Jisɔs na kɨtɨ bənɨ buhu ji chɛ́
15
“Na mɨ gbaŋ wu kɨtɨ kɨ muntaŋ'ə wu yɛyi, Taa ji chɛ kə wa. 2 Yu ba yu gbe ba foso chɛ́ yɛŋ chi yi na munchɛhɛ muntaŋ, yi na munchi ya muntaŋ, yu ba yu sɛyi yi fə yi kɨ ji ntsaaŋ yi munchi muntaŋ kɨyɛŋ. 3 Nchanyɛ yi mɨ nchanyɛ bə bəŋ' fə bə kɨ tsalə. 4 Bə kə̂tə mɨ wɨ, ŋkətə tɨ bəŋ wɨ. Chɛ naji ɨ yi muŋ kə muntaŋ nə yikaŋ fiəŋkə lə yi' kətə kɨtɨ wɨ. Na tɨ diəŋ nɨ naji ɨ bə fə fiɔŋ kə jilə bə na jimiɛhɛ mɨ wɨ. 5 Na mɨ gbaŋ wu kɨtɨ kɨ muntaŋ'ə, bə ji chɛ́ ya. Miɨ wu na ji mɨ wɨ, nji tɨ yu wɨ, na yu wu na ji nɨ chɛ yi naji ɨ yi kɨ munchi muntaŋ kɨyɛŋ, ndzɨ jilə nna nsɨŋ, ɨ miɨ fə fiɔŋ kə. 6 Miɨ wu kə kətə mɨ wɨ, na ji nɨ chɛ yi naji lə bə́ gbe ba tɔfu lɨ, yi wɨŋ. Ŋgwe yi ya chɛ́ bə́ ná banchɛ li boso ntɨŋ ɨ yi fiə. 7 Ɨ bə kətə mɨ wɨ, diɛ yɛmɨ ji bəŋ ntɨŋ, bə bi ma la fi bə na se, ɨ bə́ fə fi bəŋ'ɨ. 8 Ɨ bə na ji nɨ chɛ́ yi na munchi muntaŋ kɨyɛŋ, ɨ fiŋfi kɨ nya Taa yɨ wubəŋ, ɨ fiŋ kɨ donchɛ lə bə na ji bənɨ bɛmɨ bə nɨŋ'ə.9 Nɨ Taa na laŋkɨ mɨ na tɨ diəŋ nɨ nna nlaŋkɨ bəŋ. Bə kə̂tə kɨnse kɛŋ ntɨŋ. 10 Ɨ bə na galɨ bilaŋ biɛŋ, ɨ bə kətə kɨnse kɛŋ ntɨŋ, diəŋ nɨ mɨ ŋgalə bilaŋ bi Taa lə ba kətə kɨnse kɨhɨ ntɨŋ. 11 Nna nchanyɛ biɔŋ biŋ bə bəŋ fə kɨnlaŋ kɛŋ kɨ ji bə bəŋ, ɨ bə tə keŋkɛ kɨnlaŋ kɨ na ji təəə. 12 Kɨlaŋ kɛŋ na kɨŋ kɨ na ji lə bə kɨ laŋkɨ gwɨ́ yɛnɨ diəŋ nɨ nna nlaŋkɨ bəŋ. 13 Kɨnse kɨdɔ sɨŋ su kɨ na ko ba ya kɨŋ lə miɨ nya buwəŋ buhu ba kkpə ndzɨ nsáŋ yihi. 14 Ɨ bə na fɨtɨ fiɔŋ fi nna ntɨdi lə bə kɨ fɨtɨ, tə bə na ji nsáŋ yɛŋ. 15 Nna ntsɔhɔ tsɨsə bəŋ lə beŋ bə nɨŋ'ə, ndzɨ wɛŋ wu nɨŋ ba yu kɨ jikə kkə fiɔŋ fichi fi miɨ wuhu wubəŋ na fɨtɨ. Nna ntsɨsə bəŋ lə nsáŋ yɛmɨ ndzɨ fiɔŋ fichi fi mɨ ŋ'wɔɔ nə Taa lɨ, mɨ mfə tɨ bə kkə fi. 16 Nə̀ chiŋ bəŋ mɨ kə. Nə̀ chiŋ mɨ bəŋ, mfoso ba ga lə bə gəŋ kɨ ji nɨ chɛ́ yi na munchi muntaŋ kɨyɛŋ, ɨji muntaŋ mu ná kətə. Ɨ bə na fɨtɨ manɨ, ma la fi bə na bi nə Taa lɨ bə yɨ wɛŋ, ɨ yu nya bəŋ. 17 Kɨlaŋ kɨ nna nya bəŋ na kwa kɨŋkɨ lə bə kɨ laŋkɨ gwɨ́ yɛnɨ.
Jisɔs tə lə mbi no ná kɨ ti bə bənɨ buhu
18 Jilə mbi no na ti bə bəŋ, bə kɨ kkɨ lə yu nə̀ sa ti ji bə mɨ fə yu tə kɨ ti bə bəŋ. 19 Bə tə nə ji bənɨ bə mbi no lə, mbi no tə kɨ laŋkɨ bəŋ nɨ bənɨ buhu. Bəmanɨ, bə na jimiɛhɛ bənɨ bə mbi no lə. Mɨ nchiŋ bəŋ nə mbi no ntɨŋ. Na fiɔŋ fi mbi no na ti bə bəŋ. 20 Bə sê nchanyɛ yi nsə nchanyɛ bə bəŋ lə wɛŋ wu nɨŋ kɔhɔ ba ya miɨ wuhu wubəŋ. Jilə bɔ na sesɛ gbo mɨ nəjiŋ, tə bɔ ná kɨ sesɛ tɨ bəŋ nəjiŋ. Jilə bɔ na woko nchanyɛ yɛmɨ, tə bɔ ná kɨ woko tɨ yɛnɨ. 21 Bɔ ná kɨ fɨtɨ biɔŋ biŋ bichi bə bəŋ ndzɨ mɨ, ndzɨ bɔ na kkəhə yu wu nə̀ faŋə wa mɨ. 22 Tə nə̀ jikə jimiɛ lə nnə̀ mba ba chanyɛ bə bɔ, bɔ tə jikə keŋkɛ ŋgbɔ. Bəmanɨ, fɛŋ bɔ na sɨŋ bə fiɔŋ fi bɔ tambiɛ gwɨ su ndzɨ bubiə bubɔlə. 23 Miɨ wu na ti bə mɨ, yu na ti bə Taa tɨ. 24 Tə nə̀ jikə jimiɛ lə nnə̀ mfə ŋgwe yi nɨ́ŋ yi miɨ kə saa fə lɨ bɔ ntɨŋ, bɔ tə jikə keŋkɛ ŋgbɔ. Bəmanɨ bɔ' ŋəŋ ba kɨ chisə tiɛ bə mɨ, bɔ ti tɨ bə Taa. 25 Fiŋfi na ji mɛni bə mfə lə diɛ ya ba fɔ diəŋ nɨ fi na ji bubɔndɔ kɨŋwatɨ kɨbɔlə kɨ bilaŋ'ə ntɨŋ lə,
‘Bɔ ti bə mɨ kɨlɔlɔ.’