Bə́ faŋ bənɨ bə bitsa lə bɔ gəŋ ba kwe Jisɔs
18
Lə Jisɔs kasɨ bə ntsɨsɨ, bɔ bə beŋ buhu bə nɨŋ'ə dza nə mɨ ba gəŋ llə fiɔŋ wu bə́ tsɨsə lə Kidlɔn ba fɔ nɔ nəwuŋ fə kə wu bitɨ bi muntaŋ'ə wudɔ ku, ba be sɔ. 2 Nə̀ ji Judas wu nə̀ taŋŋə wa Jisɔs kkɨ dɨ wa, ndzɨ Jisɔs bə beŋ buhu bə nɨŋ'ə nə̀ ba bɔ kɨ gɨntɨ bɔ tɛshɛ mɨ sususu. 3 Bəma, Judas gəŋ mɨ bə kɨntsu kɨ bənɨ bə bitsa lə ma bənɨ bədɔ bə nə̀ kɨki tsɔŋ yi bintɔfiɛ. Nə̀ bəchɛ bintɔfiɛ bəbəŋ ma Bəfalasi bə nə̀ faŋə bənɨ bɛŋ. Bɔ nə̀ gɨntɨ bə bimwə bə bibɨlə ma bə biɔŋ bi dzoŋ'ə. 4 Nɨ Jisɔs nə̀ kkɨ fiɔŋ fi nə̀ji lə fi tɨchə yu, yu fɔ ba bi bə bɔ lə, “Bə na noŋko yəŋ?” 5 Bɔ chi bə yu lə, “Jisɔs wu Nadzalɛt.” Jisɔs tə bə bɔ lə, “Na mɨ yu.” Nə̀ ji Judas wu nə̀ taŋŋə wa yu lɨmi bə bənɨ ba. 6 Nɨ Jisɔs tədiə bə bɔ lə, “Na mɨ yu,” bɔ tsuyɛ jiŋ ba gbɔyɛ fəkoso. 7 Yu chi biɛ bə bɔ lə, “Bə na noŋko ji yəŋ lə?” Bɔ chi lə, “Jisɔs wu Nadzalɛt.” 8 Jisɔs tə bə bɔ lə, “Nsə ntə bə bəŋ lə na mɨ yu. Jilə bə na noŋko ji mɨ, bə shə bənɨ bɛmbɛ bɔ kɨ gɨntɨ fibɔlə.” 9 Yu nə̀ tə manɨ bə mfə lə fi ba fɔ diəŋ nɨ yu nə̀ tədiə bə Nyɔ lə, “Nnə̀ ŋkə nlasə miɨ miu nə bənɨ bə wə nə̀ nya ba mɨ ntɨŋ.”10 Semon Pita nə̀ ji bə mbiəlɨ. Yu bu tsɔ yu nə kɨbalə ntɨŋ ba tsə kɨtiu kɨ nədiɨ kɨ mfia wu fo wu bəchɛ bintɔfiɛ lə. Yɨ wu mfia wa lə nə̀ ji lə Malkus. 11 Jisɔs tə bə Pita lə, “Chî mbiəlɨ wɔhɔ kɨbalə kɨsu ntɨŋ. Ŋkə mwɔhɔ bwaŋ wu ŋgə lə wu Taa nya mɨ?”
Bə́ dze Jisɔs ba gəŋ bə yu fə Anas ku
12 Fo wu bənɨ bə bitsa lə bə kɨntsu kɨ bənɨ bə bitsa lə ma bənɨ bə nə̀ kɨki tsɔŋ yi bintɔfiɛ yi Bəju bu kwe Jisɔs ba kansɨ yu bə gɨ. 13 Bɔ sa dze yu ba gəŋ bə yu fə Anas ku, ndzɨ Anas nə̀ chɛ kpansɨ Kaifas wu nə̀ ji fo wu bəchɛ bintɔfiɛ lə kɨya ka wɨ. 14 Kaifas no na wu nə̀ nya wa bitɨfiə bə Bəju lə fi na ndzeŋe lə miɨ miu kkpə bənɨ bəchi lɨ.
Pita nɨŋŋ lə yu na kkəhə Jisɔs
15 Nɨ bɔ nə̀ gɨntɨ bə Jisɔs manɨ, Semon Pita bə wɛŋ wu nɨŋ wu Jisɔs wudɔ nə̀ biəlɨ yu. Nɨ fo wu bəchɛ bintɔfiɛ lə nə̀ kkɨ wɛŋ wu nɨŋ wu Jisɔs no, yu biə Jisɔs ba gəŋ be mɨ ku wu fo wu bəchɛ bintɔfiɛ lə kɨntɨŋ kɨntɨŋ. 16 Pita ləŋ ba kətə binchi fə fiənsɨ wu mbaŋ'ə ku. Wɛŋ wu nɨŋ wu Jisɔs wu fo wu bəchɛ bintɔfiɛ lə nə̀ kkɨ wa fɔ ba chanyɛ bə wɛŋ wu kansɨ wu nə̀ kɨki fiənsɨ wu mbaŋ'ə ba dze Pita be bə yu. 17 Wɛŋ wu kansɨ wa bi bə Pita lə, “Ntɨlə wə na ji wudɔ miɨ wu nɨŋ wu miɨ no?” Pita chi lə, “Nna njimiɛhɛ.” 18 Nə̀ ji fiəfɨ ji, beŋ bə nɨŋ'ə bə bənɨ bə na kɨki tsɔŋ yi bintɔfiɛ' fə boso ba ləŋ mɨ kɨ yuku. Pita gəŋ tɛshɛ bɔ ba kɨ yuku tɨ.
Fo wu bəchɛ bintɔfiɛ lə gbɔ kɨ bishɛ biɔŋ bə Jisɔs
19 Fo wu bəchɛ bintɔfiɛ lə kɨ bishɛ biɔŋ bə Jisɔs tsukɔ beŋ buhu bə nɨŋ'ə wɨ ma tsukɔ bitɨfiɛ bihi wɨ. 20 Jisɔs chi bə yu lə, “Nnə̀ mba ŋkɨ nchanyɛ bə mbi chi ŋgbooŋ. Nnə̀ mba ŋkɨ ntɨfiə bənɨ tsɔ́ŋ yi kɨntsɨsɨ lə ntɨŋ ma mbaŋ wu tsɔŋ yi bintɔfiɛ ntɨŋ shi yi Bəju bəchi sə tɛshɛ. Ŋkə nchanyɛ fiɔŋ bunyələ. 21 Wə na bishɛ biɔŋ biŋ bə mɨ ndzɨ la? Kɨ bishɛ ji bə bənɨ bə nə̀ ba bɔ kɨ woko nɨ nnə̀ ntɨfiə. Bɔ na kkɨ fiɔŋ fi nnə̀ mba ŋkɨ ntɨfiə.” 22 Nɨ Jisɔs chanyɛ manɨ, miɨ wudɔ wu nə̀ lɨmi mɨ gwɨgwɨ nə kɨntsu kɨ bənɨ lə ntɨŋ bə nə̀ kɨki tsɔŋ yi bintɔfiɛ kə yu bə biaŋ bəŋgaŋ wɨ, ba bi bə yu lə, “Cha chi wə na chisə nchanyɛ bə fo wu bəchɛ bintɔfiɛ lə?” 23 Jisɔs chi bə yu lə, “Jilə mɨ nchanyɛ ba fɨsə lɨ, wə donchɛ fiɔŋ fi mɨ mfɨsə fia bə fi. Jilə mɨ nchanyɛ ji yɛyi, wə tsu ba kə mɨ ndzɨ la?” 24 Anas tə faŋ Jisɔs Kaifas lɨ wu nə̀ ji fo wu bəchɛ bintɔfiɛ lə. Nə̀ji Jisɔs bambi kwa bukansə.
Pita chi nɨŋŋə lə yu na kkəhə Jisɔs
25 Nɨ Semon Pita nə̀ bambi yu lɨmi, yu yuku boso wa, bənɨ bi bə yu lə, “Ntɨlə wə na ji wudɔ nə beŋ buhu bə nɨŋ'ə ba ntɨŋ?” Bəmanɨ Pita nɨŋŋ ba tə lə, “Nna njimiɛhɛ wudɔ.” 26 Wɛŋ wu nɨŋ wu fo wu bəchɛ bintɔfiɛ lə wudɔ chi biɛ bə Pita lə, “Nsə ŋkə ŋəŋkəhə bəŋ bə yu kə wu bitɨ bi muntaŋ'ə wa ntɨŋ?” Wɛŋ wu nɨŋ wa nə̀ miɨ nə kɨtsɔŋ kɨ miɨ wu Pita nə̀ kəmbə wa kɨtiu kɨhɨ ntɨŋ. 27 Pita chi nɨŋŋə. Mɨ kɨsɨkɨ, kɨyɔŋ tiŋ.
Bə́ gəŋ bə Jisɔs Pailɛt nəfiə
28 Bənɨ dze Jisɔs nə Kaifas ku kɨ gɨntɨ bə yu ntɔ wu miɨ wu Lom lə ntɨŋ wu nə̀ sakɨ nɔ. Nə̀ ji ɨ bambi fuwɔki futə ntɨŋ. Bɔ gəŋ ba jikə bekɛ fibɔlə gəŋ ntɔ wu miɨ wa lə ntɨŋ, ndzɨ nə̀ ji bɔ be lɨ, ɨ bɔ tɔ yidi ba jikə tsɔhɔ diə Kɨgbeyɛ kɨ Nchɛnəbɨŋ'ə. 29 Bəma Pailɛt fɔ ba tɨchə bɔ bi bə bɔ lə, “Fiɔŋ fi bə ŋəŋə miɨ no gbɔ bə fi na la?” 30 Bɔ chi bə yu lə, “Miɨ no tə jikə gbɔɔ fiɔŋ, kə tə jikə baha lə kə nya yu bə wə.” 31 Pailɛt chi bə bɔ lə, “Bə dzê bə sa yu nɨ kɨlaŋ kɛnɨ na tɨdi.” Bəju tə bə yu lə, “Kə na keŋkɛhɛ buŋga bu kkpɨsə miɨ.” 32 Nchanyɛ nyi ba fɔ diəŋ nɨ diɛ yi Jisɔs nə̀ chanyɛɛ yu donchɛ ŋgwe yi kkpə yi nə̀ji lə yu kkpə. 33 Pailɛt fichə ba be gəŋ ntɔ wuhu ntɨŋ, yu bəndɨ bɔ ba bə Jisɔs, yu bi bə Jisɔs lə, “Na wə ŋkuŋ wu Bəju?” 34 Jisɔs bi bə yu lə, “Wə na chanyɛ fiŋ ɨji nə kɨŋgɔmbiɛ kɔhɔ ntɨŋ maa ə tə bənɨ bədɔ bə wə tsukɔ mɨ wɨ lə?” 35 Pailɛt bi bə yu lə, “Nna nji Miɨbəju? Na bənɨ bɔhɔ bə kɨtuŋ'ə bə bəchɛ bintɔfiɛ bəbəŋ bə nya wə bə mɨ. Na la fi wə fɨsə?” 36 Jisɔs chi bə yu lə, “Buŋkuŋ bwɛŋ na jimiɛhɛ bu mbi no lə. Buŋkuŋ bwɛŋ tə na ji bu mbi no lə, bənɨ bɛmɨ bə nɨŋ'ə tə kɨ dio lə bə́ kə nyaha mɨ Bəju kaŋ. Bəmanɨ buŋkuŋ bwɛŋ na jimiɛhɛ bu mbi no lə.” 37 Pailɛt bi bə yu lə, “Kɨ ji lə wə na ji ŋkuŋ?” Jisɔs chi bə yu lə, “Na nɨ wə tədiə lə nna nji ŋkuŋ. Bə́ nə̀ bɛyɛ mɨ, mba mbi no ntɨŋ ndzɨ fiŋ lə mba nchanyɛ tsukɔ kɨyɛyi wɨ. Miɨ chi wu na biəlɨ kɨyɛyi, yu ba yu kɨ woko diɛ yɛmɨ.” 38 Pailɛt masə lə, “Kɨyɛyi ji la?” Nɨ yu biɛ manɨ, yu fɔ ba gəŋ ŋəŋ Bəju ba tə bə bɔ lə, “Ŋkə ŋəŋkəhə fiɔŋ fi yu fɨsə. 39 Bəmanɨ bə na ji bə fiə wɛnɨ wudɔ lə ə ba ji tsa yi Kɨgbeyɛ kɨ Nchɛnəbɨŋ'ə, mfoso miɨ wu tsɔŋ yi buŋfia miu. Bə na se lə mfoso ji ŋkuŋ wu Bəju?” 40 Bəju ba ye kɨtso lə, “Yɛɛ, kə na sɛhɛ miɨ no, fôso ji Balabas!” Balabas no nə̀ miɨ nə kɨntsu kɨ bənɨ lə ntɨŋ bə nə̀ dio bə Gɔmɛn wu Lom.