Jisɔs gu yəsɨ yi miɨ lə wu bə́ nə̀ bɛyɛ yu ji nyimə
9
Lə Jisɔs kɨ gəndə, yu ŋəŋ nyunso wudɔ wɨ ɨji bə́ nə̀ bɛyɛ yu, yu ji yəsɨ yi nyimə. 2 Beŋ buhu bə nɨŋ'ə bi bə yu lə, “Labay, nə̀ yəŋ wu nə̀ fəə bubiə fə bə́ tə bɛyɛ miɨ no yəsɨ yi nyimə? Nə̀ fə miɨ wusu maa bətɨɨ bə mɛni lə?” 3 Jisɔs chi bə bɔ lə, “Fi na jimiɛhɛ lə miɨ no makə bətɨɨ bə mɛni nə̀ fə bubiə. Bə́ nə̀ bɛyɛ yu manɨ fə buŋga bu Nyɔ lə yinshɛ yu wɨ. 4 Kə naji lə kə kɨ nɨntɨ nɨŋ yi miɨ wu' faŋə mɨ ɨ bambi bbushə. Fu jimi ya ɨji na tsa yi miɨ naji yu nɨŋ fiɔŋ kə. 5 Gəŋ fɔ ma tsa yi la wɨ nɨ nna nji mbi no ntɨŋ, nna nji kɨŋgbooŋ kɨ mbi no lə.” 6 Nɨ Jisɔs chanyɛ nchanyɛ nyi, yu chə mənchəŋ fəkoso ba bi bidze ba fi yəsɨ yi miɨ wa lə su, 7 tə tə bə yu lə, “Gə̂ŋ wwɔ Kɨkpɔ kɨ Ŋgɔŋ'ə kɨ Sailɔm ntɨŋ.” (Yɨ wuŋ lə Sailɔm ji lə, “Bə́' faŋ.”) Miɨ wa gəŋ ba wɔ lɨ ba fichə kɨ ba yu ŋɨntɨ. 8 Bənɨ bə nə̀ me fə yu ku, ma bə bənɨ bə nə̀ ba bɔ kɨ ŋɨntɨ yu nɨ miɨ wu kɨnende, bɔ kɨ masə lə, “Ntɨlə no na miɨ wu nə ba wa yu kɨ jimi yu nende biɔŋ?” 9 Bədɔ kɨ tɨdi lə, “Na yu.” Bədɔ lə, “Yɛ yu na boto yu bubɔnɔ.” Miɨ wa tə lə, “Na mɨ yu.” 10 Bəma bɔ tə bi bə yu lə, “Yəsɨ yɔhɔ fə nəŋ tə gulɔ lɨ?” 11 Yu chi lə, “Miɨ wu bə́ na tsɨsə lə Jisɔs sə bi bidze ba fi yəsɨ yɛmɨ wɨ ba tə lə ŋgəŋ ŋ'wwɔ ŋgɔŋ mə Sailɔm ntɨŋ. Mɨ ŋgəŋ ba wwɔ lɨ, yəsɨ yɛmɨ bu gulɔ.” 12 Bɔ bi bə yu lə, “Yu dzəŋ?” Yu chi lə, “Nna ŋkkəhə.”Kɨnjɛgwɨ ba Bəfalasi ntɨŋ tsukɔ buŋga bu Jisɔs lə wɨ
13 Bɔ dze miɨ wu nə̀ sa wa yu ji nyimə ba gəŋ bə yu Bəfalasi nəfiə. 14 Butsu bu Jisɔs nə̀ biɛ bwa bidze ba gu yəsɨ yi miɨ wa lə su nə̀ butsu bu fufiɛ. 15 Bəfalasi ba chi biɛ nɨ yu sə fəə fə yəsɨ yihi tə gulɔ. Yu chi bə bɔ lə, “Miɨ wa sə fi yəsɨ yɛmɨ bə bidze, mɨ ŋgəŋ wwɔ ba kɨ ŋɨntɨ.” 16 Bəfalasi tə tə lə, “Miɨ no kə fɔkɔ nə fə Nyɔ ku kə, ndzɨ yu na nɨntɨ butsu bu fufiɛ.” Bədɔ tɨdi fibɔlə lə, “Miɨ wu na fɨtɨ bubiə naji ɨ yu fə nəŋ tə kɨ fɨtɨ ŋgwe yi biŋ biɔŋ bi na donchɛ buŋga bu Nyɔ lə?” Kɨnjɛgwɨ ba bɔ ntɨŋ. 17 Bɔ chi biɛ bə miɨ wa lə, “Wə tə yɔhɔ lə la tsukɔ miɨ wa wɨ nɨ yu sə guyɛ cha yəsɨ yɔhɔ?” Yu chi lə, “Miɨ wa na ji miɨ wu shɔŋ yi Nyɔ.”
18 Bəju nə̀ kə bɨmiə lə miɨ wa nə̀ sa yu ji nyimə bə́ tə gu yəsɨ yihi, sɨŋ sɨŋ bə́ dɨnə bətɨɨ bə mɛni, bɔ ba. 19 Bəju ba bi bə bɔ lə, “Ntɨlə no na wɛŋ wɛnɨ wu bə na tɨdi lə bə́ nə̀ bɛyɛ yu, yu ji nyimə sɨŋ? Yu fə nəŋ tə kɨ ŋɨntɨ fɛŋ?” 20 Tɨɨ bə mɛni chi lə, “Kə na kkɨ lɨ lə no na wɛŋ waha wu kə nə̀ bɛyɛ yu, yu ji nyimə. 21 Bəmanɨ, nɨ fi jimiɛ fə yu tə gbɔɔ kɨ ŋɨntɨ fɛŋ, kə kə kkə. Kə kə kkə tɨ miɨ wu' gulɔ yəsɨ yihi. Bə bi ji bə yu. Yu na ji miɨntaŋ. Naji ɨ yu chanyɛ bə bifuŋ bihi.” 22 Mɛni bə tɨɨ nə̀ tɨdi manɨ ndzɨ bɔ nə̀ lete Bəju, nə̀ ji Bəju' ga lə ɨ miɨ mɔŋ ba chanyɛ bə bifuŋ bihi lə Jisɔs na Nchitə wu Nyɔ nə̀ kaa wa, ɨ bɔ kɔŋɔ miɨ wa nə tsɔŋ yi kɨntsɨsɨ ntɨŋ. 23 Fia nə̀ fiɔŋ fi mɛni bə tɨɨ nə̀ tədiə lə, “Yu na ji miɨntaŋ, bə bi ji bə yu.”
24 Bɔ chi bəndə miɨ wu nə̀ sa wa yu ji nyimə tsá bɨŋ fiɛ ba tə bə yu lə, “Tə̂ kɨyɛyi kɨŋkuntə gəŋ bə Nyɔ. Kə na kkɨ yaha lə miɨ no na miɨ wu na fɨtɨ bubiə.” 25 Yu chi lə, “Fa yu na fɨtɨ bubiə lɛɛ, nna ŋkkəhə. Fiɔŋ fimo fi nna ŋkkɨ na kwa lə nnə̀ nsa nji nyimə, fɛŋ ŋŋɨntɨ wa.” 26 Bɔ chi biɛ bə yu lə, “Yu sə fə nəŋ bə wə? Yu sə fə nəŋ tə gu yəsɨ yɔhɔ?” 27 Yu chi bə bɔ lə, “Mɨ nsə ntə bəŋ, bə jikə sɛhɛ lə bə wɔ. Bə na se lə bə chi wɔɔ lə bə fə nəŋ? Bə na se lə bə kɨ ji beŋ buhu bə nɨŋ'ə tɨ?” 28 Bɔ sɛyi yu ba tə lə, “Na wə wene wu nɨŋ. Kə na ji fiaha beŋ bə nɨŋ'ə bə Mose lə. 29 Kə na kkɨ lɨ lə Nyɔ nə̀ ba yu kɨ chanyɛ bə Mose. Bəmanɨ kə kə kkə dɨ wu miɨ no fɔɔ.” 30 Miɨ wa chi lə, “Hɛbɛ, fiŋ na fiɔŋ fi kɨgəsə kɨ wɨŋə lə! Bə tə lə bə na kkəhə dɨ wu yu fɔɔ? Bəmanɨ yu gu yəsɨ yɛmɨ. 31 Kə na kkɨ lɨ lə Nyɔ na wokɔhɔ kɨntsɨsɨ kɨ miɨ wu na fɨtɨ bubiə lə. Bəmanɨ, ɨ miɨ na kuntə Nyɔ, yu fɨtɨ fiɔŋ fi Nyɔ na se, ɨ Nyɔ kɨ woko kɨntsɨsɨ kɨhɨ. 32 Dze nɨ mbi nə̀ bɛyɛ bə́ kə saa wɔ lə miɨ' gu yəsɨ yi miɨ lə wu bə́ nə̀ bɛyɛ yu, yu ji nyimə. 33 Tə kɨ ji lə miɨ no kə fɔkɔ ji nə fə Nyɔ ku, yu tə jikə kafɔ mfə fiŋ fiɔŋ.” 34 Bɔ tə bə yu lə, “Bə́ nə̀ bɛyɛ wə wuchidi bubiə ntɨŋ, wə kɨ se lə wə tɨfiə bɨ?” Nɨ bɔ tədiə manɨ, bɔ kɔŋ yu nə bɔ ntɨŋ.
Nyimə dzə yi Nyɔ ntɨŋ
35 Jisɔs wɔ lə bɔ kɔŋɔ miɨ wa nə bɔ ntɨŋ, yu nɔŋ ba ŋəŋ yu wɨ, bi bə yu lə, “Wə' ga shəŋ Wɛŋ wu Miɨ wɨ?” 36 Yu bi lə, “Miɨ wubəŋ, miɨ wa na yəŋ? Tə̂ la mɨ, fə ŋgalə shəŋ yu wɨ.” 37 Jisɔs chi bə yu lə, “Wə' ŋəŋ yu wɨ. Na yu miɨ wu na chanyɛ no bə wə fɛŋ.” 38 Miɨ wa tə tə lə, “Baba mɨ' ŋga.” Nɨ yu tədiə manɨ, yu tuŋ nu yu nəfiə ba nya yu kɨŋkuntə. 39 Jisɔs tə lə, “Mɨ mba mbi no ntɨŋ lə nsa kɨ ji, fə bənɨ bə na ŋɨntəhə, bɔ kɨ ŋɨntɨ, bə na ŋɨntɨ, bɔ tsu bənyimə.” 40 Nɨ Jisɔs chanyɛ mɛ, Bəfalasi bə nə̀ ji mɨ fə yu ku wɔ, bɔ bi bə yu lə, “Kə na ji bənyimə tɨ?” 41 Jisɔs tə bə bɔ lə, “Bə tə sə ji bənyimə, kaŋ yənɨ tə kɨ ji yiya. Bəmanɨ fɛŋ nɨ bə na tɨdi lə bə ŋɨntɨ ba, bə' kətə bubiə bwɛnɨ ntɨŋ.”