Pita bɔ bə Jɔŋ tambi gwɨ́ yibɔlə
4
Kwa nɨ Pita bɔ bə Jɔŋ nə̀ bambi bɔ chanyɛ bə bənɨ manɨ, bəchɛ bintɔfiɛ bədɔ ma bə fo wu bənɨ bə bitsa lə bə nə̀ kɨki tsɔŋ yi bintɔfiɛ, ma Bəsadusi bədɔ lafu mɨ. 2 Shəŋ nə̀ lo bɔ ndzɨ Pita bɔ bə Jɔŋ nə̀ tɨfiəə bənɨ, bɔ tɨdi lə Jisɔs nə̀ dzakɔ nə kkpə lɨ, lə bəŋkkpə ná dzakɔ lɨ tɨ nə kkpə lɨ. 3 Bənɨ ba kwe Pita bɔ bə Jɔŋ fudiɔ ba gəŋ fasɨ lɨ ba kɨ wokɔ lə butsu wɔ bɔ tə jiŋgə nsa ya ntɨŋ. 4 Bəmanɨ, bənɨ kɨyɛŋ bə nə̀ wɔɔ bitɨfiɛ bi Pita bɔ bə Jɔŋ'ə nə̀ bɨŋ, kɨntsu kɨbɔlə yinə, bənɨnsə kɨ ji nɨ bəntsuku bətɨŋ (5,000).5 Lə butsu wɔ, fó yi Bəju lə bə bənɨ bə sakɨ kɨtuŋ ma bənɨ bə nə̀ tɨfiə bilaŋ bi Nyɔ lə tɛshɛ dɨ mo Jɛlosalɛm. 6 Anas fo wu bəchɛ bintɔfiɛ lə bə Kaifas bə Jɔŋ bə Alɛdzanda ma bə bənɨ bədɔ bə nə̀ ji tɨ kɨtsɔŋ kɨ fo wu bəchɛ bintɔfiɛ lə ntɨŋ ji mɨ. 7 Bɔ ga Pita bɔ bə Jɔŋ bɔ nəfiə ba bi bə bɔ lə, “Bə nə dze buŋga nə məŋ tə wəmiəsɨ miɨ no? Bə nə wəmiəsɨ yu bə yɨ wu yəŋ'ə?” 8 Pita wu nə̀ ji təəə bə Kɨn'yɨntɨ kɨ Ntsaaŋ chi bə bɔ lə, “Fó yi Bəju lə bə bənɨ bə sakɨ kɨtuŋ, 9 kə na lɨmi mɛni nsa ntɨŋ ndɛŋ ndzɨ nɨŋ yi ndzeŋe yi kə nə fəə bə kɨŋkələ kɨ kɨ gəndə. Nɨ bə na se lə bə kkə nɨ fi nə gəndə, 10 bəŋ bə bənɨ bəchi Bəisla kɨ kkɨ lə miɨ no na lɨmi bəŋ yəsɨ fɛŋ yu ji gwɨ buntaŋ mɛ, ɨji ndzɨ yɨ wu Jisɔs Klistu wu Nadzalɛt lə. Jisɔs no na wu bə nə̀ dzɛɛ wa ba bandɨ kɨtɨ kɨ ŋ'wa lə wɨ, yu kkpə, bəmanɨ Nyɔ dzakɔ yu nə kkpə lɨ. 11 Yu na ji ta wu Kɨŋwatɨ kɨ Nyɔ lə na chanyɛ wa tsukɔ wu wɨ lə,
‘Ta wu bəŋ bənɨ bə na wɛyɛ nə̀ nɨŋŋə wa
wu' tsu ta wu bo wu tsɔŋ'ə.’
12 Na kwa Jisɔs yu wumbɔŋ wu na fɨtɨ bənɨ foto fo. Yɨ wu miɨ wudɔ lə na sɨŋ su sɛŋ koso wu Nyɔ galə lə na wu wu kɨ fɨtɨ bənɨ foto fo.”
13 Bənɨ bə nə̀ sakɨ ba wɔ nɨ Pita bɔ bə Jɔŋ na chanyɛ nle sɨŋ, bɔ kkə lə na bənɨ bəwa bə nə̀ kəhə kɨŋwatɨ buni, kɨgəsə wɨŋ bɔ. Bɔ kkə lə fi na ji manɨ ndzɨ na bənɨ bə nə̀ gəndəə bə Jisɔs. 14 Bɔ tsukə keŋkɛ fiɔŋ fi bɔ kɨ yimbiɛ Pita bɔ bə Jɔŋ ndzɨ fi, ndzɨ bɔ nə̀ ŋɨntɨ miɨ wu bɔ nə̀ wəmiəsɨ wa wɨ, yu lɨmi bə bɔ. 15 Bənɨ bə nə̀ sakɨ ba foso bɔ binchi ba shə kɨ sesɛ diɛ bɔ bɔ, bɔ tɨdi lə, 16 “Kə jiba kə fə nəŋ bə bənɨ bɛŋ? Bənɨ bəchi bə Jɛlosalɛm na kkɨ tsukɔ fiɔŋ fi bɔ fəə fiŋ fi na donchɛ buŋga bu Nyɔ lə ŋgbooŋ, ɨji naji ɨ kə nɨŋŋ kə. 17 Bəmanɨ, bə mfə lə fiɔŋ fiŋ kə tsɔhɔ tsaŋə ba gəŋ fiə, kə lôso bənɨ bɛŋ lə bɔ kə̂ tsɔhɔ chanyɛ fiɔŋ bə miɨ tsukɔ yɨ wu Jisɔs no lə wɨ.”
18 Bɔ bəndɨ Pita bɔ bə Jɔŋ bɔ chi bɛɛ. Bɔ loso Pita bɔ bə Jɔŋ lə bɔ kə̂ tsɔhɔ mɔŋɔ lə bɔ chanyɛ, makə bɔ tɨfiə miɨ tsukɔ yɨ wu Jisɔs lə wɨ. 19 Pita bɔ bə Jɔŋ chi bə bɔ lə, “Bə na gɔmbiɛ lə fiɔŋ fi diəŋ Nyɔ lɨ na lə kə wɔ ji bə bəŋ, maa bə yu Nyɔ lə? 20 Naji ɨ kə baŋ bifuŋ ba jikə kɨ chanyɛ kɨ biɔŋ bi kə ŋəŋə wɨ ba wɔ lɨ kə.” 21 Bənɨ bə nə̀ sakɨ ba dze tsa ba loso bɔ kɨtso, tə tɔkaŋ nə bɔ wɨ lə bɔ kɨ gɨntɨ. Ndzɨ bɔ nə̀ sɨŋ bə fiɔŋ fi fənə bɔ ŋgə ndzɨ fi, ndzɨ bənɨ bəchi nə̀ sɛnti Nyɔ bə fiɔŋ fi nə̀ tɨchə, 22 fi nə̀ yaa nə̀ lə miɨ wu bɔ nə̀ fəə wa fiɔŋ fi nə̀ donchɛ buŋga bu Nyɔ lə fiŋ bə ŋ'wəmiəsɨ yu nə̀ yakɨ biya mbaania.
Bənɨ bə kɨmbɨŋ'ə nende buŋga nə Nyɔ lɨ
23 Lə bə́ tɔkaŋ nə bə Pita bə Jɔŋ wɨ manɨ, bɔ tsu kɨntsu kɨbɔlə ntɨŋ ba tə bɔ fiɔŋ fi bəchɛ bintɔfiɛ bəbəŋ bə bənɨ bə sakɨ kɨtuŋ sə chanyɛ. 24 Bɔ wɔ ba tɛshɛ nende Nyɔ fiɔŋ'ɨ fimo lə, “Baba wu ji Miɨ Wubəŋ, nə̀ fə wə bɔlu bə sha bə ŋgɔŋ, ma bə biɔŋ bichi bi na ji bidɨ biŋ ntɨŋ. 25 Wə nə̀ fə taa waha Dɛbi, wu nə̀ ji wana wu nɨŋ, yu chanyɛ nə buŋga bu Kɨn'yɨntɨ kɨ Ntsaaŋ'ə ntɨŋ lə,
‘Bənɨ bə na jimiɛhɛ Bəju na fu bə bulo,
bənɨ galɨ diɛ ɨji naji ɨ yi jikə ləmiə ndzɨ la?
26 Bəŋkuŋ bə sɛŋ koso nə̀ fə gwɨ yibɔ
ba tɛshɛ bə bənɨ bə sakɨ bituŋ
lə bɔ diɔ Baba bə miɨ wuhu wu yu' kushɛ lə na Nchitə.’
27 Na jimə fiŋ fiɔŋ fi nə̀ tɨchə sɛŋ kɨtuŋ kɨŋ ntɨŋ. Ŋkuŋ Hɛlɔd bə Pɔntus Pailɛt nə̀ tɛshɛ Bəju bə bənɨ bə na jimiɛhɛ Bəju kɨ kwete ntsuŋ yi Jisɔs ɨji wɛŋ wu nɨŋ wu ntsaaŋ wu wə nə̀ kushɛ lə yu na ji Nchitə. 28 Bɔ nə̀ tɛshɛ lə bɔ fə ji biɔŋ bi wə nə̀ sesɛ nə ndɛŋkəlɨ bə buŋga bwɔhɔ lə wə na se lə bi kɨ ji. 29 Bəma, fɛŋ Baba, bô ŋəŋ dzə́ yi bənɨ bɛŋ na funsə bɨ. Nyâ bɨ bənɨ bɔhɔ bə nɨŋ'ə shəŋ yintaŋ kə kɨ tɨdi diɛ yɔhɔ nle sɨŋ. 30 Tsêyɛ buŋga bwɔhɔ bu wəmiəsɨ bənɨ, wə fə̂ lə bənɨ kɨ ŋɨntɨ biɔŋ bi na donchɛ buŋga bwɔhɔ bə biɔŋ bi kɨgəsə kɨ wɨŋə lə, yɨ wu Jisɔs Wana wu nɨŋ wu ntsaaŋ'ə lɨ.” 31 Lə bɔ kanə bə ntsɨsɨ, sha nɨkə dɨ wu bɔ nə̀ tɛshɛ wa wɨ. Kɨn'yɨntɨ kɨ Ntsaaŋ yi bɔ ntɨŋ, bɔ gbɔ kɨ tɨdi diɛ yi Nyɔ nle sɨŋ.
Ntɛshɛ yi bənɨ bə kɨmbɨŋ'ə kɨ jikə keŋkɛ kɨnjɛ bə biɔŋ bibɔlə
32 Ntɛshɛ yi bənɨ bə kɨmbɨŋ'ə nə̀ ji shəŋ miu, bɔ ji miɨ lɨ miu, miɨ jikə dzɛɛ fiɔŋ fidɔ lə na fihi yu wumbɔŋ. Fiɔŋ fi miɨ lə ji fibɔlə bəchi. 33 Nyɔ nya buŋga bu kɨtso lə bə beŋ bə faŋə bə Jisɔs lə, bɔ kɨ tɨfiə bənɨ lə Baba Jisɔs nə̀ dzakɔ nə kkpə lɨ. Bɔ kɨ ji ɨji Nyɔ' donchə bɔ shəŋ yihi yi ndzeŋe kɨtso. 34 Miɨ nə̀ sɨŋ su wu fiəŋkə nə bɔ ntɨŋ ndzɨ bənɨ bə nə̀ keŋkɛ kə́ makə tsɔ́ŋ nə̀ ba bɔ taŋŋə ba ba bə kpə wa 35 ba nya beŋ bə faŋə bə Jisɔs lə kaŋ, bɔ jɛ bə miɨ chi bɔ ntɨŋ nɨ ŋgə wu miɨ nə̀ ji.