16
“Nna ntɨdi biɔŋ biŋ bichi bə bəŋ fə bə jɛkə gbɔɔ nə kɨmbɨŋ kɛnɨ wɨ. 2 Bə́ ná koŋko bəŋ nə tsɔ́ŋ yi kɨntsɨsɨ lə ntɨŋ. Yɛyi lɨ, tsa ba ya yi miɨ ná kɨ kkpɨsə miɨ nə bəŋ ntɨŋ, yu gɔmbiɛɛ lə yu na fɨtɨ ji nɨŋ yi ndzeŋe Nyɔ lɨ. 3 Bɔ ná kɨ fɨtɨ manɨ, ndzɨ bɔ kə kkə Taa makə mɨ. 4 Nna ntɨdi biɔŋ biŋ bichi bə bəŋ mɛ, fə tsa ya ná kwətsə lɨ, ɨ bə se lə nnə̀ nchanyɛ bə bəŋ tsukɔ bi wɨ.Nɨŋ yi Kɨn'yɨntɨ kɨ Ntsaaŋ
Nnə̀ ŋkə ntədiə biɔŋ biŋ bə bəŋ nə mbɛyɛ bɨŋ ndzɨ nnə̀ mbambi bə bəŋ. 5 Fɛŋ ntsu wa dɨ wu yu wu nə̀ faŋə mɨ lə. Bəmanɨ, miɨ nə bəŋ ntɨŋ kə biɛhɛ tɨmo bə mɨ lə, ‘Wə na gɨntɨ məŋ?’ 6 Bə na dzudi gwɨ ndzɨ mɨ nchanyɛ biɔŋ biŋ bə bəŋ. 7 Mɛfə fi na ji manɨ, ntə bəŋ yɛyi lə, na buni bwɛnɨ lɨ lə ŋgəŋ. Njikə gəŋkə, ɨ Nchitə wa jikə baha bəŋ'ɨ. Bəmanɨ, ŋgəŋ'ɨ, ntə mfaŋ yu bəŋ'ɨ. 8 Tsa yi yu ná ba, yu ná yinshi bənɨ bə mbi no lə ŋgbooŋ lə bɔ' gbɔ, ba fə ɨ bɔ ŋəŋ fiə wu diəŋ wɨ, ɨ yu fə tɨ ɨ bɔ ŋəŋ nsa yi Nyɔ wɨ. 9 Yu ná fɨtɨ ɨ bɔ ŋəŋ bubiə bubɔlə nɨ bɔ kə galə shəŋ mɨ wɨ, 10 ɨ yu fə bɔ ŋəŋ fiə wu diəŋ wɨ ndzɨ nna ŋgɨntɨ fə Taa ku, bə tsɔhɔ ŋəŋə mɨ wɨ. 11 Yu ná fɨtɨ ɨ bɔ ŋəŋ nsa yi Nyɔ wɨ ndzɨ nsa' kwe ŋkuŋ wu sakɨ mbi no.
12 Mbambi wa ŋkeŋkɛ biɔŋ kɨyɛŋ bi chanyɛ bə bəŋ, bəmanɨ naji ɨ bə kafu bi lɨ fɛŋ kə. 13 Tsa yi yu wu Kɨn'yɨntɨ kɨ kɨyɛyi lə ba, ɨ yu chitə bəŋ ɨ bə kkə kɨyɛyi kɨchi. Yu ná kɨ jikə chanyɛ nə buŋga buhu ntɨŋ. Fiɔŋ fichi fi yu wɔɔ na fi fi yu ná kɨ chanyɛ, yu tɨdi bəŋ biɔŋ bi ná kɨ ba. 14 Yu ná donchɛ bubəŋ bwɛŋ, nɨ yu ná kɨ dze ji fiɔŋ fi na ji fiɛŋ yu shafiɛ bə bəŋ. 15 Fiɔŋ fi Taa lə fichi na fiɛŋ. Na fiɔŋ fi mɨ ntədiə lə yu ná kɨ dze ji fiɔŋ fi na ji fiɛŋ, yu shafiɛ bə bəŋ.
Ndzudi yi gwɨ yi beŋ bə nɨŋ'ə bə Jisɔs lə ná tsu kɨnlaŋ
16 Tsa tsəsɨ ji ɨ bə tsu mɨ kə ŋəŋkəhə, ɨ kɨ ji tsa tsəsɨ ɨ bə chi ŋəŋə mɨ wɨ.” 17 Lə Jisɔs chanyɛ manɨ, beŋ buhu bə nɨŋ'ə bədɔ kɨ masə bə gwɨ́ yibɔlə lə, “Ɨ ji la fi yu na tɨdi bə bɨ lə, ‘Tsa tsəsɨ ji ɨ bə tsu mɨ kə ŋəŋkəhə, ɨ kɨ ji tsa tsəsɨ ɨ bə chi ŋəŋə mɨ wɨ,’ bə lə, ‘Ŋgɨntɨwa Taa ku’? 18 Yu na tɨdi lə tsa tsəsɨ ma ji lə la? Kə kə kkə fiɔŋ fi yu na chanyɛ manɨ.”
19 Jisɔs kkə lə bɔ se ba lə bɔ bi bə yu fiɔŋ fi yu chanyɛ, yu bi lə, “Bə na masə bəŋ bəŋ tsukɔ fiɔŋ fi mɨ nchanyɛ wɨ lə, ‘Tsa tsəsɨ ji ɨ bə tsu mɨ kə ŋəŋkəhə, ɨ kɨ ji tsa tsəsɨ ɨ bə chi ŋəŋə mɨ wɨ?’ 20 Ntə bəŋ yɛyi yɛyi lə, bə ná kɨ dɨ, bə dzudi gwɨ, bənɨ bə mbi no lə laŋkɨ bulaŋə. Bə ná kɨ dzudi gwɨ, bəmanɨ ɨ ndzudi yi gwɨ yɛnɨ nyi ná tsɔ ji kɨnlaŋ. 21 Kpansɨ ba yu gboso lɨ, yu kɨ woko bulo, ndzɨ tsa yihi yi bɛyɛ' kwətsə. Tsa yi yu sə bɛyɛ wɛŋ, yu tsukə gɔmbiɛ bulo bwa, ndzɨ yu woko wa ji buni lə miɨbəwəŋ' ba mbi ntɨŋ. 22 Na tɨ nɨ fi na ji bə bəŋ fɛŋ. Bə na dzudi gwɨ, bəmanɨ tsa yi nná mfichɛ ba ŋəŋ bəŋ, ɨ bə keŋkɛ ji kɨnlaŋ bəŋ shəŋ, ɨji jimə kɨnlaŋ kɨ naji ɨ miɨ ləkə nə bəŋ'ɨ kə. 23 Ná kɨ ji tsa ya wɨ, ɨ bə tsukə bishɛ biɔŋ bə mɨ. Ntə bəŋ yɛyi yɛyi lə, jilə bə' bi ma nə Taa lɨ la bə yɨ wɛŋ, ɨ yu nya bəŋ. 24 Dze nə mbɛyɛ bɨŋ ba fɔ ndɛŋ, bə kə saa bi fiɔŋ nə Taa lɨ yɨ wɛŋ'ɨ. Bə bî, bə jiba bə keŋkɛ, fə kɨnlaŋ kɛnɨ kɨ ji təəə.
25 Nna nchanyɛ bənchanyɛ bɛmbɛ ɨji kwa bəŋgaŋ ntɨŋ, bəmanɨ tsa ba ya yi ntsɔkə chanyɛ bə bəŋ bəŋgaŋ ntɨŋ. Nná ŋkɨ nchanyɛ bə bəŋ ji ŋgbooŋ tsukɔ Taa wɨ. 26 Ná kɨ ji tsa ya wɨ, ɨ bə kɨ bi fiɔŋ nə Taa lɨ bə yɨ wɛŋ. Nna ntɨdiɛhɛ bə bəŋ lə nná ŋkɨ nnende fiɔŋ nə Taa lɨ bəŋ'ɨ. 27 Taa kɨbɛɛ na laŋkɨ bəŋ, ndzɨ bə' laŋ mɨ ba bɨŋ lə mɨ mfɔ nə fə Taa ku. 28 Nnə̀ mfɔ nə fə Taa ku ba ba mbi no ntɨŋ, bə fɛŋ, ndza wa nə mbi no ntɨŋ ntsu jiŋ fə Taa ku.”
29 Lə Jisɔs chanyɛ manɨ, beŋ buhu bə nɨŋ'ə ye lə, “Ɨŋhɨŋŋ! Wə chanyɛɛ wa fɛŋ ŋgbooŋ, ɨjikə tsɔhɔ jimiə bəŋgaŋ ntɨŋ! 30 Fɛŋ kə' ŋəŋ lə wə na kkɨ biɔŋ bichi, wə jikə wokɔ lə miɨ bi fiɔŋ bə wə bubinɛ. Fiŋfi fə kə bɨŋ lə wə fɔ nə fə Nyɔ ku.” 31 Jisɔs chi bə bɔ lə, “Bə bɨŋ fɛŋ? 32 Tsa ba ya, yi' ba, yi bə jiba ɨ bə saŋfiə miu miu, ɨ miɨ kɨ gɨntɨ yu ku, nshə mɨ wumbɔŋ. Bəmanɨ nna njimiɛhɛ mɨ wumbɔŋ kə, ndzɨ Taa na ji bə mɨ. 33 Nna nchanyɛ biɔŋ biŋ bə bəŋ nɨ bə na ji mɨ ntɨŋ bə keŋkɛ budə. Bə na keŋkɛ bəŋgə mbi no ntɨŋ, bəmanɨ, bə tɛ̂se shəŋ. Mɨ' n'ya mbi no.”