Jisɔs dzakɔ nə kkpə lɨ
28
Lə butsu bu fufiɛ chɛ, kɨ ji futə ntɨŋ butsu bu fiəfiə biənɨ ntɨŋ, Maliya Madalen bə Maliya wudɔ wa gəŋ lə bɔ jiŋgə dzəŋ. 2 Fi fɔ lə sha nə̀ nɨkə bə buŋga, ndzɨ nchinda wu Baba nə̀ shi nə bɔ́ ba bindiɛ ta wu bə́ nə̀ baŋə wa fiənsɨ wu dzəŋ ya lə su ba jiŋ wu bɨŋ. 3 Bushi bu nchinda wa lə nə̀ lakiɛ nɨ dzaŋ, bindzu bihi wosɔ boo. 4 Lə bənɨ bə nə̀ kɨki ba dzəŋ ya ŋəŋ yu wɨ, bɔ le kɨtso ba kɨ jakɨ mɛ kɨkɨkɨkɨ, bɔ gbɔyɛ fəkoso kɨ me nɨ bənɨ bəŋkkpə. 5 Nchinda wu Nyɔ wa tə bə bəkansɨ ba lə, “Bə kə̂ lekɛhɛ. Nna ŋkkɨ lə bə na noŋko ji Jisɔs wu bə́ nə bandə wa kɨtɨ kɨ ŋ'wa lə wɨ. 6 Yu na sɨŋ mɛ, yu sə dzakɔ nə kkpə lɨ nɨ yu nə̀ tədiə cha. Bə bâ ŋəŋ dɨ wu bə́ nə memɛ wa yu. 7 Bəma bə gəŋ fɔfɔ ba tə bə beŋ buhu bə nɨŋ'ə, lə yu sə dzakɔ nə kkpə lɨ, lə yu wa wu sa bəŋ fiə yu gɨntɨ Galili. Bə jiba bə gəŋ ŋəŋ yu sɔ. Bə wɔ̂, Mɨ nnachɛ bəŋ.” 8 Bəkansɨ ba bu sokiɛ ba dza nə fə dzəŋ ya ku bə nyiŋ, bəmanɨ bɔ keŋkɛ kɨnlaŋ kɨbəŋ, bɔ kɨ lətə lə bɔ gəŋ tə bə beŋ bə Jisɔs lə bə nɨŋ'ə. 9 Nɨ bɔ nə̀ gɨntɨ, bɔ bu bɨkənɨ bə Jisɔs, yu tə bə bɔ lə, “Mɨ ntsɨsɨ bəŋ.” Bɔ ba gwɨgwɨ yu wɨ ba gbɔ kukɔ go yihi ba kuntə yu. 10 Jisɔs tə bə bɔ lə, “Bə kə̂ lekɛhɛ. Bə gə̂ŋ tə bə bəŋgwɨŋ lə bɔ gəŋ Galili, bɔ jiba bɔ ŋəŋ mɨ sɔ.”Bənɨ bə nə̀ kɨki dzəŋ tə fiɔŋ fi nə̀ tɨchə
11 Lə bəkansɨ ba dza ba kɨ gɨntɨ, bənɨ bə bitsa lə bə nə̀ kɨki ba dzəŋ ya bu dza ba tsu toko gəŋ tə bə bəchɛ bintɔfiɛ bəbəŋ fiɔŋ fichi fi' tɨchə. 12 Bəchɛ bintɔfiɛ bəbəŋ ba bəndɨ bənɨ bə nə̀ sakɨ kɨtuŋ, bɔ bə bɔ jiŋ ba sese diɛ ba baŋ bifuŋ bi bənɨ bə bitsa lə ba bə kkpə kɨyɛŋ, 13 ba tə bə bɔ lə, “Bə kɨ tɨdi bə bənɨ lə, bə nə me lɨ beŋ buhu bə nɨŋ'ə ba ba yə kɨŋgundu kɨhɨ ba gəŋ bə kɨ. 14 Ɨ bə tə manɨ, miɨ wu na sakɨ wɔ lɨ ba kɨ se lə yu funsu bəŋ, ɨ kə fə yu buni, ɨ yu tsukə funsə bəŋ.” 15 Bəma bɔ dze kpə wa ba kɨ tɨdi nɨ bə́ nə̀ tədiə bə bɔ. Nchanyɛ ya tsaŋ ba kətə Bəju ntɨŋ tuŋ ndɛŋ lə bə́ nə̀ yə kɨŋgundu kɨ Jisɔs lə buyənə.
Jisɔs faŋ bənɨ buhu mbi chi ntɨŋ
16 Beŋ bə nɨŋ'ə bə Jisɔs lə bə yɔɔ ntse miu dza ba gəŋ Galili ba bəndɨ dzo yi Jisɔs nə̀ tədiə bə bɔ. 17 Lə bɔ ŋəŋ yu wɨ, bɔ kuntə yu. Bəmanɨ bədɔ kɨ masə yu. 18 Jisɔs kɨnɨ ba tə bə bɔ lə, “Taa' nya mɨ buŋga buchi bu na ji bɔ́ bə bu na ji sɛŋ koso. 19 Bəma, bə gə̂ŋ bituŋ bichi ntɨŋ, bə kɨ fɨtɨ bənɨ kɨ ji beŋ bɛmɨ bə nɨŋ'ə, bə chɛsɛ bɔ biɔ yɨ wu Baba Nyɔ lə lɨ, bə wu Wɛŋ'ə, bə wu Kɨn'yɨntɨ kɨ Ntsaaŋ'ə, 20 bə tɨfiə bɔ lə bɔ kɨ fɨtɨ fiɔŋ fichi fi mɨ ntɨfiə bəŋ. Bə wôkɔ bə wɔ, njiwa ŋkɨ nji bə bəŋ tsá chi gəŋ fɔ tsa yi mbi ná ka.”