bibəmbiə lə fi, ma kɨndzu kɨ buŋkuŋ'ə ka yu gwɨ. Pailɛt tə bə bɔ lə, “Bə bô bə ŋəŋ, miɨ wa no!” 6 Lə bəchɛ bintɔfiɛ bəbəŋ bə bənɨ bə nə̀ kɨki tsɔŋ yi bintɔfiɛ ŋəŋ yu wɨ, bɔ kɨ wɛnti lə, “Bândɨ yu kɨtɨ kɨ ŋ'wa lə wɨ, bândɨ yu kɨtɨ kɨ ŋ'wa lə wɨ!” Pailɛt tə bə bɔ lə, “Bə dzê yu bə kaŋ yɛnɨ ba bandɨ yu kɨtɨ kɨ ŋ'wa lə wɨ, ndzɨ ŋkə ŋŋəŋkəhə fiɔŋ fi yu fɨsə.” 7 Bəju ba chi bə yu lə, “Kə na ji bə kɨlaŋ kaha, kɨlaŋ ka donchɛ lə, yu naji lə yu kkpə, ndzɨ yu' dze gwɨ yihi lə yu na ji Wɛŋ wu Nyɔ.” 8 Lə Pailɛt wɔ nchanyɛ nyi, nyiŋ chi yu kwɛɛ kɨtso. 9 Bɔ bə Jisɔs chi tsɔ ntɔ wuhu ntɨŋ, yu bi bə Jisɔs lə, “Wə fɔ nə məŋ?” Bəmanɨ Jisɔs jikə chisə yu nchanyɛ. 10 Pailɛt bi bə Jisɔs lə, “Wə na chanyɛhɛ bə mɨ? Wə na kkəhə lə nna ŋkeŋkɛ buŋga bu tɔkaŋ nə wə wɨ, ŋkeŋkɛ tɨ buŋga bu naji ntə lə bə́ bandɨ wə kɨtɨ kɨ ŋ'wa lə wɨ?” 11 Jisɔs chi bə yu lə, “Naji ɨ wə keŋkɛ buŋga mɨ bɨŋ kə fiəŋkə lə bə́' nya wə buŋga bwa nə bɔ́. Bəma ndzɨ fiŋfi, miɨ wu' nya wa mɨ wə kaŋ na keŋkɛ bubiə bubəŋ ya bwɔhɔ.”12 Lə Pailɛt wɔ nchanyɛ nyi, yu gbɔ kɨ gɔmbiɛ dzə́ yi yu tɔkaŋ nə Jisɔs wɨ. Bəmanɨ Bəju wɛŋ kɨtso lə, “Ɨ wə mɔŋ ba shə miɨ no, tə wə na jimiɛhɛ nsɨnə Kaisa Ŋkuŋ wubəŋ wu Lom. Miɨ chi wu na dze gwɨ yihi lə yu na ji ŋkuŋ, na miɨ wu nchɛnɛ wu Kaisa.” 13 Lə Pailɛt chi wɔɔ nchanyɛ nyi, yu fɔ bə Jisɔs ba jiŋ kɨtɨ kɨ nsa lə bɨŋ, dɨ wu bə́ nə̀ tsɨsə lə, Dɨ wu bə́' wɛyɛ bə Ta, bə́ tsɨsə díɛ yi Hiblu ntɨŋ lə Gabata. 14 Butsu bwa nə̀ bu bə́ nə̀ sesɛ Kɨgbeyɛ kɨ Nchɛnəbɨŋ'ə, tsa nə̀ ji nɨ tsá yɔɔ ntse fiɛ. Pailɛt chanyɛ bə Bəju lə, “Bə bô bə ŋəŋ no na Ŋkuŋ wɛnɨ!” 15 Bəju ba kɨ wɛnti lə, “Dzâ bə yu, dzâ bə yu, bândɨ yu kɨtɨ kɨ ŋ'wa lə wɨ!” Pailɛt bi bə bɔ lə, “Mbandɨ Ŋkuŋ wɛnɨ kɨtɨ kɨ ŋ'wa lə wɨ?” Bəchɛ bintɔfiɛ bəbəŋ chi bə yu lə, “Kə na sɨŋ bə Ŋkuŋ wudɔ fiəŋkə Kaisa.” 16 Pailɛt bu nya Jisɔs bə bɔ lə bɔ gəŋ bandɨ yu kɨtɨ kɨ ŋ'wa lə wɨ.
Bə́ bandɨ Jisɔs kɨtɨ kɨ ŋ'wa lə wɨ
17 Bɔ dze Jisɔs ba fɔ bə yu. Yu tɔ kɨtɨ kɨhɨ kɨ ŋ'wa lə kɨ gɨntɨ dɨ wu bə́ tsɨsə lə Kɨgɔkɔlɔ kɨ Fo lə, bə́ tsɨsə díɛ yi Hiblu ntɨŋ lə Gɔlgɔta. 18 Bɔ gəŋ ba bandɨ yu mɨ kɨtɨ kɨ ŋ'wa lə wɨ, bandɨ tɨ bənɨ bədɔ bəfɛ bitɨ bi ŋ'wa lə wɨ, wudɔ nədiɨ, wudɔ nəməsə, Jisɔs ji fəntɨŋ. 19 Pailɛt bɔndu fiɔŋ fidɔ bə́ bandɨ kɨtɨ kɨ ŋ'wa lə kɨ Jisɔs lə wɨ. Fiɔŋ fi yu nə̀ bɔndɔ fia nə̀ ji lə, “Jisɔs wu Nadzalɛt, Ŋkuŋ wu Bəju.” 20 Bəju kɨyɛŋ nə̀ tanchɛ fiɔŋ fi yu nə̀ bɔndɔ fia, ndzɨ dɨ wu bə́ nə̀ bandə wa Jisɔs kɨtɨ kɨ ŋ'wa lə wɨ nə̀ ji gwɨgwɨ fə ku ku, yu nə̀ bɔndu fiɔŋ fiŋ díɛ yi Hiblu, yi Latin, bə yi Glek ntɨŋ. 21 Bəchɛ bintɔfiɛ bəbəŋ bə Bəju lə gəŋ ba tə bə Pailɛt lə, “Wə kə̂ bɔndɔhɔ lə, ‘Ŋkuŋ wu Bəju.’ Bɔ̂ndu ji lə, ‘Miɨ no na tɨdi lə yu na ji Ŋkuŋ wu Bəju.’” 22 Pailɛt chi bə bɔ lə, “Fiɔŋ fi mɨ' mbɔndɔ mɨ mbɔndu.”
23 Nɨ bənɨ bə bitsa lə nə̀ bandə Jisɔs kɨtɨ kɨ ŋ'wa lə wɨ, bɔ dze bindzu bihi ba jɛ bə gwɨ́ yibɔlə shi nia, nɨ bɔ nə̀ ji. Bɔ dze ma bə kɨnyə kɨhɨ. Kɨnyə kɨŋ ji kɨ bə́ nə̀ kɔɔ bunlɨsə dze nə kɨmiə wɨ shi fɔ go wɨ. 24 Bəma bɔ tə tə bə gwɨ́ yibɔlə lə, “Kə kə̂ shakiɛ kɨnyə kɨŋ. Kə tâ kɨmbəmbɨ ba ŋəŋ miɨ wu jiwa yu diə kɨ.” Fiŋfi nə̀ tɨchə bə mfə lə fi ba fɔ diəŋ nɨ fi nə̀ ji bubɔndɔ Kɨŋwatɨ kɨ Nyɔ lə ntɨŋ lə,
“Bɔ nə̀ jɛ bindzu biɛmɨ bə gwɨ́ yibɔlə,
ba ta kɨmbəmbɨª kɨnyə kɛŋ lɨ.”
Bəma bənɨ bə bitsa lə ba nə̀ fə ma diəŋ.
25 Bəkansɨ bədɔ nə̀ lɨmi mɨ fə kɨtɨ kɨ ŋ'wa lə kɨ Jisɔs lə ku. Bəkansɨ bɛmbɛ nə̀ mə Jisɔs bə jimə mə Jisɔs wu kansɨ ma Maliya kpansɨ Klɔpas bə Maliya Madalen. 26 Lə Jisɔs bo ba ŋəŋ mɛni wɨ, ma wene wu nɨŋ wu yu nə̀ laŋkɨ wa wɨ, bɔ lɨmi gwɨgwɨ, yu tə bə mɛni lə, “Kpansɨ, bô ŋəŋ, no na wana.” 27 Nɨ yu tədiə manɨ, yu tə tɨ bə wene wu nɨŋ wa lə, “Bô ŋəŋ, no na ma.” Dze nə tsa ya bɨŋ, wene wu nɨŋ wa dze mə Jisɔs, yu gəŋ kɨ me fɛŋ ji yu ku.
Jisɔs kkpə
28 Nəjiŋ wusu nɨ Jisɔs nə̀ kkɨ lə fiɔŋ fichi' ka, bə mfə lə fi ba fɔ diəŋ nɨ fi nə̀ ji bubɔndɔ Kɨŋwatɨ kɨ Nyɔ lə ntɨŋ, yu jiji ba tə lə,
“Ŋgɔ wɨntɨ ya mɨ.”
29 Nsɔ wudɔ nə̀ ji mɨ bə mbiŋ mə ŋkpatə, mɔ' yi təəə. Bənɨ bə bitsa lə ba chɛse kɨŋ'wɔ sɔ ba sese fintɨ fi isɔpª lə wɨ ba tɔ bɔ́ bifuŋ bihi wɨ. 30 Jisɔs feŋfe mbiŋ ma ba tə lə, “Kaka' ka.” Nɨ yu tədiə manɨ, yu tse bushi, kɨn'yɨntɨ kɨhɨ bu ka.
Bə́ bəmbɨ Jisɔs bíə ntɨŋ
31 Nɨ butsu bwa nə̀ ji Butsu bu bə́ nə̀ Sese lə bə́ be butsu bu fufiɛ ntɨŋ, Bəju kɨ se lə bɔ fə dzə yi naji ɨ biŋgundu bia jikə kətə bitɨ wɨ butsu bu fufiɛ (butsu bu fufiɛ bwa kɨbɛɛ nə̀ bubəŋ). Bɔ tə gəŋ ba ŋəŋ Pailɛt nende lə yu tə bə́ bunyɛ go yi bənɨ bə nə̀ ji ba bitɨ wɨ fə bɔ kəmə bə ŋkkpəyɛ ɨ bɔ tə shisəsɨ biŋgundu bibɔlə ba tɔ lɨ. 32 Bəma bənɨ bə bitsa lə tə ba ba bunyɛ go yi miɨ wu fiəfiə lə, bunyɛ tɨ yi wudɔ wa lə, wu bə́ nə̀ bandə wa bɔ bə yu. 33 Bəmanɨ, lə bɔ ba fɔ Jisɔs wɨ, bɔ ŋəŋ ji yu sə kkpə, bɔ jikə bunyɛ go yihi. 34 Miɨ wudɔ nə kɨntsu kɨ bənɨ bə bitsa lə ntɨŋ tsɔ Jisɔs bíə ntɨŋ bə kɨndzɔŋ. Lə yu tsɔ manɨ, tsa miu ŋgwembe bə ŋgɔŋ kɨ foto. 35 Miɨ wu nə̀ ŋəŋə wa biɔŋ biŋ, yu' ləŋ nsa ya nəjiŋ, nchanyɛ yihi ji yɛyi, yu kkɨ lə yu na chanyɛ ji yɛyi, fə bə bɨmiə. 36 Biɔŋ biŋ nə̀ tɨchə fə fiɔŋ fi nə̀ ji bubɔndɔ Kɨŋwatɨ kɨ Nyɔ lə ntɨŋ fɔɔ diəŋ nɨ fi nə̀ ji bubɔndɔ lə, “Bə́ ná bunchɛhɛ kɨkuŋfɔ kɨhɨ kɨmo.” 37 Fi ji tɨ dɨ wudɔ wɨ bubɔndɔ Kɨŋwatɨ kɨ Nyɔ lə ntɨŋ lə, “Bənɨ ná kɨ ŋɨntɨ miɨ wu bə́' tsɔɔ wa.”
Bə́ di Jisɔs
38 Nəjiŋ wusu Jɔsɛ wu Alimatia gəŋ ŋəŋ Pailɛt ba nende lə Pailɛt nya yu dzə, yu tɔ kɨŋgundu kɨ Jisɔs lə. Jɔsɛ no nə̀ wɛŋ wu nɨŋ wu Jisɔs, bəmanɨ yu ji kwa buŋkaŋə ndzɨ yu nə̀ lete Bəju. Pailɛt bɨŋ, yu tə gəŋ ba tɔ kɨŋgundu ka. 39 Nikɔdɛmus wu nə̀ sa ba gəŋ ŋəŋ Jisɔs butsu budɔ bbutsu nə̀ ba tɨ bə məŋ məndɔ mə ntsɔŋfu lə bə́' fə ba funchɛ bə mɛɛl ma alos, bunjitə busu ji nɨ bəkilo mbaatiɛ ntse bətɛ. 40 Bɔ bə yu shisəsɨ kɨŋgundu kɨ Jisɔs lə, kwɨdi bindzu ntɨŋ ɨji bə́' fi bə məŋ ma nɨ bə́ nə̀ ba bə́ kɨ diyi bənɨ fiə wu Bəju lə ntɨŋ. 41 Nə̀ ji kə wu bitɨ bi muntaŋ'ə wudɔ ji gwɨgwɨ fə dɨ wu bə́ nə̀ bandə wa Jisɔs kɨtɨ kɨ ŋ'wa lə wɨ. Kə wa ji dzəŋ yidɔ yifa ji sɔ, ɨji bə́ kə sa di miɨ yi ntɨŋ. 42 Bəma nɨ butsu bwa nə̀ ji Butsu bu Bəju lə bu Nsese lə bə mbe butsu bu fufiɛ ntɨŋ, dzəŋ ya ji tɨ gwɨgwɨ, bɔ tə ga Jisɔs sɔ.ª