Bə́ ba bə məku wudɔ fə Jisɔs ku ɨji bə́' kwe yu ndzenɛ ntɨŋ
8
Jisɔs dza ba bəndɨ fihi Dzo yi Bitɨ bi Ɔlif lə bɨŋ. 2 Lə butsu wɔ, yu chi tsɔ jiŋ ba gəŋ mbaŋ wu tsɔŋ yi bintɔfiɛ ntɨŋ. Bənɨ bəchi tɛshɛ fə yu ku, yu jiŋ fəkoso ba kɨ tɨfiə bɔ. 3 Bəfalasi bə bənɨ bə nə̀ tɨfiə bilaŋ ba bə məku wudɔ ɨji bə́' kwe yu, yu dzenɛ bɔ bə nyunso wudɔ. Lə bɔ ba bə yu, bɔ ga yu bɔ nəfiə 4 ba tə bə Jisɔs lə, “Miɨ wu Bitɨfiə, bə́' kwe məku no, yu dzenɛ bɔ bə nyunso wudɔ, 5 ɨji bilaŋ ntɨŋ, Mose nə̀ tə lə ŋgwe yi no kpansɨ na wu naji lə bə́ tûmiɛ bə ta ba kkpɨsɨ lɨ. Wə tə yɔhɔ lə la?” 6 Bɔ nə̀ bishɛ manɨ bɔ tosɔ Jisɔs fə yu fɨsə bə nchanyɛ ɨ bɔ tə keŋkɛ fiɔŋ fi bɔ buŋɔ yu wɨ. Bəmanɨ, Jisɔs tsəkə ba kɨ bondo biɔŋ fəkoso bə kpaŋ. 7 Bɔ kətə kwa bɔ lɨmi mɨ, bɔ bu bishɛ yu biɔŋ. Yu dzasɨ gwɨ ba tə bə bɔ lə, “Ɨ miɨ na ji su bəŋ ntɨŋ wu na sɨŋ bə bubiə, kɨ ji yu miɨ wu fiəfiə wu saa ba tuŋ kpansɨ no bə ta.” 8 Lə Jisɔs tə manɨ, yu chi tsəkə ba kɨ bondo biɔŋ fəkoso bə kpaŋ. 9 Bɔ wɔ fiɔŋ fi Jisɔs tədiə ba gbɔ kɨ saŋfiɛ miu miu, dze nə bəntaŋ bɨŋ. Lə bɔ saŋfiɛ, ə kətə kwa kpansɨ wa yu lɨmi mɨ bɔ bə Jisɔs. 10 Jisɔs chi ləmiə wə ba bi bə kpansɨ wa lə, “Kpansɨ, bɔ dzəŋ? Miɨ wudɔ kə shə su wu tədiə lə wə naji lə wə kkpə?” 11 Kpansɨ wa chi lə, “Miɨ kə shə Baba.” Jisɔs tə tə lə, “Naji ntə tɨ kə lə wə naji lə wə kkpə. Kɨ gɨntɨ, bəmanɨ wə bubiə kə tsɔhɔ fəə.”]Jisɔs na kɨŋgbooŋ kɨ mbi lə
12 Jisɔs chi chanyɛ bə bənɨ ba lə, “Na mɨ kɨŋgbooŋ kɨ mbi no lə. Miɨ wula wu na biəlɨ mɨ naji ɨ yu shəshə gəndə kɨjuwɔ ntɨŋ kə. Yu jiwa ɨ yu keŋkɛ kɨŋgbooŋ kɨ na nya bənɨ buwəŋ.” 13 Bəfalasi tə bə yu lə, “Wə na lɨmi nsa yɔhɔ nəjiŋ, bəma miɨ na sɨŋ wu naji ɨ yu tə lə fiɔŋ fi wə chanyɛ na diəŋ.” 14 Jisɔs chi bə bɔ lə, “Ɨji tɨ lə nna nlɨmi nsa yɛmɨ nəjiŋ, kɨjilə naji ɨ miɨ tə lə fiɔŋ fi nna nchanyɛ na diəŋ, ndzɨ nna ŋkkɨ dɨ wu mɨ mfɔɔ, ŋkkɨ tɨ dɨ wu nna ŋgɨntɨ. Bəmanɨ, bə na kkəhə dɨ wu mɨ mfɔɔ makə dɨ wu nna ŋgɨntɨ. 15 Bə na sakɨ bənɨ ji dzə́ yi miɨbəwəŋ'ə ntɨŋ. Nsakəhə fiɛŋ miɨ. 16 Bəmanɨ, nsa miɨ tɨmo, kɨjilə nna nsakɨ dzə́ yi diəŋ ntɨŋ, ndzɨ nsakəhə mɨ wumbɔŋ kə. Nsakɨ bɨ bə Taa wu nə̀ faŋə mɨ. 17 Fi na ji bubɔndɔ kɨŋwatɨ kɛnɨ kɨ bilaŋ'ə ntɨŋ lə, ɨ bənɨ bəfɛ ləŋ nsa yi fiɔŋ nəjiŋ, tə naji ɨ bə́ bɨŋ lə fiɔŋ fi bɔ na chanyɛ na yɛyi. 18 Nna nlɨmi nsa yɛmɨ nəjiŋ, Taa wu faŋə mɨ lɨmi tɨ nsa yɛmɨ nəjiŋ.” 19 Bɔ bi bə yu lə, “Chaa dzəŋ?” Jisɔs chi lə, “Bə na kkəhə mɨ makə Taa. Bə tə nə̀ kkɨ mɨ, bə tə kkə tɨ Taa.”
20 Jisɔs nə̀ chanyɛɛ biɔŋ biŋ nɨ yu nə̀ tɨfiəə bənɨ mbaŋ wu tsɔŋ yi bintɔfiɛ ntɨŋ, gwɨgwɨ fə dɨ wu bə́ nə̀ ba bə́ kɨ nya kpə. Bəmanɨ, miɨ jikə kwekɛhɛ yu ndzɨ tsa yihi nə̀ bambi kə kwətsə.
Jisɔs donchɛ lə yu fɔ nə bɔ́
21 Jisɔs chi tədiə bə bɔ lə, “Njiwa ŋgəŋ, bə jiba ɨ bə shə nɔŋ mɨ sɨŋ sɨŋ ba kkpə bubiə bwɛnɨ ntɨŋ. Dɨ wu nna ŋgɨntɨ, naji ɨ bə ba mɨ kə.” 22 Bəju bi lə, “Yu jiwa ɨ yu kkpɨsɨ gwɨ yihi maa, nɨ yu na tɨdi lə dɨ wu yu na gɨntɨ naji ɨ kə ba mɨ kə?” 23 Jisɔs tə bə bɔ lə, “Bə fɔ nə sɛŋ koso, mɨ mfɔ fiɛŋ nə bɔ́. Bə na ji bənɨ bə mbi no lə. Nna njimiɛhɛ miɨ wu mbi no. 24 Ntə bəŋ lə bə kkpɨ məmbiə mɛnɨ ntɨŋ. Bə kɨ kkɨ lə bə jiba ɨ bə ná kkpə məmbiə mɛnɨ ntɨŋ jilə bə kə bɨmiə lə na mɨ yu wa.” 25 Bɔ bi bə yu lə, “Na wə yəŋ?” Jisɔs chi lə, “Nna nji miɨ wu nnə̀ mba wa ŋgəŋ ŋkɨ ntɨdi bə bəŋ tsukɔ yu wɨ dze nə mbɛyɛ bɨŋ. 26 Nna ŋkeŋkɛ biɔŋ kɨyɛŋ bi naji nchanyɛ tsukɔ bəŋ wɨ bə biɔŋ kɨyɛŋ bi naji nsa bəŋ bi wɨ. Miɨ wu faŋə mɨ na miɨ wu kɨyɛyi. Fiɔŋ fi nna ntɨdi bə mbi na fi mɨ ŋ'wɔɔ nə yu lɨ.” 27 Lə yu tə manɨ, bɔ jikə kkə lə yu na chanyɛ bə bɔ ji tsukɔ Tɨɨ wɨ. 28 Bəma Jisɔs tə bə bɔ lə, “Tsa yi bə tiyɛ Wɛŋ wu Miɨ bɔ́, ɨ bə tə kkə lə na mɨ yu wa ba kkə tɨ lə mfɨtəhə fiɔŋ fidɔ nə buŋga bwɛŋ ntɨŋ, lə nna nchanyɛ mɛ ɨji nɨ Taa tɨfiə mɨ. 29 Miɨ wu faŋə mɨ na ji bə mɨ. Yu kə tɔkaŋ nə mɨ wɨ lə ŋkɨ nji mɨ wumbɔŋ, ndzɨ mba ŋkɨ mfɨtɨ fiɔŋ tsá chi ɨji fi ndzeŋe yu lɨ.” 30 Lə Jisɔs chanyɛ biɔŋ biŋ mɛ, bənɨ kɨyɛŋ ga shəŋ yu wɨ.
Kɨyɛyi na fosɔ bənɨ nə buŋfia ntɨŋ
31 Jisɔs tə fɛŋ bə Bəju bə nə̀ galə shəŋ yu wɨ lə, “Ɨ bə kətə kɨ lɨmi kwa diɛ yɛmɨ bɨŋ, ɨ bə kɨ ji bənɨ bɛmɨ bə nɨŋ'ə bə yɛyi, 32 ɨ bə tə kkə kɨyɛyi, ɨ kɨyɛyi ka fə ɨ bə fɔ nə buŋfia ntɨŋ.” 33 Bɔ chi bə yu lə, “Kə na ji kɨtsɔŋ kɨ Ablaham lə, kə kə saa ba jiŋ buŋfia ntɨŋ miɨ wudɔ kaŋ. Ə fə la lə wə kɨ tɨdi lə kə jiba kə fɔ nə buŋfia ntɨŋ?”
34 Jisɔs chi bə bɔ lə, “Ntə bəŋ yɛyi yɛyi lə miɨ chi wu na fɨtɨ bubiə na mfia wu bubiə. 35 Mfia kətəhə miɨ tsɔŋ tsá chi kə. Na wɛŋ wu chɛ tsɔŋ wa wu ba yu kətə tsɔŋ ya ntɨŋ tsá chi. 36 Bəma, ɨ Wɛŋ foso bəŋ nə buŋfia ntɨŋ, tə bə' fɔ nə bu ntɨŋ yɛyi lɨ. 37 Nna ŋkkɨ ŋgbooŋ lə bə na ji ŋkɨkɨ wu Ablaham, bəmanɨ bə se kwa lə bə kkpɨsɨ mɨ ndzɨ diɛ yɛmɨ na keŋkɛhɛ tɨmo shi bəŋ ntɨŋ. 38 Nna nchanyɛ ji fiɔŋ fi mɨ' ŋəŋə nə Taa lɨ, bə fɨtɨ fiɛnɨ ji fiɔŋ fi bə' wɔɔ nə chaa wɛnɨ lɨ.”
39 Bɔ chi bə yu lə, “Taa waha na Ablaham.” Jisɔs tə bə bɔ lə, “Bə tə sə ji beŋ bə Ablaham lə, bə tə kɨ fɨtɨ ji fiɔŋ fi Ablaham nə̀ fɨtɨ. 40 Nna nji miɨ wu' tədiə bəŋ kɨyɛyi kɨ mɨ ŋ'wɔɔ nə Nyɔ lɨ. Bəmanɨ, fɛŋ bə se ba lə bə kkpɨsɨ mɨ, fiŋfi na jimiɛhɛ fiɔŋ fi Ablaham nə̀ fɨtɨ. 41 Bə na fɨtɨ ji fiɔŋ fi chaa wɛnɨ nə̀ fɨtɨ.” Bɔ tə bə yu lə, “Kə na jimiɛhɛ beŋ bə bə́' bɛyɛ koso. Kə na keŋkɛ Taa waha miu, ɨji Nyɔ.” 42 Jisɔs tə bə bɔ lə, “Ɨ Nyɔ tə na ji chaa wɛnɨ, bə tə bɨŋ ba laŋ mɨ, ndzɨ mɨ mfɔ ji nə fə Nyɔ ku ba tə ba lɨ. Ŋkə mbaha buŋga bwɛmɨ lɨ. Ə faŋ yu mɨ. 43 Bə na wokɔhɔ fiɔŋ fi nna nchanyɛ ndzɨ la? Na ndzɨ bə na nɨnntɨ ŋ'wɔ diɛ yɛmɨ. 44 Bə na ji beŋ bə chaa wɛnɨ Satan lə, fiɔŋ fi bə na laŋkɨ na bə mfə yi fiɔŋ fi chaa wɛnɨ na laŋkɨ. Yu nə̀ ji miɨ wu nə̀ kkpɨshə bənɨ dze nə mbɛyɛ bɨŋ. Yu na keŋkɛhɛ fiɔŋ fi fənə bə kɨyɛyi, ndzɨ kɨyɛyi na sɨŋ yu wɨ. Tsa yi yu na tɨdi dyɛ, yu ba yu kɨ chanyɛ diəŋ nɨ fiə wuhu ji, ndzɨ yu na ji miɨ wu dyɛ, yu ji chɛ dyɛ. 45 Bəmanɨ, nna ntɨdi fiɛŋ ji kɨyɛyi, na fiɔŋ fi bə kə bɨmiə bə mɨ. 46 Na yəŋ nə bəŋ ntɨŋ wu naji ɨ yu donchɛ bubiə bu mɨ mfəə? Nɨ fiɔŋ fi nna ntɨdi bə bəŋ na yɛyi, ə fə la lə bə jikə bɨmiə bə mɨ? 47 Miɨ wu na ji miɨ wu Nyɔ ba yu kɨ woko diɛ yi Nyɔ. Fiɔŋ fi bə na wokɔhɔ diɛ yi Nyɔ na ndzɨ bə na jimiɛhɛ bənɨ bə Nyɔ lə.”
Ablaham bə Jisɔs
48 Bəju bi bə Jisɔs lə, “Kə sə kə tədiə yɛyi lə wə na ji mɛ wə ji miɨ wu Samaliya, tsə ji wə wɨ?” 49 Jisɔs chi bə bɔ lə, “Tsə na sɨŋ mɨ wɨ. Nna ŋkuntə fiɛŋ Taa, bəmanɨ bə jikə kuntə mɨ. 50 Fi na jimiɛhɛ lə nna nnoŋko yɨ wubəŋ gwɨ yɛmɨ lɨ. Miɨ wa su miu wu na se kɨŋkuntə, ɨji yu wu na kɨmbɨ bənsa.
51 Ntə bəŋ yɛyi yɛyi lə ɨ miɨ na woko diɛ yɛmɨ, ɨ yu jikə muŋkɔ kkpə.” 52 Bəju tə bə yu lə, “Kə kkə fɛŋ lə tsə na ji wə wɨ. Ablaham nə̀ kkpə, bənɨ bə shɔŋ yi Nyɔ lə kkpəyɛ tɨ, wə kɨ tɨdi lə, ‘Ɨ miɨ na woko diɛ yɛmɨ, ɨ yu jikə muŋkɔ kkpə.’ 53 Wə na yakɨ taa waha Ablaham wu nə̀ kkpə, wə yakɨ tɨ bənɨ bə shɔŋ yi Nyɔ lə bə nə̀ kkpəyɛ ba? Wə na gɔmbiɛ lə wə na ji la?” 54 Jisɔs chi lə, “Jilə nna mbəndɨsɨ gwɨ yɛmɨ, tə na kɨlɔlɔ. Na Taa wu ba yu kɨ bəndɨsɨ mɨ, ɨji yu wu bə na tɨdi lə na Nyɔ wɛnɨ, 55 bəmanɨ bə ji yu kə kkə. Na kwa mɨ wu na kkɨ yu. Ntə lə nna ŋkkəhə yu, tə nna nji tɨ miɨ wu dyɛ nɨ bəŋ. Bəmanɨ, nɨ fi na ji, nna ŋkkɨ yu, ŋ'woko diɛ yihi. 56 Chaa wɛnɨ Ablaham nə̀ laŋkɨ lə yu ná ŋɨntɨ díɔ yɛmɨ wɨ. Lə yu ŋəŋ, yu kɨ woko buni.” 57 Bəju ba kəmbə shəŋ lə, “Wə kə fɔkɔ tɨmo biya mbaashɨŋ, wə tɨdi lə wə nə̀ ŋəŋ Ablaham wɨ?” 58 Jisɔs chi bə bɔ lə, “Ntə bəŋ yɛyi yɛyi lə, fə Ablaham nə̀ ji, nna nji lɨ.”ª 59 Lə bɔ wɔ manɨ, bɔ dze ta lə bɔ tumiɛ Jisɔs su. Jisɔs nyələ ba fɔ nə mbaŋ wu tsɔŋ yi bintɔfiɛ wa ntɨŋ.