Kɨn'yɨntɨ kɨ Ntsaaŋ ba
2
Lə butsu bu Kɨgbeyɛ kɨdɔ lə kɨ bə́ nə̀ tsɨsə lə Pɛntikɔs kɨ baa kwətsə, bənɨ bəchi bə nə̀ galə shəŋ Jisɔs wɨ tɛshɛ dɨ mo. 2 Bɔ ji ji ba wɔ fiɔŋ fidɔ kunə fi shichi nə bɔ́ nɨ tənchə. Lə fi shi, fi be ba yi tsɔŋ yi bɔ nə̀ ji ya ntɨŋ chi. 3 Lə bɔ bo, bɔ ŋəŋ fiɔŋ fidɔ wɨ fi ji nɨ lɨmɨ yi boso lə, fi tsaŋ ba shi bɔ bɨŋ miu miu. 4 Kɨn'yɨntɨ kɨ Ntsaaŋ bu yi bɔ bəchi wɨ ba fə bɔ kɨ chanyɛ díɛ ntɨŋ chichi chichi. 5 Tsa ya wɨ nə̀ ji Bəju bə nə̀ dzɛɛ tsa ba ga shəŋ Nyɔ wɨ ji Jɛlosalɛm, ɨji bɔ' fɔ nə bituŋ bi mbi ntɨŋ bichi. 6 Nɨ bɔ nə̀ wɔɔ manɨ, bɔ tɛshɛ kɨyɛŋ ba ba dɨ wu bənɨ bə nə̀ galə ba shəŋ Jisɔs wɨ nə̀ ji. Bənɨ bə nə̀ galə ba shəŋ Jisɔs wɨ kɨ chanyɛ, miɨ chi woko díɛ yihi ntɨŋ. Fi funsə bənɨ bə nə̀ woko ba. 7 Kɨgəsə wɨŋ bɔ, bɔ kɨ masə, bɔ tɨdi lə, “Bənɨ bə na chanyɛ bɛŋ bəchi na bənɨ bə Galili! 8 Fi gəndə nəŋ fə miɨ chi na woko bɔ chanyɛ díɛ yihi yi ku lə ntɨŋ? 9 Bɨ bədɔ fɔ nə Patia, bədɔ nə Mɛdia, bədɔ nə Ɛlam, bədɔ nə Mɛsɔpɔtɛmia, bədɔ nə Judɛya, bədɔ nə Kapadɔsha, bədɔ nə Pɔntus, bədɔ nə Ɛsha. 10 Bɨ bədɔ fɔ nə Flija bə Paŋfilia, bədɔ nə Ijip bə bidia bi Libia, bi na ji gwɨgwɨ fə kɨtuŋ kɨ Silin ku. Bɨ bədɔ fɔ nə Lom, ɨji Bəju bə bənɨ bə' fichə ba tsu bənɨ bə kɨmbɨŋ kɨ Bəju lə. 11 Bɨ bədɔ fɔ nə Klɛt bə Alɛbia. Kə woko díɛ yaha yi ku lə ntɨŋ chichi chichi nɨ bənɨ bɛŋ na chanyɛ biɔŋ bintaŋ bi Nyɔ fəə.” 12 Kɨgəsə wɨŋ bɔ, bɔ kɨ masə bɔ bɔ lə fa fiŋ fiɔŋ na donchɛ lə la lɛɛ. 13 Bədɔ bənɨ kɨ ŋgo bɔ, bɔ tɨdi lə, “Bənɨ bɛŋ' chiŋ.”Pita chanyɛ bə bənɨ
14 Bəma, Pita bə beŋ bə faŋə bə Jisɔs lə bə yɔɔ ntse miu bədɔ ba ləŋ mɨ. Pita dze kɨ chanyɛ bə kɨntsu kɨ bənɨ lə bə diɛ bɔ́ lə, “Bəju bɛŋŋ bə bənɨ bəchi bə na ji Jɛlosalɛm, nna nse lə bə kkə̂ fiɔŋ fiŋ. Bə nyâ bitiu biɛnɨ buni ba wɔ fiɔŋ fi nchanyɛ bə bəŋ. 15 Bənɨ bɛŋ kə chiŋkɛhɛ nɨ bə na gɔmbiɛ cha. Fɛŋ na bambi kwa tsá fumbɔɔ fuwɔki. 16 Fiɔŋ fi na tɨchə fiŋ fɛŋ na fi Jwɛl miɨ wu shɔŋ yi Nyɔ nə̀ chanyɛ lə,
17 ‘Nyɔ na tɨdi lə, ná kɨ ji díɔ yi fəŋgbɨŋ,
ɨ yu yente Kɨn'yɨntɨ kɨhɨ bənɨ bəchi wɨ.
Bəma, ɨ beŋ bɛnɨ bə nɨnsə ma bə kansɨ
kɨ woko biɔŋ bi yu na chanyɛ, bɔ tɨdi bə bənɨ,
ɨ məndəŋfɨ kɨ kwete beŋ butsɔ bɛnɨ,
ɨ məndəŋfɨ kɨ kwete bəntaŋ bɛnɨ.
18 Ná kɨ ji díɔ ya ntɨŋ,
ɨ yu yente Kɨn'yɨntɨ kɨhɨ bənɨ buhu bə nɨŋ'ə wɨ bəchi,
bənɨnsə bə bəkansɨ,
ɨ bɔ kɨ woko biɔŋ bi yu na chanyɛ, bɔ tɨdi bə bənɨ.
19 Yu ná kɨ fɨtɨ biɔŋ bi kɨgəsə kɨ wɨŋə lə,
ɨ yu fə tɨ biɔŋ bi na donchɛ buŋga buhu sha nyi bɨŋ.
Ŋgwembe bə boso ma məndimbi məmbiə ná kɨ ji.
20 Diɔ ná jimə lɨ,
ɨ fiəə kɨ yɨtɨ nɨ ŋgwembe,
ɨ butsu bubəŋ bu Baba lə bu biɔŋ bintaŋ'ə tə ba.
21 Bəma, ɨ ma yəŋ wu na bɨndɨ yɨ wu Baba lə, fɔfo.’”
22 Pita chi tədiə lə, “Bənɨ bə Isla, bə wôkɔ buni bə wɔ̂ fiɔŋ fi nna nchanyɛ. Jisɔs wu Nadzalɛt nə̀ miɨ wu Nyɔ nə̀ dzɛɛ tsa ba donchɛ bə bəŋ lə na yu wu faŋə yu, nɨ yu nə̀ fəə Jisɔs kɨ fɨtɨ biɔŋ bi na donchɛ buŋga bu Nyɔ lə, bə biɔŋ bi kɨgəsə kɨ wɨŋə lə, ma biɔŋ bintaŋ bəŋ ntɨŋ. Bə na kkɨ biɔŋ biŋ buni. 23 Jisɔs no na miɨ wu bə́ nə̀ nya wa bə bəŋ, ɨji Nyɔ wu nə̀ sesɛ ga lɨ, fi ba tɨchə yu kkɨ. Bə nə̀ kkpɨsɨ yu nɨ bə nə̀ nya yu bənɨ bəbiə kaŋ, bɔ bandɨ yu kɨtɨ kɨ ŋ'wa lə wɨ. 24 Bəmanɨ, Nyɔ dzakɔ yu nə kkpə lɨ, yu fɔ nə kkpə kaŋ ndzɨ nə̀ ji ɨ kkpə kafu bə ŋkətə yi chiŋfi yu kə. 25 Dɛbi nə̀ chanyɛ tsukɔ Jisɔs no wɨ ba tə lə,
‘Nna ŋŋɨntɨ Baba wɨ, kə ji bɨ bə yu tsá chi
kɨbandə kɛŋ kɨ nədiɨ wɨ, fə fiɔŋ jɛkə nɨkə mɨ.
26 Bəma, shəŋ yɛŋ na woko buni,
nchanyɛ bə kɨnlaŋ.
Nna nji miɨ wu njiwa ŋkpə,
bəmanɨ mbobi kwa fiə,
27 ndzɨ wə wu Nyɔ, wə shɨkəhə kɨn'yɨntɨ kɛmɨ mbi wu bəŋkkpə ntɨŋ.
Wə shɨkəhə Wana wu nɨŋ wu Ntsaaŋ lə yu fe findi ntɨŋ.
28 Wə donchɛ mɨ dzə yi buwəŋ.
Njiwa ŋkɨ nlaŋkɨ nɨ nna ŋkɨ nji wə nəfiə.’”
29 Pita chi tədiə lə, “Bəŋgwɨŋ, naji nchanyɛ bə bəŋ masə sɨŋ lə Ŋkuŋ Dɛbi chɛ taa waha nə̀ kkpə, bə́ di yu, dzəŋ yihi ya mɛ ba fɔ ndɛŋ. 30 Yu nə̀ ji miɨ wu shɔŋ yi Nyɔ, yu kkɨ bikaŋə bi Nyɔ nə̀ kaa yu ba chɛŋ lə yu ná galɨ wɛŋ nə tsɔŋ yihi ntɨŋ kabala bɨŋ. 31 Yu kəmə bə ŋŋəŋ fiɔŋ fi Nyɔ nə̀ji lə yu fə, ba tə tə lə Nchitə wu Nyɔ nə̀ kaa wa jiwa yu dzakɔ nə kkpə lɨ. Na fiɔŋ fi yu nə̀ tədiə lə,
‘Yu nə̀ kə kətə mbi wu bəŋkkpə ntɨŋ,
gwɨ yihi nə̀ kə fɛɛ.’
32 Jisɔs no, Nyɔ nə̀ dzakɔ yu nə kkpə lɨ, bɨ beŋ buhu bə nɨŋ'ə bəchi, kə nə̀ ŋəŋ yu wɨ. 33 Nyɔ tɔ yu bɔ́, yu jiŋ Nyɔ nədiɨ ba nya yu Kɨn'yɨntɨ kɨ Ntsaaŋ nɨ yu nə̀ kaa. Fiɔŋ fi bə na ŋɨntɨ bə woko fɛŋ na Kɨn'yɨntɨ kɨsu kɨ Jisɔs nya bɨ. 34 Na Dɛbi wu nə̀ bəndə bɔ́ kə. Dɛbi kɨbɛɛ nə̀ tə yu wu yu lə,
‘Baba Nyɔ nə̀ tə bə Baba wɛŋŋ lə,
“Jîŋ mɨ nədiɨ,
35 gəŋ fɔ tsa yi ŋkɨnshɛ bənɨ bɔhɔ bə nchɛnɛ lə wə nəfiə,
ɨ wə tɨŋ go yɔhɔ bɔ bɨŋ nɨ kɨtɨ kɔhɔ kɨ go lə.”’
36 Bəma, bənɨ bəchi Bəisla naji lə bɔ kkə buni lə Jisɔs wu bə́ nə̀ bandə no kɨtɨ kɨ ŋ'wa lə wɨ na yu wu Nyɔ galə lə yu kɨ ji Baba, yu ji tɨ Nchitə wu yu nə̀ kaa.” 37 Lə bənɨ ba wɔ manɨ, nchanyɛ ya kwe bɔ. Bɔ bi bə Pita bə beŋ bə faŋə bə Jisɔs lə bədɔ ba lə, “Bəŋgwɨŋ, kə jiba kə fə nəŋ fɛŋ?” 38 Pita chi bə bɔ lə, “Miɨ chi fîchɛ shəŋ yihi, bə́ chɛse yu biɔ yɨ wu Jisɔs Klistu lə lɨ, fə Nyɔ gufiə məmbiə muhu ba nya yu kɨnya kɨhɨ əji Kɨn'yɨntɨ kɨ Ntsaaŋ. 39 Bikaŋə biŋ na ji bəŋ'ɨ bə beŋ bɛnɨ lɨ, bi ji tɨ bənɨ bəchi lɨ bə na ji dzəbudə, bə bənɨ bəchi bə Baba Nyɔ waha na bəndiə bɔ, bɔ baa fə yu ku.” 40 Pita chi chanyɛ biɔŋ kɨyɛŋ, yu nya bɔ bitɨfiə yu nende lə bɔ chitə gwɨ́ yibɔlə nə ŋgə wu naji lə yu ba ŋkɨkɨ wu bənɨ bəbiə no bɨŋ. 41 Lə bənɨ wɔ nchanyɛ yi Pita nyi, kɨyɛŋ bɨŋ, bə́ chɛse bɔ biɔ. Butsu bwa bənɨ yinə ntɛshɛ yi bənɨ bə kɨmbɨŋ'ə ntɨŋ nɨ bəntsuku bətɛ (3,000). 42 Bɔ nya gwɨ́ yibɔlə kɨ woko ji biɔŋ bi beŋ bə faŋə bə Jisɔs lə nə̀ tɨfiə. Bɔ bə bɔ kɨ ji kɨntsu lɨ, bɔ gbədiɛnɨ blɛ, bɔ tsɨsə tɨ kɨntsu lɨ.
Kɨjimiɛ kɨ ntɛshɛ yi bənɨ bə kɨmbɨŋ'ə
43 Beŋ bə faŋə bə Jisɔs lə kɨ fɨtɨ biɔŋ bi kɨgəsə kɨ wɨŋə lə bə biɔŋ kɨyɛŋ bi na donchɛ buŋga bu Nyɔ lə, bənɨ ŋɨntɨ, fi yakɨ bənɨ ba. 44 Ntɛshɛ yi bənɨ bə kɨmbɨŋ'ə bəchi kɨ ji fiɔŋ'ɨ fimo, fiɔŋ fibɔlə ji fimo. 45 Bɔ gəŋ bɔ taŋŋə bidɨ bibɔlə bə biɔŋ bibɔlə ba jɛ kpə wa bə gwɨ́ yibɔlə nɨ ŋgə wu miɨ na ji. 46 Bɔ gəŋ bɔ kɨ tɛshɛ mbaŋ wu tsɔŋ yi bintɔfiɛ ntɨŋ díɔ chi, bɔ diɨ kɨntsu lɨ tsɔ́ŋ yibɔlə ntɨŋ bə kɨnlaŋ, bɔ jikə yəkəhə yəsɨ bə biɔŋ bibɔlə, 47 bɔ kuntə Nyɔ, bənɨ bəchi laŋkɨ bɔ. Baba kɨ fɨtɨ bənɨ foto fo díɔ chi, yu yinə bənɨ ntɛshɛ yibɔ ntɨŋ.