Jisɔs tsɨsɨ gwɨ yihi lɨ, bə bənɨ buhu lɨ
17
Lə Jisɔs chanyɛ ba kanə lɨ, yu tɔ bushi bɔ́ ba tsɨsɨ lə, “Taa, tsa' kwətsə. Dônchɛ bubəŋ bu Wana lə, fə Wana donchɛ bwɔhɔ bubəŋ tɨ. 2 Naji ɨ yu donchɛ ndzɨ wə' nya yu buŋga miɨbəwəŋ chi bɨŋ fə yu nya buwəŋ bu kəkaha bə bənɨ bəchi bə wə nə̀ nya ba bə yu. 3 Buwəŋ bu kəkaha buŋ ji fiŋ lə bɔ kɨ kkɨ wə wu na ji kwa wə Nyɔ wu kɨyɛyi, bɔ kkə̂ mɨ tɨ Jisɔs Klistu wu wə nə̀ faŋə. 4 Mɨ ndonchɛ bubəŋ bwɔhɔ sɛŋ koso nɨ nnə ŋkanə nɨŋ yi wə nə̀ nya lə nnɨŋ. 5 Bə fɛŋ Taa, chi bubəŋ bwɛŋ fə wə ku, bu nnə̀ nsa nji bə bu fə mbi tə bɛyɛ.6 Mɨ ndonchɛ wə bə bənɨ bə wə nə̀ sabiɛ nə mbi no ntɨŋ ba nya mɨ. Bənɨ bɛmbɛ nə̀ bɔhɔ, wə tə nya bɔ bə mɨ. Bɔ' wɔ diɛ yɔhɔ. 7 Fɛŋ, bɔ na kkɨ lɨ lə fiɔŋ fichi fi nna ŋkeŋkɛ fi fɔ nə wə lɨ. 8 Nna nchanyɛ mɛ ndzɨ mɨ' nnya bɔ diɛ yi wə nə̀ nya mɨ. Bɔ ləkə ba tə kkə yɛyi lə mɨ mfɔ nə fə wə ku, bɔ' bɨŋ tɨ lə nə̀ wə wu nə̀ faŋə mɨ. 9 Nna ntsɨsə mɛ, ɨji bə bɛmbɛ. Nna ntsɨsəhə ji bə bə na ji ba bə mbi no lə. Nna ntsɨsə ji bə bɛmbɛ bə wə nya bɛŋ mɨ, ndzɨ bɔ na ji bənɨ bɔhɔ. 10 Biɔŋ bichi bi nna ŋkeŋkɛ na biɔhɔ. Biɔŋ bichi bi wə na keŋkɛ ji biɛmɨ. Na nə bənɨ bɛŋ wɨ wu bubəŋ bwɛmɨ na yinshi. 11 Fɛŋ, nna mbambiɛhɛ mbi no ntɨŋ. Bəmanɨ bɔ bambi ba mbi no ntɨŋ, mfichə wa mba fə wə ku. Taa wu ntsaaŋ, gâ bɔ yɨ wɔhɔ lɨ wu wə nya mɨ fə bɔ kɨ ji miɨ lɨ miu, diəŋ nɨ kə na ji miɨ lɨ miu bɨ bə wə.
12 Tsa yi nnə̀ nji bə bɔ, nnə̀ ŋga bɔ yɨ wɔhɔ lɨ wu wə nya mɨ. Nnə̀ ŋkɨɨ bɔ, miɨ wudɔ nə bɔ ntɨŋ jikə laa, yasə kwa wa wu nə̀ ji wa lə yu la. Fiŋfi nə̀ ji lə fiɔŋ fi ji bubɔndɔ Kɨŋwatɨ kɨ Nyɔ lə ntɨŋ fɔ diəŋ. 13 Fɛŋ, mfichə wa mba wə wɨ. Nna nchanyɛ biɔŋ biŋ mbambi mbi no ntɨŋ fə kɨnlaŋ kɛŋ yisə bɔ ntɨŋ. 14 Mɨ nnya diɛ yɔhɔ bɔ kaŋ. Bənɨ bə mbi no lə ti bə bɔ ndzɨ bɔ na jimiɛhɛ bənɨ bə mbi no lə, diəŋ tɨ nɨ nna njimiɛhɛ miɨ wu mbi no. 15 Nna ntsɨsəhə mɛ lə wə foso bɔ nə mbi no ntɨŋ. Nna ntsɨsə ji lə wə kɨɨ bɔ, lə bɔ kə̂ bekɛ miɨ wubiə wa kaŋ. 16 Bɔ na jimiɛhɛ bənɨ bə mbi no lə, diəŋ tɨ nɨ nna njimiɛhɛ miɨ wu mbi no. 17 Tsâləsɨ bɔ bə kɨyɛyi. Diɛ yɔhɔ ji kɨyɛyi. 18 Nɨ wə nə̀ faŋə mɨ mbi no ntɨŋ, na diəŋ tɨ nɨ mɨ mfaŋə bɔ mbi no ntɨŋ. 19 Mɨ ntsaləsɨ gwɨ yɛmɨ ndzɨ bɔ, fə bɔ tsaləsɨ tɨ gwɨ́ yibɔlə kɨyɛyi ntɨŋ.
20 Nna ntsɨsəhə kwa ji bə bənɨ bɛmbɛ. Nna ntsɨsə tɨ bə bənɨ bəchi bə ná wɔɔ diɛ yibɔ ba ga shəŋ mɨ wɨ. 21 Nna ntsɨsə lə bɔ bəchi ná kɨ ji miɨ lɨ miu diəŋ nɨ wə wu Taa na ji mɨ ntɨŋ, nji wə ntɨŋ. Nna ntsɨsə lə bɔ ná kɨ ji tɨ bɨ ntɨŋ, fə bənɨ bə mbi lə bɨmiə lə nə̀ faŋ wə mɨ. 22 Bubəŋ bu wə nə̀ kuntə mɨ su, mɨ nnya bə bɔ lə ma bɔ kɨ ji miɨ lɨ miu, diəŋ nɨ bɨ bə wə na ji miɨ lɨ miu, 23 nna nji bɔ ntɨŋ, wə ji mɨ ntɨŋ. Bɔ kɨ ji fiɔŋ'ɨ fimo yɛyi lɨ, bəma, ɨ bənɨ bə mbi no lə kkə lə ə faŋ wə mɨ, lə wə na laŋkɨ bɔ diəŋ nɨ wə na laŋkɨ mɨ. 24 Taa, nna nse lə bənɨ bə wə nya ba mɨ ná kɨ ji tɨ bə mɨ dɨ wu nna nji wɨ, fə bɔ ŋəŋə bubəŋ bu wə nə̀ nya mɨ ndzɨ kɨnse kɔhɔ bə mɨ fə mbi no kɨ bɛyɛ. 25 Ɔɔɔ Taa wu diəŋ, bənɨ bə mbi no lə na kkəhə wə, bəmanɨ nna ŋkkɨ wə, bənɨ bɛmɨ bɛŋ' kkə lə ə faŋ wə mɨ. 26 Mɨ mfə bɔ kkə wə, njiwa ŋkɨ mbu mfəə lə bɔ kɨ kkɨ wə kɨtso, fə kɨnse kɨ wə sɛ mɨ kɨ ji bɔ ntɨŋ, ŋkɨ nji tɨ bɔ ntɨŋ.”