Jisɔs na ntɨŋkɨ wu shíŋ wu ndzeŋe
10
“Ntə bəŋ yɛyi yɛyi lə, ɨ miɨ na beke mbaŋ wu shíŋ ntɨŋ, jilə yu kə bekɛ ji fiəŋ, yu bəndɨ ji mbaŋ wɨ tə be lɨ, tə wa miɨ na wuu, yu ji miɨ wu na fashɛ biɔŋ buŋga lɨ. 2 Bəmanɨ ntɨŋkɨ wu shíŋ na ba yu kɨ beke fihi ji fiəŋ. 3 Na yu wu miɨ wu kɨki fiənsɨ wu mbaŋ'ə ba yu gu kɨgwəŋ yu lɨ, yu be ba bəndɨ shíŋ yi na ji yihi yɨ lɨ yɨ lɨ, yi wɔ diɛ yihi, yu tə dze ba fɔ bə yi. 4 Tsa yi yu' fosɔ shíŋ yihi chi, yu kɨ sa fiə yu bɨndɨ shíŋ ya yi biəlɨ yu, ndzɨ yi na kkɨ diɛ yihi. 5 Jilə na miɨ wudɔ chichi, ɨ yi jikə biələ yu. Ɨ yi kɨ lətə miɨ wa bulətə, ndzɨ yi na kkəhə diɛ yi miɨ wudɔ chichi.” 6 Lə Jisɔs ma ŋgaŋ no bə bɔ manɨ, bɔ jikə kkə fiɔŋ fi yu chanyɛ bə bɔ ŋgaŋ wa ntɨŋ.7 Bəma, Jisɔs chi tədiə bə bɔ lə, “Ntə bəŋ yɛyi yɛyi lə na mɨ fiənsɨ wu mbaŋ'ə dɨ wu shíŋ na chɛti. 8 Bənɨ bəchi bə nə̀ sa ba nə mɨ lɨ nə̀ bəwuu, bɔ ji tɨ bənɨ bə nə̀ fashɛɛ biɔŋ buŋga lɨ. Bəma shíŋ jikə kɨ woko fiɔŋ fi bɔ nə̀ chanyɛɛ. 9 Na mɨ fiənsɨ wu mbaŋ'ə. Ɨ miɨ chɛ mɨ ntɨŋ tə be lɨ, ɨ yu fɔfo. Yu ná kɨ ji nɨ shiŋ yi na foto yi gɨntɨ yi diɨ yi fichɛ tsu mbaŋ ntɨŋ. 10 Wuu ba yu ba kwa lə yu yə, yu kkpɨsɨ, ba bɨsɨ lɨ. Mɨ mba yəmɨ lə bənɨ keŋkɛ ji buwəŋ, buwəŋ bu na ji bu təəə. 11 Na mɨ ntɨŋkɨ wu shíŋ wu ndzeŋe. Ntɨŋkɨ wu shíŋ wu ndzeŋe ba yu nya buwəŋ buhu lə yu kkpə ndzɨ shíŋ yihi. 12 Miɨ wu bə́' dzɛɛ kwa yu nɨŋ'ɨ budzenɛ, yu jikə jimiɛ ntɨŋkɨ wu shíŋ, shíŋ jikə jimiɛ yihi, yu ba yu ŋəŋ fwa ba, yu bu shə shíŋ ya mɨ ba tsəkiə lɨtɨ, fwa tə shə ba kwe shíŋ yidɔ, yidɔ tsaŋ. 13 Yu ba yu lətə ndzɨ bə́' dze kwa yu nɨŋ'ɨ budzenɛ, yu jikə nyaha kɨgaŋ bə shíŋ ya. 14 Na mɨ ntɨŋkɨ wu shíŋ wu ndzeŋe. Ŋkkɨ shíŋ yi na ji yɛmɨ, shíŋ yɛmɨ kkɨ mɨ tɨ. 15 Diəŋ nɨ Taa na kkɨ mɨ, ŋkkɨ tɨ Taa, mɨ nya buwəŋ bwɛŋ lə ŋkkpə ndzɨ shíŋ yɛmɨ. 16 Nna ŋkeŋkɛ tɨ shíŋ yidɔ yi na sɨŋ kɨkɨŋ kɨŋ ntɨŋ. Nna nji lə mba bə yi tɨ, yi kɨ woko diɛ yɛmɨ, kɨkɨŋ kɨ shíŋ'ə kɨ ji kɨmo, ntɨŋkɨ wu shíŋ ji miu.
17 Mɨ nya buwəŋ bwɛŋ lə ŋkkpə, fə nchisə ləkə buwəŋ busu jiŋ. Na fiɔŋ fi Taa na laŋkɨ mɨ. 18 Miɨ na sɨŋ su wu na dze buwəŋ bwɛŋ. Na mɨ wu na nya buwəŋ bwɛŋ nə kɨnse kɛŋ ntɨŋ. Nna ŋkeŋkɛ buŋga bu nyanə buwəŋ bwɛŋ lə ŋkkpə, ŋkeŋkɛ buŋga bu chisə ləkə buwəŋ bwɛŋ jiŋ. Fiŋ na fiɔŋ fi Taa tədiə lə ŋkɨ mfɨtɨ.”
19 Lə Jisɔs chanyɛ biɔŋ biŋ mɛ, kɨnjɛgwɨ chi ba Bəju ntɨŋ. 20 Bənɨ kɨyɛŋ nə bɔ ntɨŋ kɨ tɨdi lə, “Yu na keŋkɛ tsə, yu na dza lɨ. Bə na wokɔ la nə yu lɨ?” 21 Bəmanɨ bədɔ kɨ tɨdi lə, “Bɛmbɛ bənchanyɛ na jimiɛhɛ bə miɨ wu na keŋkɛ tsə lə. Naji ɨ tsə gu yəsɨ yi nyimə lə?”
Jisɔs donchɛ lə yu na ji Wɛŋ wu Nyɔ
22 Lə kɨ ji tsa yi kɨgbeyɛ kɨdɔ wɨ bə́ gɔmbiɛɛ nɨ bə́ nə̀ chisə guyɛ tsɔŋ yi bintɔfiɛ Jɛlosalɛm,ª 23 Jisɔs gəŋ kɨ gəndə mbaŋ wu tsɔŋ yi bintɔfiɛ ntɨŋ, fə kɨfufiə kɨ Sɔlɔmon lə ku. Tsa ya wɨ nə̀ tsa yi fiəfɨ. 24 Bəju jiji ba ba fiədiɛ yu ba bi bə yu lə, “Wə jiwa wə ga ɨ kə kətə kə kpɨ maa mɛ gəŋ fɔ bu la? Jilə na wə Nchitə wu Nyɔ nə̀ kaa wa, wə tə bɨ ŋgbooŋ.” 25 Jisɔs chi bə bɔ lə, “Mɨ' ntə bəŋ, bə jikə bɨmiə. Nɨ́ŋ yi nna nɨntɨ yɨ wu Taa lə lɨ, yi' donchɛ miɨ wu nna nji yu lɨ. 26 Bəmanɨ bə kə bɨmiə, ndzɨ bə na jimiɛhɛ kɨkɨŋ kɨ shíŋ yɛmɨ lə ntɨŋ. 27 Shíŋ yɛŋ ba yi kɨ woko diɛ yɛmɨ. Ŋkkɨ yi, yi biəlɨ mɨ, 28 nnya yi buwəŋ bu kəkaha. Naji ɨ yi ná laa kə. Miɨ na sɨŋ su wu naji ɨ yu chi fasɨ yi nə mɨ kaŋ. 29 Taa wu nya shíŋ ya bə mɨ na yakɨ miɨ chi, miɨ na sɨŋ su wu naji ɨ yu fasɨ yi nə yu kaŋ. 30 Bɨ bə Taa kə na ji miɨ miu.”
31 Bəju chi dzɛɛ ta lə bɔ tumiɛ yu su. 32 Jisɔs bi bə bɔ lə, “Bə ŋəŋ nɨ́ŋ yi ndzeŋe kɨyɛŋ yi Taa tədiə lə ŋkɨ mfɨtɨ. Na yi la yi bə na se lə bə tumiɛ mɨ ndzɨ yi?” 33 Bɔ chi bə yu lə, “Kə na tumiɛhɛ wə ji ndzɨ nɨ́ŋ yi ndzeŋe yi wə na fɨtɨ. Kə na tumiɛ wə ndzɨ wə na bɨsə yɨ wu Nyɔ lə. Wə na ji kwa miɨbəwəŋ, wə tɨdi lə wə na ji Nyɔ.” 34 Jisɔs chi bə bɔ lə, “Fi na jimiɛhɛ bubɔndɔ kɨŋwatɨ kɛnɨ kɨ bilaŋ'ə ntɨŋ Nyɔ chanyɛ sɔ lə, ‘Mɨ ntə lə bə na ji bənyɔ?’ 35 Nyɔ na tsɨsə bənɨ ba lə bənyɔ, ɨji tɨ bɔ bə diɛ yihi nə̀ gɨntɨ bɔ lɨ, ɨji kə na kkɨ lɨ lə fiɔŋ fi na ji Kɨŋwatɨ kɨ Nyɔ lə ntɨŋ naji ɨ fi yashənɨ kə. 36 Nɨ fi na ji manɨ, bə na tɨdi bə miɨ wu Tɨɨ' tsaləsɨ ba faŋ mbi no ntɨŋ lə yu na bɨsə yɨ wu Nyɔ lə kwa ndzɨ yu' tə lə yu na ji Wɛŋ wu Nyɔ ndzɨ la? 37 Jilə nna nɨntəhə ji nɨŋ yi Taa, bə mɨ kə̂ bɨmiə. 38 Bəmanɨ jilə nna nɨntɨ ji yi, mɛfə bə kə bɨmiə tɨmo mɨ, bə bɨ̂ŋ nɨ́ŋ ya, fə bə kkə buni lə Taa na ji mɨ ntɨŋ, nji Taa ntɨŋ.” 39 Bəju kɨ chisə nɔŋɔ lə bɔ kwe yu, bəmanɨ yu kpɔsɔ nə bɔ kaŋ.
40 Jisɔs chi gəŋə ba llə tsu Kɨnchɛŋ kɨ Jɔdan nəwuŋ dɨ wu Jɔŋ nə̀ sa yu chɛsɛ bənɨ biɔ, kɨ ji nɔ. 41 Bənɨ kɨyɛŋ kɨ ba bɔ ŋɨntɨ yu. Bɔ jiji ba tə lə, “Mɛfə Jɔŋ nə̀ kə fəkə tɨmo fiɔŋ fidɔ fi na donchɛ bubəŋ bu Nyɔ lə, fiɔŋ fichi fi yu nə̀ chanyɛɛ tsukɔ miɨ no wɨ nə̀ yɛyi.” 42 Bəma bənɨ kɨyɛŋ ga shəŋ Jisɔs wɨ mɨ.