Kɨŋwatɨ kɨ Bifənə
bi beŋ bə faŋə bə Jisɔs lə
1
Tiɔfilɔs miɨ wubəŋ, nə kɨŋwatɨ kɨ fiəfiə ntɨŋ kɨ nnə̀ mbɔndɔ bə wə, nnə̀ mbɔndu sɔ tsukɔ biɔŋ bichi bi Jisɔs nə̀ fɨtɨ wɨ bə bi yu nə̀ tɨfiəə bənɨ, dze nə yu nə̀ gbɔɔ nɨŋ yihi ba 2 gəŋ fɔ butsu bu Nyɔ nə̀ dzɛɛ yu, yu bəndɨ bɔ́. Fə Nyɔ nə̀ dzɛɛ yu, yu bəndɨ bɔ́, yu bə buŋga bu Kɨn'yɨntɨ kɨ Ntsaaŋ'ə nə̀ ji yu' nya bitɨfiə bə beŋ buhu bə faŋə bə yu nə̀ sabiɛ. 3 Tsa yi yu nə̀ dzakɔ nə kkpə lɨ, yu nə̀ donchɛ gwɨ yihi bə bɔ díɔ ntɨŋ mbaania, dzə́ ntɨŋ kɨyɛŋ bə ntseyɛ lə yu wa wuwəŋ. Yu chanyɛ bə bɔ tsukɔ buŋkuŋ bu Nyɔ lə wɨ. 4 Nɨ yu nə̀ ji bə bɔ manɨ, yu tə bə bɔ lə, “Bə kə̂ dzaha nə Jɛlosalɛm. Bə kɨ wokɔ kɨnya kɨ Taa nə̀ kaa bəŋ, kɨ bə nə̀ wɔɔ nchanyɛ tsukɔ kɨ wɨ. 5 Bə kɨ kkɨ lə Jɔŋ nə̀ chɛsɛ bənɨ biɔ, bəmanɨ díɔfɛkə ji ɨ Nyɔ chɛse bəŋ ji Kɨn'yɨntɨ kɨ Ntsaaŋ ntɨŋ.”Jisɔs bəndɨ bɔ́
6 Lə Jisɔs bə beŋ buhu bə faŋə kɨ ji tsa yidɔ wɨ, bɔ bi bə yu lə, “Baba, tsa' kwətsə yi wə jiwa wə fə ɨ bənɨ baha Bəisla kɨ chisə saa buŋkuŋ bubɔlə?”
7 Yu chi bə bɔ lə, “Tsa makə butsu bu fi jifia ɨ fi tɨchə, na Taa wu sesɛ bə buŋga buhu, na jimiɛhɛ dɨ wɛnɨ lə bə kkə. 8 Fiɔŋ fi bə naji lə bə kkə na lə Kɨn'yɨntɨ kɨ Ntsaaŋ ná ba ba yi bəŋ wɨ, ɨ bə keŋkɛ buŋga ba gbɔ kɨ chanyɛ kɛmɨ Jɛlosalɛm bə bituŋ bichi Judɛya ntɨŋ bə Samaliya, gəŋ fɔ bo yi mbi lə ntɨŋ chi.” 9 Kwa nɨ yu chanyɛ manɨ, Nyɔ bu dze yu, yu kɨ bɨndɨ bɔ́, bɔ ŋɨntɨ nɨ yu na bɨndɨ, yu bəndɨ, kɨku kusə yu, yu layɛ nə bɔ yəsɨ.
10 Lə bɔ dɔŋ yəsɨ kɨ ŋɨntɨ nɨ yu na bɨndɨ, bənɨnsə bədɔ bəfɛ lafu, ɨji bɔ' dɔŋ bindzu biwo ba ləŋ fə bɔ ku. 11 Bənɨ ba bi bə bɔ lə, “Bənɨnsə bə Galili, bə na lɨmi bə jiŋgə la bɔ́? Jisɔs wu Nyɔ dzɛɛ no nə bəŋ ntɨŋ yu bəndɨ bɔ́, yu ná tsu tɨ diəŋ nɨ bə' ŋəŋə cha yu bɨndɨ.”
Bə́ sa Matia lə yu dzê dɨ wu Judas lə
12 Beŋ bə faŋə bə Jisɔs lə dza nə Dzo yi Bitɨ bi Ɔlif lə bɨŋ kɨ tsu Jɛlosalɛm, dzə ya nə̀ ji nɨ kɨdiadia kɨ mai ləª bə ŋgəŋ fɔ sɔ. 13 Lə bɔ be sɔ, bɔ bəndɨ ba gəŋ tsɔŋ yi nəbɔ́ ntɨŋ, dɨ wu bɔ nə̀ ba bɔ kɨ gɨntɨ bɔ shɨ. Bənɨ bɛŋ nə̀ Pita, Jɔŋ, Jɛm bə Andulu, Felip bə Tɔmas, Batɔlɔmiu bə Matiɔ, Jɛm wɛŋ wu Alfiyus, Semon miɨ nə kɨntsu kɨ Bədzɛlɔtª lə ntɨŋ bə Judas wɛŋ wu Jɛm. 14 Bənɨ bɛŋ bəchi bə Bəkansɨ bədɔ ma Maliya mə Jisɔs bə bəjimə Jisɔs kɨ tɛshɛ fiɔŋ'ɨ fimo bɔ tsɨsə tsá chi.
15 Lə kɨ ji díɔ ya ntɨŋ, bənɨ bə kɨmbɨŋ'ə tɛshɛ. Bɔ nə̀ ji mɨ nɨ bənɨ gbɨ bə mbaafiɛ (120). Pita dza wə ba chanyɛ bə bɔ lə, 16 “Bəŋgwɨŋ, fiɔŋ fi Kɨŋwatɨ kɨ Nyɔ lə nə̀ chanyɛ nə̀ji lə fi fɔ diəŋ. Na fiɔŋ fi Kɨn'yɨntɨ kɨ Ntsaaŋ nə̀ fəə Dɛbi chanyɛ nə ndɛŋkəlɨ kɨ Judas lə wu nə̀ saa fiə fə bə́ tə kwɛɛ Jisɔs. 17 Bə na kkɨ lə Judas no nə̀ ji miɨ nə kɨntsu kaha ntɨŋ, yu keŋkɛ yihi nɨŋ bɨ ntɨŋ.”
18 (Fə Pita nə̀ chanyɛɛ manɨ nə̀ ji Judas' dze kpə wu bə́ nə̀ nya yu ka wu fiɔŋ fi sɔkə lə fi yu nə̀ fəə fia, ba taŋ dɨ su. Dɨ wuŋ ji dɨ wu yu nə̀ gbɔɔ butsekiɛ, tɔ wuhu busə, binəshəŋ bichi fɔ. 19 Bənɨ bə Jɛlosalɛm bəchi wɔ ba kɨ tsɨsə dɨ wa díɛ yibɔlə ntɨŋ lə Akɛldama, ma ji lə, “Dɨ wu Ŋgwembe lə.”)
20 Pita chi tədiə lə, “Dɛbi nə̀ bɔndu kɨŋwatɨ kɨ Kɨŋkuntə lə ntɨŋ lə,
‘Bə́ shə̂ ku wuhu, wu tsu bichə,
miɨ kə̂ tsɔhɔ mɛɛ mɨ.’
Yu nə̀ bɔndu tɨ lə,
‘Wudɔ miɨ naji lə yu dzê shi yihi yi nɨŋ.’
21-22 Bəma, miɨ wudɔ naji lə yu yinə bɨ ntɨŋ, kə kɨ tɨfiə lə Baba Jisɔs nə̀ dzakɔ nə kkpə lɨ. Wa miɨ naji lə yu kɨ ji miɨ wu nə̀ gəndəə bə bɨ tsá chi yi Jisɔs nə̀ gəndəə bə bɨ, dze nə tsa yi Jɔŋ nə̀ chɛsɛɛ bənɨ biɔ, gəŋ fɔ butsu bu Nyɔ nə̀ dzɛɛ Jisɔs nə bɨ ntɨŋ, yu bəndɨ bɔ́.”
23 Lə yu chanyɛ manɨ, bɔ foso bənɨ bəfɛ. Miuŋkpaŋ nə̀ Jɔsɛ wu bə́ nə̀ tsɨsə lə Basabas, yɨ wuhu wudɔ ji tɨ lə Jɔstus, wudɔ miɨ ji Matia. 24 Nɨ bɔ sabiɛ manɨ, bɔ tsɨsɨ lə, “Baba, wə na kkɨ shəŋ yi miɨ chi lə. Bəma, dônchɛ bɨ miɨ wu wə' sabiɛ nə bənɨ bɛŋ bəfɛ ntɨŋ, 25 lə yu kɨ ji wɛŋ wu faŋə wu Jisɔs wu jiwa yu dze shi yi Judas yi nɨŋ, yi yu nə̀ shə ba gəŋ dɨ wuhu wɨ.” 26 Lə bɔ tsɨsə manɨ, bɔ bɔndu yɨ yibɔlə ba fiəŋ'ɨ, wu Matia lə fɔ ba gbɔ lɨ. Bɔ tə yinə yu kɨntsu kɨ beŋ bə faŋə bə Jisɔs lə bə yɔɔ ntse miu ntɨŋ.