Ananias bɔ bə Safilia
5
Miɨ wudɔ wu bə́ nə̀ tsɨsə lə Ananias bɔ bə məku wuhu Safilia taŋŋə tɨ ndəŋgə. 2 Ananias yɛtɛ nə kpə wa wɨ, kpansɨ kkɨ nu, yu dze ji kɨdiadia ba gəŋ nya beŋ bə faŋə bə Jisɔs lə kaŋ. 3 Lə yu nya manɨ, Pita bi bə yu lə, “Ananias, ə fə la lə wə ga Satan be wə shəŋ ba fə lə wə tə dyɛ bə Kɨn'yɨntɨ kɨ Ntsaaŋ ɨji wə' yɛtɛ nə kpə wu wə' taŋŋə wa ndəŋgə wa wɨ? 4 Tsa yi wə nə̀ bambi kə taŋŋə ndəŋgə no, yu nə̀ jimiɛhɛ wɔhɔ? Tsulə wə taŋŋə yu, kpə wa sə jimiɛhɛ ji wɔhɔ? Wə gəndə nəŋ tə fə ŋgwe yi fiŋ fiɔŋ? Wə kə tədiə dyɛ ji bə bənɨ, wə tə ji bə Nyɔ.” 5 Kɨsɨkɨ ka bɨŋ nɨ Ananias wɔɔ nchanyɛ nyi mɛni, yu bu gbɔ ba kkpə lɨ. Nyiŋ yi kɨtso kwe bənɨ bəchi bə nə̀ wɔɔ shɔŋ ya. 6 Beŋ butsɔ ba ba kwɨdi yu bindzu ntɨŋ ba tɔ fɔ bə yu gəŋ di lɨ.7 Lə bitsə chɛ su nɨ bitɛ, kpansɨ Ananias be, yu jikə kkə fiɔŋ fi sə chɛɛ bə nomo. 8 Pita bi bə yu lə, “Tə̂ mɨ, wuŋ na kpə wa chi wu bəŋ bə nya' taŋŋə ndəŋgə wa?” Yu chi lə, “Ɨŋŋ, na wu mɛ wuchi.” 9 Pita chi biɛ bə yu lə, “Bəŋ bə nya gəndə nəŋ ba tə kwe ntsuŋ lə bə mɔŋ Kɨn'yɨntɨ kɨ Baba lə? Wôkɔ wɔ, chí yi bənɨ bə sə gəŋə ba di nya ya ma fiəŋ, bɔ jiba bɔ be ba tɔ wə, fɔ ba gəŋ di lɨ tɨ.” 10 Nɨ Pita chanyɛ manɨ, kɨsɨkɨ ka Safilia bu gbɔ yu nəfiə ba kkpə lɨ. Lə beŋ butsɔ ba be ba ŋəŋ ji yu' kkpə tɨ, bɔ tɔ yu ba fɔ gəŋ di yu fə nomo ku. 11 Nyiŋ yi kɨtso kwe ntɛshɛ yi bənɨ bə kɨmbɨŋ'ə chi ma bə bənɨ bəchi bə nə̀ wɔɔ shɔŋ ya.
Biɔŋ bi kɨgəsə kɨ wɨŋə lə
12 Beŋ bə faŋə bə Jisɔs lə kɨ fɨtɨ biɔŋ bi na tseyɛ buŋga bu Nyɔ lə bə biɔŋ bi kɨgəsə kɨ wɨŋə lə kɨyɛŋ bənɨ ntɨŋ. Bənɨ bə kɨmbɨŋ'ə bəchi gəŋ bɔ kɨ tɛshɛ fə kɨfufiə kɨ Sɔlɔmon lə ku kɨ nə̀ ji fə tsɔŋ yi bintɔfiɛ ku. 13 Bənɨ bəwa nə̀ moŋkɔhɔ lə bɔ tɛshɛ bə bɔ. Mɛfə bənɨ nə̀ sɛnti bɔ kɨtso. 14 Bənɨnsə bə bəkansɨ kɨyɛŋ ga shəŋ Baba wɨ kɨ yinə kɨntsu kɨbɔlə ntɨŋ. 15 Biɔŋ bi beŋ bə faŋə bə Jisɔs lə nə̀ fɨtɨ kɨ fɨtɨ bənɨ toto bənɨ bə gwɨ́ lə bɔ memɛ fə dzə́ ku, bita bə biga bɨŋ lə fə Pita kɨ chɛti, mɛ ji kwa ndindi wuhu chɛ bədɔ bɨŋ. 16 Bintsu bi bənɨ lə kɨ dza nə fə bituŋ bi fə Jɛlosalɛm ku, bi ba bə bənɨ bə gwɨ́ lə ma bə bə na ji bə bin'yɨntɨ bibiə bɔ wɨ, bɔ wəmiəsɨ bɔ bəchi.
Bə́ kɨ yichi shəŋ bə beŋ bə faŋə bə Jisɔs lə
17 Fo wu bəchɛ bintɔfiɛ lə bə kɨntsu kɨhɨ kɨ nə̀ ji Bəsadusi dza ba gbɔ kɨ yichi shəŋ bə beŋ bə faŋə bə Jisɔs lə, 18 bɔ faŋ bənɨ bɔ gəŋ ba kwe bɔ ba fasɨ tsɔŋ yi buŋfia ntɨŋ. 19 Bəmanɨ, lə kɨ ji bbutsu, nchinda wu Baba ba guyɛ bigwəŋ bi tsɔŋ yi buŋfia lə ba foso bɔ. Lə yu foso bɔ, yu tə bə bɔ lə, 20 “Bə gə̂ŋ tsɔŋ yi bintɔfiɛ ntɨŋ, bə gəŋ kɨ tɨfiə fiɔŋ fichi bə bənɨ tsukɔ kɨjimiɛ kɨfa kɨŋ wɨ.” 21 Nɨ bɔ wɔɔ manɨ, bɔ gəŋ. Lə butsu kɨ ba wɔɔ, bɔ be tsɔŋ yi bintɔfiɛ ntɨŋ ba gbɔ kɨ tɨfiə bənɨ.
Kwa tsa ya bɨŋ, fo wu bəchɛ bintɔfiɛ lə bə beŋ buhu bə nɨŋ'ə kundi bənɨ bə Isla bə sakɨ kɨtuŋ bəchi bɔ bə bɔ jiŋ ba faŋ bənɨ bə bitsa lə lə bɔ gə̂ŋ tsɔŋ yi buŋfia ntɨŋ ba ba bə beŋ bə faŋə bə Jisɔs lə. 22 Bɔ gəŋ fɔ mɨ ba nɔŋ bɔ sɨŋsɨŋ tə tsu jiŋ ba tə lə, 23 “Kə' gəŋ fɔ tsɔŋ yi buŋfia ntɨŋ ba ŋəŋ bigwəŋ ji bə́' dze tsa ba fasɨ lɨ, bənɨ bə bitsa lə lɨmi mɨ bɔ kɨki. Kə gu tsɔŋ ya ba be jikə ŋəŋkəhə miɨ wɨ sɔ.” 24 Lə fo wu bənɨ bə bitsa lə bə nə̀ kɨki ba tsɔŋ yi bintɔfiɛ bə bəchɛ bintɔfiɛ bəbəŋ wɔ manɨ, fi funsə bɔ, bɔ kɨ masə lə bɔ jiba bɔ tsu məŋ bə fiŋ fiɔŋ lɛɛ. 25 Miɨ wudɔ jiji ba be tə bə bɔ lə, “Bə wɔ̂, bənɨ bə bə nə fashɛ ba tsɔŋ yi buŋfia ntɨŋ, bɔ ba ji tsɔŋ yi bintɔfiɛ ntɨŋ bə na tɨfiə bənɨ.” 26 Nɨ bɔ wɔɔ manɨ, fo wu bənɨ bə bitsa lə bə kɨntsu kɨhɨ fɔ ba gəŋ dze bɔ, kɨ ba bə bɔ. Bəmanɨ, bɔ nə̀ dzɛhɛ bɔ ji buŋga lɨ, ndzɨ bənɨ bə bitsa lə ba nə̀ lete lə bənɨ tə kə tumiɛ bɔ bə ta.
27 Bɔ ba bə beŋ bə faŋə bə Jisɔs lə ba be bə bɔ ba ga bənɨ bə sakɨ kɨtuŋ nəfiə. Fo wu bəchɛ bintɔfiɛ bi biɔŋ bə bɔ lə, 28 “Kə' dze tsa ba loso bəŋ lə bə kə̂ tsɔhɔ mɔŋɔ lə bə tɨfiə ba miɨ tsukɔ yɨ wu miɨ no lə wɨ. Bəmanɨ, bə ŋə̂ŋ fiɔŋ fi bə fəə! Bə nə fə bitɨfiə biɛnɨ tsaŋ Jɛlosalɛm ntɨŋ chi. Bə noŋko ba lə bə fə fi kɨ donchɛ lə kaŋ yaha ya kkpə yihi ntɨŋ.” 29 Pita bə kɨntsu kɨ beŋ bə faŋə bə Jisɔs lə chi lə, “Kə naji lə kə wɔ ji bə Nyɔ ba ya ŋ'wɔ nə miɨ lɨ. 30 Bə nə̀ bandɨ Jisɔs kɨtɨ kɨ ŋ'wa lə wɨ yu kkpə. Nyɔ wu bəchɛ bətaa baha dzakɔ yu nə kkpə lɨ, 31 yu bəndɨsɨ Jisɔs ba tɨŋ yu kɨbandə kɨhɨ kɨ nədiɨ wɨ lə yu kɨ ji Miɨ Wubəŋ, yu ji tɨ Nchitə, fə bənɨ bə Isla fichə shəŋ yibɔlə, Nyɔ gufiɛ məmbiə məmbɔlə. 32 Kə ŋəŋ biɔŋ biŋ wɨ ba tə kɨ tɨdi bə bənɨ, ɨji Kɨn'yɨntɨ kɨ Ntsaaŋ kɨ Nyɔ na nya bə bənɨ bə na kuntə yu, kɨ na tambi tɨ lə biɔŋ biŋ na yɛyi.”
33 Lə bənɨ bə nə̀ sakɨ ba kɨtuŋ wɔ nchanyɛ nyi manɨ, shəŋ bə bɔ. Bɔ kɨ noŋko lə bɔ kkpɨshɛ beŋ bə faŋə bə Jisɔs lə. 34 Bəmanɨ, miɨ wudɔ dza wə nə kɨntsu kɨ bənɨ bə nə̀ sakɨ kɨtuŋ ntɨŋ wu yɨ wuhu nə̀ ji lə Gamalia, ɨji miɨ Bəfalasi yu ji tɨ miɨ wu nə̀ tɨfiə bilaŋ bi Nyɔ lə, bənɨ bəchi kuntə yu buni. Nɨ yu dza cha wə, yu tə bə́ sa foso beŋ bə faŋə bə Jisɔs lə binchi. 35 Yu shə ba chanyɛ bə bənɨ bə nə̀ sakɨ ba kɨtuŋ lə, “Bənɨ bə Isla, bə dzê tsa bə fiɔŋ fi bə na se lə bə fə bə bənɨ bɛŋ. 36 Bə gɔ̂mbiɛ lə tsa yidɔ nə̀ ji, miɨ wudɔ dza nə mɛni bə́ tsɨsə yu lə Tiɔdas, yu kɨ donchɛ lə yu na ji miɨ wubəŋ. Bənɨ gbɔ yu nəjiŋ nɨ gɨ na. Lə bə́ kkpɨsɨ yu, kɨntsu kɨhɨ tsaŋ, fiɔŋ fi yu nə̀ ba bə fi la kɨlɔlɔ. 37 Nəjiŋ wusu, wudɔ miɨ chi fɔɔ tsa yi bə́ nə̀ bɔmbiɛ bənɨ wɨ bə́ tsɨsə yu lə Judas, ɨji miɨ wu Galili. Yu kpa bənɨ kɨyɛŋ yu nəjiŋ. Lə bə́ kkpɨsɨ yu kɨntsu kɨhɨ tsaŋ. 38 Nə fiŋ ntɨŋ, mɨ ŋkɨ nnya bəŋ bitɨfiə lə, bə kə̂ fəkə fiɔŋ bə bənɨ bɛŋ. Bə shə̂ dzə yibɔ. Jilə fiɔŋ fi bɔ na ba fiŋ bə fi bɔ chisə tɨfiə bənɨ na mbɛyɛ yi miɨbəwəŋ, tə fi jifia fi la kɨlɔlɔ. 39 Jilə fiɔŋ fia na mbɛyɛ yi Nyɔ, tə naji ɨ bə ya bɔ kə. Ɨ bə jikə dzɛɛ tsa, ɨ fi fɔ lə bə na dio ji bə Nyɔ.”
40 Lə Gamalia chanyɛ manɨ, bənɨ bə nə̀ sakɨ ba kɨtuŋ bɨŋ bitɨfiɛ bihi, bɔ chi bəndə beŋ bə faŋə bə Jisɔs lə ba, bɔ be. Nɨ bɔ bɛɛ manɨ, bə́ shɔkiɛ bɔ ba loso lə bɔ kə̂ tsɔhɔ mɔŋɔ lə bɔ tɨfiə ba miɨ tsukɔ yɨ wu Jisɔs lə wɨ, bə́ tɔkaŋ nə bɔ wɨ, bɔ kɨ gɨntɨ. 41 Lə bɔ fɔ nə nɔ kɨ gɨntɨ fibɔlə, bɔ kɨ woko ji buni lə bɔ' kwətsə bənɨ bə bə́ nya bɔ yaa ndzɨ yɨ wu Jisɔs lə. 42 Bɔ gəŋ manɨ, kɨ chisə tɨfiə bənɨ díɔ chi tsɔŋ yi bintɔfiɛ ntɨŋ ma kú ntɨŋ, bɔ tɨfiə shɔŋ yi ndzeŋe yi na tseyɛ lə Jisɔs na Nchitə wu Nyɔ nə̀ kaa wa.