Jisɔs na Dzə yi na gɨntɨ Nyɔ wɨ
14
Jisɔs gəŋ fiə bə nchanyɛ bə beŋ buhu bə nɨŋ'ə lə, “Bə kə̂ galə lə shəŋ yɛnɨ kɨ funsə bəŋ. Bə gâ shəŋ Nyɔ wɨ, bə gâ tɨ shəŋ mɨ wɨ. 2 Tsɔŋ yi Taa na ji bə tsɔ́ŋ yi nəntɨŋ kɨyɛŋ. Fi tə na jimiɛhɛ manɨ, ntə njikə tədiə lə ŋgɨntɨ wa ŋgəŋ mfə dɨ bəŋ'ɨ. 3 Ŋgəŋ ba fə dɨ wa bəŋ'ɨ, ntə mfichə mba ndze bəŋ ɨ bɨ bə bəŋ kɨ ji, fə dɨ wu nna nji, ɨ bə kɨ ji tɨ mɨ. 4 Bə na kkɨ dzə yi na gɨntɨ dɨ wu nna ŋgɨntɨ.” 5 Tɔmas tə bə yu lə, “Baba, kə na kkəhə dɨ wu wə na gɨntɨ. Kə fɨtɨ nəŋ tə kkə dzə ya?” 6 Jisɔs chi lə, “Na mɨ dzə, nji kɨyɛyi, nji buwəŋ. Naji ɨ miɨ gəŋ fə Taa ku kə fiəŋkə lə yu' chɛ mɨ ntɨŋ. 7 Bə tə sə kkɨ mɨ, bə tə kkə tɨ Taa. Dze nə fɛŋ bɨŋ, bə' kkə yu ba ŋəŋ yu wɨ tɨ.”8 Felip tə bə yu lə, “Baba dônchɛ bɨ Chaa, kə ŋəŋ ba fulu lɨ.” 9 Jisɔs chi bə yu lə, “Felip, kə jiŋ kɨtso mɛ wə jikə kkə mɨ? Miɨ wu ŋəŋə mɨ wɨ, yu ŋəŋ Taa wɨ. Ə fə la lə wə kɨ tɨdi lə ndonchɛ bəŋ Taa? 10 Wə kə bɨmiə lə nna nji Taa ntɨŋ, Taa ji mɨ ntɨŋ? Nchanyɛ yi nna nchanyɛ nyi bə bəŋ nna nchanyɛhɛ bə buŋga bwɛŋ kə. Taa wu na ji mɨ ntɨŋ na yu wu na nɨntɨ nɨ́ŋ yihi. 11 Bə bɨ̂ŋ bə mɨ lə nna nji Taa ntɨŋ, Taa ji mɨ ntɨŋ. Ɨ bə kə bɨmiə mɨ ndzɨ fiɔŋ fi nna ntɨdi, ɨ bə bɨŋ ndzɨ nɨ́ŋ yi nna nɨntɨ. 12 Yɛyi lɨ ntə bəŋ lə miɨ wu galə shəŋ mɨ wɨ, yu jiwa ɨ yu kɨ nɨntɨ tɨ nɨ́ŋ yi nna nɨntɨ. Yu jiwa ɨ yu kɨ nɨntɨ nɨ́ŋ yu yakɨ tɨmo yi nna nɨntɨ, ndzɨ ŋgɨntɨ wa Taa wɨ. 13 Ma la fi bə biɛ bə yɨ wɛŋ, mfə fi, fə Chɛ Wɛŋ keŋkɛ yɨ wubəŋ ndzɨ Wɛŋ. 14 Ɨ bə bi ma la bə yɨ wɛŋ, mfə fi.
Jisɔs ka bənɨ buhu Kɨn'yɨntɨ kɨ Ntsaaŋ
15 Ɨ bə na laŋkɨ mɨ, bə kɨ galɨ bilaŋ biɛŋ. 16 Njiwa nnende Taa ɨ yu nya bəŋ wudɔ Nchitə ɨ yu kɨ ji bə bəŋ tsá chi. 17 Miɨ no na Kɨn'yɨntɨ kɨ kɨyɛyi lə. Yu na jimiɛhɛ miɨ wu naji ɨ bənɨ bə mbi no lə ləkə yu, ndzɨ bɔ na ŋɨntəhə yu wɨ, bɔ ji yu kə kkə tɨ. Bə bəŋ, bə na kkɨ yu ndzɨ yu wa bə bəŋ, yu ji bəŋ ntɨŋ.
18 Naji nshə bəŋ lə bə kɨ ji nɨ beŋ bə bəŋku lə kə. Njiwa mfichə mba ŋkɨ nji bə bəŋ. 19 Tsa tsəsɨ ji bənɨ bə mbi no lə tsukə ŋəŋkəhə mɨ wɨ. Bəmanɨ, bə ná ŋɨntɨ lɨ mɨ wɨ. Nɨ nná ŋkɨ nji wuwəŋ, bə jiba ɨ bə kɨ ji bəwəŋ tɨ. 20 Ná kɨ ji butsu bwa, ɨ bə kkə lə nna nji Taa ntɨŋ, bə ji mɨ ntɨŋ, nji bəŋ ntɨŋ. 21 Miɨ wu na kkɨ bilaŋ biɛŋ, yu galɨ bi, na wu na laŋkɨ wa mɨ. Miɨ wu na laŋkɨ mɨ, Taa jiwa ɨ yu kɨ laŋkɨ yu, nlaŋkɨ yu tɨ, ndonchɛ gwɨ yɛmɨ bə yu.” 22 Judas (ɨjikə jimiə Ɛskaliɔt) bi bə yu lə, “Baba, fi na ji ma nəŋ lə wə jiwa ɨ wə donchɛ gwɨ yɔhɔ ji bə bɨ, ɨjikə jimiə bə bənɨ bə mbi no lə?” 23 Jisɔs chi bə yu lə, “Ɨ miɨ na laŋkɨ mɨ, ɨ yu kɨ galɨ diɛ yɛmɨ, ɨ Taa kɨ laŋkɨ yu, ɨ bɨ bə Taa ba yu wɨ, kɨ ji bə yu. 24 Miɨ wu na laŋkəhə mɨ ba yu kɨ jikə galə diɛ yɛmɨ. Diɛ yi bə na woko nyi na yɛmɨ kə. Na yi Taa wu faŋə mɨ.
25 Nna nchanyɛ biɔŋ biŋ mbambi bə bəŋ. 26 Bəmanɨ, Nchitə wu na ji wa Kɨn'yɨntɨ kɨ Ntsaaŋ, wu Taa jiwa yu faŋ yɨ wɛŋ'ɨ, yu ná tɨfiə bəŋ biɔŋ bichi ba fə tɨ lə bə se biɔŋ bichi bi nnə̀ nchanyɛ bə bəŋ. 27 Mɨ ŋga budə lə bu kɨ ji bə bəŋ. Mɨ nnya budə bwɛmɨ bə bəŋ. Ŋkə nnyaha budə buŋ bə bəŋ nɨ bənɨ bə mbi no lə ba bɔ kɨ nya. Bə kə̂ galə lə shəŋ yɛnɨ kɨ funsə bəŋ, makə lə yi kɨ keŋkɛ nyiŋ. 28 Bə' wɔ nɨ mɨ ntədiə lə ŋgɨntɨ wa, ɨji njiwa ntsu mba ŋkɨ nji bə bəŋ. Jilə bə nə laŋkɨ mɨ, bə tə kɨ laŋkɨ ndzɨ nna ŋgɨntɨ ji fə Taa ku, ndzɨ Taa na ko ba ya mɨ. 29 Nna nchanyɛ fiɔŋ fiŋ bə bəŋ fɛŋ fi bambi kə fɔkɔ, fə tsa yi fi fɔɔ, ɨ bə bɨŋ bə mɨ. 30 Ntsɔhɔ chanyɛ bə bəŋ kɨtso, ndzɨ ŋkuŋ wu na sakɨ mbi no ba wa. Na jimiɛhɛ lə yu na keŋkɛ buŋga mɨ bɨŋ. 31 Bəmanɨ, nna mfɨtɨ ji nɨ Taa tədiə lə ŋkɨ mfɨtɨ fə bənɨ bə mbi no lə kkə lə nna nlaŋkɨ Taa. Bə dzâ wə kə dza nə mɛni.”