Pita bɔ bə Jɔŋ wəmiəsɨ kɨŋkələ
3
Lə kɨ ji butsu budɔ, Pita bɔ bə Jɔŋ dza kɨ bɨndɨ bɔ gɨntɨ fə tsɔŋ yi bintɔfiɛ ku tsá tiɛ bɨŋ bbushə, ɨji nə̀ tsa yi kɨntsɨsɨ. 2 Tsa ya bɨŋ tɨmɛ, bənɨ tɔ miɨ wudɔ ba ba bə yu, bɔ ga yu fə fiənsɨ wu mbaŋ'ə ku bə́ tsɨsə wu lə Buni, wu nə̀ beke wu gɨntɨ fə tsɔŋ yi bintɔfiɛ ku. Bə́ nə̀ bɛyɛ miɨ wa yu ji kɨŋkələ, bə́ nə̀ ba bə́ kɨ toto yu díɔ chi bə́ galɨ yu mɨ, yu nende kpə nə bənɨ lɨ bə nə̀ chɛti bɔ beke tsɔŋ yi bintɔfiɛ ntɨŋ. 3 Lə yu ŋəŋ Pita bɔ bə Jɔŋ chɛti lə bɔ be, yu kɨ nende kpə nə bɔ lɨ. 4 Bɔ dɔŋ yəsɨ yu wɨ. Pita tə bə yu lə, “Bô bɨ!” 5 Yu bo bɔ bə kɨŋgɔmbiɛ lə bɔ jiba bɔ nya yu fiɔŋ. 6 Pita tə bə yu lə, “Nna nsɨŋ bə kpə, bəmanɨ njiwa nnya wə fiɔŋ fi nna ŋkeŋkɛ. Nna ntɨdi bə wə yɨ wu Jisɔs Klistu wu Nadzalɛt lə lɨ, dzâ wə, kɨ gəndə!” 7 Lə yu tə manɨ, yu chiŋfi miɨ wa kɨbandə kɨhɨ kɨ nədiɨ wɨ ba dzasɨ yu wə. Mɨ kɨsɨkɨ, go yi miɨ wa lə bə muŋkɔkɔ muhu bu tɛ gwɨ. 8 Yu tə bɔ́ ləŋ'ɨ ba gbɔ kɨ gəndə. Bɔ bə yu gəŋ ba be mbaŋ wu tsɔŋ yi bintɔfiɛ ntɨŋ, yu kɨ gəndə mɨ yu tɨki, yu kuntəə Nyɔ. 9 Lə bənɨ bəchi ŋəŋ nɨ yu na gəndə yu kuntə Nyɔ, 10 bɔ kkə lə na miɨ wu nə̀ shɨ wa yu nende biɔŋ fə fiənsɨ wu mbaŋ'ə ku wu bə́ nə̀ tsɨsə wa lə Buni, wu na beke wu gɨntɨ fə tsɔŋ yi bintɔfiɛ ku. Bufɨ bubɔlə la, bɔ kɨ keŋkɛ kɨgəsə kɨ wɨŋə bə fiɔŋ fi tɨchə yu.Pita chanyɛ bə bənɨ fə tsɔŋ yi bintɔfiɛ ku
11 Miɨ wa bu shiŋ Pita bɔ bə Jɔŋ wɨ. Bənɨ ŋəŋ kɨgəsə wɨŋ bɔ, bɔ kɨ lətə bɔ gɨntɨ fə bə Pita bɔ bə Jɔŋ ku dɨ wudɔ wɨ wu bə́ nə̀ tsɨsə lə kɨfufiə kɨ Sɔlɔmon lə. 12 Lə Pita ŋəŋ nɨ bənɨ tɛshɛ ba lɨ, yu chanyɛ bə bɔ lə, “Bənɨ bə Isla, kɨgəsə na wɨntɨ bəŋ tsukɔ fiɔŋ fiŋ wɨ, bə jiŋgəə bɨ mɛ ndzɨ la? Bə na gɔmbiɛ yənɨ lə ə fə bɨ bə buŋga bwaha fə miɨ no kɨ gəndə? Maa bə na gɔmbiɛ lə ə fə fiə waha wu ntsaaŋ lə? Na manɨ kə. 13 Fi na ji lə Nyɔ wu Ablaham, Adze bə Jakɔ, wu na ji Nyɔ wu bəchɛ bətaa baha bəchi nə̀ bəndɨsɨ Jisɔs miɨ wuhu wu nɨŋ ba ga fə yu ku. Jisɔs no na wu bə nə̀ nɨŋŋə wa ba dze nya bə bənɨ bə nsa lə, Pailɛt kɨ se lə yu tɔkaŋ nə yu wɨ, bə nɨŋŋ. 14 Jisɔs nə̀ ji miɨ wu ntsaaŋ, yu ji diəŋ, bə nɨŋŋ yu ba tə lə bə́ foso bə́ nya bəŋ ji miɨ wu nə̀ kkpɨshɛ bənɨ. 15 Bə fə manɨ ba kkpɨsɨ miɨ wu na nya bənɨ buwəŋ, bəmanɨ, Nyɔ dzakɔ yu nə kkpə lɨ, kə nə̀ ŋəŋ yu wɨ ba tə kɨ chanyɛ kɨhɨ. 16 Na yɨ wu Jisɔs wa lə wu fəə lə kɨŋkələ kɨ bə na ŋɨntɨ kɨŋ, bə kkɨ kɨ, lə kɨ kɨ gəndə. Fi tɨchə manɨ ndzɨ kə' ga shəŋ Jisɔs wɨ, shəŋ yi kə galə yu wɨ fə miɨ no kɨ ji gwɨ buntaŋ mɛ nɨ bə ŋəŋə chiŋ.
17 Fɛŋ bəŋgwɨŋ, nna ŋkkɨ lə fiɔŋ fi bəŋ bə fó yi kɨtuŋ'ə nə̀ fəə bə Jisɔs, bə nə̀ fɨtɨ ŋkkə sɨŋ. 18 Fi nə̀ tɨchə nyi dzə ntɨŋ bə mfə lə fi ba fɔ diəŋ nɨ Nyɔ nə̀ fəə bənɨ buhu bə shɔŋ'ə chanyɛ nə ndɛŋkəlɨ lə Nchitə wuhu wu yu nə̀ kaa wa jiwa yu wɔ ŋgə. 19 Bəma, bə fîchə shəŋ yɛnɨ ba tsu Nyɔ wɨ, fə yu gufiɛ məmbiə mɛnɨ 20 ba dɨsɨ shəŋ yɛnɨ ba faŋ Jisɔs Nchitə wu yu nə̀ sabiɛ bəŋ'ɨ. 21 Jisɔs no naji lə yu kətə bɔ́ gəŋ fɔ tsa yi Nyɔ ná lɨmə biɔŋ bichi lə bi tsu bifa, nɨ yu nə̀ fəə bənɨ buhu bə shɔŋ'ə bə ntsaaŋ chanyɛ nə ndɛŋkəlɨ. 22 Mose nə̀ tə lə,
‘Baba Nyɔ jiwa yu foso miɨ wuhu wu shɔŋ wudɔ
nə bəwəma ntɨŋ chi mɨ,
ba faŋ bə bəŋ nɨ yu nə̀ faŋə mɨ,
bə naji lə bə kɨ woko fiɔŋ fi yu jiwa yu kɨ tɨdi bəŋ.
23 Miɨ wu ná jɛkə kɨ woko bə miɨ wu shɔŋ wa,
bə́ ná jiba bə́ foso yu nə kɨntsu kɨ bənɨ bə Nyɔ lə ntɨŋ ba jishi yu kamo lɨ.’
24 Na tɨ diəŋ nɨ bənɨ bə shɔŋ yi Nyɔ lə bəchi dze nə Samwɛl bɨŋ ma bə nə̀ ba yu nəjiŋ nə̀ chanyɛ tsukɔ biɔŋ bi na tɨchə díɔ yiŋ ntɨŋ. 25 Biɔŋ bichi bi Nyɔ nə̀ kaa bifuŋ bi bənɨ buhu bə shɔŋ'ə bɛmbɛ wɨ na biɛnɨ, nchínə yi Nyɔ nə̀ diə bə bəchɛ bəchaa bɛnɨ na ji tɨ bə bəŋ. Ə ji nɨ Nyɔ nə̀ chanyɛ bə Ablaham lə,
‘Njiwa nli budə bənɨ bəchi wɨ bə na ji mbi ntɨŋ,
bu ba nə wɛŋ wu wə tsɔŋ ntɨŋ.’
26 Nyɔ tə sa miɨ wuhu wu nɨŋ ba sa faŋ yu ji bəŋ'ɨ lə yu ba nya bəŋ budə, yu fə̂ bə shə̂ dzə́ yɛnɨ yibiə.”