Bə́ sa bənɨ bə nɨŋ'ə fumba
6
Lə ba kɨ ji tsa yidɔ wɨ, nɨ ntɛshɛ yi bənɨ bə kɨmbɨŋ'ə nə̀ ko yi gɨntɨ fiə, Bəju bə nə̀ chanyɛɛ ji díɛ yi Glek gbɔ kɨ kwente Bəju bə nə̀ chanyɛɛ díɛ yi ku lə, lə bɔ na jɛti biɔŋ bə bəkansɨ bə bəŋku lə díɔ chi, bɔ njiŋgə sɨŋ bəbɔlə. 2 Bəma, beŋ bə faŋə bə Jisɔs lə bə yɔɔ ntse bəfɛ tə dɨnə ntɛshɛ yi bənɨ bə kɨmbɨŋ'ə chi ba tə bə bɔ lə, “Fi na ndzeŋɛhɛ lə bɨ beŋ bə faŋə kə chində su nə ntɨfiə yi diɛ yi Nyɔ wɨ ba gəŋ jiŋ ji kɨtɨ kɨ kɨjɛnɛ lə bɨŋ. 3 Bəŋgwɨŋ baha, fi na ndzeŋe lə bə sâ bənɨ fumba nə bəŋ ntɨŋ, kə nyâ nɨŋ nyi bɔ kaŋ. Bə dze kɨ sabi, bə jiŋgə ji bənɨ bə na keŋkɛ fiə wu ndzeŋe, bɔ' yi bə Kɨn'yɨntɨ kɨ Ntsaaŋ, bɔ keŋkɛɛ tɨ bufɨ. 4 Bəma, ɨ kə tə nya gwɨ́ yaha ji kɨntsɨsɨ wɨ ba kɨ nɨntɨ nɨŋ yi diɛ yi Nyɔ.” 5 Lə bənɨ bəchi wɔ kɨmbɨchə ka, kɨ ndzeŋ bɔ lɨ. Bɔ tə sa Tefen ɨji miɨ wu kɨmbɨŋ kɨhɨ nə̀ ji təəə, yu' yi tɨ bə Kɨn'yɨntɨ kɨ Ntsaaŋ. Bədɔ nə̀ Felip bə Blukɔlus, Nikanɔ bə Timɔn, Bamɛnas bə Nikɔlas wu nə̀ ji miɨ wu Antiɔk wu nə̀ fichə bu fichə ba tsu miɨ wu kɨmbɨŋ kɨ Bəju lə. 6 Bɔ dze bənɨ bɛŋ ba ga beŋ bə faŋə bə Jisɔs lə nəfiə, beŋ ba tsɨsɨ bə bɔ ba ga kaŋ bɔ bɨŋ. 7 Diɛ yi Nyɔ kɨ tsaŋkɨ yi gɨntɨ fiə. Ntɛshɛ yi bənɨ bə kɨmbɨŋ'ə bə Jɛlosalɛm kɨ ko yi gɨntɨ fiə. Bəchɛ bintɔfiɛ kɨyɛŋ ga tɨ shəŋ Jisɔs wɨ.Bə́ kɨ bunchi dyɛ Tefen wɨ
8 Nyɔ donchə Tefen shəŋ yihi yi ndzeŋe kɨtso, yu keŋkɛ buŋga ba kɨ fɨtɨ biɔŋ bi kɨgəsə kɨ wɨŋə lə bə biɔŋ bi na donchɛ buŋga bu Nyɔ lə bənɨ ntɨŋ. 9 Bənɨ bədɔ jiji ba gbɔ yímbiɛ bə Tefen. Bənɨ bɛŋ nə̀ Bəju bə nə̀ fɔɔ nə Silin bə Alɛdzandia ma Silisha bə Ɛsha. Nə̀ bənɨ bə tsɔŋ yi kɨntsɨsɨ yi bə́ nə̀ tsɨsə lə yi Bəŋfia bə nə̀ Fɔɔ nə Buŋfia ntɨŋ. 10 Nɨ bɔ nə̀ yimbiɛɛ manɨ, Kɨn'yɨntɨ kɨ Ntsaaŋ nya Tefen buŋga, miɨ jikə jimiə wu naji ɨ yu ya yu.
11 Bɔ nyishi bənɨ bədɔ nəjiŋ nəjiŋ, bənɨ ba kɨ yalə lə bɔ' wɔ Tefen chanyɛ díɛ yibiə tsukɔ Mose bə Nyɔ wɨ. 12 Nɨ bɔ fəə manɨ, bɔ nɨkə shəŋ yi bənɨ lə, bə yi bənɨ bə sakɨ kɨtuŋ'ə, ma yi bənɨ bə na tɨfiə bilaŋ bi Nyɔ lə. Bɔ chimə Tefen wɨ ba kwe gəŋ bə yu bənɨ bə kɨtuŋ'ə bə sakɨ bənsa nəfiə. 13 Bənɨ ba chi ba bə bənɨ bədɔ bɔ ləŋ nsa yi dyɛ nyi nəjiŋ, bɔ kɨ bunchi dyɛ Tefen wɨ bɔ tɨdi lə, “Miɨ no na fiəŋkəhə nchanyɛ díɛ yibiə tsukɔ tsɔŋ yi bintɔfiɛ nyi wɨ bə bilaŋ bi Mose lə. 14 Kə' wɔ yu chanyɛ lə Jisɔs wu Nadzalɛt wa jiwa yu kpodiɛ tsɔŋ yi bintɔfiɛ nyi ba yashənɨ fiə wu kɨtuŋ kaha lə wu Mose nə̀ tɨfiə bɨ.” 15 Bənɨ bəchi bə nə̀ ji kansu wa ntɨŋ dɔŋ yəsɨ Tefen wɨ, bɔ jiji ba ŋəŋ bushi buhu tsu kɨ boto bu nchinda wu Nyɔ lə.